2 Jaꞌ bꞌey sjolom junoj wonan cꞌam steꞌal, jaꞌ tituꞌ che waꞌne a junoj bandera yet jowal. Alwej tet ebꞌ soldado tol chi too ebꞌ yin jowal. Iꞌwej a je kꞌabꞌ yu je txꞌoxon eloj tol chi oc ebꞌ yul spuertail sna ebꞌ mimej yaaw yeoc bꞌey Babilonia.

3 Tuxa jix wawte ebꞌ naj soldado, tuxa jix wakꞌ chejbꞌanile tet ebꞌ naj akꞌom jowal sicꞌbꞌilxa el wu, jaꞌton ebꞌ oj tzala yet oj wakꞌon eyqꞌuey ebꞌ chi jowi oc win yetoj sjowal jin cꞌul, ẍi Jehová.

4 Jex a Babilonia, abꞌwej wal yoc aw bꞌey sjolomlaj wonan tuꞌ. Abꞌwej yoc aw yu ebꞌ conobꞌ, jaꞌton ebꞌ jix syambꞌa oc sbꞌa. Lalan yawi slistail ebꞌ yu Jehová, jaꞌton slistail ebꞌ soldado tol tꞌinan stoo yin jowal.

5 Jaꞌton ebꞌ jix tit bꞌey wan nación caw naat, jaꞌton bꞌey slawubꞌal yul yibꞌankꞌinal tiꞌ. Jaxca tol mitxꞌkꞌabꞌe yet jowal yeoc ebꞌ yu Jehová, yet watxꞌ jaꞌ ebꞌ chi akꞌon lawoj el masanil tzet ey sat xꞌotxꞌ ebꞌ tuꞌ yu sjowal scꞌul.

6 Cꞌuyuyoj ojabꞌ yel je yaw yu xiwcꞌulal, yutol tuxa wal chi jul scꞌual yaontej sjowal scꞌul Jehová je yibꞌan, jaꞌton Naj chi skeꞌ yu masanil. Jaꞌ oj aontej syaꞌilal je yibꞌan.

7 Yu jun tuꞌ xin, masanil ebꞌ ánima oj pax yip yu xiwcꞌulal.

8 Caw oj qꞌueya scꞌul ebꞌ yu cuscꞌulal yetoj syaꞌilal, yet oj jul yibꞌan ebꞌ. Tuxa cꞌal oj ecꞌ txꞌumumoj ebꞌ yabꞌen syaꞌil, jaxca yet chi waꞌxi scꞌul ebꞌ ix ix yu unin. Tuxa cꞌal oj qꞌueya scꞌul ebꞌ soldado yet Babilonia tuꞌ yil-len oc sat, oj cajbꞌoj yili sat ebꞌ yu qꞌuixwilal.

9 Jaꞌ tinaniꞌ, lalan yapni oc scꞌual yet chi jul sjowal scꞌul Jehová, jun cꞌual caw wal eyxa smey, laan jaxca junoj kꞌakꞌ chi nilxi xaj. Oj cancan jun txꞌotxꞌ tiꞌ yin tzꞌinanil, oj lawoj el ebꞌ ánima pena sbꞌeybꞌal caan sat txꞌotxꞌ.

10 Jaꞌ yet tuꞌ, jaꞌ masanil weycan chi koplabꞌi bꞌey satcan, manxa oj yakꞌ sajkꞌinalil. Oj kꞌejbꞌoj el yajan cꞌu yet lalan yaoloj, cꞌamxa cꞌal pax yajan xꞌaaw yet akꞌbꞌalil.

11 Oj yalon Jehová jaxca tiꞌ: Jaꞌ tinaniꞌ, oj waoc syaꞌilal yibꞌan ebꞌ ánima bꞌey yul yibꞌankꞌinal tiꞌ yu spenail chi yun ebꞌ. Oj wiꞌon ey ebꞌ chi yiꞌa can sbꞌa, cꞌal ebꞌ chi smeyne sbꞌa, yetoj ebꞌ cꞌam yeloc apnoj yet animail yul sat.

12 Ian xacꞌal man oj ilcha ebꞌ ánima, jaxca chꞌen oro yet Ofir tol yel xacꞌal watxꞌ, tol man comonoj chi ilcha ocoj.

13 Jain Jehová jin tiꞌ tol chi skeꞌ wu masanil, oj jin tzicoꞌtane satcan, jaxa txꞌotxꞌ txꞌotxꞌ, oj bꞌilwoj txꞌotxꞌ bꞌey bꞌatxan ey yu sjowal jin cꞌul. Caw yelcꞌulal oj tit sjowal jin cꞌul yet jun cꞌual tuꞌ.

14 Jaꞌ ebꞌ txꞌoj conobꞌal caan bꞌey Babilonia tuꞌ, laan xacꞌal oj yun ebꞌ jaxca noꞌ scꞌultajil che tol ujtebꞌil ocoj, laan oj yun ebꞌ jaxca junoj bꞌulan noꞌ meꞌ chi sajlemtoj, tol cꞌam yilomal, cꞌamxa mactxequel chi yambꞌan ocoj. Junjun xacꞌal oj tojcan bꞌey sconobꞌ, cꞌal bꞌey xꞌotxꞌ junjun.

15 Yal cꞌal mactxequel oj michꞌcha eyoj, oj tejle cam yetoj chꞌen espada.

16 Tꞌanan wal oc ebꞌ, catuꞌ oj telcꞌotoj ebꞌ, cꞌal smakꞌle cam yuninal ebꞌ bꞌey sat txꞌotxꞌ. Oj ujtele eltej ebꞌ masanil yul-laj sna, catuꞌ oj etnele yistil ebꞌ.

17 Oj watej ebꞌ a Medos yin ebꞌ. Jaꞌ wan ánima tuꞌ cꞌam chi oc tucan ebꞌ yu chꞌen plata cꞌal chꞌen oro cha wakꞌ tet ebꞌ.

18 Oj jul-le cam ebꞌ achꞌe unin yu sjulbꞌal ebꞌ tuꞌ. Cꞌam niꞌoj smimancꞌulal ebꞌ yin ebꞌ unin tol to chi ali, tam wal oj okꞌ scꞌul ebꞌ yin ebꞌ unin.

19 Jaꞌ conobꞌ Babilonia, asanne watxꞌ yili xol wanxa nación. Tol jaꞌ eyoc smeynebꞌailoj Caldeo, jaxca chꞌen chꞌen caw ey stool yeoc ebꞌ. Jain xa Jehová jin tiꞌ oj wakꞌ lawoj ebꞌ jaxca wutenaj ebꞌ a Sodoma cꞌal ebꞌ a Gomorra.

20 Cꞌamxa bꞌakꞌin oj caey ebꞌ ánima tituꞌ junelxa. Cꞌamxa mac oj meltzotej caey yul jun conobꞌ tuꞌ, tam wal ebꞌ Árabe oj caey ecꞌ yetoj sjobꞌbꞌeal noꞌ. Cꞌamxa bꞌakꞌin oj ey bꞌulan noꞌ meꞌ xew tituꞌ.

21 Jaꞌ tituꞌ oj caey ecꞌ noꞌ ooj, oj noel yul-laj na yu noꞌ tonton. Jaxa cꞌal noꞌ avestruz oj eyecꞌ tituꞌ; yetoj cꞌal pax noꞌ xol-laj teꞌal chiw oj ecꞌ tecꞌlabꞌoj noꞌ tituꞌ.

22 Jaꞌ noꞌ ooj, oj okꞌ yul-laj mimej scuartel ebꞌ soldado. Jaꞌ bꞌey yul-laj mimej sdespacho ebꞌ mimej yaaw, jaꞌ tituꞌ oj caey ecꞌ noꞌ mimej ooj. Lalan yapni oc scꞌual yet oj qꞌueycan el conobꞌ Babilonia, caw tuxa chi jul scꞌual, ẍi Jehová.