2 Jix lawi tuꞌ xin, jix poꞌole ecꞌ ebꞌ yakꞌomal xaambꞌal cꞌal ebꞌ Levita yin xolilal yu naj Ezequías, junjun tujan yetoj yopiso: Jaꞌton yin akꞌo tzꞌaꞌ xaambꞌal, cꞌal akꞌo tzꞌaꞌ xaambꞌal yet watxꞌcꞌulal, cꞌal alo yu diosal, cꞌal sbꞌitnele watxꞌ kꞌane tet Jehová, cꞌal steynele spuertail templo. 3 Jix yakꞌon cꞌal pax noꞌ sjobꞌbꞌeal noꞌ naj rey yet chi oc noꞌ yin xaambꞌalil, cꞌal wanxa tzetyetal chi kꞌanle yet chi akꞌle xaambꞌal yet skꞌinibꞌalil, yet yeycꞌualil, yet scꞌual xewilal, yet chi oc kꞌin yet chi ali xꞌaaw, cꞌal yet wanxa kꞌin miman yeloc apnoj, jaxca ye can stzꞌibꞌele yul sley Jehová. 4 Jix yalon cꞌal pax tet masanil ebꞌ ánima caan bꞌey Jerusalén, tol chi yakꞌ scolwal ebꞌ tol tꞌinan cꞌaltaꞌ yakꞌon tet ebꞌ yakꞌomal xaambꞌal, cꞌal tet ebꞌ Levita, yet watxꞌ yelcꞌulal chi yakꞌon servil Jehová ebꞌ jatacꞌalaꞌ yalon ley. 5 Jaꞌ yet jix eltoj jun chejbꞌanile tuꞌ, jix yakꞌon scolwal ebꞌ Israel jatacꞌalaꞌ jantaj wal jix el yin scꞌul ebꞌ; ixim tiriw, yal uva, aceite olivo, noꞌ yal awcabꞌ cꞌal masanil jantaj sat yawo ebꞌ jix syambꞌa ocoj. Yetoj cꞌal pax oj, jix yiꞌontej sdiezmoal masanil yawo ebꞌ. Caw miman jix yakꞌ ebꞌ.

6 Masanil ebꞌ ánima caan bꞌey Jerusalén yetoj cꞌal ebꞌ caan bꞌey wanxa conobꞌ yul yet Judá, jix yiꞌ cꞌaltej sdiezmoal swacax ebꞌ, sdiezmoal smeꞌ ebꞌ, yetoj cꞌal sdiezmoal masanil stzettaj yetal ebꞌ tol yet xa Jehová sDiosal ebꞌ yeocoj. Jun wal miman bꞌulan jix yun sjul scolwal masanil ebꞌ. 7 Jaꞌ yet yox xꞌaaw yul jun abꞌil tuꞌ, jix cꞌoli syambꞌan oc masanil wan scolwal ebꞌ tuꞌ, masantaꞌcꞌal yet jujebꞌ xꞌaaw jix oc tucan yiꞌontej scolwal ebꞌ. 8 Jaꞌ yet jix bꞌet yilon naj Ezequías yetoj cꞌal ebꞌ eyoc yin yaawil yetoj, masanil wan tzetyetal jix yamcha tuꞌ, jix yalon watxꞌ kꞌane ebꞌ tet Dios, cꞌal yibꞌan conobꞌ Israel. 9 Jix lawi tuꞌ, jix skꞌanlen naj Ezequías tet ebꞌ yakꞌomal xaambꞌal, cꞌal tet ebꞌ Levita yu masanil wan tzetyetal jix apni oc bꞌulan tuꞌ. 10 Jaxa naj sat yakꞌomal xaambꞌal chi yij Azarías, yicꞌaal Sadoc, jix takꞌwi naj jaxca tiꞌ: Jatax cꞌal yet jix ẍaꞌon el yich yiꞌontej scolwal ebꞌ yu stemplo Jehová, ey cꞌal cu loꞌbꞌe; caw miman to chi cani. Masanil wan tiꞌ jix yakꞌ can sobra, yutol jaꞌ Jehová, jix yakꞌ syaaxilal yibꞌan sconobꞌ.

11 Yu jun tuꞌ, yuxan jix yal naj Ezequías tol chi waꞌnele scꞌunaꞌil wan saꞌbꞌeal tuꞌ bꞌey templo, bꞌey chi cꞌubꞌale aoj. Jaxa yet jix waꞌxi xin, 12 tzꞌajaji jix yun yaon octoj wan scolwal ebꞌ tuꞌ, cꞌal wan diezmo tuꞌ, jaꞌton masanil tzetyetal jix yiꞌtej ebꞌ ánima, cꞌal masanil tzetyetal tol yet Jehová yeocoj. Jaꞌ jun Levita chi yij Conanías jix oc yilomaloj; jaxa jun yuẍtaj chi yij Simí, jaꞌ jix oc yet scaabꞌ yilomaloj wan tuꞌ. 13 Jaꞌ naj rey Ezequías, yetoj naj sat yakꞌomal xaambꞌal chi yij Azarías, jaꞌ ebꞌ jix aon oc laonwan ebꞌ yet Levitail yin mulnail, jaꞌton ebꞌ tiꞌ: Jehiel, Azazías, Náhat, Asael, Jerimot, Jozabad, Eliel, Ismaquías, Máhat cꞌal Benaías. 14 Jaꞌ naj Coré, scꞌaal Imná yicꞌaal Leví, yaaw yeoc xol ebꞌ chi teynen spuertail templo yetcꞌulal bꞌey chi aol cꞌu. Ey cꞌal pax oc yibꞌan yin ẍaꞌon ofrenda, cꞌal spoꞌon ecꞌ ofrenda chi el yin scꞌul ebꞌ ánima yakꞌoni, cꞌal tzetyetal tol yet Jehová yeocoj. 15 Jaꞌ ebꞌ Levita, jaꞌton: Edén, Miniamín, Jesúa, Semaías, Amarías cꞌal Secanías, jaꞌton ebꞌ jix colwa yetoj naj Coré yin masanil scꞌul, yin spoꞌon ecꞌ ofrenda xol sconobꞌ ebꞌ yakꞌomal xaambꞌal, jatacꞌalaꞌ yeoc junjun tujan ebꞌ, ebꞌ icham ánima cꞌal ebꞌ unin. 16 Jix spoꞌon ecꞌ xol masanil ebꞌ winaj chi jul yil yopiso bꞌey templo yin junjun cꞌu, jatacꞌalaꞌ yeoc ebꞌ yin xolilal, asan ta tol tzꞌibꞌebꞌil sbꞌi ebꞌ xol ebꞌ yicꞌaal Leví, ebꞌ oxebꞌ abꞌil skꞌinal chi bꞌey cꞌaltoj. 17 Jaꞌ sbꞌi ebꞌ yakꞌomal xaambꞌal jatacꞌalaꞌ yeoc xolilal smam icham junjun ebꞌ, cꞌal ebꞌ Levita ey 20 abꞌil skꞌinal chi bꞌey cꞌaltoj, jatacꞌalaꞌ yeoc ebꞌ yin xolilal yilontoj smulnail. 18 Jaꞌ xol wan bꞌie tuꞌ, jaꞌ tituꞌ tzꞌibꞌebꞌilcan ey sbꞌi ebꞌ ix yistil ebꞌ naj, ebꞌ cꞌaale, cꞌal ebꞌ ix cutzꞌine, chi yal yeloc apnoj masanil mactxequel eyoc yalan yopiso ebꞌ. Yin xolilal jix yun spoꞌon ecꞌ wan ofrenda ebꞌ akꞌbꞌil tet Dios. 19 Ey cꞌal pax ebꞌ winaj tol eyoc yibꞌan spoꞌon ecꞌ sgasto ebꞌ yakꞌomal xaambꞌal, cꞌal ebꞌ Levita tol tzꞌibꞌebꞌil sbꞌi xol ebꞌ smam icham ebꞌ, jaꞌton ebꞌ caan yinlaj sconobꞌal ebꞌ yakꞌomal xaambꞌal, yetoj cꞌal bꞌey wanxa conobꞌ.

20 Queytuꞌ jix yute naj rey Ezequías tuꞌ bꞌey masanil yul yet Judá. Jaꞌ masanil tzet jix yun tuꞌ, caw watxꞌ, yutol caw jichan cꞌal sbꞌeybꞌal sattaj Jehová. 21 Masanil tzet jix yun yakꞌon servil bꞌey stemplo Dios, jix yun yin jijemal tet Dios yin masanil scꞌul, jatacꞌalaꞌ yalon ley cꞌal chejbꞌanile. Yu cꞌal jun tuꞌ, yuxan caw watxꞌ cꞌal jix elocoj.