6 Yuxan jix too ebꞌ ẍejabꞌ naj rey yakꞌon an carta bꞌey masanil yul yet Israel cꞌal yul yet Judá, bꞌey chi yal jaxca tiꞌ: Jex ket Israelal, meltzaanwejtej yin Jehová, jaꞌton sDiosal cu mam icham Abraham, Isaac, cꞌal Israel, catuꞌ oj meltzotej Naj ey jex, jaꞌton jaex jix jex elcan yul skꞌabꞌ ebꞌ sreyal Asiria. 7 Man laan oj che yute je bꞌa jaxca ebꞌ cu mam icham, ma jaxca ebꞌ ket Israelal, tol caw pena jix yute sbꞌa ebꞌ tet Jehová, jaꞌton cu Diosal yetoj ebꞌ cu mam icham tuꞌ. Jaꞌ Naj jix aon oc ebꞌ yalan syaꞌtajilal, jaxca ton chi yun kilon tinaniꞌ. 8 Yu jun tuꞌ, manche je yakꞌ cawxo el je naꞌbꞌal jaxca jix yute sbꞌa ebꞌ cu mam icham tuꞌ. Awej oc je bꞌa yul skꞌabꞌ Jehová, catuꞌ che caꞌ waꞌnen yeoc je wa kꞌane yetoj, catuꞌ chex jul bꞌey scalubꞌal sicꞌbꞌil el yu yin junelne. Akꞌwej servil Jehová cu Diosal, yet watxꞌ cꞌamxa chi tit sjowal scꞌul je yin. 9 Ta jaex tiꞌ oj je yaoc je bꞌa yul skꞌabꞌ Jehová, jaꞌ ebꞌ cu cajat jix iꞌontoj ebꞌ ket Israelal, cꞌal ebꞌ je yuninal yin presowomal tuꞌ, oj cusa scꞌul ebꞌ yin ebꞌ, catuꞌ oj jajletej ebꞌ yu ebꞌ bꞌey cu conobꞌ tiꞌ, yutol jaꞌ Jehová cu Diosal, caw chi okꞌ scꞌul, ey scamcꞌulal, man oj jex yintajne can eloj, ta tol oj je yaoc je bꞌa yul skꞌabꞌ, ẍi toj naj rey tuꞌ tet ebꞌ.

10 Queytuꞌ jix yun stoo ebꞌ yakꞌomal servil tuꞌ bꞌey masanil yul-laj yet Efraín, cꞌal yul-laj yet Manasés, jix too cꞌal ebꞌ bꞌey conobꞌlaj, masantaꞌcꞌal jix apni oc ebꞌ bꞌey yul yet Zabulón. Jaxa ebꞌ ánima tuꞌ xin, tucꞌal jix tzee ebꞌ, cꞌal sbꞌuchwa ebꞌ yin ebꞌ ẍejabꞌ naj rey tuꞌ. 11 Ey cꞌaltaꞌ jaywanoj ebꞌ xol ebꞌ yicꞌaal Aser, ebꞌ yet Manasés, cꞌal ebꞌ yet Zabulón jix yiꞌey sbꞌa ebꞌ tet Dios, jix tit ebꞌ bꞌey Jerusalén. 12 Jaꞌ Dios jix akꞌon yun ebꞌ ánima bꞌey Judá yet chi sjijen jun chejbꞌanile ebꞌ jix yal naj rey tuꞌ, yetoj cꞌal ebꞌ eyoc yin yaawilal yetoj, jatacꞌalaꞌ tzet jix yun yalon Jehová.

13 Queytuꞌ jix yun syamchan oc sbꞌa jun miman bꞌulan ebꞌ ánima bꞌey Jerusalén yin yet scaabꞌ xꞌaaw, yin yaon oc kꞌin ebꞌ yet ixim pan cꞌam yich. 14 Yin sbꞌabꞌelal jix yiꞌel masanil wan yet xaambꞌal ebꞌ cꞌal wan bꞌey chi akꞌle tzꞌaꞌ incienso tet comon dios bꞌey Jerusalén tuꞌ. Jix skꞌojon can eytoj ebꞌ bꞌey sjobꞌeal Cedrón. 15 Jaꞌ yet 14 yoc yet scaabꞌ xꞌaaw tuꞌ, jix makꞌon cam noꞌ achꞌe meꞌ yet kꞌin Pascua ebꞌ.

Jaꞌ ebꞌ yakꞌomal xaambꞌal cꞌal ebꞌ Levita, tuxa cꞌal jix qꞌuixwi a ebꞌ, yu jun tuꞌ, yuxan jix sajbꞌane sbꞌa ebꞌ, jatacꞌalaꞌ yalon ley. Jix yiꞌontoj noꞌ xaambꞌal ebꞌ chi tzꞌaꞌ bꞌey stemplo Jehová. 16 Queytuꞌ jix yun yoc ebꞌ yin yopiso junelxa, jatacꞌalaꞌ yalon sley Moisés, naj ẍejabꞌ Dios. Jaꞌ ebꞌ yakꞌomal xaambꞌal jix secon ey ẍiqꞌuil noꞌ xaambꞌal jix yakꞌ ebꞌ yet Levitail ebꞌ tuꞌ. 17 Yutol ecꞌal to ebꞌ ánima xol conobꞌ tuꞌ cꞌam tocꞌal chi sajbꞌane sbꞌa; sowalil jix smakꞌ cam noꞌ noꞌ ebꞌ Levita tuꞌ yin xaambꞌalil yu ebꞌ cꞌamto chi sajbꞌane sbꞌa tuꞌ, yet watxꞌ chi oc yopiso noꞌ yet jun kꞌin tuꞌ. 18-19 Ey cꞌal pax jun miman bꞌulan ebꞌ ánima yin yicꞌaal Efraín, yin yet Manasés, yin yet Isacar, cꞌal yin yet Zabulón, jaꞌton ebꞌ tuꞌ jix ẍaꞌ sloꞌbꞌe yin noꞌ xaambꞌal yet jun kꞌin jix oc tuꞌ, yutol man jaxca oj tuꞌ ye stzꞌibꞌelecan yul an juun, yutol ma sajbꞌane sbꞌa ebꞌ jaxca yalon ley. Yuxan jix txali naj rey Ezequías tet Jehová yu ebꞌ, jix yalon jaxca tiꞌ: Jaach Jehová, cu Diosal jaach yetoj ebꞌ kichmam, tol miman ja camcꞌulal. Akꞌ mimancꞌulal yin spenail mactxequel chi el yin scꞌul yalon sbꞌa ey jaach, caxcꞌal mi ma sajbꞌane sbꞌa ebꞌ, jatacꞌalaꞌ yalon sleyal snail ja kꞌane, ẍi naj.

20 Jix abꞌle xa naj rey Ezequías yu Jehová, yuxan jix yakꞌ mimancꞌulal yibꞌan spenail ebꞌ conobꞌ tuꞌ. 21 Ey jujebꞌ cꞌual jix eecꞌ ebꞌ Israel tuꞌ bꞌey Jerusalén, yin tzalacꞌulal jix yun yaon oc kꞌin ebꞌ yetoj ixim pan cꞌam yich. Jaxa ebꞌ yakꞌomal xaambꞌal cꞌal yetoj ebꞌ Levita, junjun cꞌal cꞌu chi bꞌitni ebꞌ yu yalon watxꞌ kꞌane ebꞌ tet Jehová, yetoj masanil wan mitxꞌkꞌabꞌe tol yet Jehová yeocoj. 22 Jaxa naj rey Ezequías xin, jix yal yu diosalil tet ebꞌ Levita, yu xꞌoxon el sjelanil ebꞌ yin yakꞌon servil Jehová ebꞌ. Yin jujebꞌ cꞌual jix low ebꞌ, jix yakꞌon xaambꞌal ebꞌ yet watxꞌcꞌulal, cꞌal yalon watxꞌ kꞌane ebꞌ tet Jehová, jaꞌton sDiosal ebꞌ yetoj smam icham. 23 Jix lawi tuꞌ, jix yalon masanil ebꞌ conobꞌ, tol chi yaoc jujebꞌojxa cꞌual kꞌin ebꞌ. Caw yin tzalacꞌulal jix yun yaon oc jun kꞌin tuꞌ ebꞌ. 24 Jaꞌ naj Ezequías sreyal Judá jix saꞌ jun 1,000 noꞌ achꞌe wacax tet ebꞌ, yetoj 7,000 noꞌ meꞌ tet ebꞌ conobꞌ tuꞌ. Jaxa masanil ebꞌ yaaw bꞌey junjun conobꞌ, jix saꞌ jun 1,000 noꞌ achꞌe wacax yetoj 10,000 noꞌ meꞌ ebꞌ. Caw ecꞌal ebꞌ yakꞌomal xaambꞌal jix sajbꞌane sbꞌa yet tuꞌ. 25 Masanil ebꞌ ánima a Judá, cꞌal pax ebꞌ yakꞌomal xaambꞌal, cꞌal masanil ebꞌ Levita, masanil ebꞌ jix tit bꞌey Israel, yetoj masanil ebꞌ txꞌoj conobꞌal jix eyecꞌ bꞌey yul yet Israel, cꞌal ebꞌ caan bꞌey yul yet Judá, caw jix tzala ebꞌ sicꞌlebꞌil. 26 Manxa jantajoj tzalacꞌulal jix oc bꞌey Jerusalén yu ebꞌ, yutol yet tax stiempoal naj rey Salomón, scꞌaal naj David sreyal Israel, cꞌam tocꞌal bꞌey jix oc junoj kꞌin jaxca jun jix yun ebꞌ bꞌey Jerusalén tuꞌ. 27 Jix lawi tuꞌ, jix a linan ebꞌ yakꞌomal xaambꞌal cꞌal ebꞌ Levita yin skꞌanon swatxꞌcꞌulal Jehová ebꞌ yibꞌan ebꞌ conobꞌ. Jix abꞌle tacꞌal xa ebꞌ tuꞌ bꞌey satcan, jaꞌton bꞌey eyecꞌ Dios.