3 Jaꞌ naj Salmanasar, sreyal Asiria jix yakꞌ jowal yetoj naj Oseas tuꞌ. Jaꞌ jun tiꞌ jix oc yakꞌomal servilal cꞌal yakꞌon stoolabꞌal tet naj. 4 Jaxa jix yun xin, ey jun cꞌual jix sbꞌej naj Oseas yakꞌon chꞌen toolabꞌal tuꞌ yin junjun abꞌil, jix yaontoj ẍejabꞌ naj bꞌey naj So, sreyal conobꞌ Egipto yu chi colwa yetoj naj, yet chi eltej naj yalan ẍejbꞌanil naj sreyal Siria tuꞌ. Yu cꞌal jun tuꞌ, yuxan jix yal naj rey Salmanasar tol chi iꞌletoj naj Oseas tuꞌ preso. 5 Jix lawi tuꞌ, jix oc cꞌal ian naj smajbꞌan oc sbꞌa yibꞌan masanil yul yet Israel, jix yakꞌon jowal naj yin conobꞌ Samaria, oxebꞌ abꞌil jix smajbꞌa oc sbꞌa ebꞌ yakꞌon jowal yin. 6 Jaxa jix yun xin, yet bꞌalonebꞌxa abꞌil yoc naj Oseas yin reyal, jaꞌ yet tuꞌ jix eyqꞌuey xacꞌal conobꞌ Samaria yu naj Salmanasar tuꞌ. Queytuꞌ jix yun yiꞌletoj masanil ebꞌ Israel yin presowomal yu naj. Jaꞌ tituꞌ jix eecꞌ ebꞌ yu bꞌey conobꞌ Halah yul yet Habor bꞌey stiꞌ jaꞌ Gozán, cꞌal bꞌey yul-laj sconobꞌal ebꞌ a Medos.

7 Queytuꞌ jix yun sjul jun tiꞌ yibꞌan ebꞌ Israel tuꞌ, yutol caw jix yaoc spenail ebꞌ sattaj Jehová sDiosal, Naj jix iꞌon eltej ebꞌ bꞌey conobꞌ Egipto, yet jix col-le el ebꞌ yul skꞌabꞌ naj sreyal Egipto tuꞌ, jix oc pax ebꞌ yin eyilal tet wan comon dios. 8 Jix sbꞌeybꞌalne sbꞌeybꞌal wan nación jix iꞌle el sattaj ebꞌ yu Jehová, cꞌal wan bꞌeybꞌale jix sbꞌeybꞌalne jaywan ebꞌ sreyal ebꞌ.

9 Yin ewantajil jix yun ebꞌ Israel wan tzetyetal man watxꞌoj sattaj Jehová, jix swaꞌnen a wan pat na yet eyilal bꞌey wan wonan naat eya bꞌey junjun mimej conobꞌ, yetoj cꞌal bꞌey junjun cuartel bꞌey chi cu ecꞌ eltoj yul junjun conobꞌ. 10 Jix swaꞌne cꞌal pax wan chꞌen chꞌen ebꞌ tol yaꞌ yili yetoj teꞌ teꞌ chi txꞌoxon jun sdiosal ebꞌ chi yij Aserá bꞌey tzalquiltaj cꞌal bꞌey yichlaj teꞌ teꞌ yaax xaj. 11 Jaꞌ tituꞌ jix yakꞌ tzꞌaꞌ incienso ebꞌ jaxca sbꞌeybꞌal wan nación jix yiꞌel Jehová sattaj ebꞌ. Jix xꞌemtej sjowal scꞌul Jehová ebꞌ yu spenail jix el yunen ebꞌ tuꞌ. 12 Jix oc ebꞌ yin eyilal tet wan echele, jaꞌton wan jix yal Jehová tol cꞌam chi oc ebꞌ yin eyilal tet.

13 Jix yatej Jehová ebꞌ ẍejabꞌ yu yalon tet ebꞌ Israel cꞌal tet ebꞌ a Judá, yet jix al-le tet ebꞌ jaxca tiꞌ: Snaꞌ ojabꞌ sbꞌa je cꞌul yin masanil je pena bꞌeybꞌal, catuꞌ che jijen masanil chejbꞌanile, yetoj ley cꞌal masanil cuybꞌanile jix wakꞌcan tet ebꞌ je yichmam, jacꞌalaꞌ lalan cꞌal yalon pax ebꞌ jin chejabꞌ ey jex, ẍi Dios, ẍi ebꞌ. 14 Caw ma ẍaꞌ yabꞌ niꞌoj ebꞌ tzet jix al-lei, caw pit jix yute snaꞌbꞌal ebꞌ jaxca smam icham ebꞌ, yutol ma yaoc Jehová sDiosal ebꞌ yipoj scꞌul. 15 Jix yintajne el ley cꞌal wa kꞌane ebꞌ jix swaꞌne Jehová yetoj yichmam ebꞌ, cꞌal chejbꞌanile jix al-le tet yichmam ebꞌ tuꞌ, yetoj cꞌal pax oj, tol jix oc cꞌal tzajan ebꞌ yintaj wan comon dios tol cꞌam niꞌoj yeloc apnoj. Jaꞌ yu wan tuꞌ, yuxan cꞌamxa niꞌoj yeloc apnoj ebꞌ, jaxa cꞌal spena sbꞌeybꞌal wanxa nación jix sbꞌeybꞌalne ebꞌ, wan tol ey sowalil yu Jehová tol cꞌam chi skeꞌ sbꞌeybꞌalne ebꞌ. 16 Jix sbꞌejoncan masanil chejbꞌanile yet Jehová Dios ebꞌ, jix swaꞌnen a caabꞌ yechel wacax ebꞌ yul smolteal tol oro cꞌal eloj. Ey cꞌal pax jun teꞌ kꞌoo yechel ix Aserá bꞌey jix oc ebꞌ yin eyilal, catuꞌ jix oc pax ebꞌ yin eyilal tet masanil tzejtebꞌal ey bꞌey satcan, yetoj tet Baal. 17 Jix yakꞌon tzꞌaꞌ yuninal ebꞌ yin xaambꞌal tet comon dios, jix skꞌanlen snaꞌbꞌal ebꞌ tet ebꞌ naꞌom el kꞌane yaloni, cꞌal tet ebꞌ atxum. Jix oc xacꞌal ian yaontoj sbꞌa ebꞌ xol spenail, queytuꞌ jix yun xꞌemontej sjowal scꞌul Jehová ebꞌ yibꞌan.

18 Yu cꞌal jun tuꞌ, yuxan caw jix tit sjowal scꞌul Jehová yin conobꞌ Israel, yuxan jix intajnele can el ebꞌ yu. Asanxane ebꞌ yicꞌaal Judá ma chaꞌ iꞌletoj ebꞌ jaxca presowomal. 19 Ma cꞌal pax sjije ẍejbꞌanil Jehová Dios ebꞌ a Judá tuꞌ. Jaꞌ jun jix yun ebꞌ, tol jix sbꞌeybꞌalne ebꞌ jaxca wal tzet jix sbꞌeybꞌalne ebꞌ Israel. 20 Yu tuꞌ xin, masanil ebꞌ yicꞌaal Israel jix intajnele can el yu Jehová, yuxan jix akꞌle eyqꞌuey ebꞌ, jix ale oc ebꞌ yul skꞌabꞌ ebꞌ txꞌoj conobꞌal yet jix yuchon lawoj ebꞌ masantaꞌcꞌal jix iꞌle el ebꞌ sattaj Naj. 21 Jaꞌ Jehová jix poꞌon el ebꞌ Israel tuꞌ yintaj ebꞌ yicꞌaal David. Jaꞌ tiꞌ yet ebꞌ tol jix yaoc Jeroboam scꞌaal Nabat yin sreyaloj ebꞌ, jaꞌton wal jun tuꞌ jix iꞌon el snaꞌbꞌal ebꞌ yin Jehová, yel xacꞌal miman spenail ebꞌ jix yaocoj. 22 Pilan cꞌal jix sbꞌeybꞌalne ebꞌ Israel jaxca spenail jix yun naj Jeroboam. 23 Yu jun tuꞌ, yuxan jix intajnele can el ebꞌ Israel tuꞌ yu Jehová, jaxca jix yun yalon can ebꞌ ẍejabꞌ. Yuxan jix iꞌle cantoj ebꞌ Israel yin presowomal bꞌey conobꞌ Asiria, jaꞌton tituꞌ eyecꞌ ebꞌ masantaꞌcꞌal tinaniꞌ.

24 Jaꞌ naj sreyal Asiria jix iꞌontej ebꞌ ánima eyecꞌ bꞌey wan conobꞌ tuꞌ: Jaꞌton bꞌey Babilonia, bꞌey Cuta, bꞌey Avá, bꞌey Hamat, cꞌal bꞌey Sefarvaim. Jaꞌton ebꞌ tuꞌ jix caey ecꞌ yul yet Samaria sqꞌuexeloj ebꞌ Israel. Queytuꞌ jix yun scaey ecꞌ wan ánima tuꞌ bꞌey conobꞌlaj yul yet Samaria. 25 Yutol jaꞌ ebꞌ ánima jix jul caey tituꞌ cꞌam cꞌaltaꞌ chi oc ebꞌ yin eyilal tet Jehová, yu jun tuꞌ, jix aletoj wan noꞌ bꞌalam xol ebꞌ yu Jehová, ey jaywan ebꞌ jix cam yu noꞌ. 26 Yu tuꞌ xin, jix al-le tet naj sreyal Asiria jaxca tiꞌ: Tol jaꞌ ebꞌ ánima jix ja watoj caey bꞌey Samaria, man yotaj oj ebꞌ chi oc yin eyilal tet sDiosal jun conobꞌ tuꞌ, yuxan jaꞌ Dios tuꞌ jix aontoj noꞌ bꞌalam xol ebꞌ, catuꞌ chi makꞌle cam ebꞌ yu noꞌ, ẍi ebꞌ tet naj.

27 Jaꞌ yet jix yabꞌen oc naj sreyal Asiria tuꞌ, jix yalon naj tet junoj ebꞌ yakꞌomal xaambꞌal iꞌbꞌiltoj yin presowomal tuꞌ, tol chi too caey tituꞌ, catuꞌ chi cuyle ebꞌ ánima tuꞌ yu, tzet chi yun yoc ebꞌ yin eyilal tet sDiosal jun conobꞌ tuꞌ.

28 Yuxan jix tit junoj ebꞌ yakꞌomal xaambꞌal a Samaria tuꞌ, ebꞌ tol iꞌbꞌiltoj jaxca presowomal tituꞌ. Jaꞌ bꞌey conobꞌ Betel jix caey ecꞌoj, jix ijbꞌale ebꞌ ánima tuꞌ yu, cꞌal tzet chi yun yoc ebꞌ yin eyilal tet Jehová. 29 Jal pax junjun wan conobꞌ tuꞌ xin, tol jix swaꞌne sdiosal ebꞌ yul yet bꞌey junjun conobꞌ bꞌey jix caey ecꞌoj. Jix swaꞌnen a snail sdiosal ebꞌ bꞌey wan tzalanlaj bꞌey waꞌnebꞌiltaꞌ a yu ebꞌ a Samaria. 30 Jaꞌ ebꞌ a Babilonia jix swaꞌne yechel sdiosal ebꞌ chi yij Sucot-benot. Jaxa ebꞌ a conobꞌ Cuta jix swaꞌne ebꞌ yechel Nergal; jaxa ebꞌ a Hamat jix swaꞌne yechel Asimá ebꞌ. 31 Jaxa ebꞌ a conobꞌ Avá jix swaꞌne yechel Nibhaz ebꞌ, yetoj yechel Tartac. Jal pax ebꞌ a conobꞌ Sefarvaim jix yakꞌ tzꞌaꞌ yuninal ebꞌ yin xaambꞌal tet yechel sdiosal chi yij Adramélec cꞌal tet Anamélec, jaꞌton wan tuꞌ sdiosal ebꞌ conobꞌ tuꞌ. 32 Catuꞌ chi oc pax ebꞌ yin eyilal tet Jehová yalbꞌanil. Jix yaon cꞌal pax oc wan yet conobꞌ ebꞌ yin yakꞌomaloj xaambꞌal yet chi oc ebꞌ yin eyilal tet sdiosal bꞌey wan pat na eya bꞌey wan tzalan tuꞌ. 33 Caxcꞌal mi chi oc ebꞌ yin eyilal tet Jehová yaloni, jacꞌalaꞌ yoc ebꞌ yin eyilal tet comon dios, jaxca cꞌaltaꞌ sbꞌeybꞌal ebꞌ ánima bꞌey titnaj ebꞌ.

34 Chi tocꞌal sbꞌeybꞌalne ebꞌ tinaniꞌ jaxca cꞌal sbꞌeybꞌal ebꞌ yet peyxa tuꞌ. Cꞌam chi oc ebꞌ yin eyilal tet Jehová, tam wal chi yoche ebꞌ chi sjije chejbꞌanile cꞌal ley jix yakꞌ Jehová tol sowalil chi sjije ebꞌ yicꞌaal Jacob, jaꞌton naj jix akꞌle yij sbꞌi Israel. 35 Jaꞌ yet jix swaꞌnen jun swa kꞌane Jehová yetoj ebꞌ, jix yalon can jaxca tiꞌ: Manche jex oc yin eyilal tet wanojxa comon dios, tam wal je yakꞌon servil yin je yakꞌon je xaambꞌal tet wan tuꞌ. 36 Yutol asanne ey jin, jatuꞌ chex oc yin eyilal, yutol jain jix jex wiꞌeltej bꞌey conobꞌ Egipto yetoj wipalil, yuxan asan wal ey jin sowalil chex oc yin eyilal, asan ey jin che yakꞌ cꞌal pax je xaambꞌal. 37 Yetoj cꞌal pax oj, tol che jije masanil jin ley, jin chejbꞌanil, cꞌal cuybꞌanile tol tzꞌibꞌebꞌilcanoj. Cꞌam cꞌal chex oc yin eyilal tet wan comon dios. 38 Cꞌam ojabꞌ chi too qꞌueycꞌulal jun jin wa kꞌane chin waꞌne can je yetoj tiꞌ. Cꞌam cꞌal chex oc yin eyilal tet wan comon dios, 39 yutol asanne jin Jehová jin tiꞌ je Diosal jin, catuꞌ oj jex jin colon el yul skꞌabꞌ ebꞌ je cajat, ẍi Jehová.

40-41 Jaxa jix yun ebꞌ xin, caw ma cꞌaltaꞌ ẍaꞌ yabꞌ niꞌoj ebꞌ tzet jix yal Jehová. Jaꞌ jun jix yun ebꞌ, tol jix sbꞌeybꞌalne cꞌaltaꞌ sbꞌeybꞌal ebꞌ yet yalantoj. Caxcꞌal mi chi oc ebꞌ yin eyilal tet Jehová yaloni, jacꞌalaꞌ cꞌal yoc pax ebꞌ yin eyilal tet comon dios. Jacꞌalaꞌ pax yicꞌaal ebꞌ jix sbꞌeybꞌalne ebꞌ jaxca sbꞌeybꞌal yichmam, jacꞌalaꞌ cꞌal sbꞌeybꞌal ebꞌ tinaniꞌ.