2 Watxꞌ cꞌal tzet jix yun naj Jotam sattaj Jehová jaxca sbꞌeybꞌal smam, jaꞌton Uzías. Ma octoj naj yul stemplo Jehová yu yakꞌon tzꞌaꞌ incienso, jaxca jix yute sbꞌa smam. Jal pax ebꞌ conobꞌ xin, jix sbꞌeybꞌalne cꞌal pena bꞌeybꞌale ebꞌ. 3 Jaꞌ naj Jotam tuꞌ, jix swaꞌne a jun spuertail templo bꞌey yibꞌan atoj, ecꞌal tzet jix swaꞌne a bꞌey yibꞌan smuroal conobꞌ Ófel bꞌey mujbꞌil el jun jobꞌe. 4 Jix swaꞌne cꞌal pax a wan mimej conobꞌ bꞌey txꞌotxꞌ tzalquiltaj txꞌotxꞌ yul yet Judá, yetoj wan snail bꞌey chi steyne ebꞌ soldado bꞌey xol-laj teꞌ. 5 Jix yakꞌ cꞌal jowal yetoj ebꞌ Amonita; jix eyqꞌuey ebꞌ tuꞌ yu naj. Jaꞌ yet jun abꞌil tuꞌ, jix yakꞌ stoolabꞌal ebꞌ Amonita tet naj. Jix yakꞌ 75 quintal chꞌen plata ebꞌ, yetoj 37,000 quintal ixim tiriw, jacꞌalaꞌ quey cꞌal pax tuꞌ ixim cebada jix yakꞌ ebꞌ. Oxebꞌ abꞌil jix yun ebꞌ jaxca tuꞌ.

6 Caw jix bꞌinale naj rey Jotam tuꞌ, yutol caw watxꞌ sbꞌeybꞌal sattaj Jehová. 7 Jaꞌ jantaj to skꞌaneal naj rey Jotam tuꞌ, cꞌal tzet jix yun naj, yetoj cꞌal tzet jix yun yakꞌon jowal, jatuꞌ tzꞌibꞌebꞌilcan yul an yuunal skꞌaneal yet ebꞌ sreyal Israel cꞌal Judá.

8 Ey 25 abꞌil skꞌinal naj Jotam yet jix oc yin reyal. Ey 16 abꞌil jix yakꞌ reyal bꞌey conobꞌ Jerusalén. 9 Jaꞌ yet jix cami, jix mujle bꞌey mujan ebꞌ smam icham bꞌey sconobꞌ David. Jix lawi tuꞌ, jaꞌ jun scꞌaal chi yij Ahaz, jix oc can sqꞌuexeloj yin reyal.