3 Jaꞌ yet 16 abꞌil skꞌinal naj Uzías tuꞌ, jix ẍaꞌon el yich yakꞌon reyal. Ey 52 abꞌil jix yakꞌ reyal bꞌey Jerusalén. Jaꞌ xutx chi yij Jecolías, a Jerusalén ix.

4 Watxꞌ cꞌal masanil tzet jix yun Uzías tuꞌ sattaj Jehová, jaxca jix yun Amasías, jaꞌton smam. 5 Jix yaoc snaꞌbꞌal yin Dios, yajbꞌan iquisto ecꞌ naj Zacarías, naj chi aon oc snaꞌbꞌal yin yet Dios, caw jijem jix yute sbꞌa tet Jehová, watxꞌ cꞌal jix yun yeloc naj yu Jehová.

6 Jaꞌ naj Uzías tuꞌ, jix too naj yetoj ebꞌ soldado yu yakꞌon jowal yetoj ebꞌ Filisteo, jix yuch lawoj ey smuroal conobꞌ Gat ebꞌ, Jabnia cꞌal Asdod. Jix swaꞌnen a wan conobꞌ yul yet Asdod bꞌey xol ebꞌ Filisteo. 7 Jix colwa Dios yetoj naj yet jix yakꞌon jowal yetoj ebꞌ Filisteo tuꞌ, yetoj cꞌal yin ebꞌ Árabe caan bꞌey Gur-baal cꞌal yin ebꞌ Meunita. 8 Jix yakꞌon cꞌal pax stoolabꞌal ebꞌ Amonita tet naj Uzías tuꞌ, jix apni taꞌcꞌal oc jun skꞌaneal tuꞌ bꞌey smoonal txꞌotxꞌ Egipto, yutol caw jix bꞌinale ecꞌ naj yin yopiso.

9 Jix swaꞌne cꞌal pax a bꞌey chi atoj ebꞌ soldado naj bꞌey yibꞌan smuroal conobꞌ Jerusalén, bꞌey yibꞌan spuertail xiquin, bꞌey spuertail bꞌey spananil ecꞌtoj sat, cꞌal bꞌey wanxa xiquinlaj; caw watxꞌ jix yun swaꞌnen aoj. 10 Jix swaꞌne cꞌal pax a wan cuartel yet ebꞌ soldado chi teynen bꞌey txꞌotxꞌ cusiltaj txꞌotxꞌ. Caw ecꞌal wan jaꞌ kꞌobꞌ jaꞌ jix sjotoꞌ, yutol caw miman sjobꞌbꞌeal noꞌ ey bꞌey spananil jobꞌe, cꞌal bꞌey yichlaj wonan tuꞌ. Ey cꞌal pax ebꞌ smulnawom chi mulna yin awo uva, cꞌal yin wanojxa awbꞌeal teꞌ ey bꞌey txꞌotxꞌ tzalquiltaj, cꞌal bꞌey acꞌal-laj. Caw yelcꞌulal chi mulna yin wan awo tuꞌ.

11 Ey pax junxa miman bꞌulan ebꞌ soldado naj, jaꞌ yet chi too ebꞌ yin jowal, poꞌoquiẍtaj chi yun stoo ebꞌ, jatacꞌalaꞌ jix yun sicꞌle el ebꞌ eyoc yul skꞌabꞌ naj Jehiel, naj tzꞌibꞌlom yetoj naj Maaseías. Jaꞌ mactxequel chi ijbꞌan ebꞌ tuꞌ, jaꞌton naj Hananías, jaꞌ eyoc yin syaawiloj ebꞌ soldado naj rey Uzías. 12 Jaꞌ ebꞌ yaaw yeoc xol ebꞌ soldado naj rey, ey 2,600 ebꞌ. 13 Ey pax jun 307,500 ebꞌ soldado watxꞌ xa yeoc yet chi too yin jowal, caw chi colwa ebꞌ yetoj naj rey yet chi yakꞌon jowal yetoj ebꞌ scajat. 14 Jix yalon naj rey Uzías tol chi waꞌnele chꞌen majbꞌal sat julbꞌal yet masanil ebꞌ soldado, chꞌen lanza, wan chꞌen kꞌoxkꞌome, chꞌen majbꞌal xamcꞌule, chꞌen julbꞌal cꞌal jinich. 15 Jix seyle ecꞌ wan ebꞌ winaj caw jelan swaꞌnen wan mimej mitxꞌkꞌabꞌe yet jowal yu naj rey, catuꞌ jix swaꞌnen atoj bꞌey yibꞌanlaj bꞌey chi steyne ebꞌ soldado bꞌey yibꞌan smuroal conobꞌ bꞌey naat eyaoj. Jaꞌ tituꞌ chi julwa eytej ebꞌ, cꞌal skꞌojon eytej mimej chꞌen ebꞌ. Caw naat jix too jun skꞌaneal tzet jix yun naj rey tuꞌ, yutol jaꞌ Dios jix colwa yetoj wan qꞌueyubꞌtaj yili tzet jix yun naj, yutol caw jix skeꞌ yu masanil.

16 Jaꞌ yet jix yiꞌon xacꞌal yip yin yopiso tuꞌ, jix smeyne xacꞌal sbꞌa yetoj snaꞌbꞌal, queytuꞌ jix yun stit yibꞌan. Yutol ecꞌnaj xacꞌal jix yute sbꞌa sattaj Jehová. Comon cꞌal jix octoj yul stemplo Jehová, yin yakꞌon tzꞌaꞌ incienso bꞌey yet xaambꞌal. 17 Eyxa octoj naj, catuꞌ jix oc apnoj naj yakꞌomal xaambꞌal chi yij Azarías, jaꞌjun wanxa 80 ebꞌ yakꞌomal xaambꞌal tet Jehová yetoj naj, caw cꞌam chi xiw niꞌoj naj rey tuꞌ. 18 Jaꞌ yet jix oc apnoj ebꞌ tuꞌ sattaj naj rey, jix yalon ebꞌ tet jaxca tiꞌ: Jaach rey Uzías, jaach tiꞌ man eyoj oc ja wopiso ja wakꞌon tzꞌaꞌ incienso tet Jehová, yutol jaon yakꞌomal xaambꞌal jon yicꞌaal jon Aarón tiꞌ, jaon sicꞌbꞌil jon oc yin jun mulnail tiꞌ, yuxan watxꞌ chach eltoj titiꞌ, tuxa jix oc ja penail sattaj Jehová, yuxan man oj jaach iꞌle a can yu Naj, ẍi ebꞌ tet naj.

19 Linan oc naj rey Uzías tuꞌ scꞌatan jun yet xaambꞌal bꞌey chi tzꞌaꞌ incienso yul templo tuꞌ. Tꞌunbꞌil a jun chꞌen txayibꞌ bꞌey chi tzꞌaꞌ incienso yu naj. Caw jix tit sjowal yin ebꞌ naj yakꞌomal xaambꞌal tuꞌ, jaꞌ yet jun txolan tuꞌ jix txeclo a jun yaꞌbꞌil chi yij lepra yin snan sat naj. 20 Jaꞌ yet jix yilon naj sat yakꞌomal xaambꞌal yetoj cꞌal wanxa ebꞌ jaꞌjun yetoj, tol jix eltej lepra yin snan sat naj rey tuꞌ, yin eymanil jix yun yiꞌon eltej ebꞌ. Jix yoche xacꞌal pax naj rey tuꞌ chi eltej yin eymanil, yutol jix oc syaꞌilal yibꞌan yu Jehová.

21 Jix oc xacꞌal can jun yaꞌbꞌil chi yij lepra tuꞌ yin naj rey Uzías, masantaꞌcꞌal yet jix cam naj, yuxan xꞌojli xacꞌal jix eyecꞌ bꞌey junoj na, ma xa chaꞌle octoj naj yul stemplo Jehová; jaxa jun scꞌaal chi yij Jotam jix oc can sqꞌuexeloj yin yilon spalacio, cꞌal yin yakꞌon yaawilal bꞌey yul nación tuꞌ.

22 Jaxa niꞌojxa skꞌaneal naj rey Uzías, yet yichbꞌanil masantaꞌcꞌal slawubꞌal, jix stzꞌibꞌe can naj Isaías scꞌaal Amós, ẍejabꞌ Dios. 23 Jaꞌ yet jix camtoj naj Uzías tuꞌ, jatuꞌ jix mujle scawilal bꞌey mujan ebꞌ smam icham bꞌey camposanto yet ebꞌ rey, yutol ey lepra yin naj. Jix lawi tuꞌ, jaxa jun scꞌaal chi yij Jotam, jix oc can sqꞌuexeloj yin reyal.