3 Jaꞌ yet jix yiꞌon yip yopiso tuꞌ, jaꞌ ebꞌ eyoc yin yaawilal yetoj, jix makꞌle cam ebꞌ yu naj, jaꞌton ebꞌ jix makꞌon cam smam. 4 Asan xin, ma makꞌle cam scꞌaal ebꞌ yu naj, yutol tzꞌibꞌebꞌilcan ey yul an yuunal sley Moisés, bꞌey jix yal can Jehová jaxca tiꞌ: Cꞌam chi skeꞌ scam ebꞌ mame yu spenail yuninal ebꞌ chi oqui, tam wal ebꞌ uninale, cꞌam chi skeꞌ scam ebꞌ yu spenail smam chi oqui; yutol junjun cꞌal mactxequel smoo chi cam yu spenail, ẍi yul an juun.

5 Jix yalon naj Amasías tuꞌ tol chi syambꞌa oc sbꞌa masanil ebꞌ winaj yin yicꞌaal Judá cꞌal ebꞌ yicꞌaal Benjamín. Yin junjun tujan icꞌaaleal jix yun sicꞌle el ebꞌ, jatacꞌalaꞌ yeoc ebꞌ yin yicꞌaal. Jix sicꞌle can oc ebꞌ yaaw chi ijbꞌan yin mil cꞌal yin ciento; jix yiꞌon a sbꞌisil ebꞌ eyxa 20 abꞌil skꞌinal chi bꞌey cꞌaltoj. Jaꞌ yet jix lawi a jun bꞌiswal tuꞌ, ey 300,000 ebꞌ stiempoal xa stoo yin soldadoal, caw yotaj ebꞌ chi skꞌan lanza cꞌal majbꞌal sat julbꞌal yet jowal. 6 Jix smaanen cꞌal pax jun 100,000 soldado bꞌey Israel; 80 quintal chꞌen tumin plata jix yakꞌ stooloj ebꞌ.

7 Jaꞌ yet tuꞌ, ey jun ẍejabꞌ Dios jix apni oc sattaj naj Amasías, jix yalon tet jaxca tiꞌ:

—Jaach rey, manche ja waoc ebꞌ soldado yet Israel yetoj ebꞌ yet Efraín ja wetoj, yutol man eyoj oc Jehová yetoj ebꞌ tuꞌ. 8 Caxcꞌal mi cha naꞌ tol yetoj scolwal ebꞌ tuꞌ yuxan ey yip ebꞌ ja soldado yakꞌon jowal, jaxa oj yunne tol jaꞌ Dios oj jaach akꞌon eyqꞌuey yul skꞌabꞌ ebꞌ ja cajat tuꞌ, yutol ey yipal Dios yu jaach scolon eloj, ey cꞌal pax yipal jaach yakꞌon lawoj eloj, ẍi naj.

9 Catuꞌ jix skꞌanlen naj Amasías tet jun ẍejabꞌ Dios tuꞌ jaxca tiꞌ:

—Asan xin, ¿tzet oj yun pax chꞌen 80 quintal plata jix wakꞌ tet ebꞌ Israel tuꞌ an xin?

Catuꞌ jix yalon jun ẍejabꞌ Dios tuꞌ jaxca tiꞌ:

—Jaꞌ Jehová chi skeꞌ yakꞌon ecꞌbꞌan sbꞌisil chꞌen tumin tuꞌ ey jaach, ẍi tet naj.

10 Jix lawi tuꞌ xin, jix yalon naj Amasías tet ebꞌ soldado jix tit bꞌey yul yet Efraín, tol watxꞌ chi paxtoj ebꞌ bꞌey sna; caw jix tit sjowal scꞌul ebꞌ yin ebꞌ yet Judá, caw jix tit sjowal ebꞌ yet jix meltzotoj ebꞌ.

11 Queytuꞌ jix yun yiꞌon yip naj rey Amasías, jix too naj yetoj soldado bꞌey spananil sjobꞌeal yet atzꞌam. Jaꞌ tituꞌ jix smakꞌ cam 10,000 soldado a Seír. 12 Jacꞌalaꞌ ebꞌ Judá tuꞌ jix mitxꞌle cꞌal pax ey junxa 10,000 ebꞌ a Seír yu ebꞌ, jix yiꞌontoj ebꞌ bꞌey sjolom jun wonan caw satlaj chꞌen yeqꞌui. Jaꞌ bꞌey satlaj chꞌen tuꞌ jix tenle cantoj ebꞌ yu ebꞌ, kocꞌ xacꞌal jix yuntoj ebꞌ.

13 Jaxa pax ebꞌ soldado ma chaꞌletoj yu naj Amasías tuꞌ, ebꞌ jix chejle meltzo bꞌey sna yu naj, jaꞌ ebꞌ tuꞌ jix yakꞌ lawoj el jayebꞌ conobꞌ ebꞌ bꞌey yul yet Judá, chi too tacꞌal bꞌey Samaria masantaꞌcꞌal bꞌey Bet-horón. Ey 3,000 ánima jix smakꞌ cam ebꞌ, jix yelkꞌanentoj masanil stzettaj yetal ebꞌ.

14 Jaꞌ yet jix meltzotej naj Amasías, yet jix lawi yeyqꞌuey ebꞌ Edomita tuꞌ yu naj, jix yiꞌontej wan comon dios yet ebꞌ a Seír, jix yaon oc sdiosaloj. Jix oc yin eyilal tet, cꞌal yakꞌon tzꞌaꞌ xaambꞌal cꞌal incienso tet. 15 Queytuꞌ jix yun stit sjowal scꞌul Jehová yin naj Amasías tuꞌ, yuxan jix yatej jun ẍejabꞌ, jix yalon tet naj rey jaxca tiꞌ:

—¿Tzet yuxan chach oc yin eyilal tet wan comon dios tol ma skeꞌ yu scolon el ebꞌ sconobꞌ yul ja kꞌabꞌ?

16 Jaꞌ yet jix yalon jun ẍejabꞌ Dios tuꞌ, catuꞌ jix takꞌwi naj rey jaxca tiꞌ:

—Tumi jix wal ey jaach tol jaach cha wakꞌ junoj naꞌbꞌale ey jin jain rey jin tiꞌ. Bꞌej cꞌal ja walon wan tzetyetal tuꞌ, ¿ma chi yoche ja cꞌul chach makꞌle camoj? ẍi tet naj.

Jaxa jun ẍejabꞌ Dios tuꞌ, cꞌamxa tzet jix yal tet naj rey tuꞌ, asanxane jun jix yal tet jaxca tiꞌ:

—Wotaj jain tiꞌ tol naꞌbꞌil xacꞌaltaꞌ yu Dios tol oj jaach yakꞌ lawoj, yutol jix ja wun jun tiꞌ, ma ja jije tzet jix wal ey jaach, ẍi tet naj rey tuꞌ.

17 Jaxa naj Amasías sreyal Judá, jix skꞌanle snaꞌbꞌal tet wanxa ebꞌ akꞌom naꞌbꞌale. Jix yaontoj kꞌane tet naj rey Joás scꞌaal Joacaz, yitxiquin naj Jehú, sreyal conobꞌ Israel, jix yalontoj jaxca tiꞌ: Titan, kakꞌle jowal, ẍi toj tet naj. 18 Yu jun tuꞌ, jaꞌ Naj Joás jix aontej spaj kꞌane tet naj Amasías, jix yalontej jaxca tiꞌ: Ey jun teꞌ sajin qꞌuix jix yaltoj tet jun teꞌ kꞌuteꞌ bꞌey Líbano: Akꞌ ix ja cutzꞌin yistiloj naj jin cꞌaal an, ẍi teꞌ. Jaxa jix yunne, ey jun noꞌ xol-laj teꞌ noꞌ jix ecꞌ tituꞌ. Jaꞌ noꞌ jix tecꞌon ey jun teꞌ qꞌuix tuꞌ. 19 Jaach tiꞌ cha meyne ja bꞌa yutol jix eyqꞌuey ebꞌ a Edom ja wu. Jaꞌ yu jun tuꞌ, yuxan cha woche cha sey tzet chi yun yiꞌle a can ja bꞌi. Yuxan yel xacꞌal mi watxꞌ tol chach can cꞌal bꞌey ja na, ¿tzet yuxan chi yoche ja cꞌul cha wiꞌtej junoj syaꞌilal ja wibꞌan, cꞌal yibꞌan conobꞌ Judá? ẍi toj naj Joás tet naj.

20 Jaxa naj Amasías ma ẍaꞌ yabꞌ jaxca tuꞌ, yutol naꞌbꞌilxa yu Dios tol oj ale oc naj yul skꞌabꞌ naj Joás, yutol jaꞌ tet wan sdiosal ebꞌ Edomita chi oc naj yin eyilal. 21 Queytuꞌ jix yun stoo naj Joás yakꞌon jowal yin naj Amasías; jatuꞌ jix ẍaꞌle sbꞌa ebꞌ naj yin jowal bꞌey Bet-semes yul yet Judá. 22 Jix eyqꞌuey Judá tuꞌ yu ebꞌ Israel, jix ela ebꞌ soldado a Judá tuꞌ, jix too ebꞌ bꞌey sna. 23 Jix michꞌcha naj Amasías, naj sreyal Judá bꞌey Bet-semes tuꞌ yu naj Joás, sreyal Israel. Jix lawi tuꞌ, jix iꞌletej naj bꞌey Jerusalén. Jaꞌ tituꞌ jix uchle ey smuroal conobꞌ yu ebꞌ Israel. Ey mi junoj 180 metro jix yuch lawoj ebꞌ, jix too tacꞌal bꞌey spuertail yet Efraín, masantaꞌcꞌal bꞌey spuertail xiquin jun muro tuꞌ. 24 Catuꞌ jix yiꞌontoj masanil chꞌen oro ebꞌ, cꞌal chꞌen plata yetoj cꞌal wanxa tzetyetal ey bꞌey stemplo Dios, jaꞌton wan chi teynele yu ebꞌ yicꞌaal Obed-edom, cꞌal masanil jantaj bꞌeomal ey bꞌey spalacio naj rey. Ey ebꞌ ánima jix iꞌletoj jaxca presowomal yu yet jix paxtoj bꞌey Samaria. 25 Ey 15 abꞌil to jix ecꞌ naj Amasías, scꞌaal Joás, yin sreyaloj Judá, catuꞌ jix cam naj Joás, scꞌaal Joacaz sreyal Israel. 26 Jaꞌ jantaj to skꞌaneal naj Amasías yet jix el yich cꞌal slawubꞌal, jatuꞌ tzꞌibꞌebꞌilcan bꞌey yul an yuunal skꞌaneal ebꞌ sreyal Judá, cꞌal ebꞌ sreyal Israel. 27 Jaꞌ yet tuꞌ jix yiꞌon el snaꞌbꞌal Amasías yin Jehová, jatax yet tuꞌ jix cꞌoli cꞌal snaꞌon ebꞌ a Jerusalén tol oj smakꞌ cam naj Amasías tuꞌ ebꞌ; cꞌuancꞌulal cꞌal xin, jix ela naj, jaꞌ bꞌey conobꞌ Laquis jix apni naj, caw jix apni cꞌal pax oc tzajan wan scajat tuꞌ yintaj bꞌey jun conobꞌ tuꞌ. Jaꞌ tituꞌ jix cam naj yu ebꞌ. 28 Jix lawi tuꞌ, jix iꞌletoj smimanil naj yibꞌan che yu ebꞌ, jix smujon ebꞌ bꞌey mujan ebꞌ yichmam naj bꞌey conobꞌ David.