—Abꞌ tzet chi yal skꞌane Dios: Jaꞌ yet yecal yabꞌ jaxca hora tiꞌ, jaꞌ bꞌey spuertail conobꞌ Samaria tiꞌ, jaꞌ yin jun siclo chꞌen tumin plata oj skeꞌ cu manon laonebꞌoj libra ixim jarina yin chꞌen. Jacꞌalaꞌ yin jun siclo chꞌen plata oj skeꞌ cu manon caabꞌoj almu ixim cebada, ẍi Jehová, ẍi naj.

2 Catuꞌ jix takꞌwi jun yakꞌomal servil naj rey tet naj Eliseo jaxca tiꞌ:

—Caxcꞌal mi chi jajle sventanail satcan tuꞌ yu Jehová, ma cꞌal mi eloc jaxca cha wal tuꞌ, ẍi naj. Jix takꞌwi naj Eliseo tet naj jaxca tiꞌ:

—Oj ja wil jun tuꞌ jaach tiꞌ, asan xin, manxa oj ja loꞌ ixim, ẍi naj.

3 Jaꞌ yet tuꞌ ey canwan ebꞌ naj eyoc lepra yin, eyecꞌ ebꞌ naj bꞌey spuertail conobꞌ tuꞌ, catuꞌ jix yalon ebꞌ tet junjun jaxca tiꞌ:

—¿Tzet wal chi kun titiꞌ? Tucꞌal chotan jon ey kechbꞌanen cu camichal.

4 Ta tol chi cu octoj yul conobꞌ tiꞌ, sowalil oj cu cam yu wail. Ta chi cu cancan chotan titiꞌ sowalil oj cu cam cꞌaltaꞌa. Yel mi watxꞌ ta chi cu too bꞌey bꞌulan ey ebꞌ Sirio tuꞌ. Ta chi yakꞌ mimancꞌulal ebꞌ kin, catuꞌ chi too cu eecꞌ niꞌojxa; ta cꞌamaj xin, tucꞌaltaꞌ tol yet jon camich, ẍi ebꞌ naj.

5 Jaꞌ yet jix kꞌejbꞌi ey xin, catuꞌ jix too ebꞌ bꞌey bꞌulan ey ebꞌ Sirio tuꞌ. Jaxa yet jix apni oc ebꞌ, jix yilon ebꞌ cꞌamxa junoj mactxequel eyecꞌoj.

6 Yutol jaꞌ Jehová jix akꞌon yabꞌ ebꞌ soldado a Sirio tuꞌ yecꞌ wan noꞌ che, cꞌal wan carruaje yet jowal, cꞌal yetoj jun miman bꞌulan soldado jix yabꞌ ebꞌ. Jaꞌ snaꞌon ebꞌ Sirio tuꞌ tol jaꞌ naj sreyal ebꞌ conobꞌ Israel jix toolanen ebꞌ sreyal Hitita cꞌal sreyal conobꞌ Egipto, catuꞌ chi yakꞌon jowal yin ebꞌ snaꞌon ebꞌ.

7 Yuxan jix a lemna ebꞌ yet akꞌbꞌalil catuꞌ jix too ebꞌ, jix sbꞌejoncan skꞌap na ebꞌ bꞌey bꞌulan ey tuꞌ, cꞌal noꞌ che, cꞌal scarruaje ebꞌ yet jowal, asan xacꞌal ebꞌ jix scol sbꞌa xꞌojli.

8 Jaꞌ yet jix apni oc ebꞌ naj bꞌey stiꞌlaj eltoj bꞌey bꞌulantaꞌ ey ebꞌ tuꞌ, catuꞌ jix octoj ebꞌ bꞌey yul junoj wan kꞌap na tuꞌ, jix low ebꞌ cꞌal yuqꞌuen jaꞌ ebꞌ, jix yiꞌon eltej chꞌen oro ebꞌ, chꞌen plata cꞌal an pichile ebꞌ, catuꞌ jix too yewbꞌan el ebꞌ. Catuꞌ jix meltzo ebꞌ junelxa, jix oc pax toj ebꞌ bꞌey yul junxa kꞌap na, catuꞌ jix yiꞌon eltej tzettaj yetal ebꞌ ey yul, catuꞌ jix too pax ebꞌ yewbꞌan el junelxa.

9 Eyman jix yal ebꞌ tet junjun jaxca tiꞌ:

—Man watxꞌoj jaxca jun chi kun tiꞌ. Jaꞌ tinaniꞌ scꞌual wal kiꞌontoj jun kꞌane tiꞌ, jajxa xin, tzꞌin cꞌal cu chi. Ta tol oj to kechbꞌane yet yecal, ey mi la tzet oj tit kibꞌan. Watxꞌ mi tol chi too kal tet naj rey tinaniꞌ, ẍi ebꞌ naj.

10 Yuxan jix too ebꞌ naj, jix yawten ebꞌ chi teynen stiꞌ conobꞌ tuꞌ, jix yalon ebꞌ jaxca tiꞌ:

—Jix cu bꞌetecꞌ bꞌey bꞌulan ey ebꞌ soldado a Sirio, cꞌamxa junoj mactxequel eyecꞌoj, asanxane noꞌ che cꞌal noꞌ bꞌuru ey canoj, cꞌal skꞌap na ebꞌ jaxca cꞌal jix yun swaꞌnen a ebꞌ, quey cꞌal tuꞌ ye can aoj.

11 Jix awtele ebꞌ chi teynen stiꞌ conobꞌ tuꞌ cꞌal ebꞌ chi teynen spalacio naj rey yu ebꞌ.

12 Jix al-le yabꞌ naj rey, yuxan jix a waan naj yet akꞌbꞌalil tuꞌ, jix yalon tet ebꞌ eyoc yin opiso yetoj:

—Oj wal ey jex tzet chi yoche ebꞌ a Sirio chi cu yute, yutol yotaj ebꞌ tol chi cu cam yu wail, yuxan jix sbꞌejcan skꞌap na ebꞌ bꞌey bꞌulan eyoj catuꞌ chi yewbꞌan el sbꞌa ebꞌ xol-laj teꞌ, yet chi cu mitxꞌle ey yu ebꞌ yin kiquisal ta chi cu eltoj yinlaj conobꞌ tiꞌ, jaxam yoc cantej ebꞌ yul cu conobꞌ tiꞌ, ẍi naj rey tuꞌ.

13 Ey jun naj yakꞌomal servil naj rey jix alon jaxca tiꞌ:

—Toj ojabꞌ jaywanoj winaj yilaꞌ yetoj jocꞌonoj noꞌ che eyto ecꞌ tiꞌ, catuꞌ chi kiloni tzet jix ui tituꞌ. Ta jix cam ebꞌ, ma cꞌamaj, laan cꞌal eloj, man watxꞌoj tituꞌ man pax watxꞌoj bꞌey ey jon ecꞌ tiꞌ, ẍi ebꞌ.

14 Yuxan jix yiꞌtoj caabꞌ carruaje ebꞌ yetoj noꞌ che, catuꞌ jix ẍejontoj naj rey ebꞌ bꞌey bꞌulan ey skꞌap na ebꞌ a Sirio tuꞌ. Jix al-le tet ebꞌ yet chi too ebꞌ sbꞌeytzen tzet utbꞌil wal yeocoj.

15 Jix oc cꞌal tzajan ebꞌ yintaj ebꞌ Sirio tuꞌ masantaꞌcꞌal jix apni oc ebꞌ bꞌey stiꞌ jaꞌ Jordán. Jix yilon ebꞌ yul-laj bꞌe tol ey can spichil ebꞌ cꞌal smitxꞌkꞌabꞌ ebꞌ Sirio tuꞌ yu yel jininoj ebꞌ scolon sbꞌa. Eyman jix meltzo ebꞌ yu jul yalon ebꞌ tet naj sreyal Israel tzet jix bꞌet ebꞌ yilaꞌ.

16 Jix lawi tuꞌ, jix eltoj masanil ebꞌ a Samaria tuꞌ, catuꞌ jix yiꞌon eltej masanil tzettaj yetal ebꞌ bꞌey yul-laj skꞌap na ebꞌ a Sirio tuꞌ jix sbꞌejcanoj. Jix yun jaxca jix yun yalon Jehová, tol laonebꞌ libra ixim jarina jix txonle yin jun siclo chꞌen tumin plata, catuꞌ caabꞌ almu ixim cebada yin jun siclo chꞌen tumin.

17 Jix yalon naj rey tet jun yilomal tuꞌ, tol caw chi steyne stiꞌ spuertail conobꞌ tuꞌ, jaxa masanil ebꞌ ánima jix too bꞌulna ebꞌ yibꞌan naj, jix telcꞌotoj naj yu ebꞌ, catuꞌ jix cam naj, jaxca jix yun yalon Eliseo naj ẍejabꞌ Dios tet naj, yet jix bꞌetecꞌ naj rey kꞌanabꞌ yetoj.

18 Jix eloc jaxca jix yun yalon naj ẍejabꞌ Dios tol jaꞌ bꞌey spuertail conobꞌ Samaria yabꞌ jaxca tiꞌ yet yecal oj txonle ixim jarina, yin jun siclo chꞌen tumin plata yin laonebꞌ libra, cꞌal caabꞌ almu ixim cebada yin jun siclo chꞌen plata.

19 Jaꞌ naj chi teynen naj rey tuꞌ jix takꞌwi tet naj ẍejabꞌ Dios jaxca tiꞌ: Caxcꞌal mi tol chi jajcha swentanail satcan yu Jehová, ma cꞌal mi yun jaxca chi yun ja walon tuꞌ, ẍi naj. Jix takꞌwi naj Eliseo tol oj yilaꞌ, asan xin manxa oj sloꞌ naj wan loꞌbꞌe tuꞌ.

20 Caw yel jix yun jaxca tuꞌ, yutol jaꞌ ebꞌ ánima jix tecꞌon cam bꞌey stiꞌ spuertail conobꞌ tuꞌ, queytuꞌ jix yun scam naj.