—Ilaꞌ wal jun na bꞌey caan jon ecꞌ ja wetoj tiꞌ, caw witzꞌan jun na tiꞌ.

2 Yu jun tuꞌ, ta chi ẍaꞌ ja cꞌul chi cu too bꞌey stiꞌ jaꞌ Jordán, catuꞌ chi too kiꞌon junjunoj cu teꞌ, chi cu waꞌne a junoj na bꞌey chi cu caey ecꞌoj, ẍi ebꞌ.

—Asiꞌwej xin, ẍi naj Eliseo.

3 —Chi yoche cu cꞌul tol chach too ketoj jon, ẍi junoj ebꞌ tet naj Eliseo tuꞌ.

—Ye xin, chin too je yetoj an, ẍi naj.

4 Yuxan jix too naj Eliseo tzokꞌo el teꞌ yetoj ebꞌ bꞌey stiꞌ jaꞌ Jordán tuꞌ.

5 Jaꞌ yet lalan stzokꞌwi teꞌ ebꞌ tuꞌ, ey jun naj jix el cꞌotna yeche yul skꞌabꞌ, jix too chꞌen yul jaꞌ jaꞌ tuꞌ, jix yaon el yaw naj, jix yalon jaxca tiꞌ:

—¡Ay jaach jin cuyumal, jaꞌ jun chꞌen eche tiꞌ tol maanebꞌil chꞌen wu an! ẍi naj.

6 —¿Bꞌeytuꞌ jix too oc chꞌen jix ja wilaꞌ? ẍi naj Eliseo tet naj.

Jix xꞌoxon naj yetcꞌulal bꞌey jix too chꞌen eche tuꞌ. Jix stzokꞌon el jun teꞌ teꞌ naj Eliseo, catuꞌ jix yaon eytoj naj yul jaꞌ, catuꞌ jix aol bꞌatxatxoj chꞌen yibꞌan jaꞌ. Jaꞌ jun eche tuꞌ hierro cꞌal el chꞌen.

7 —Iꞌatej chꞌen, ẍi Eliseo tet naj. Jix yaon eytoj skꞌabꞌ naj, catuꞌ jix yiꞌon atej chꞌen eche tuꞌ naj.

8 Jaꞌ naj sreyal conobꞌ Siria eyoc jowal yu naj yetoj conobꞌ Israel, catuꞌ jix slatiꞌne sbꞌa naj sreyal Siria yetoj ebꞌ syaawil soldado tuꞌ yu bꞌey chi skeꞌ swaꞌne ey bꞌulan sbꞌa ebꞌ.

9 Jix yalontoj naj Eliseo tet naj sreyal Israel yal cꞌal bꞌeytuꞌ eyoc ecꞌ ebꞌ a Siria yet watxꞌ cꞌam chi too ebꞌ tituꞌ.

10 Jix lawi tuꞌ, jix ẍejontoj yilomal naj sreyal conobꞌ Israel wan lugar bꞌey chi yal naj ẍejabꞌ Dios tuꞌ, yuxan ecꞌal el jix scol sbꞌa ebꞌ.

11 Jaxa naj sreyal conobꞌ Siria caw jix qꞌueya scꞌul naj yu jun tuꞌ, yuxan jix awtele ebꞌ syaawil soldado yu naj, jix yalon tet ebꞌ jaxca tiꞌ:

—¡Alwej ey jin an, mactxequel eyoc yetoj naj sreyal Israel cu xol ti! ẍi naj tet ebꞌ.

12 Catuꞌ jix takꞌwi jun naj yet yaawil tet jaxca tiꞌ:

—Jaach yaaw, cꞌam mactxequel, asanne naj ẍejabꞌ Dios chi yij Eliseo eyecꞌ bꞌey conobꞌ Israel tuꞌ, jaꞌ chi alon tet naj rey masanil tzet cha wal jaach tiꞌ caxcꞌal yin ewantajil cha walaꞌ, ẍi tet naj.

13 Yuxan jix yal naj sreyal conobꞌ Siria tuꞌ jaxca tiꞌ:

—Asiꞌwej ilaꞌ, bꞌeytuꞌ eyoc ecꞌ naj Eliseo tuꞌ, catuꞌ chi waontoj jaywanoj jin soldado yet chi too kꞌal-letej naj, ẍi naj rey tuꞌ.

Jaꞌ yet jix yabꞌen ocoj tol jaꞌ bꞌey conobꞌ Dotán eyecꞌ naj Eliseo, 14 catuꞌ jix yaontoj jun miman bꞌulan ebꞌ soldado, yetoj che, cꞌal carruaje yet jowal. Akꞌbꞌalil yet jix apni oc ebꞌ soldado tuꞌ bꞌey conobꞌ Dotán, jix sjoyon oc sbꞌa ebꞌ yinlaj conobꞌ tuꞌ.

15 Jaxa yet jix sajbꞌi eloj, jix a waan jun yakꞌomal servil naj Eliseo tuꞌ; jaꞌ yet jix eltej jix yiloni, manxa jantajoj ebꞌ soldado joyan ecꞌ yinlaj conobꞌ tuꞌ, ey noꞌ che cꞌal carruaje yet jowal. Yuxan jix too yal tet naj Eliseo jaxca tiꞌ:

—Ay jaach jin cuywam, ¿tzet wal oj kute cu bꞌa? ẍi naj yakꞌomal servil tuꞌ.

16 Jix takꞌwi naj Eliseo jaxca tiꞌ:

—Manche jaach xiwi, yutol yel miman sbꞌisil mactxequel eyecꞌ ketoj yintaj ebꞌ naj tuꞌ, ẍi naj.

17 Catuꞌ jix oc ian naj Eliseo txaloj tet Jehová: Chin kꞌan ey jaach, tol cha jaj sat naj wakꞌomal servil tiꞌ an, ẍi naj.

Jix jajle sat naj yakꞌomal servil Eliseo tuꞌ yu Jehová, catuꞌ jix yilon naj tol jaꞌ bꞌey satlaj pakꞌan cꞌal bꞌey txꞌotxꞌ tzalquiltaj txꞌotxꞌ, tuxa cꞌal joyantej ebꞌ soldado eyoc yibꞌan che cꞌal yul-laj carruaje tol naꞌbꞌa kꞌakꞌ cꞌal eloj, joyan oc ebꞌ yin naj Eliseo.

18 Jaꞌ yet lalan xacꞌal yapni oc ebꞌ naj Sirio tuꞌ yakꞌon jowal yin ebꞌ, catuꞌ jix txali naj Eliseo tet Jehová jaxca tiꞌ: Chin kꞌan ey jaach an, tol cꞌam ojabꞌxa chi skeꞌ yilwan wan winaj tiꞌ, ẍi naj yin xa.

Yet jun txolan tuꞌ cꞌamxa chi skeꞌ yilwan ebꞌ naj yu Jehová, jaxca jix yun skꞌanon naj Eliseo yin xa.

19 Catuꞌ jix yalon naj Eliseo tet ebꞌ jaxca tiꞌ:

—Manaj jun bꞌe tiꞌ che seyaꞌ catuꞌ manaj jun conobꞌ tiꞌ. Ocanwej tzajan wintaj an catuꞌ chex wijbꞌantoj bꞌey eyecꞌ jun naj che seyecꞌ tuꞌ, ẍi naj tet ebꞌ. Catuꞌ jix ijbꞌaletoj ebꞌ yu naj bꞌey conobꞌ Samaria.

20 Jaꞌ yet jix octoj ebꞌ yul conobꞌ tuꞌ, jix txali naj Eliseo jaxca tiꞌ: Jaach Jehová, chin kꞌan ey jaach an tol cha jaj sat ebꞌ naj tiꞌ, catuꞌ chi ilwi a ebꞌ, ẍi naj. Jix jajcha sat ebꞌ naj, jix yilon ebꞌ tol jaxa tuꞌ eyecꞌ ebꞌ bꞌey yul conobꞌ Samaria. 21 Jaꞌ yet jix yilon naj sreyal conobꞌ Israel ebꞌ naj tuꞌ, jix skꞌanlen naj rey tet naj Eliseo.

—Jaach cuywam, ¿chim jin makꞌ cam ebꞌ naj tiꞌ, ma cꞌamaj? ẍi naj.

22 Jix yalon naj Eliseo jaxca tiꞌ:

—Cꞌamaj, cꞌam cha makꞌ cam ebꞌ naj. ¿Tejan tol qꞌueynaj jaach ja makꞌon cam ebꞌ chi michꞌcha ja wu yin jowal? Tol cha wakꞌ low ebꞌ cꞌal yuqꞌuen jaꞌ ebꞌ naj, catuꞌ cha chejon meltzo ebꞌ yul skꞌabꞌ syaawil bꞌey jix tit ebꞌ, ẍi naj.

23 Catuꞌ jix waꞌxi jun miman loꞌbꞌe, jix low ebꞌ cꞌal yuqꞌuen jaꞌ ebꞌ. Jix lawi tuꞌ, catuꞌ jix yalon naj sreyal Israel tol chi paxtoj ebꞌ, queytuꞌ jix yun smeltzotoj ebꞌ bꞌey eyecꞌ syaawil tuꞌ. Jatax yet tuꞌ jix sbꞌejon ebꞌ soldado a conobꞌ Siria yoctej yin yetnen conobꞌ Israel cꞌal yin elkꞌan.

24 Jix lawi yecꞌ can jun tiempoal tuꞌ, jaꞌ naj Ben-adad, sreyal conobꞌ Siria jix syambꞌan oc soldado, catuꞌ jix too sjoyon a conobꞌ Samaria yu yakꞌon jowal yin.

25 Queytuꞌ jix yun sjul jun miman wail bꞌey conobꞌ Samaria. Caw jix a stool masanil tzetyetal, yutol joyan oc ebꞌ soldado conobꞌ Sirio yin conobꞌ tuꞌ. Jaꞌ junoj sjolom noꞌ bꞌuru, 80 siclo chꞌen tumin plata stool noꞌ, jaxa jun vaso stzaꞌ noꞌ paramuch, joebꞌ siclo plata stool.

26 Ey jun cꞌual yet lalan sbꞌeyecꞌ naj sreyal conobꞌ Israel yibꞌan smuroal conobꞌ tuꞌ, catuꞌ jix awi atoj jun ix ix tet naj, jix yalon ix jaxca tiꞌ:

—Jaach rey, colwaan win an, ẍi ix tet naj.

27 Jix takꞌwi naj rey tet ix jaxca tiꞌ:

—Ta cꞌam chach col-le yu Jehová, ¿tumi jainto wal oj jaach jin coloꞌ? ¿Tumi oj skeꞌ wakꞌon ja tiriw cꞌal ja vino?

28 ¿Tzet chach ioni? ẍi naj tet. Jix takꞌwi ix tet naj:

—Ey jun ix ix jix alon ey jin tol chi cu wa chiꞌne eytoj jun wuneꞌ tiꞌ, jaxa yet junxa cꞌual, jaxa ix chi yakꞌ jun yuneꞌ tuꞌ chiꞌleoj.

29 Yuxan jix cu txic jun wuneꞌ tuꞌ, jix cu chiꞌon eytoj jon. Jaxa yet junxa cꞌual tuꞌ, jix walon tet ix tol chi yakꞌ jun yuneꞌ ix tuꞌ cu chiꞌ jon, tuxa jix yewbꞌa el jun yuneꞌ ix tuꞌ, ẍi ix tuꞌ.

30 Jaꞌ yet jix yabꞌen naj rey tzet jix yal ix tuꞌ, catuꞌ jix stzilontoj spichil naj yu xꞌoxon eloj tol ey scuscꞌulal. Yutol lalan yecꞌtoj naj yibꞌan smuroal conobꞌ tuꞌ, jix yilon ebꞌ ánima eyecꞌ scawilal muro tuꞌ tol eyoc an eel pichile yet bꞌiscꞌulal yu naj.

31 Jix yalon naj rey tuꞌ jaxca tiꞌ: Tit ojabꞌ can sjowal scꞌul Dios wibꞌan ta tol cꞌam chi wiꞌel sjolom naj Eliseo scꞌaal Safat yet jun cꞌual tiꞌ, ẍi naj rey tuꞌ.

32 Chotan ey naj Eliseo stiꞌ sna, yetoj ebꞌ icham winaj yul conobꞌ tuꞌ. Catuꞌ jix ẍejontoj naj rey jun winaj yin naj Eliseo. Jaꞌ yet cꞌamto chi apni oc jun yakꞌomal servil naj rey tuꞌ, catuꞌ jix yalon naj Eliseo tet ebꞌ icham winaj yeoc yul conobꞌ tuꞌ jaxca tiꞌ:

—Ilwej ton abꞌi, jix ẍejtej jun makꞌom cam ánima tuꞌ jun yakꞌomal servil yet chi jul yiꞌon el jin jolom. Abꞌwej wal tzet chi walaꞌ: Jaꞌ yet oj jul naj tuꞌ catuꞌ oj je majchen eltoj teꞌ smajil na tuꞌ, watxꞌ chi yun je majchen eltoj teꞌ, yutol tzajan oc naj rey yintaj, ẍi naj.

33 Lalanto wal skꞌanabꞌ naj catuꞌ jix jul jun yakꞌomal servil naj rey tuꞌ, jix yalon jaxca tiꞌ:

—Jaꞌ jun syaꞌilal tiꞌ, jaꞌ Jehová jix aontej. ¿Tzet to wal oc chi wechbꞌane jin scolon Naj tinaniꞌ? ẍi jun yakꞌomal servil naj rey tuꞌ.