2 Jix chejletoj jun bꞌulan ebꞌ soldado a Siria yet chi too ebꞌ elkꞌan bꞌey yul yet Israel. Jix michꞌchatej jun ix kꞌopo ix yu ebꞌ, catuꞌ jix oc ix yakꞌomaloj servil ix yistil naj Naamán.

3 Jix yalon ix kꞌopo tuꞌ tet bꞌey eyoc yakꞌomaloj servil tuꞌ jaxca tiꞌ:

—Watxꞌ mi ta chi too naj jin patrón tiꞌ bꞌey jun naj ẍejabꞌ Dios eyecꞌ bꞌey conobꞌ Samaria; ta cꞌuxan chi waꞌxi jun syaꞌilal naj tiꞌ, ẍi ix.

4 Catuꞌ jix too naj Naamán yalon tet naj sreyal Siria tzet jix yal ix kꞌopo tuꞌ.

5 Jix yalon naj rey tet jaxca tiꞌ:

—Watxꞌ ta chach too xin, chi watoj junoj an carta tet naj sreyal Israel tuꞌ, ẍi naj.

Queytuꞌ jix yun stoo naj Naamán tuꞌ, jix yiꞌontoj nan swaxajebꞌ quintal chꞌen tumin plata, wajebꞌ arroba chꞌen oro, yetoj laonebꞌ moan pichile.

6 Catuꞌ jix yiꞌontoj an carta tet naj sreyal Israel, bꞌey chi yal jaxca tiꞌ: Chi wakꞌ ja wotajne eloj, tol yu naj jin capitán Naamán tiꞌ, yuxan chi watoj jun jin carta tiꞌ ey jaach an. Chi woche cha wante naj, yutol yaꞌey naj yu lepra, ẍi yul an carta tuꞌ.

7 Jaꞌ yet jix lawi yilon naj sreyal Israel jun carta tuꞌ, catuꞌ jix stzilontoj spichil yu xꞌoxon eloj tol ey staccꞌulal, jix yalon jaxca tiꞌ:

—¿Tumi Dios jin, yuxan oj skeꞌ wakꞌon scamichal ánima cꞌal wakꞌon scawil, yuxan chi yatej jun carta jun winaj tiꞌ ey jin yet chi wiꞌon el lepra yin? Tejan tol pena tzetyetal chi snaꞌ ebꞌ win, ẍi naj rey tuꞌ.

8 Jaꞌ yet jix yabꞌen naj Eliseo tol jix stziltoj spichil naj rey tuꞌ, jix yalontoj naj jaxca tiꞌ:

—¿Tzet yuxan jix ja tziltoj ja pichil? Tit ojabꞌ jun winaj tuꞌ ey jin tiꞌ an, catuꞌ oj yiloni tol ey ẍejabꞌ Dios bꞌey Israel tiꞌ, ẍi Eliseo tuꞌ.

9 Catuꞌ jix too naj Naamán yetoj ẍe cꞌal scarruaje yet jowal, cꞌal ebꞌ jaꞌjun yetoj, catuꞌ jix apni oc linan ebꞌ bꞌey stiꞌ sna Eliseo tuꞌ.

10 Catuꞌ jix ẍejontoj jun yakꞌomal servil naj Eliseo yet chi al-le tet jaxca tiꞌ: Asiꞌ bꞌey stiꞌ jaꞌ Jordán, jujel chach eytoj xol jaꞌ, queytuꞌ oj yun swaꞌxoj ja mimanil tol eyoc lepra yin tuꞌ, ẍi naj.

11 Caw jix tit sjowal naj Naamán, yet jix toi, jix cꞌoli yalon jaxca tiꞌ:

—Jaꞌ waloni tol oj elol naj jin jul ẍaꞌoni, tol oj oc wal linan naj txaloj tet Jehová sDiosal jin sattaj, catuꞌ oj yaon oc skꞌabꞌ naj bꞌey eyoc lepra tiꞌ win, yet chi elcan jun yaꞌbꞌil tiꞌ waloni.

12 ¿Tumi jantaj swatxꞌil jaꞌ Abaná cꞌal jaꞌ Farfar ey bꞌey conobꞌ Damasco, yintaj jaꞌ jaꞌ ey bꞌey Israel tiꞌ? ¿Tumi cꞌam chi skeꞌ jin to jin txꞌaon el jin bꞌa xol jaꞌ tuꞌ catuꞌ chin waꞌxi? ẍi naj Naamán.

Caw eytej sjowal naj sicꞌlebꞌil yet jix meltzotoj.

13 Jaxa ebꞌ yakꞌomal servil jaꞌjun yetoj, jix yalon cꞌal ebꞌ tet jaxca tiꞌ:

—Jaach yaaw, ta ey junojxa tzetyetal caw yaꞌtaj yoc jix yal naj ẍejabꞌ Dios tuꞌ ey jaach, ¿tumi man oj ja jije pax oj? Jal xin, asan jix cꞌal yal naj tol chi too ja txꞌael ja bꞌa catuꞌ chach waꞌxi canoj, ẍi ebꞌ tet naj.

14 Queytuꞌ jix yun stoo naj Naamán tuꞌ, jujel jix sjejeytoj sbꞌa naj yul jaꞌ Jordán, jaxca jix yun yalon naj Eliseo, naj ẍejabꞌ Dios. Jix waꞌxi can smimanil jaxca xacꞌal smimanil junoj achꞌe unin, caw wal watxꞌ jix yun canoj. 15 Yu tuꞌ xin, jix meltzotej naj yetoj ebꞌ jaꞌjun yetoj bꞌey eyecꞌ naj Eliseo. Jaꞌ yet jix apni oc ebꞌ sattaj naj, jix yalon naj Naamán jaxca tiꞌ:

—Jaꞌ tinaniꞌ jix naꞌcha el wu tol cꞌam junojxa Dios bꞌey yul yibꞌankꞌinal tiꞌ, yutol asanne je Diosal jaex Israel jex tiꞌ; yu tuꞌ xin, eloj yin ja cꞌul, tol ojabꞌ cha chaꞌ jin saꞌbꞌeal chi jul wakꞌ ey jaach tiꞌ, ẍi naj Naamán tuꞌ.

16 Jix takꞌwi naj Eliseo jaxca tiꞌ: Sattaj wal Jehová chi wakꞌon jin tiꞌ tol cꞌam chin chaꞌ tzetyetal cha wakꞌ tuꞌ, ẍi naj.

Caxcꞌal caw jix oc cꞌal tean naj yin, ma cꞌaltaꞌ ẍaꞌ naj.

17 Catuꞌ jix yalon Naamán jaxca tiꞌ:

—Ta jaxca tuꞌ xin, eloj wal yin ja cꞌul tol cha wakꞌ cacꞌonoj cheal ijatzil txꞌotxꞌ txꞌotxꞌ ey yul yet Israel tiꞌ,^a yin cacꞌonoj cheal chi wiꞌtoj, yutol jain ja wakꞌomal servil jin tiꞌ, cꞌamxa junojxa dios bꞌey oj skeꞌ wakꞌon jin xaambꞌal, tol asanne tet Jehová.

18 Asan jun chin kꞌan tet Jehová, tol chin yakꞌ mimancꞌulal, yutol jaꞌ yet oj toj naj jin reyal yin eyilal bꞌey stemplo sdiosal chi yij Rimón, oj oc quetzan naj yin jin kꞌabꞌ, catuꞌ sowalil oj jin ey kaan yetoj bꞌey templo tuꞌ; yakꞌ ojabꞌ mimancꞌulal Jehová wibꞌan yu jun tuꞌ, ẍi naj Naamán.

19 Jix takꞌwi naj Eliseo jaxca tiꞌ:

—Cꞌam cꞌal tzet cha naꞌ yu jun tuꞌ, asiꞌ, ẍi naj.

Catuꞌ jix too naj Naamán tuꞌ. Txenne to wal chi too naj, 20 catuꞌ jix snaꞌon Guehazí, naj yakꞌomal servil naj Eliseo jaxca tiꞌ: ¿Tzet taꞌ wal yu, yuxan tucꞌal jix chaꞌletoj naj Naamán a Siria tuꞌ yu naj bꞌey ey jin oc yakꞌomaloj servil tiꞌ yin tol cꞌam niꞌoj tzet jix ẍaꞌ can naj tet? Chi wakꞌ jin tiꞌ sattaj Jehová tol chin too tzajan yintaj naj an, yal cꞌal tzet oj wiꞌecꞌ tet naj, ẍi naj.

21 Catuꞌ jix too tzajan naj Guehazí yintaj naj. Jaꞌ yet jix yilontoj Naamán tol chi tit naj, jix eytej naj yul scarruaje, catuꞌ jix tit chaꞌle apnoj naj Guehazí tuꞌ yu naj, jix skꞌanlen jaxca tiꞌ:

—¿Tzet la yei, ma tol ey tzet jix ui? ẍi naj.

22 —Cꞌamaj, cꞌam cꞌal tzet, asan naj chi wakꞌ servil jix jin chejontej yu jul walon ey jaach, tol lalanto wal yapni oc cawan ebꞌ achꞌe ẍejabꞌ Dios, speto ebꞌ bꞌey txꞌotxꞌ tzalquiltaj txꞌotxꞌ yul yet Efraín. Yuxan chi skꞌan naj ey jaach ta cha wakꞌ oxebꞌ arroba chꞌen tumin plata yetoj caabꞌoj moan an pichile, ẍi tet naj.

23 Jix takꞌwi Naamán jaxca tiꞌ:

—El ojabꞌ yin ja cꞌul tol cha chaꞌ wal wajebꞌoj arroba chꞌen plata tiꞌ, ẍi naj.

Yajbꞌan chi oc cꞌal tean yin, jix yaon eytoj chꞌen tumin tuꞌ yetoj caabꞌ moan an pichile tuꞌ yul caabꞌ coẍtal, jix yaontej cawan yakꞌomal servil yetoj naj Guehazí tuꞌ.

24 Jaꞌ yet jix apni oc ebꞌ bꞌey jun tzalan bꞌey eyecꞌ naj Eliseo tuꞌ, catuꞌ jix yiꞌon ecꞌ naj Guehazí tzetyetal iꞌbꞌil oc yu ebꞌ yakꞌomal servil Naamán tuꞌ, catuꞌ jix scꞌubꞌan a naj yul sna, catuꞌ jix chejle pax ebꞌ tuꞌ yu naj.

25 Eyman jix jul naj scꞌatan syaawil tuꞌ, catuꞌ jix skꞌanlen naj Eliseo tet naj jaxca tiꞌ:

—¿Bꞌeytuꞌ jix jaach bꞌetoc ecꞌ cha Guehazí? ẍi naj.

—Cꞌam cꞌal bꞌey chin bꞌetecꞌoj, ẍi naj Guehazí tuꞌ.

26 Yelcꞌulal xacꞌal jix yal naj Eliseo jaxca tiꞌ:

—Jaꞌ yet jix eytej jun naj winaj bꞌey yul scarruaje, catuꞌ jix jaach jul chaꞌlei yu, ¿tumi ma yil jin pixan jun tuꞌ cha naꞌ? Jaꞌ tinaniꞌ man to smoo oj cu chaꞌon tumin cꞌal pichile, tam wal cu manon teꞌ awbꞌeal teꞌ, jaxca an olivo, cꞌal an uva, noꞌ meꞌ ma noꞌ wacax, ma ebꞌ naj yakꞌomal servil cꞌal ebꞌ ix yakꞌomal servil.

27 Yu jun tzet jix ja wun tuꞌ, yuxan jaꞌ tinaniꞌ chi oc can slepra naj Naamán tuꞌ ja win cꞌal yin ebꞌ ja wicꞌaal, ẍi naj.

Jaxa yet jix spoꞌolen sbꞌa naj Guehazí yetoj naj Eliseo, eyxa oc lepra yin naj, saj xacꞌal yili smimanil jaxca chꞌen cheew.