—Jaꞌ naj camom wichamil an, ja wotaj naj jaach tiꞌ, tol ey yeloc apnoj Jehová yul sat. Jaꞌ tinaniꞌ ey jun naj jix akꞌon tumin smaane naj camom wichamil tuꞌ an, catuꞌ jix apni oc naj jin cꞌatan an. Jaxa tinaniꞌ chi yoche naj tol chi iꞌletoj ebꞌ naj wuneꞌ yu yet chi oc ebꞌ naj yin yakꞌomaloj servil yu sqꞌuexel chꞌen maan tumin tuꞌ, ẍi ix tet naj.

2 Jix skꞌanlen naj Eliseo tet ix jaxca tiꞌ:

—¿Tzet chi yoche ja cꞌul chi wun ey jaach tinaniꞌ? Al ey jin tzetyetal ey bꞌey ja na, ẍi naj tet ix.

Jix yalon ix jaxca tiꞌ:

—Jaꞌ jain ja wakꞌomal servil tiꞌ, caw cꞌam niꞌoj tzetyetal ey, ey jin, asan chꞌan jun jin yaliẍ ẍalu aceite eyecꞌoj, ẍi ix tuꞌ.

3 Jix yalon naj Eliseo tet ix jaxca tiꞌ:

—Asiꞌ, catuꞌ cha maanen ecꞌaloj neet tet ebꞌ ánima caan ja cawilal, cha wiꞌtej jantaj cꞌal neet cꞌam tzet eey yul chi ilcha ja wu.

4 Eyman chach octoj yul ja na yetoj ebꞌ naj ja wuneꞌ tuꞌ. Cha majchen spuertail ja na tuꞌ, catuꞌ cha wakꞌon no masanil wan neet tuꞌ yetoj aceite. Txꞌoj bꞌey cha wakꞌcan ey wan chi no can tuꞌ, ẍi naj.

5 Jaꞌ yet jix lawi skꞌanabꞌ ix yetoj naj Eliseo tuꞌ, catuꞌ jix too ix smajchen octoj sbꞌa yul sna yetoj ebꞌ yuneꞌ tuꞌ, catuꞌ jix cꞌoli yakꞌon no wan neet jix yiꞌtej ebꞌ tuꞌ.

6 Jaꞌ yet tuxa chi no wan neet iꞌbꞌil oc yu ix tuꞌ, jix yalon ix tet junoj ebꞌ yuneꞌ tuꞌ jaxca tiꞌ:

—Iꞌtej junojxa cu neet tuꞌ, ẍi ix. Jix yalon jun yuneꞌ ix tuꞌ tet tol jix lawi wan neet tuꞌ. Jaxa yoc tucan sjul jun aceite tuꞌ.

7 Jix lawi tuꞌ xin, jix too ix yalon tet Eliseo, naj ẍejabꞌ Dios. Jix yalon naj tet ix jaxca tiꞌ:

—Jaꞌ tinaniꞌ asiꞌ txono aceite tuꞌ, catuꞌ cha toolanen can chꞌen ja jec tumin tuꞌ; jaxa jantaj to chꞌen chi cancan xin, chi oc chꞌen ja gastooj yetoj ebꞌ naj ja wuneꞌ tuꞌ, ẍi naj tet ix.

8 Ey jun cꞌual jix ecꞌ naj Eliseo bꞌey conobꞌ Sunem. Jaꞌ tituꞌ ey jun ix ix caw bꞌeom. Jix oc tean ix yin naj tol chi ecꞌ naj low bꞌey sna ix. Junjuntaj cꞌal el yet chi ecꞌ naj tituꞌ, chi ecꞌ naj lowoj.

9 Yuxan jix yal ix tet yichamil jaxca tiꞌ:

—Jaꞌ tinaniꞌ jix naꞌcha el wu tol jaꞌ naj chi ecꞌ cꞌaltaꞌ cu cꞌatan junjuntaj el, caw yel ẍejabꞌ Dios yeoc naj.

10 Yu tuꞌ xin, chi wal ey jaach an, tol chi cu waꞌne a junoj cuarto bꞌey yibꞌan cu na tiꞌ, catuꞌ chi kaon octoj junoj txꞌat yul, junoj meẍa, yetoj junoj ẍila, cꞌal junoj tzejtebꞌal, yuxan jaꞌ yet chi ecꞌ naj cu cꞌatan junelxa, jatuꞌ chi can naj, ẍi ix.

11 Jaxa yet jix apni oc naj Eliseo junelxa yetoj jun yakꞌomal servil chi yij Guehazí, jaꞌ yul jun cuarto jix waꞌxi tuꞌ, jatuꞌ jix wey ebꞌ naj.

12 Jix yalon naj Eliseo tet naj Guehazí, jun yakꞌomal servil tuꞌ jaxca tiꞌ:

—Awte ix a Sunem tuꞌ titiꞌ, ẍi naj.

Jix awtele ix yu naj, catuꞌ jix apni oc ix sattaj naj Eliseo tuꞌ.

13 Jix yalon naj tet jun yakꞌomal servil tuꞌ jaxca tiꞌ:

—Kꞌanle ja wabꞌ tet ix tzet chi yoche scꞌul ix, yutol yel xacꞌal chi xꞌox swatxꞌcꞌulal ix ey jon. Ta chi yal scꞌul ix chi skeꞌ kalon tet naj rey ma tet ebꞌ syaawil ebꞌ soldado yu ix, ẍi naj. Jix yalon ix jaxca tiꞌ:

—Cꞌamaj, tzꞌajan cꞌal ye tzet ey, ey jin, tzalacꞌulal cꞌal weoc yul jin conobꞌ tiꞌ, ẍi ix tet jun yakꞌomal servil naj Eliseo tuꞌ.

14 —¿Tzet watxꞌ chi kun tet ix chi yal tuꞌ? ẍi naj tet jun yakꞌomal servil tuꞌ.

—¿Cꞌam chi naꞌcha wu an? ẍi naj. Asan xin, cꞌam yuneꞌ ix, icham winajxa pax yichamil ix, ẍi naj Guehazí tuꞌ.

15 —Awtetej ix junelxa xin, ẍi naj Eliseo tuꞌ.

Catuꞌ jix awteletej ix junelxa yu naj, jix apni oc ix bꞌey stiꞌ spuertail jun cuarto tuꞌ. 16 Jix yalon naj Eliseo tuꞌ tet ix jaxca tiꞌ:

—Yabꞌ wal jaxca tiꞌ yet junxa abꞌil, tol chelbꞌilxa a junoj ja wuneꞌ ja wu, ẍi naj tet ix.

—Caw cꞌamaj jaach ẍejabꞌ Dios, pena xacꞌal ja walon ey jin chi wabꞌe, ẍi ix tet naj.

17 Jaxa jix yun xin, jix eloc jaxca jix yun yalon naj Eliseo tuꞌ, jix yijoc yuneꞌ ix, jaxa yet junxa abꞌil tuꞌ, jix ali jun yuneꞌ ix.

18 Jix chꞌibꞌa jun yaliẍ unin tuꞌ, ey jun cꞌual jix too naj unin tuꞌ yil smam, yutol eytoj naj mame tuꞌ yil ebꞌ kꞌupom tiriw.

19 Catuꞌ jix awi naj unin tuꞌ tet smam jaxca tiꞌ:

—Ay, caw yaꞌ jin jolom, caw yaꞌ jin jolom, ẍi naj.

Yu tuꞌ xin, jix yalon smam naj unin tuꞌ tet jun yakꞌomal servil jaxca tiꞌ:

—Iꞌtoj naj unin tiꞌ bꞌey xutx jin kꞌan an, ẍi naj.

20 Catuꞌ jix iꞌletoj naj unin tuꞌ yu jun yakꞌomal servil tuꞌ bꞌey xutx, catuꞌ jix ẍelon a yuneꞌ ix txutxe tuꞌ, jaxa yet chuman cꞌu xin jix cam naj unin tuꞌ.

21 Catuꞌ jix too ix yakꞌon can bꞌey yul scuarto naj ẍejabꞌ Dios tuꞌ, jix stelbꞌan atoj ix bꞌey sat txꞌat tuꞌ. Jix eltej ix, jix smajchen can spuertail jun cuarto tuꞌ.

22 Eyman jix yawte yichamil ix, jix yalon ix tet naj jaxca tiꞌ:

—Atoj junoj ebꞌ kakꞌomal servil tuꞌ yetoj junoj noꞌ bꞌuru tuꞌ wetoj an, yet chi too wilon naj ẍejabꞌ Dios; catuꞌ chin meltzo pax yin eymanil junelxa, ẍi ix.

23 —¿Tzet yuxan chi too ja wil naj tinaniꞌ? Tumi eyoc skꞌinal yali xꞌaaw tinaniꞌ tam wal scꞌual xewilal, ẍi yichamil ix tuꞌ tet.

—Cꞌam cꞌal tzet cha wal yu jun tuꞌ, ẍi ix tet naj.

24 Jix yalon ix tol chi oc stzꞌuum noꞌ che, jix yalon ix tet jun yakꞌomal servil jaxca tiꞌ:

—Toon xin, yelcꞌulal cha wujte noꞌ che tiꞌ walan an, masantaꞌcꞌal oj wal ey jaach bꞌey oj cu apnoj ocoj, ẍi ix tet naj.

25 Queytuꞌ jix yun stoo ix masantaꞌcꞌal jix apni oc bꞌey sjolom wonan chi yij Carmelo bꞌey eyecꞌ naj ẍejabꞌ Dios. Naat tocꞌal ey ix jix yilontej naj Eliseo, jix yalon naj tet naj Guehazí jaxca tiꞌ:

—Ilaꞌ lalan sjul ix a Sunem tituꞌ, ẍi naj.

26 Asiꞌ chaꞌ sjul ix, catuꞌ cha kꞌanlen tet ta watxꞌ cꞌal scꞌul ix yetoj yichamil yetoj cꞌal naj yaliẍ unin, ẍi naj.

Catuꞌ jix too chaꞌle apnoj ix yu naj. Jix skꞌanlen naj tet ix ta watxꞌ scꞌul ix, jix yaloni tol watxꞌ scꞌul ix.

27 Catuꞌ yin eymanil jix yun stoo ix bꞌey sjolom wonan Carmelo bꞌey eyecꞌ naj Eliseo tuꞌ, jix oc lakꞌan ix yin yajan naj, catuꞌ jix quetzle el ix yu naj Guehazí chi yute snaꞌoni. Jix yalon naj Eliseo tet naj Guehazí jaxca tiꞌ:

—Manche jaach oc quetzan yin ix, yutol caw wal cuscꞌulal yeoc spixan ix, cꞌamto tzet chi yal Jehová ey jin tzet yuxan jix jul ix, ẍi naj.

28 Catuꞌ jix yalon ix tet naj jaxca tiꞌ:

—Jaach ẍejabꞌ Dios, ¿tumi jain jix jin kꞌan ey jaach tol chi ali junoj wuneꞌ? ¿Tumi ma wal ey jaach tol tucꞌal cha waoc jun tiꞌ yipoj jin cꞌul? ẍi ix tet naj.

29 Catuꞌ jix yalon naj Eliseo tet naj Guehazí, jun yakꞌomal servil tuꞌ jaxca tiꞌ:

—Akꞌ lista ja bꞌa, catuꞌ cha wiꞌontoj jin kꞌojoch tiꞌ ja wetoj, catuꞌ chach too ja wilon yin eymanil. Cꞌam ojabꞌ cꞌal bꞌey chach oc tucanoj. Ta ey mactxequel cha chaꞌ, cꞌam ojabꞌ cha wakꞌ scawil scꞌul, ta ey mactxequel chi akꞌon scawil ja cꞌul, cꞌam ojabꞌ chach takꞌwi tet, catuꞌ eyman cha waey jin kꞌojoch tiꞌ yibꞌan sat naj unin tuꞌ, ẍi naj.

30 Jix yalon ix xutx naj unin tuꞌ jaxca tiꞌ:

—Sattaj Dios chi wakꞌon jin tiꞌ tol cꞌam chin el titiꞌ ta tol cꞌam chach too wetoj an, ẍi ix tet naj.

31 Queytuꞌ jix yun stoo naj Eliseo yetoj ix. Jal naj Guehazí tuꞌ xin, jix bꞌabꞌitoj naj tet ebꞌ, xax yaoc teꞌ kꞌojoche tuꞌ yibꞌan sat naj unin tuꞌ, cꞌam cꞌal niꞌoj yechel ta chi to jul scꞌul naj unin tuꞌ. Catuꞌ jix too chaꞌle naj Eliseo tuꞌ yu naj, jix yalon naj jaxca tiꞌ:

—Cꞌam chi jul scꞌul naj unin tuꞌ, ẍi naj.

32 Jaꞌ yet jix octoj naj Eliseo bꞌey yul cuarto tuꞌ, camnajxa el naj unin tuꞌ, pacꞌan ey naj bꞌey sat txꞌat.

33 Jix lawi tuꞌ, jix octoj naj Eliseo tuꞌ, jix smajchen eltej spuertail jun cuarto tuꞌ, catuꞌ jix txali naj tet Jehová. Xꞌojli cꞌal naj eyoctoj yul cuarto yetoj naj unin tuꞌ.

34 Eyman jix atoj naj sat txꞌat, jix ey noan yibꞌan naj unin tuꞌ, jix yaon ey sbꞌakꞌ sat yin sat naj, cꞌal stiꞌ yin stiꞌ naj yetoj cꞌal skꞌabꞌ yibꞌan skꞌabꞌ naj unin tuꞌ. Jix ey xacꞌal pajan yibꞌan naj unin tuꞌ, catuꞌ jix kꞌaxna a smimanil naj.

35 Jix a waan naj yibꞌan naj unin tuꞌ, catuꞌ jix ecꞌ lininoj naj yul na tuꞌ. Jix lawi tuꞌ, jix oc pax pajan yibꞌan naj unin tuꞌ junelxa jaxca jix yun yet sbꞌabꞌelal. Jaxa jix yun xin, jujel jix jatꞌiẍli naj unin tuꞌ, catuꞌ jix elol lemna sat naj.

36 Catuꞌ jix awtele naj Guehazí yu naj Eliseo, jix yalon jaxca tiꞌ:

—Awte ix Sunamita tinaniꞌ.

Catuꞌ jix awtele ix yu naj. Jaꞌ yet jix apni oc ix scꞌatan naj Eliseo tuꞌ, jix yalon naj tet ix jaxca tiꞌ:

—Ti ey naj ja wuneꞌ tiꞌ, ẍi naj tet ix.

37 Jix sjitzon oc sbꞌa ix, jix ey noan ix bꞌey yajantaj naj. Catuꞌ jix too ix scꞌatan yuneꞌ tuꞌ, jix lawi tuꞌ, jix eltej ix bꞌey yul scuarto naj Eliseo tuꞌ, yetoj naj unin tuꞌ.

38 Jaꞌ yet junel ey jun miman wail jix jul bꞌey conobꞌ Israel. Jix too naj Eliseo bꞌey Guilgal. Ey jun cꞌual chotan ey ebꞌ ẍejabꞌ Dios scꞌatan naj Eliseo yet chi cuywi ebꞌ. Jix yalon naj tet jun yakꞌomal servil jaxca tiꞌ: Aatoj junoj xi yibꞌan kꞌakꞌ, catuꞌ cha waꞌnen junoj loꞌbꞌe tet ebꞌ ẍejabꞌ Dios tiꞌ, ẍi naj Eliseo tuꞌ.

39 Ey jun xol ebꞌ tuꞌ jix too yambꞌa ita. Jaxa jix yunne, jix ilcha wan an xol-laj teꞌal kꞌum yu naj tol ey sat. Caw ecꞌal an sat teꞌ tuꞌ jix syambꞌatej naj, jix yiꞌontej yul sjojan pichil. Jaꞌ yet jix apni oc naj, catuꞌ jix oc ian skꞌupon eytoj teꞌ sat teꞌ tuꞌ naj bꞌey yul xial loꞌbꞌe tuꞌ, caw man yotaj oj naj tzetyetal.

40 Jix lawi tuꞌ, jix akꞌle sloꞌbꞌe ebꞌ ẍejabꞌ Dios tuꞌ yu naj. Jaꞌ yet jix ẍaꞌon el yich sloꞌon jun loꞌbꞌe tuꞌ ebꞌ, jix yaon el yaw ebꞌ, jix yalon ebꞌ jaxca tiꞌ:

—Jaach ẍejabꞌ Dios, jaꞌ jun loꞌbꞌe tiꞌ eytoj veneno xol, ẍi ebꞌ.

Yuxan ma xa sloꞌ ebꞌ.

41 Jix yalon naj Eliseo jaxca tiꞌ:

—Iꞌwejtej niꞌoj ixim jarina ey jin an, ẍi naj. Jix yaon eytoj jarina yul xi tuꞌ, jix yalon jaxca tiꞌ:

—Jaꞌ tinaniꞌ akꞌ low ebꞌ ánima tiꞌ, ẍi naj.

Jaxa yet jix sloꞌon ebꞌ ánima tuꞌ, watxꞌ xa jun loꞌbꞌe tuꞌ jix yabꞌ ebꞌ.

42 Jix lawi tuꞌ, jix apni oc jun winaj a conobꞌ Baal-salisá. Jaꞌ naj jix iꞌontej jun 20 ixim pan cebada yetoj ixim acꞌ tiriw tet naj Eliseo, iꞌbꞌil cꞌal pax oc ixim yaax sjolom cebada yu naj. Jix yalon naj Eliseo tet jun yakꞌomal servil tol chi yakꞌ ixim pan tuꞌ sloꞌ ebꞌ ánima eyecꞌ tuꞌ.

43 Jix takꞌwi jun yakꞌomal servil tuꞌ, jix yalon jaxca tiꞌ:

—Tumi wal oj skeꞌ wakꞌon niꞌan tiꞌ tet junoj 100 ánima tiꞌ cha naꞌ, ẍi naj. Jix yalon naj Eliseo jaxca tiꞌ:

—Akꞌ tet ebꞌ ánima tiꞌ, tuxa jix yal Jehová tol oj low ebꞌ, catuꞌ eyto cꞌal oj canoj, ẍi naj Eliseo.

44 Jix low ebꞌ ánima tuꞌ masanil. Eyto cꞌal jix cani, jaxca wal jix yun yalon Jehová tet naj Eliseo.