2 Caw pena cꞌal tzet jix el yunen naj sattaj Jehová, asan xin eyto wal ma apnoj spenail yintaj smam cꞌal xutx. Jaꞌ jun tiꞌ jix yiꞌel jun chꞌen chꞌen yet comon dios Baal, tol jaꞌ smam jix waꞌnen can aoj.

3 Caxcꞌal mi jaxca tuꞌ, caw jix sbꞌeybꞌalne cꞌal naj Joram tuꞌ jaxca spenail sbꞌeybꞌal naj Jeroboam scꞌaal Nabat, naj jix ijbꞌantoj ebꞌ Israel yin spenail.

4 Jaꞌ naj chi yij Mesá sreyal conobꞌ Moab, jobꞌom meꞌ naj yetoj masanil ebꞌ ánima ey yul conobꞌ tuꞌ. Yuxan jaꞌ stoolabꞌal chi yakꞌ tet naj sreyal Israel jaꞌton 100,000 noꞌ yuneꞌ meꞌ yetoj 100,000 noꞌ icham meꞌ yetoj cꞌal slanail noꞌ.

5 Jaxa yet jix cam naj Ahab, jix yiꞌel sbꞌa naj sreyal Moab tuꞌ yalan ẍejbꞌanil conobꞌ Israel.

6 Yu tuꞌ xin, jix el naj Joram bꞌey conobꞌ Samaria catuꞌ jix syambꞌan oc masanil ebꞌ soldado Israel.

7 Eyman jix yaltoj tet naj Josafat sreyal conobꞌ Judá jaxca tiꞌ: Jaꞌ naj sreyal conobꞌ Moab tuxa jix yiꞌel sbꞌa naj yul jin kꞌabꞌ, ¿chim yal ja cꞌul chach oc wetoj an, catuꞌ chi kakꞌon jowal yetoj? ẍi naj.

Jaxa jix yun stakꞌwi naj sreyal Judá tuꞌ jaxca tiꞌ: Oj jin toj ja wetoj yetoj cꞌal ebꞌ jin soldado cꞌal noꞌ jin che yet jowal tiꞌ, ẍi naj.

8 Asan xin chin kꞌanle ey jaach, ¿tzet bꞌeal oj kiꞌ yet oj cu toj yin jowal tuꞌ? ẍi naj. Jix takꞌwi naj Joram jaxca tiꞌ: Jaꞌ yul sbꞌeal txꞌotxꞌ cusiltaj txꞌotxꞌ yul yet Edom, jaꞌ tituꞌ oj cu toj, ẍi toj naj tet.

9 Queytuꞌ jix yun stoo naj sreyal Israel, naj sreyal Judá cꞌal naj sreyal Edom yetoj ebꞌ soldado yin jowal. Yutol jix ecꞌ cꞌal joyoyoj ebꞌ yin jujebꞌ cꞌual, yuxan jix lawi a jaꞌ jaꞌ chi yucꞌ ebꞌ soldado cꞌal yetoj yet masanil noꞌ che yet jowal iꞌbꞌil oc yu ebꞌ.

10 Jix lawi tuꞌ xin, jix yalon naj sreyal Israel jaxca tiꞌ:

—Jaꞌ tinaniꞌ jaxca wal tol jix jon syambꞌa oc Jehová jaon oxwan rey jon tiꞌ yet chi cu yaon oc yul skꞌabꞌ ebꞌ a Moab tiꞌ, ẍi naj.

11 Jix yalon naj Josafat jaxca tiꞌ:

—¿Cꞌam mi junoj ẍejabꞌ Dios cu xol tiꞌ, yet watxꞌ chi skꞌanle tet Jehová ku? ẍi naj.

Ey jun ebꞌ soldado naj sreyal conobꞌ Israel jix takꞌwi jaxca tiꞌ:

—Jaꞌ titiꞌ eyecꞌ naj Eliseo scꞌaal Safat. Jaꞌ jun tiꞌ yakꞌomal servil naj Elías yeoc naj yet yalantoj, ẍi naj.

12 Jaꞌ jun tuꞌ caw yel ẍejabꞌ Dios toni, ẍi naj Josafat sreyal Judá.

Yin eymanil jix yun stoo ebꞌ oxwan rey tuꞌ kꞌanabꞌ yetoj naj Eliseo.

13 Jaxa jix yun yalon naj Eliseo tet naj sreyal Israel tuꞌ jaxca tiꞌ:

—¿Tzet walon wet je yetoj? Jatuꞌ chi too je kꞌanle tet ebꞌ yakꞌomal servil dios yeoc yu ja mam cꞌal ja txutx, ẍi naj.

Caw jix oc cꞌal tean naj sreyal Israel tuꞌ yin naj jix yalon jaxca tiꞌ:

—Cꞌamaj, sowalil tol jaꞌ tet junoj ẍejabꞌ Dios chi cu kꞌanle jon, yutol jaꞌ Jehová jix cu iꞌontej titiꞌ yet chi cu eyqꞌuey yul skꞌabꞌ ebꞌ Moabita tiꞌ, ẍi naj.

14 Jix yalon naj Eliseo tet naj jaxca tiꞌ:

—Chi wal sattaj Jehová, Naj Yaaw yin Masanil, Naj chi wakꞌ servil, yu ey yeloc apnoj naj Josafat sreyal Judá tiꞌ yul jin sat, yuxan chin chaꞌ wabꞌ tzet cha walaꞌ, catuꞌ chin oc tꞌanan ja win.

15 Iꞌwejtej junoj mactxequel chi skeꞌ stenon teꞌ arpa jin sattaj, ẍi naj Eliseo tuꞌ. Catuꞌ jix yiꞌontej jun chi skeꞌ stenon arpa ebꞌ.

Jaꞌ yet lalan stenon arpa naj tuꞌ, jix jul yipalil Jehová yin naj Eliseo, 16 catuꞌ jix yalon jaxca tiꞌ:

—Jaꞌ Jehová jix alon jaxca tiꞌ: Waꞌnewej ecꞌaloj kꞌobꞌ bꞌey jun tajin jobꞌe tiꞌ, 17 caxcꞌal cꞌam kaꞌeꞌ cꞌal nabꞌ oj je yil sjuli, yutol jaꞌ bꞌey jun tajin jobꞌe tiꞌ oj no yu jaꞌ, yuxan oj je yucꞌ jaꞌ je masanil jaex tiꞌ, oj yuqꞌuen pax jaꞌ noꞌ je wacax yetoj cꞌal noꞌ je che.

18 Jaꞌ jun tiꞌ asan chꞌan junoj yaliẍ txꞌoxbꞌanileal tol subꞌotaj yeoc yul sat Jehová, tol tax oj ale oc ebꞌ Moabita yul je kꞌabꞌ yu Naj.

19 Jaex tiꞌ, oj je yuch lawoj masanil sconobꞌ ebꞌ tol watxꞌ yeoc smuroal, cꞌal wan mimej conobꞌ yeocoj. Oj je kꞌajwej ey masanil teꞌ awbꞌeal teꞌ awbꞌil yu ebꞌ, che mujon can el jaꞌ snukꞌ jaꞌ chi yucꞌ ebꞌ, catuꞌ oj je mujon can el xꞌotxꞌ ebꞌ yetoj chꞌen chꞌen bꞌey chi mulna ebꞌ, ẍi Jehová, ẍi naj Eliseo.

20 Jaxa jix yun xin, jaꞌ yet junxa skꞌinibꞌalil, jaxca wal yorail chi yun yakꞌle ofrenda sattaj Dios, jaꞌ bꞌey yul yet conobꞌ Edom jix tit jaꞌ jaꞌ, caw jix noel sat txꞌotxꞌ txꞌotxꞌ tuꞌ yu jaꞌ.

21 Yajbꞌan tuꞌ xin, jix naꞌcha el yu ebꞌ Moabita tol lalan yapni oc ebꞌ rey yakꞌon jowal yin ebꞌ. Yuxan jix yambꞌale oc masanil ebꞌ achꞌe cꞌal ebꞌ icham winaj yu ebꞌ, jaꞌton ebꞌ stiempo yoc yin soldadoal, catuꞌ jix oc ebꞌ smajon bꞌey yul moon tuꞌ.

22 Jaxa yet jix a waan ebꞌ yet skꞌinibꞌalil, tuxa cꞌal chi kopopi yili jaꞌ jaꞌ yu yajan cꞌu, jix yilontoj ebꞌ Moabita tuꞌ tol chicꞌ xacꞌal yili yibꞌan jaꞌ.

23 Yuxan jix yal ebꞌ jaxca tiꞌ: Jaꞌ jun tuꞌ chicꞌ. Tejan jaꞌ ebꞌ rey yetoj ebꞌ soldado jix smitxꞌle oc sbꞌa yin jowal, catuꞌ jix smakꞌlen cam sbꞌa ebꞌ, ẍi ebꞌ. Jaꞌ tinaniꞌ, toonwej yet chi kiꞌon can oc masanil stzetyetal ebꞌ jix cani, ẍi ebꞌ.

24 Jaxa yet jix apni oc ebꞌ Moabita bꞌey bꞌulan ey ebꞌ Israel tuꞌ, eyman jix oc ebꞌ Israel tuꞌ yakꞌon jowal yin ebꞌ. Jix ela ebꞌ Moabita tet ebꞌ, jix tzajlo xacꞌal ebꞌ Israel tuꞌ yintaj ebꞌ, jix makꞌle cam ebꞌ yu ebꞌ.

25 Jix lawi tuꞌ, jix uchle can lawoj sconobꞌ ebꞌ Moabita tuꞌ yu ebꞌ, jix yakꞌon no sat txꞌotxꞌ txꞌotxꞌ ebꞌ bꞌey chi oc mulnail yetoj chꞌen. Jix smujon can el jaꞌ snukꞌ jaꞌ ebꞌ, catuꞌ jix stzokꞌon a masanil teꞌ awbꞌeal teꞌ ebꞌ. Asanxane conobꞌ Quir-haréset jix cancanoj, jaxa ebꞌ chi kꞌojwa yetoj jinich jix oc joyan ebꞌ yinlaj conobꞌ tuꞌ, jix skꞌojontoj chꞌen chꞌen ebꞌ yibꞌan conobꞌ tuꞌ.

26 Jaꞌ yet jix yilon naj sreyal Moab tol caw jow yakꞌon jun jowal tuꞌ, jix yiꞌontej jun 700 ebꞌ soldado chi kꞌanbꞌalnen chꞌen espada. Jix yochen ebꞌ sjajon ecꞌtoj jun bꞌe bꞌey eyecꞌ naj sreyal Edom yaloni, ma xa skeꞌ yu ebꞌ.

27 Jix lawi tuꞌ, jix yiꞌontej naj sreyal Moab jun sbꞌabꞌel cꞌaal, jaꞌton naj tuꞌ tꞌinan yoc sqꞌuexeloj yin reyal. Jix yakꞌon tzꞌaꞌ yin xaambꞌalil bꞌey yibꞌan smuroal conobꞌ tuꞌ. Queytuꞌ jix yun stit sjowal naj yin ebꞌ Israel, catuꞌ jix yiꞌon el skꞌap na ebꞌ bꞌey bꞌulan ey tuꞌ, jix meltzo ebꞌ bꞌey sconobꞌ.