2 Catuꞌ jix yalon naj Elías tet naj Eliseo jaxca tiꞌ:

—Canan can titiꞌ yutol chin chejletoj yu Jehová bꞌey Betel, ẍi naj. Catuꞌ jix takꞌwi naj Eliseo tet jaxca tiꞌ:

—Chi wakꞌ jin tiꞌ ey jaach cꞌal sattaj Jehová tol oj jin toj cꞌal ja wetoj, ẍi naj.

Yuxan jix too ebꞌ naj scawanil bꞌey Betel tuꞌ.

3 Catuꞌ jix eltej ebꞌ ẍejabꞌ Dios ey bꞌey Betel tuꞌ ẍaꞌon ebꞌ, jix yalon ebꞌ tet naj Eliseo jaxca tiꞌ:

—¿Ja wotajxa mi tol jaꞌ tinaniꞌ oj iꞌle el naj ja cuyumal tiꞌ yu Jehová? ẍi ebꞌ tet naj.

—Wotajxa an; tzꞌin cꞌal je chi, ẍi naj Eliseo tet ebꞌ.

4 Jix lawi tuꞌ, jix yalon naj Elías tet naj Eliseo jaxca tiꞌ:

—Canan can titiꞌ, yutol chin chejletoj yu Jehová bꞌey Jericó, ẍi naj Elías. Catuꞌ jix takꞌwi pax naj Eliseo jaxca tiꞌ:

—Chi wakꞌ jin tiꞌ ey jaach cꞌal sattaj Jehová tol oj jin toj cꞌal ja wetoj, ẍi naj Eliseo.

Jix lawi tuꞌ jix too ebꞌ naj scawanil bꞌey Jericó.

5 Catuꞌ jix chaꞌle pax apnoj ebꞌ yu ebꞌ ẍejabꞌ Dios eyecꞌ tituꞌ, catuꞌ jix yalon ebꞌ tet naj Eliseo jaxca tiꞌ:

—¿Ja wotajxa mi tol jaꞌ tinaniꞌ oj iꞌle el naj ja cuyumal tiꞌ yu Jehová? ẍi ebꞌ tet naj.

—Wotajxa an; tzꞌin cꞌal je chi, ẍi naj Eliseo tet ebꞌ.

6 Jix lawi tuꞌ, jix yalon pax naj Elías tet naj Eliseo jaxca tiꞌ:

—Canan can titiꞌ, yutol chin chejletoj yu Jehová bꞌey jaꞌ Jordán, ẍi naj Elías. Catuꞌ jix takꞌwi pax naj Eliseo jaxca tiꞌ:

—Chi wakꞌ jin tiꞌ ey jaach cꞌal tet Jehová tol oj jin toj cꞌal ja wetoj, ẍi naj Eliseo.

Jix lawi tuꞌ jix too ebꞌ naj scawanil bꞌey jaꞌ Jordán.

7 Jix apni oc jun 50 ebꞌ ẍejabꞌ Dios scꞌatan ebꞌ cawan tuꞌ; naat jix oc can linan ebꞌ yiloni, jaxa ebꞌ naj cawan tuꞌ jix oc linan ebꞌ bꞌey stiꞌ jaꞌ Jordán.

8 Jix lawi tuꞌ, jix spajon ey an sjojan spichil naj Elías, catuꞌ jix smakꞌon ey naj yibꞌan sat jaꞌ Jordán tuꞌ. Catuꞌ jix spoꞌon sbꞌa jaꞌ, jix txeclo a jun tajin bꞌe, catuꞌ jix ecꞌtoj ebꞌ yul jun bꞌe tuꞌ.

9 Jix cꞌal wal kꞌaxbꞌo ecꞌtoj ebꞌ naj xin, catuꞌ jix yalon naj Elías tet naj Eliseo jaxca tiꞌ:

—Al ey jin tinaniꞌ tzet wal cha woche chi wakꞌ ey jaach yet cꞌamto chin iꞌle el ja cꞌatan tiꞌ, ẍi naj Elías.

Jix yalon naj Eliseo jaxca tiꞌ:

—Chin oc wal tean ja win, tol caabꞌ chi yun ja wakꞌon can wopiso tiꞌ, jaxca ojabꞌ tol ja bꞌabꞌel cꞌaal jin, yet chin cancan ja qꞌuexeloj, ẍi naj.

10 —Caw yaꞌtaj yoc jun cha kꞌan tuꞌ. Ta oj ja wil tzet oj yun wiꞌletoj, catuꞌ oj akꞌle can ey jaach. Ta man oj ja wil xin, man oj akꞌle ey jaach, ẍi naj Elías tuꞌ.

11 Yajbꞌan chi bꞌey ebꞌ naj scawanil xin, catuꞌ lalan skꞌanabꞌ ebꞌ. Eyman jix txeclo a jun carruaje kꞌakꞌ yetoj cacꞌon che tol kꞌakꞌ cꞌal pax eloj. Jaꞌ jix iꞌon el naj Elías scꞌatan naj Eliseo, catuꞌ jix iꞌletoj naj Elías tuꞌ bꞌey satcan xol jun cajxuchum kaꞌeꞌ.

12 Jaꞌ yet jix yilon naj Eliseo jaxca tuꞌ, catuꞌ jix a yaw naj jix yalon jaxca tiꞌ: ¡Jaach jin cuyumal, jaach jin cuyumal, tuxa jix jaach toi; ecꞌbꞌan ja jelanil jaxca soldado caw ey yip queytuꞌ ja weoc xol conobꞌ Israel! ẍi naj.

Jatax cꞌal yet tuꞌ, cꞌamxa bꞌey jix il-le yin naj Elías yu naj Eliseo.

Jix yiꞌon el jun jojan pichile eyoc yu naj Eliseo, catuꞌ jix stzilon ey snan spichil bꞌey sattaj yu xꞌoxon el scuscꞌulal.

13 Jix too naj yiꞌon cantej an sjojan pichil naj Elías jix cancanoj. Catuꞌ jix meltzo cantoj naj bꞌey jaꞌ Jordán, catuꞌ jix oc linan naj bꞌey stiꞌ jaꞌ tuꞌ.

14 Jix smakꞌon ey an sjojan pichil naj Elías bꞌey yibꞌan jaꞌ jaꞌ tuꞌ naj, catuꞌ jix a yaw naj, jix yalon jaxca tiꞌ: ¿Bꞌeytuꞌ eyoc Jehová sDiosal naj Elías? ẍi naj.

Jix cꞌal eyqꞌuey an pichile tuꞌ yibꞌan jaꞌ jaꞌ tuꞌ, catuꞌ jix spoꞌon sbꞌa jaꞌ. Queytuꞌ jix yun yecꞌtoj naj Eliseo bꞌey skꞌaxepal ecꞌtoj jaꞌ jaꞌ tuꞌ.

15 Jaꞌ yet jix yilon ebꞌ naj ẍejabꞌ Dios eyecꞌ bꞌey Jericó tuꞌ, jaꞌton ebꞌ naat jix can linan yiloni jix yalon ebꞌ jaxca tiꞌ: Caw jaꞌ yopiso naj Elías jix oc can yin naj Eliseo tiꞌ, ẍi ebꞌ.

Catuꞌ jix tit ebꞌ ẍaꞌoni, jix ey noan ebꞌ sattaj.

16 Jix yalon ebꞌ tet jaxca tiꞌ:

—Jaach ẍejabꞌ Dios, ilaꞌ tol ey 50 jaon ja wakꞌomal servil jon tiꞌ, caw ey cu bꞌejancꞌulal jon ja chejoni. Chi cu oc tean ja win, tol chi too cu sey naj ja cuyumal tuꞌ, tala cꞌuxan ey bꞌey jix kꞌojle cantoj naj yu Yespíritu Jehová bꞌey txꞌotxꞌ tzalquiltaj txꞌotxꞌ ma yul-laj jobꞌe, ẍi ebꞌ tet naj. Jix yalon naj tet jaxca tiꞌ:

—Cꞌamaj, cꞌam mactxequel chi toi, ẍi naj tet ebꞌ.

17 Jix oc cꞌal ian ebꞌ yalon tet naj, jix yalon naj tet ebꞌ jaxca tiꞌ: Asiꞌwej xin, ẍi naj tet ebꞌ. Catuꞌ jix too ebꞌ 50 tuꞌ seywal yin oxebꞌ cꞌual. Cꞌam cꞌal mactxequel jix ilcha yu ebꞌ.

18 Jix lawi tuꞌ, jix meltzotej ebꞌ bꞌey Jericó. Jaꞌ tituꞌ jix cancan naj Eliseo, jix yalon naj tet ebꞌ jaxca tiꞌ:

—Jix wal ey jex tol cꞌam mactxequel chi toi, jin chi, ẍi naj tet ebꞌ.

19 Jix yalon ebꞌ ánima caan bꞌey jun conobꞌ tuꞌ tet naj Eliseo jaxca tiꞌ:

—Il ton abꞌi wal swatxꞌil kilon jun txꞌotxꞌ tiꞌ, asan xin cꞌam tzet chi el sat txꞌotxꞌ yutol cꞌam swatxꞌil jaꞌ jaꞌ ey titiꞌ, ẍi ebꞌ.

20 Jix yalon naj tet ebꞌ jaxca tiꞌ:

—Iꞌwejtej atzꞌam atzꞌam yul junoj miman acꞌ secꞌ, ẍi naj Eliseo tet ebꞌ.

Jix yiꞌontej jun secꞌ atzꞌam ebꞌ tuꞌ tet naj, 21 catuꞌ jix too naj secon eytoj yul snukꞌ jaꞌ jaꞌ tuꞌ. Jix yalon naj jaxca tiꞌ:

Jaꞌ Jehová jix aloni: Tol jain chin waꞌne jun jaꞌ jaꞌ tiꞌ. Cꞌamxa bꞌakꞌin tol ey mac oj cam yu jaꞌ, cꞌamxa pax bꞌakꞌin tol cꞌam tzet chi skeꞌ sat txꞌotxꞌ txꞌotxꞌ tiꞌ yu jaꞌ, ẍi Jehová, ẍi naj.

22 Queytuꞌ jix yun swaꞌxi can el jaꞌ jaꞌ masantaꞌcꞌal tinaniꞌ, jaxca jix yun yalon naj Eliseo.

23 Jix lawi tuꞌ xin, catuꞌ jix atoj naj Eliseo bꞌey conobꞌ Betel. Jaꞌ yet lalan cꞌal sbꞌey stoi, catuꞌ jix elol jun bꞌulan ebꞌ naj achꞌe, chi bꞌawa ebꞌ yin naj, chi yalon ebꞌ jaxca tiꞌ: ¡Aantej jaach petx jolom, aantej jaach petx jolom! ẍi ebꞌ yin naj.

24 Catuꞌ jix too tꞌanan naj Eliseo yin ebꞌ naj, jix yalon jayebꞌ kꞌane tol man watxꞌoj yin sbꞌi Jehová. Yuxan eyman jix elol cacꞌon noꞌ oso xol teꞌ, catuꞌ jix kocꞌtzilneletoj ebꞌ naj 42 achꞌe tuꞌ yu noꞌ.

25 Eyman jix too naj Eliseo bꞌey sjolom wonan Carmelo, jaꞌ tituꞌ jix meltzo ecꞌtoj naj bꞌey conobꞌ Samaria.