Jaꞌ An Yet Scaabꞌ Libro
REYES
Scamichal Naj Ocozías
1
Jaꞌ yet jix camtoj naj rey Ahab, jix yiꞌel sbꞌa ebꞌ a Moab yalan ẍejbꞌanil conobꞌ Israel. 2 Ey jun cꞌual jix eltej pitxna naj Ocozías bꞌey stiꞌ swentanail spalacio, bꞌey caw naat eya bꞌey conobꞌ Samaria. Caw miman jix yun slawitoj naj, yuxan jix ẍejtoj wan yakꞌomal servil yet chi too skꞌanle yabꞌ ebꞌ tet Baal-zebub, sdiosal ebꞌ a Ecrón, ta tol oj too waꞌxoj scꞌul ma cꞌamajxa. 3 Jaxa jun yángel Jehová jix alon tet naj Elías a Tisbé jaxca tiꞌ: Asiꞌ, yet chach too ja chaꞌon ebꞌ yakꞌomal servil naj Ocozías, sreyal conobꞌ Samaria, catuꞌ cha kꞌanlen tet ebꞌ: ¿Tumi cꞌam Dios bꞌey Israel tuꞌ, yuxan jata cꞌal tet Baal-zebub, sdiosal Ecrón chi too je kꞌanle je yabꞌe? ja chi tet ebꞌ. 4 Catuꞌ cha walon cꞌal pax oj tol jain Jehová jin chi wal tet jun rey tuꞌ jaxca tiꞌ: Man xacꞌaltaꞌ oj jaach waꞌxoj, yutol oj jaach cam xacꞌal, ẍi Jehová, ja chi, ẍi jun ángel tuꞌ tet naj Elías.Jix lawi tuꞌ jix too naj Elías, jix sjije naj jaxca tzet jix al-le tuꞌ. 5 Jaxa cꞌal tituꞌ jix meltzotej ebꞌ yakꞌomal servil naj rey tuꞌ, yuxan jix skꞌanle naj tet ebꞌ jaxca tiꞌ:
—¿Tzet yuxan jix jex meltzo yin eymanil? ẍi naj tet ebꞌ.
6 Jix takꞌwi ebꞌ tet naj jaxca tiꞌ:
—Jaach rey, ey jun winaj jix eltej cu sattaj yul bꞌe tuꞌ jon. Jaꞌ jix alon ey jon jaxca tiꞌ: Paxanwejtoj bꞌey naj jix jex chejontej, catuꞌ che yalon tet naj jaxca tiꞌ: Tol jaxca tiꞌ yalon Jehová: ¿Tumi cꞌam Dios bꞌey ja conobꞌ tiꞌ, yuxan tol jata tet Baal-zebub sdiosal Ecrón cha watoj ja chejabꞌ yu skꞌanlen yabꞌe? Yu jun tzet jix ja naꞌ tuꞌ, yuxan manxa oj jaach waꞌxoj, oj jaach cꞌamxa cꞌal, ẍi Jehová, ẍi jun winaj tuꞌ ey jon, ẍi ebꞌ tet naj.
7 Jix skꞌanlen naj rey tet ebꞌ jaxca tiꞌ:
—¿Tzet utbꞌil yili jun winaj jix alon ey jex tuꞌ? ẍi naj tet ebꞌ.
8 —Jaꞌ jun winaj tuꞌ ey xil jun jojan pichile eyoc yin, yetoj jun tzꞌuum kꞌalile eyoc yin snan, ẍi ebꞌ tet naj.
—Jaꞌ jun tuꞌ jaꞌton Elías a Tisbé, ẍi naj rey tuꞌ.
9 Jix lawi tuꞌ, jix ẍejontoj jun capitán yetoj 50 soldado naj rey yet chi too iꞌletej naj yu ebꞌ. Jaꞌ yet jix apni oc ebꞌ, chotan ey naj Elías tuꞌ bꞌey jun tzalan. Catuꞌ jix yalon jun capitán tuꞌ jaxca tiꞌ:
—Jaach ẍejabꞌ Dios, jaꞌ naj rey chi aloni tol chach eytej tituꞌ, ẍi ebꞌ tet naj.
10 Jix takꞌwi naj Elías tet jaxca tiꞌ:
—Ta tol ẍejabꞌ jin Dios an, tit ojabꞌ kꞌakꞌ bꞌey satcan catuꞌ chach tzꞌaꞌtoj yetoj ebꞌ ja 50 soldado tuꞌ, ẍi naj Elías.
Jaꞌ yet jun txolan tuꞌ, jix tit kꞌakꞌ bꞌey satcan, catuꞌ jix tzꞌaꞌtoj ebꞌ masanil.
11 Jix lawi tuꞌ, jix ẍejontoj junxa capitán yetoj junxa 50 ebꞌ soldado naj rey. Jix too ebꞌ xin, jix yalon ebꞌ tet naj Elías jaxca tiꞌ:
—Jaach ẍejabꞌ Dios, eyantej yin eymanil ẍi naj rey, ẍi jun capitán tuꞌ.
12 Jix takꞌwi naj Elías jaxca tiꞌ:
—Ta tol ẍejabꞌ jin Dios, tit ojabꞌ kꞌakꞌ bꞌey satcan catuꞌ chach tzꞌaꞌtoj yetoj ebꞌ 50 ja soldado tuꞌ, ẍi naj tet ebꞌ. Yet cꞌal jun txolan tuꞌ jix eyol kꞌakꞌ bꞌey satcan, jix tzꞌaꞌtoj ebꞌ masanil.
13 Jix lawi tuꞌ, jix ẍejontoj junxa capitán yetoj junxa 50 ebꞌ soldado yet yoxelal naj rey. Jaꞌ naj capitán tuꞌ, jix atoj bꞌey eyecꞌ naj Elías, jix ey kaan sattaj, catuꞌ jix oc wal tean yin, jix yalon jaxca tiꞌ:
—Jaach ẍejabꞌ Dios, el ojabꞌ yin ja cꞌul tol ey ojabꞌ yeloc apnoj cu kꞌinal ja wu, cha wakꞌ mimancꞌulal win yetoj ebꞌ 50 soldado naj ja wakꞌomal servil tiꞌ.
14 Yutol jaꞌ wan ebꞌ naj capitán yetoj cꞌal ebꞌ soldado, jix jul yet sbꞌabꞌelal ey jaach tiꞌ, jix tzꞌaꞌtoj ebꞌ yu kꞌakꞌ jix tit bꞌey satcan. Jal jin pax jin jain tiꞌ xin, chin oc tean ja win, tol cha wakꞌ mimancꞌulal win, ẍi naj.
15 Jaxa jun yángel Jehová jix alon tet naj Elías jaxca tiꞌ:
—Asiꞌ yetoj ebꞌ, cꞌam chach xiwi, ẍi jun ángel tuꞌ tet naj.
Yuxan jix eytej naj Elías, jix too naj yetoj jun capitán tuꞌ, yet chi too il-le naj rey tuꞌ.
16 Jaꞌ yet jix apni oc naj Elías scꞌatan naj rey tuꞌ, jix yalon jaxca tiꞌ:
—Jaꞌ Jehová jix alon jaxca tiꞌ: Yutol jix ja chejtoj wan ebꞌ ja chejabꞌ bꞌey Baal-zebub diosal Ecrón, yet chi too skꞌanle junoj naꞌbꞌale ebꞌ, jaxca tol man eyoj ecꞌ Dios bꞌey Israel tiꞌ yet cha kꞌanlen junoj ja naꞌbꞌal, yu cꞌal jun tuꞌ, yuxan manxa oj jaach waꞌxoj, oj jaach cam xacꞌal, ẍi Jehová, ẍi naj Elías tet naj.
17 Jaxca ton tuꞌ jix yunne, jix cam xacꞌal naj Ocozías jaxca jix yun yalon naj Elías yu Jehová. Yutol cꞌam cꞌal junoj scꞌaal naj Ocozías tuꞌ, yuxan jaꞌ jun yuẍtaj chi yij Joram, jaꞌ jix oc can sqꞌuexeloj yin reyal. Jaꞌton yet caabꞌ abꞌil xa yoc naj Joram scꞌaal Josafat yin reyal bꞌey Judá.
18 Jaꞌ jantaj to skꞌaneal naj Ocozías tiꞌ, yetoj cꞌal tzet jix yunne, jatuꞌ tzꞌibꞌebꞌilcan bꞌey yul an juun bꞌey ey can ey skꞌaneal ebꞌ sreyal Israel.