Akꞌbꞌil Eyqꞌuey Ebꞌ A Egipto Bꞌey Carquemis
46
Jaꞌ Jehová jix kꞌanabꞌ tet naj Jeremías, yu tzet oj eloc masanil wan mimej conobꞌ tiꞌ. 2 Jix yal tzet oj jul yibꞌan Egipto, cꞌal yin ebꞌ soldado naj Necao sreyal Egipto, jaꞌton jun jix eyqꞌuey bꞌey Carquemis, scawilal jaꞌ miman Éufrates yu Nabucodonosor sreyal Babilonia. Jaꞌton yet scan abꞌil xa yoc naj Joaquim scꞌaal Josías yin reyal bꞌey Judá, jaꞌ yet tuꞌ jix yun jun tuꞌ. Jix yalon Jehová yu ebꞌ soldado yet Egipto:3 Chi awi ebꞌ syaawil ebꞌ soldado, chi yalon ebꞌ jaxca tiꞌ: Waꞌnewej je majbꞌal sat julbꞌal. Asiꞌwej yin jowal.
4 Awej oc stzꞌuum noꞌ je che, catuꞌ chex oc yibꞌan noꞌ. Awej oc je chꞌen kꞌoxcꞌom, catuꞌ che yaon oc je bꞌa yin xolilal. Nijwej xaam je lanza. Awej oc smajil xam je cꞌul, ẍi ebꞌ.
5 Chi yalon Jehová jaxca tiꞌ: ¿Tzetyetal jun chi wil tuꞌ? Ilaꞌ tol chi meltzo ebꞌ soldado naj Necao yin xiwcꞌulal. Sajleminaj xacꞌal chi yun yel ebꞌ akꞌom jowal. Cꞌamxa chi tit tꞌanan ebꞌ yintaj yel jininoj yu xiwcꞌulal.
6 Cꞌamxa chi skeꞌ yel ebꞌ tol jelantaꞌ sbꞌeyi. Jaꞌ ebꞌ jelan yakꞌon jowal, ma xa skeꞌ yela ebꞌ. Jaꞌ bꞌey norte bꞌey jaꞌ miman Éufrates chi telcꞌotoj ebꞌ.
7 ¿Bꞌeytet jun nación chi a can tuꞌ, jaxca chi yun jaꞌ miman Nilo, jaxca junoj jaꞌ chi malel yul sbꞌe?
8 Jaꞌton Egipto lalan ya can, jaxca chi yun ya can jaꞌ miman Nilo, jaxca junoj jaꞌ chi malel yul sbꞌe? Jix yalon ebꞌ a Egipto jaxca tiꞌ: Oj cu a can, catuꞌ oj kakꞌon noel sat txꞌotxꞌ txꞌotxꞌ tiꞌ; oj kakꞌ lawoj wan conobꞌlaj cꞌal yetoj masanil ebꞌ caan bꞌey, ẍi ebꞌ a Egipto.
9 Yakꞌ ojabꞌ ani noꞌ je che tuꞌ, stokꞌ ojabꞌtoj je carruaje noꞌ. Toj ojabꞌ ebꞌ soldado a Etiopía, cꞌal ebꞌ a Libia, iꞌbꞌil ojabꞌ oc smajbꞌal sat julbꞌal yu ebꞌ. Toj ojabꞌ cꞌal pax ebꞌ soldado a Lidia, ebꞌ caw jelan sjulwai.
10 Jaꞌton wal jun scꞌual sjowal jin cꞌul jain Jehová jin tiꞌ, jain Yaaw jin yibꞌan masanil, jun scꞌual yet oj jin pajtzen jin bꞌa tet ebꞌ chi jowi oc win. Oj cam masanil ebꞌ yu chꞌen espada, masantaꞌcꞌal oj bꞌoncha chꞌen yu chicꞌ, yutol cꞌamxa chi alcha jantaj sbꞌisil ebꞌ soldado oj cam bꞌey jun nación bꞌey yetcꞌulal norte, scawilal jaꞌ miman Éufrates.
11 Jex conobꞌ a Egipto, asiꞌwej sey ambꞌal bꞌey Galaad. Caxcꞌal mi ey miman ambꞌal che kꞌanaꞌ, cꞌamxa cꞌal tzet oj ocoj, yutol cꞌamxa ambꞌal chi skeꞌ scolwa je yin yet chex antelei.
12 Yotaj xa masanil nacionlaj tol lalan yel je qꞌuixwil; masanil xacꞌal bꞌey yul yibꞌankꞌinal chi abꞌle yel je yaw. Tuxa cꞌal chi stenle ecꞌ sbꞌa ebꞌ akꞌom jowal yeqꞌui; junne xacꞌal bꞌey chi ecꞌ bꞌal-labꞌoj ebꞌ sat txꞌotxꞌ, ẍi Jehová.
Jix Jul Nabucodonosor Yakꞌ Jowal Bꞌey Egipto
13 Jix kꞌanabꞌ Jehová tet naj Jeremías yin tzet oj yun stoo yakꞌon jowal naj rey Nabucodonosor yin conobꞌ Egipto:
14 Al yabꞌ ebꞌ conobꞌ bꞌey yul yet Egipto, jaꞌton: Bꞌey Migdol, bꞌey Menfis, cꞌal bꞌey Tafnes.
¡Jelan che yute je bꞌa! ¡Majwanwej, yutol lalan smakꞌle cam ebꞌ ánima je yinlaj yu chꞌen espada!
15 ¿Tzet yu, yuxan jix ela naj Apis tet jun yechel icham wacax bꞌey chi oc eyilal? ¿Tzet yu, yuxan ma skeꞌ stecꞌbꞌan sbꞌa naj? Queytuꞌ jix yunne, yutol jain Jehová jin jix wuch lawoj.
16 Chi ẍakꞌoc yajan ebꞌ soldado, chi telcꞌotoj ebꞌ, catuꞌ chi yal-len ebꞌ tet junjun jaxca tiꞌ: Eloj jonwej titiꞌ, catuꞌ chi cu toowej bꞌey cu conobꞌ, ma bꞌey cu nación bꞌey jix cu ali. ¡Eloj jonwej bꞌey lalan cu lawi el yu jowal tiꞌ! ẍi ebꞌ.
17 Yuxan akꞌwej yij sbꞌi naj sreyal Egipto jaxca tiꞌ: Naj Lekꞌtiꞌ, tuxa cꞌal chi xij yalaꞌ, je chi yin.
18 Jain Rey jin tiꞌ, tol ey jin cꞌal ecꞌoj. Jain chi wij Jehová, yaaw jin yibꞌan masanil, chi wakꞌ jin tiꞌ tol jaxca txꞌotxꞌ wonan Tabor tol naat yea xol wanxa wonan, jaxca txꞌotxꞌ wonan Carmelo yel xacꞌal naat yea yibꞌan jaꞌ mar, Queytuꞌ yeoc yipal jun chi jul je yin.
19 Yu jun tuꞌ, jaex caan jex bꞌey Egipto tiꞌ, akꞌwej lista je bꞌa, yutol oj jex iꞌletoj yin presowomal. Jaꞌ conobꞌ Menfis, cusiltaj txꞌotxꞌ xacꞌal oj yun cantoj, tuxa cꞌal oj uchchacantoj, cꞌamxa mactxequel oj caey ecꞌoj.
20 Jaꞌ Egipto laan jaxca junoj noꞌ kꞌopo wacax watxꞌ yili, asan xin, ey jun chi tit bꞌey yetcꞌulal norte yet chi jul yakꞌon lawoj jaxca junoj noꞌ yaax jaꞌ chi jul chiꞌontoj.
21 Jaꞌ wan soldado manbꞌiltej, caw wal bꞌakꞌech ebꞌ jaxca noꞌ wacax caw bꞌakꞌech, jaꞌjun ebꞌ oj elaoj. Manxa oj skeꞌ stecꞌbꞌan sbꞌa ebꞌ, yutol chi jul scꞌual cꞌal yorail yakꞌle lawoj ey ebꞌ yu syaꞌilal.
22 Jain caw Jehová jin chi walaꞌ: Jaꞌ yet oj jul ebꞌ soldado yakꞌon jowal yin Egipto tiꞌ, tuxa cꞌal oj lujlon a ebꞌ yela jaxca junoj noꞌ labꞌa chi ela yet chi xiwa noꞌ. Oj jul wan scajat ebꞌ yin jaxca wal yet chi too junoj winaj yetoj eche, yet chi skꞌajon ey junoj teꞌ.
23 Jain Jehová jin chi walaꞌ, tol oj kꞌajle ey ebꞌ jaxca chi yun skꞌajle ey teꞌ mimej teꞌ. Caw miman sbꞌisil ebꞌ soldado tuꞌ jaxca noꞌ kochiꞌ noꞌ, tol cꞌamxa mac chi skeꞌ sbꞌisoni.
24 Jaꞌ ebꞌ a Egipto tiꞌ oj qꞌuixwoj a ebꞌ, oj eyqꞌuey ebꞌ yul skꞌabꞌ ebꞌ conobꞌlaj speto bꞌey yetcꞌulal norte, ẍi Jehová.
25 Jaꞌ Jehová, Naj Yaaw yibꞌan masanil, jaꞌton sDiosal Israel, chi alon jaxca tiꞌ: Oj wakꞌ lawoj ey jun comon dios chi yij Amón, jaꞌton sdiosal conobꞌ Tebas. Oj wakꞌ lawoj ey sdiosal cꞌal yetoj sreyal. Oj wakꞌ eyqꞌuey sreyal Egipto yetoj cꞌal ebꞌ chi yaoc yipoj scꞌul. 26 Oj wakꞌ eyqꞌuey ebꞌ yul skꞌabꞌ scajat, jaꞌton Nabucodonosor sreyal Babilonia yetoj cꞌal soldado. Jain Jehová jin chi walaꞌ, tol jaꞌ yet bꞌakꞌin oj caey pax ecꞌ ebꞌ ánima bꞌey Egipto tiꞌ junelxa, jaxca cꞌaltaꞌ yeocoj, ẍi Jehová.
Jaꞌ Jehová Oj Colon El Sconobꞌ
27 Jex Israel, yicꞌaal Jacob, jin chejabꞌ jex, cꞌam ojabꞌ chex xiwi, yutol oj jex jin colel yetoj je yuninal bꞌey jun nación naat ye cantoj bꞌey jix jex iꞌletoj yin presowomal. Jain Jehová jin chi walaꞌ: Tol oj jex caey junelxa yin tzalacꞌulal, yin tol cꞌamxa mactxequel oj jex xibꞌtenoj.
28 Cꞌam ojabꞌ chex xiw jex sconobꞌ Jacob, tol jin chejabꞌ je yeocoj. Ey jin cꞌal oc je yetoj, catuꞌ oj wakꞌ lawoj ey masanil wan nacionlaj bꞌey jix jex jin sajlemne cantoj. Jaex tiꞌ, man oj jex wakꞌ lawoj eyoj; asan tol oj waoc syaꞌilal je yibꞌan jaxca wal smooalil; man oj jex can cꞌal pax yin tol man oj waoc syaꞌilal je yibꞌan, ẍi Jehová.