Jaꞌ yet scan abꞌil yoc naj Joaquim scꞌaal Josías yin reyal bꞌey Judá, jaꞌ yet tuꞌ, jix stzꞌibꞌen naj Baruc scꞌaal Nerías, jantaj tzet chi yal Jeremías, naj ẍejabꞌ Dios, jaꞌ yet tuꞌ jix yalon Jeremías tet naj Baruc jaxca tiꞌ: Jaꞌ Jehová cu Diosal chi alon ey jaach jaxca tiꞌ: 2-3 Jaach tiꞌ, jaach Baruc, cha wal jaxca tiꞌ: ¡Okꞌbꞌal jin cꞌul, asan cꞌal syaꞌilal cꞌal bꞌiscꞌulal chi yakꞌ Jehová wibꞌan! Lalanxa jin cꞌuumbꞌi a wokꞌi, cꞌamxa cꞌal chin xew niꞌoj chi wabꞌe, ja chi. 4 Yel toni, tol jain Jehová jin lalan wakꞌon lawoj ey jantaj tzetyetal jix jin waꞌne aoj, lalan jin tokꞌon atej xeꞌ jantaj tzetyetal jix wawaꞌ. Queytuꞌ oj wun bꞌey masanil nación tiꞌ. 5 ¿Jaach tiꞌ, man smoo oj cha kꞌanaꞌ tzet chi yun ja wa can? Cꞌam ojabꞌxa cha kꞌanaꞌ, yutol oj watoj syaꞌilal yibꞌan masanil ánima. Jain Jehová jin chi walaꞌ, tol man oj jaach jin chaꞌ makꞌle camoj, yal cꞌal bꞌey oj jaach ecꞌoj, ẍi Jehová, ẍi naj Jeremías.