7 Yuxan jain Jehová jin, yaaw jin yibꞌan masanil, je Diosal jin pax oj, jain chi walaꞌ: ¿Tzet yu, yuxan che yiꞌtej jun miman syaꞌilal tuꞌ je yibꞌan tinaniꞌ? ¿Tzet yu, yuxan chi cam masanil ánima yul yet Judá je yu tinaniꞌ, chi cam ebꞌ winaj, ebꞌ ix ix, ebꞌ unin, yetoj cꞌal ebꞌ lalanto yali; chi yal yeloc apnoj tol cꞌamxa mac oj iquisbꞌoj can ecꞌoj? 8 ¿Tzet yu, yuxan jacꞌalaꞌ je txꞌemontej sjowal jin cꞌul, yutol che yakꞌ incienso yin xaambꞌalil tet je diosal, cꞌal tet wanxa sdiosal Egipto bꞌey jix jex caey tuꞌ? Yu jun tuꞌ, yuxan oj jex lawoj eyoj. Oj jul syaꞌtajilal je yibꞌan, oj jex bꞌuchle yu masanil nacionlaj bꞌey yul yibꞌankꞌinal tiꞌ. 9 ¿Tumi lalanxa stoo qꞌueycꞌulal je yu jantajxa spenail jix yun ebꞌ je mam icham, cꞌal ebꞌ sreyal Judá, yetoj cꞌal yistil ebꞌ? Jix oc cꞌal pax je penail yetoj ebꞌ je yistil bꞌey masanil yul yet Judá, cꞌal bꞌey yul-laj scalleal Jerusalén. 10 Ilaꞌ tinaniꞌ, tol cꞌam tocꞌal che qꞌuex je bꞌeybꞌal, tam wal chex xiw niꞌoj. Cꞌam cꞌal che jije jin chejbꞌanil cꞌal jin ley jix wal ey jex, jaxca cꞌal jix yun walon tet ebꞌ je mam icham.

11 Yu jun tuꞌ, yuxan chi wal jain Jehová jin tiꞌ, yaaw jin yibꞌan masanil, je Diosal jin pax oj: Tuxa jix jin naꞌ tol oj watej junoj syaꞌilal je yibꞌan, oj jex qꞌueyle el je masanil jaex a Judá tiꞌ. 12 Jaꞌ tzet oj jex wute tinaniꞌ, jaex jix jex cancan bꞌey Judá tuꞌ; jix jex jul pax bꞌey Egipto tiꞌ, oj jex wakꞌ qꞌueyel yin junelne, masanil ebꞌ yaliẍ unin cꞌal ebꞌ icham ánima, oj cam ebꞌ yu jowal cꞌal yu wail. Oj jul syaꞌtajilal je yibꞌan, yeynajil oj jex wute. Jaꞌ ebꞌ oj jex ilonoj, oj xiwa ebꞌ. 13 Oj waoc je yaꞌilal, mac jex caan jex bꞌey Egipto tiꞌ, jaxca wal jix yun wakꞌon syaꞌilal ebꞌ bꞌey Jerusalén yetoj jowal, wail, cꞌal yetoj syaꞌilal. 14 Jal jaywan jex a Judá jex tiꞌ, jex tol caan jex bꞌey Egipto tiꞌ, cꞌamxa junoj jex oj jex colcha canoj. Caxcꞌal mi oj je yoche oj jex too caey bꞌey Judá junelxa, asan jaywan jex oj skeꞌ je colon je bꞌa bꞌey Judá tuꞌ, ẍi Jehová, ẍi naj Jeremías.

15 Jaꞌ masanil ebꞌ winaj tol yotaj tol jaꞌ ebꞌ ix yistil ebꞌ chi yakꞌ incienso yin xaambꞌalil tet wan comon dios, masanil ebꞌ ix ix ey tituꞌ, caw ecꞌal ebꞌ ix, cꞌal masanil ebꞌ a Judá caan bꞌey Egipto, cꞌal bꞌey Patros jix takꞌwi ebꞌ tet naj Jeremías jaxca tiꞌ:

16 —Man oj cu jije skꞌane Jehová jix ja wal ey jon tuꞌ. 17 Oj cu bꞌeybꞌalne cꞌaltaꞌ jaxca tzetyetal jix cu naꞌ tol oj cu bꞌeybꞌalne. Oj kakꞌ cꞌaltaꞌ incienso cꞌal vino yin xaambꞌalil tet ix syaawil satcan, jaxca cꞌal lalan kunen tinaniꞌ, jaxca cꞌal jix yun ebꞌ cu mam icham cꞌal ebꞌ cu reyal, yetoj cꞌal ebꞌ syaawil conobꞌ yeoc bꞌey Judá, bꞌey yul-laj scalleal Jerusalén. Yutol jaꞌ yet peyxa tuꞌ, ey cu loꞌbꞌe, watxꞌ cꞌal cu bꞌeytoj, cꞌam cꞌal junoj syaꞌilal jix jul kibꞌan. 18 Jato wal yet jix cu bꞌejon kakꞌon incienso cꞌal vino yin xaambꞌalil tet ix syaawil satcan tiꞌ, catuꞌ cꞌamxa tzet ey, ey jon, chi cu cam xacꞌal yu wail cꞌal yu jowal, ẍi ebꞌ.

19 Jix yalon cꞌal pax ebꞌ ix ix jaxca tiꞌ:

—Jaon tiꞌ jix cu waꞌne ixim loꞌbꞌe jaxca yili yechel ix syaawil satcan, jix kakꞌ incienso cꞌal vino yin xaambꞌalil tet, jaꞌ masanil tzet jix kun tuꞌ, yotaj ebꞌ naj kichamil yeoc jun tiꞌ, ẍi ebꞌ ix.

20 Jix lawi tuꞌ xin, jix takꞌwi naj Jeremías tet ebꞌ winaj cꞌal tet ebꞌ ix ix tuꞌ, jix yalon jaxca tiꞌ:

21 —¿Chim wal je naꞌ jaex tiꞌ tol man yotaj oj Jehová, ma jix too qꞌueycꞌulal yu, tol jix je yakꞌ incienso yin xaambꞌalil tet wan comon dios tuꞌ, bꞌey yul-laj scalleal Jerusalén jaxca jix yun ebꞌ je mam icham, ebꞌ je reyal, ebꞌ yaaw yeoc je xol, cꞌal yetoj masanil ebꞌ ánima bꞌey Judá? 22 Jaꞌ Jehová, ma techa yilon oc wan je bꞌeybꞌal caw wal pena tuꞌ, tol ma ẍaꞌ scꞌul Naj. Yu jun tuꞌ, yuxan jaꞌ cu conobꞌ tiꞌ, tuxa jix uchcha ey tinaniꞌ, cꞌamxa mactxequel caan bꞌey. Tuxa jix jul syaꞌtajilal kibꞌan, caw chi xiwa ebꞌ ánima yilon ocoj. 23 Jaꞌ jun syaꞌilal chi jul kibꞌan tinaniꞌ, smoo cu chaꞌoni, yutol jacꞌalaꞌ je yakꞌon incienso yin xaambꞌalil tet wan comon dios. Jacꞌalaꞌ je yaon oc je penail sattaj Jehová, yutol ma je jije cuybꞌanile chi yakꞌa, cꞌal sley, tam wal jix je jije ẍejbꞌanil, ẍi naj Jeremías.

24 Jix yalon cꞌal pax naj Jeremías tet ebꞌ ix ix cꞌal tet masanil ebꞌ conobꞌ:

—Je masanil jex wet conobꞌ Judá, jex tol caan jex yul yet Egipto, abꞌwej yalon skꞌane Jehová cu Diosal. 25 Jaꞌ Jehová, Naj tol miman yipalil, cu Diosal jaon Israel jon tiꞌ, chi yal jaxca tiꞌ: Jaex tiꞌ, yetoj cꞌal ebꞌ ix je yistil, jix je yakꞌ je tiꞌ tet ix syaawil satcan yin je yakꞌon tzꞌaꞌ incienso, cꞌal je yakꞌon vino yin ofrendail; bꞌey lalan je jijen je yunen bꞌey jix je yakꞌ can je tiꞌ tuꞌ. Watxꞌ toni, jijewej je yunen bꞌey jix je yakꞌ je tiꞌ tuꞌ. 26 Abꞌwej wal je masanil jex a Judá, jex caan jex bꞌey Egipto, tol jaꞌ Jehová chi yal jaxca tiꞌ: Jain chi wakꞌ jin tiꞌ, tol cꞌamxa junoj ebꞌ a Judá oj akꞌon bꞌina jin bꞌi bꞌey Egipto tiꞌ, yin yakꞌon stiꞌ yin junoj tzetyetal. 27 Yutol lalan wiloni, tol oj watej syaꞌilal je yibꞌan, man swatxꞌilal oj watej. Je masanil jex a Judá, jex tol caan jex bꞌey Egipto tiꞌ, oj jex lawoj el yu jowal, cꞌal yu wail. 28 Jaywanxane jex oj jex colcha el xol jowal tuꞌ, oj jex el bꞌey Egipto tiꞌ, catuꞌ oj jex tojcan bꞌey Judá. Je masanil jex a Judá, jantaj jex jix jex apni oc caan bꞌey Egipto tuꞌ, oj je yilaꞌ mac yel chi yalaꞌ, tumi jaꞌ tzet chi walaꞌ, ma tol jaꞌ tzet che yalaꞌ. 29 Jain Jehová jin chi wakꞌ jun txꞌoxbꞌanile tiꞌ, tol oj waoc syaꞌilal naꞌbꞌilxa wu, tol oj jex wakꞌ lawoj ey bꞌey jun nación tiꞌ, jaxca jix yun wakꞌon can jin tiꞌ. 30 Oj waoc naj Hofra, sreyal Egipto yul skꞌabꞌ ebꞌ scajat chi yoche oj makꞌon camoj, jaxca wal jix yun waon oc naj Sedequías sreyal Judá, yul skꞌabꞌ Nabucodonosor sreyal Babilonia, jaꞌton scajat jix yochen jix akꞌon camoj, ẍi Jehová, ẍi naj Jeremías.