Jaꞌ Jehová Oj Yakꞌ Yaawil Yin Watxꞌcꞌulal Yet Slawubꞌ Cꞌual
2
Jaꞌ tzet jix txꞌoxle yil naj Isaías scꞌaal Amós, yu tzet lalan sjul yibꞌan Judá cꞌal yin Jerusalén:2 Jaꞌ yet slawubꞌ cꞌual tuꞌ, jaꞌ txꞌotxꞌ wonan Sión bꞌey ey stemplo Jehová, tol miman oj yun can a steel, tol oj ecꞌbꞌantoj steel yintaj wanxa mimej wonan eya yinlaj tuꞌ. Jaꞌ masanil ebꞌ conobꞌlaj oj apnoj oc bꞌululoj ebꞌ tituꞌ.
3 Catuꞌ oj yalon ebꞌ jaxca tiꞌ: Titanwej, toonwej, aoj jonwejtoj bꞌey wonan bꞌey ey sna Jehová, sDiosal Jacob. Catuꞌ oj cu cuyle yu Naj yin watxꞌ bꞌeybꞌale, queyton tuꞌ oj yun cu bꞌeybꞌalnen swatxꞌ bꞌeybꞌal tuꞌ, ẍi ebꞌ. Yutol jaꞌ bꞌey wonan Sión oj eltej chejbꞌanile, cꞌal bꞌey Jerusalén oj eltej skꞌane Jehová.
4 Jaꞌ Jehová oj naꞌon oc yin junjun conobꞌ bꞌey ey jowal, oj lawoj ey jowal tuꞌ xol ebꞌ. Jaꞌ yespada ebꞌ oj oc can chꞌen yin azaronal, jaꞌ xaam slanza ebꞌ oj oc can yin kꞌupbꞌal xaj teꞌ. Manxa oj yakꞌ jowal ebꞌ. Manxa oj scuyle sbꞌa ebꞌ soldado yin yakꞌon jowal.
5 Jex yicꞌaal Jacob titanwej, oj cu bꞌeytoj xol sajkꞌinal chi yakꞌ Jehová.
Oj Akꞌle Cuenta Ebꞌ Pena Chi Yute Sbꞌa Sattaj Jehová
6 Jaach Jehová cu Diosal, yel ton wal bꞌian tol bꞌejbꞌil can ja conobꞌ tiꞌ ja wu, jaꞌton ebꞌ yicꞌaal Jacob, yutol nonaj el sconobꞌ ebꞌ yu ebꞌ atxum chi tit yetcꞌulal bꞌey chi aol cꞌu, yetoj cꞌal ebꞌ chi naꞌon el junoj kꞌane, jaxca chi yute sbꞌa ebꞌ Filisteo, catuꞌ chi yakꞌon swa kꞌane yetoj ebꞌ txꞌoj conobꞌal.
7 Jaꞌ xꞌotxꞌ ebꞌ Israel tuꞌ, nonaj el yu chꞌen oro cꞌal yu chꞌen plata. Cꞌamxa chi alcha jantaj sbꞌeomal ebꞌ. Nonaj cꞌal pax el yul sconobꞌ ebꞌ yu noꞌ che, cꞌamxa chi bꞌischa jantaj scarruaje ebꞌ.
8 Caw nonaj el yul sconobꞌ ebꞌ yu yechel wan comon dios, catuꞌ chi ey kaan ebꞌ ánima tet yechel tzetyetal jix swaꞌne ebꞌ tuꞌ.
9 Yu jun tuꞌ, yuxan yeynajil ánima xacꞌal jix yun cantoj ebꞌ. Cꞌam ojabꞌ cha wakꞌ mimancꞌulal yin ebꞌ.
10 Jex wet conobꞌ, ewbꞌawej el je bꞌa yul-laj chꞌen nachꞌen, ewbꞌawej el je bꞌa yul-laj xabꞌ. Smoo wal tol chex xiw tet Jehová, yutol ey smey yili yet oj jul Naj xol stzejejial.
11 Jaꞌ yet jun cꞌual tuꞌ, tuxa cꞌal oj ey mocꞌan ebꞌ chi smeyne sbꞌa. Jaꞌ ebꞌ chi yiꞌa can sbꞌa, oj iꞌle ey ebꞌ. Asanne Jehová oj iꞌle a can sbꞌi yet jun cꞌual tuꞌ.
12 Jaꞌ Jehová Naj chi skeꞌ yu masanil, oj jul jun scꞌual tol naꞌbꞌilxa yu, yet chi yaontej sjowal scꞌul yibꞌan ebꞌ chi smeyne sbꞌa, cꞌal ebꞌ chi smimanbꞌane sbꞌa, cꞌal ebꞌ chi yiꞌa can sbꞌa.
13 Catuꞌ oj qꞌueyle el masanil ebꞌ chi smimanbꞌane sbꞌa jaxca teꞌ kꞌuteꞌ mimej steel bꞌey txꞌotxꞌ Líbano, cꞌal masanil teꞌ jii bꞌey txꞌotxꞌ Basán.
14 Catuꞌ oj qꞌueyle el masanil ebꞌ miman yeloc apnoj snaꞌoni jaxca mimej wonan, yetoj cꞌal txꞌotxꞌ mimej tzalan.
15 Oj qꞌueyle can el masanil ebꞌ chi naꞌoni tol laan ebꞌ jaxca storreal cꞌal smuroal masanil conobꞌ tol joyan oc yinlaj.
16 Catuꞌ oj qꞌueyle can el masanil ebꞌ chi naꞌoni tol laan ebꞌ jaxca teꞌ barco yet Tarsis cꞌal masanil teꞌ barco watxꞌ yili.
17 Oj lawoj ey masanil ebꞌ ánima chi smeyne sbꞌa. Jaꞌ smeynebꞌail ebꞌ ánima tuꞌ, oj akꞌle lawoj. Asanne ton Jehová oj iꞌle a can sbꞌi yet jun cꞌual tuꞌ.
18 Oj yakꞌon qꞌueyle el masanil yechel comon dios; cꞌamxa cꞌal junoj oj cancanoj.
19 Jaꞌ yet oj bꞌilwoj jun yul yibꞌankꞌinal tiꞌ yu Jehová, oj octoj ebꞌ ánima yul-laj nachꞌen, cꞌal yul-laj sjolanil txꞌotxꞌ txꞌotxꞌ, yu scꞌubꞌan el sbꞌa ebꞌ yu xiwcꞌulal tet Naj tol ey smey, yutol miman yeloc apnoj yetoj stzejejial.
20 Jaꞌ yet jun cꞌual tuꞌ, jaꞌ ebꞌ ánima oj skꞌojcantoj yechel wan comon dios ebꞌ bꞌey ey noꞌ txꞌow, cꞌal bꞌey ey noꞌ sotzꞌ, jaꞌton wan echele waꞌnebꞌil yetoj chꞌen plata, cꞌal yin chꞌen oro, jaꞌton wan bꞌey chi oc ebꞌ yin eyilal tet.
21 Jaꞌ yet oj bꞌilwoj jun yul yibꞌankꞌinal tiꞌ yu Jehová, oj octoj ebꞌ ánima yul-laj nachꞌen, cꞌal yul-laj sjolanil txꞌotxꞌ txꞌotxꞌ, yu scꞌubꞌan el sbꞌa yu xiwcꞌulal tet Naj tol ey smey, yutol miman yeloc apnoj yetoj stzejejial.
22 Bꞌejwej je yaon oc ebꞌ ket animail yipoj je cꞌul, yutol cambꞌeal yeoc ebꞌ, catuꞌ cꞌam niꞌoj yeloc apnoj ebꞌ, yuxan cꞌam ojabꞌ chi kaoc cu naꞌbꞌal yin ebꞌ ánima.