Jaꞌ Jehová Oj Yakꞌ Yaawil Yin Watxꞌcꞌulal
4
Jaꞌ yet slawubꞌal, oj can xacꞌal can jun tzalan bꞌey eyecꞌ stemplo Jehová.Jaꞌ jun wonan tuꞌ, yel xacꞌal naat oj yunna steel yintaj wanxa wonan. Oj lawoj tuꞌ xin, catuꞌ oj jul masanil wanxa nacionlaj.
2 Caw miman sbꞌisil ebꞌ conobꞌ oj yamcha oc tuꞌ, oj yalon junjun ebꞌ jaxca tiꞌ: Titanwej, kawejtoj bꞌey sjolom wonan bꞌey ey stemplo Jehová, sDiosal ebꞌ yicꞌaal Jacob, yet watxꞌ chi cu cuyuꞌ cꞌal cu bꞌeybꞌalneni, ẍim ebꞌ. Yutol jaꞌ bꞌey wonan Sión tuꞌ oj eltej cuybꞌanile chi yakꞌ Jehová, jaxa bꞌey Jerusalén tuꞌ oj eltej skꞌane Jehová, jaꞌton ẍejbꞌanil.
3 Jaꞌ Jehová oj naꞌon oc yin junjun conobꞌlaj. Jaꞌ oj alon tzet oj eloc ebꞌ conobꞌlaj tol ey yip, caxcꞌal naat ey. Yu jun tuꞌ, oj meltzo oc chꞌen yespada ebꞌ yin kꞌubꞌal txꞌotxꞌ, yetoj cꞌal pax chꞌen slanza ebꞌ, oj meltzo oc chꞌen yin kꞌupbꞌal tiriw, yutol cꞌam junojxa conobꞌ oj yiꞌa smitxꞌkꞌabꞌ yet jowal yin junojxa nación, cꞌamxa mactxequel oj cuywoj yin akꞌo jowal.
4 Yu jun tuꞌ, masanil ebꞌ ánima oj caey ecꞌ ebꞌ yin tzalacꞌulal. Junjun xacꞌal oj skeꞌ xew bꞌey yalan yenel skꞌabꞌ teꞌ uva awbꞌil yu, cꞌal bꞌey yalan yenel skꞌabꞌlaj teꞌ higo. Jaꞌ Jehová, Naj Yaaw Yibꞌan Masanil, jaꞌ jix yakꞌ can stiꞌ yin jun tiꞌ.
5 Caxcꞌal mi masanil wanojxa conobꞌlaj, chi ecꞌabꞌ ebꞌ yalan yipal sdiosal yaloni. Jal jon pax jaon tiꞌ, jaꞌ yalan yipalil Jehová cu Diosal, oj cu ecꞌabꞌ cꞌal.
Jaꞌ Jehová Oj Colon El Ebꞌ Sconobꞌ
6-7 Jaꞌcaw Jehová chi alon jaxca tiꞌ: Jaꞌ yet jun cꞌual tuꞌ, oj jin yambꞌa oc ebꞌ jin conobꞌ, jaꞌton ebꞌ tuxa jix yabꞌ syaꞌil wu bꞌey txꞌoj conobꞌal, jaꞌton ebꞌ kꞌail, ebꞌ chi cꞌuumbꞌi, cꞌal ebꞌ sajleminaj ye cantoj. Yetoj cꞌal jaywanxa ebꞌ eyto cꞌal can ecꞌ tuꞌ, oj jin waꞌne jun nación tol caw ey smey oj yun sbꞌinalei. Jain caw Jehová jin, oj wakꞌ yaawil xol jin conobꞌ tuꞌ, jaꞌton bꞌey wonan Sión.
8 Jal txꞌotxꞌ wonan Sión yet Jerusalén yeocoj, jaꞌ tituꞌ oj jin teyne ebꞌ jin conobꞌ jaxca junoj ilom meꞌ. Jal Jerusalén tiꞌ, oj yakꞌ yaawil junelxa, jaxca cꞌal bꞌey jix yakꞌ yaawil yet peyxa, ẍi Dios.
9 Jaꞌ tinaniꞌ xin, jex a Jerusalén, ¿tzet yu, yuxan tol chi el je yaw jaxca junoj ix ix yet chi aapnoj scꞌual swaꞌxi scꞌul yu unin? ¿Tumi yu cꞌam junoj je reyal eyocoj? ¿Ma yutol cꞌamxa junoj ebꞌ akꞌom naꞌbꞌale je xol?
10 Jex a conobꞌ Sión, el ojabꞌ je yaw je yabꞌen syaꞌil; jaxca ojabꞌ chi yun yabꞌen syaꞌilal junoj ix ix yet chi waꞌxi scꞌul yu unin, yutol oj jex el bꞌey yul je conobꞌ tiꞌ, catuꞌ oj jex toj caey bꞌey xol-laj teꞌ; tol oj jex apnoj taꞌcꞌal oc bꞌey Babilonia. Jaꞌ tituꞌ oj jex col-le el yul skꞌabꞌ ebꞌ je cajat yu Jehová.
11 Jaꞌ tinaniꞌ, caw miman ebꞌ nacionlaj lalan syambꞌan oc sbꞌa je yinlaj, catuꞌ chi yalon ebꞌ jaxca tiꞌ: Oj kakꞌ wal cu naꞌbꞌal kilon tzet oj yun yetextoj conobꞌ Jerusalén tiꞌ, ẍi ebꞌ.
12 Jaꞌ wan nación tuꞌ, man yotaj oj ebꞌ tzet naꞌbꞌil yu Jehová. Man yotaj oj ebꞌ ta tol oj yambꞌale a ebꞌ yu Dios, jaxca chi yun syambꞌaletoj ixim tiriw bꞌey tecꞌbꞌal.
13 Jal jaex a Sión jex tiꞌ, aanwej waanoj, tecꞌwej ey wan nacionlaj tuꞌ, yutol chi yal Jehová jaxca tiꞌ: Jain oj wakꞌ je yip je tecꞌon ey wan nacionlaj tuꞌ, jaxca junoj icham wacax tol chꞌen hierro yucꞌaꞌ eyocoj, tol chꞌen bronce cꞌal yiskꞌaj, tol oj tecꞌwoj tiriw. Oj je yiꞌecꞌ sbꞌeomal wan nacionlaj tol yin man xolilaloj jix yun yiꞌon ecꞌoj, catuꞌ oj je yakꞌon ey jin, jain ton Yaaw jin yibꞌan masanil yul yibꞌankꞌinal tiꞌ, ẍi Dios.