Jaꞌ an libro Jonás tiꞌ, jix tzꞌibꞌelecan yet abꞌil 780-750 a.C.

Jaꞌ jun libro tiꞌ, txꞌoj yel skꞌaneal tet wanxa slibro ebꞌ ẍejabꞌ Dios. Jaꞌ wan libro yet wanxa ebꞌ tuꞌ, cuybꞌanile cꞌal tzꞌibꞌebꞌilcan ey yul an. Jal pax jun tiꞌ xin, chi yaltej yu spitalil jun ẍejabꞌ Dios, jaꞌton naj Jonás. Jix chejletoj naj yalel skꞌane Dios tet conobꞌ Nínive, yet chi snaꞌon sbꞌa scꞌul ebꞌ ánima tuꞌ, ta cꞌamaj, oj qꞌueyle el ebꞌ yu Dios. Jaꞌ conobꞌ Nínive, miman conobꞌ yeocoj, ey mi junoj 600,000 ebꞌ ánima caan yul jun conobꞌ yet jun tiempoal tuꞌ. Jaꞌ naj Jonás tuꞌ, ma yal scꞌul naj jix too yal skꞌane Dios tet ebꞌ ánima bꞌey conobꞌ Nínive tuꞌ, yuxan jix jul jun miman syaꞌilal yibꞌan naj yu Dios. Yu jun syaꞌilal jix jul yibꞌan naj tuꞌ, jix snaꞌon sbꞌa scꞌul naj, jix too naj yalel skꞌane Dios tet ebꞌ ánima bꞌey conobꞌ Nínive tuꞌ, cꞌal yijlen nocha sbꞌa ebꞌ. Caw jix tit pax sjowal naj Jonás tuꞌ yet jix yilon naj tol jix akꞌle mimancꞌulal yin ebꞌ a Nínive tuꞌ yu Dios, yutol jix snaꞌ sbꞌa scꞌul ebꞌ.

Jaꞌ jun libro tiꞌ, chi xꞌoxtej ey jon, tol jaꞌ Dios chi yun tzet chi yoche scꞌul bꞌey yul yibꞌankꞌinal tiꞌ. Jaꞌ yin masanil wan tiꞌ, chi xꞌox eloj tol jaꞌ Dios caw ey scamcꞌulal, caw chi okꞌ scꞌul, ey pax smimancꞌulal. Ilaꞌ tol chi yakꞌ mimancꞌulal yin ebꞌ chi jowi oc yin conobꞌ Israel.