Jix wabꞌ yalon Jehová, Kaawil wan kꞌane tiꞌ: Jix yatoj junoj ẍejabꞌ yul-laj nacionlaj, jix yalon jun kꞌane jaxca tiꞌ: ¡Kakꞌwej lista cu bꞌa! ¡Toonwej, kakꞌwej jowal yin Edom! ẍi.

3 Jaꞌ je meynebꞌail chex etneni. Jaxa cꞌal bꞌey yul-laj sjolanil chꞌen mimej chꞌen, jaꞌ tituꞌ ey jex ecꞌoj, cꞌal bꞌey sjolomlaj wonan, yuxan jix je naꞌ tol cꞌam junoj mactxequel chi skeꞌ jex yuchon lawoj ey tituꞌ.

4 Jain caw Jehová jin, chi walaꞌ, caxcꞌal naat chex a jaxca noꞌ chii chi swaꞌne atoj sweyubꞌ, jaxca xacꞌal tol jaꞌ xol weycan ey jex atoj, jata cꞌal tituꞌ oj jex wiꞌeytej.

5 Ta jaꞌ ebꞌ elkꞌom chi jul elkꞌan yet akꞌbꞌalil, cꞌam chi yiꞌtoj masanil tzetyetal ebꞌ. Yetoj cꞌal pax junoj mac chi yambꞌan el sat awo, eyto bꞌey chi cancan junjunojxa an sat uva tuꞌ yu. Jal jex jaex tiꞌ, junelne oj jex akꞌle can lawoj ey yu ebꞌ je cajat tuꞌ.

6 Jex yicꞌaal Esaú, caw okꞌbꞌal cꞌul xacꞌal oj je yun cantoj. Oj elkꞌaneletoj masanil je bꞌeomal cꞌuan ecꞌoj.

7 Masanil ebꞌ eyoc je yetoj, oj jex yetne ebꞌ. Oj jex ujtele el yu ebꞌ bꞌey sat je txꞌotxꞌ. Jaꞌ ebꞌ watxꞌ yakꞌon je yetoj tinaniꞌ oj oc ebꞌ je cajatoj. Jaꞌ ebꞌ je watxꞌil ánima tuꞌ, oj swaꞌne ey yaal ebꞌ yul je bꞌe, man oj je yiltej je bꞌa.

8 Jaꞌ yet oj waon oc syaꞌilal je yibꞌan jex a Edom, oj wakꞌ lawoj ey masanil ebꞌ jelan snaꞌbꞌal je xol. Oj wiꞌel ebꞌ jelan je xol, jantaj jex caan jex yul yet Esaú.

9 Jex a Temán, jaꞌ ebꞌ jelan yin yakꞌon jowal je xol, caw oj bꞌilwoj a ebꞌ yu xiwcꞌulal. Cꞌamxa junoj jex caan jex bꞌey txꞌotxꞌ wonanlaj yul yet Esaú oj jex cancan yin je yiquisal.

11 Jaꞌ yet jix iꞌle eltej masanil sbꞌeomal Jerusalén yu ebꞌ je cajat, jaꞌ yet jix makꞌle poꞌo spuertail jun conobꞌ tuꞌ yu ebꞌ txꞌoj conobꞌal, tucꞌal jix jex oc tꞌanan jaex tiꞌ. Yet jix yaon oc suerte ebꞌ je cajat yin masanil tzettaj yetal ey yul conobꞌ tuꞌ, catuꞌ jix iꞌletoj sbꞌeomal yu ebꞌ, laan xacꞌal jix je yute je bꞌa yetoj ebꞌ je cajat tuꞌ.

12 Man smoo oj tol jix jex tzee yet jix je yilon oc ebꞌ jaxca tuꞌ, yet jun cꞌual yet eyoc syaꞌilal yibꞌan ebꞌ a Judá tuꞌ. Caw man smoo oj tol jix jex tzala yet jix lawi ey ebꞌ tuꞌ. Man smoo oj tol jix jex bꞌuchwa yin ebꞌ yet jun cꞌual yet eyoc ebꞌ yin syaꞌtajilal.

13 Man smoo oj tol jix jex octoj yul sconobꞌal ebꞌ jin conobꞌ, yet eyoc ebꞌ yin syaꞌilal, yu je tzeewi yu tzet chi ion ebꞌ, cꞌal je yelkꞌanen stzettaj yetal ebꞌ.

14 Man smoo oj jix jex oc linan bꞌey chi ẍaꞌle sbꞌa bꞌe, yin je makꞌon cam ebꞌ lalan yelaoj, cꞌal yin je yaon oc ebꞌ yul skꞌabꞌ ebꞌ scajat yet jun cꞌual yet eyoc syaꞌilal yibꞌan ebꞌ.

15 Cawilxa chi jul jun scꞌual yet chin txꞌoxon sjowal jin cꞌul yibꞌan nacionlaj. Jaxca tzet jix el je yuneni, queytuꞌ oj yun je yetnele yu wanojxa ánima. Oj je chaꞌ spajtzebꞌal jaxca wal smooalil.

16 Jaxca jix yun je yucꞌwi an bꞌey jun wonan bꞌey chi oc eyilal ey jin, queytuꞌ oj yun wakꞌon je yucꞌ sjowal jin cꞌul yetoj wanojxa nacionlaj. Oj je yucꞌ cꞌal eytoj masanil, masantaꞌcꞌal oj jex lawoj ey yin junelne.

18 Jaꞌ ebꞌ yicꞌaal Jacob, cꞌal ebꞌ yet José, jaꞌ ebꞌ tuꞌ, jaxca wal junoj xaj kꞌakꞌ oj yun ebꞌ. Jal pax ebꞌ yicꞌaal Esaú xin, laan oj yun ebꞌ jaxca yajan jatxꞌbꞌen tol chi tzꞌaꞌey yu kꞌakꞌ yin junelne. Jain caw Jehová jin chi walaꞌ tol cꞌamxa junoj ebꞌ yet Esaú oj colcha can eloj, ẍi Dios.