3 Jix too naj Jonás tuꞌ, asan xin txꞌoj bꞌeal bꞌey jix toocan naj, jaꞌ bꞌey conobꞌ Tarsis jix yoche naj jix toi, yet chi yewbꞌa el sbꞌa naj sattaj Dios. Jix eytoj naj bꞌey stiꞌ jaꞌ Mar bꞌey jun conobꞌ chi yij Jope, jix ilcha jun teꞌ barco yu naj tol lalanxa stoo teꞌ bꞌey conobꞌ Tarsis. Jix stoolane spasaje naj catuꞌ jix oc naj yul teꞌ barco tuꞌ. Jaꞌ jix yun snaꞌon naj tala cꞌuxan cꞌamxa Dios eyecꞌ bꞌey chi too can naj bꞌey caw naat ye cantoj tuꞌ yaloni. 4 Jaxa Jehová jix aontej jun miman kaꞌeꞌ yibꞌan jaꞌ mar yet lalan yecꞌtoj teꞌ barco tuꞌ yibꞌan jaꞌ, caw ian xacꞌal jix makꞌle poꞌo teꞌ barco yu jun miman kaꞌeꞌ tuꞌ. 5 Caw wal jix xiwa ebꞌ chi iꞌon bꞌey teꞌ barco tuꞌ. Chi snaꞌ ebꞌ toloj cam ebꞌ masanil, junjun ebꞌ jix yal sbꞌa tet sdiosal; catuꞌ jix skꞌojon eltoj yijatz teꞌ barco ebꞌ, yet watxꞌ chi sebꞌbꞌi a yalil teꞌ. Jal naj Jonás xin, lalan swey naj yich octoj teꞌ barco tuꞌ. 6 Jaxa naj capitán yeoc yin teꞌ barco tuꞌ, jix too scꞌatan naj Jonás, jix yalon naj jaxca tiꞌ:

—¿Tzet yuxan weyan cꞌal cha wunne? ¡Aan waanoj, txalan tet ja Diosal! ¡Tala cꞌuxan chi okꞌ scꞌul Naj kin, catuꞌ cꞌam chi cu cami, ẍi naj capitán tuꞌ!

7 Catuꞌ jix yalon ebꞌ mulnawom yul teꞌ barco tuꞌ jaxca tiꞌ:

—Jaꞌ tinaniꞌ, kawej oc junoj cu sorteo yet chi txeclo eloj mactxequel jix oc spenail tet ebꞌ cu diosal, yuxan chi jul jun miman kaꞌeꞌ tiꞌ kibꞌan, ẍi ebꞌ.

Jaxa yet jix txeclo el tuꞌ xin, jaꞌ yibꞌan naj Jonás jix txeclo eloj tol jaꞌ naj ey spenail. 8 Catuꞌ jix yalon ebꞌ tet naj jaxca tiꞌ:

—Al ey jon tzet yuxan chi jul jun tiꞌ kibꞌan. ¿Mac jaach txequel? ¿Tzet yinal chach mulnai? ¿Tzet sbꞌi ja conobꞌ bꞌey caan jaach? ¿Tzet animail jaach? ẍi ebꞌ tet naj Jonás tuꞌ.

9 Catuꞌ jix takꞌwi naj Jonás tet ebꞌ jaxca tiꞌ:

—Hebreo jin an. Jaꞌ tet Dios chin oc eyilal, Naj sDiosal satcan, Naj jix waꞌnen jaꞌ mar, cꞌal txꞌotxꞌ txꞌotxꞌ tiꞌ, ẍi naj Jonás.

10-11 Catuꞌ jix yalon naj Jonás tet ebꞌ, tol chi too yewbꞌa el sbꞌa naj sattaj Dios, caw jix xiwa ebꞌ mulnawom tuꞌ yet jix yabꞌen ebꞌ tzet jix yal naj Jonás, catuꞌ jix yilon ebꞌ tol yelcꞌulal chi yiꞌ sjowal jun kaꞌeꞌ tuꞌ yibꞌan jaꞌ Mar tuꞌ, catuꞌ jix yalon ebꞌ tet naj jaxca tiꞌ:

—¿Tzet yuxan jix ja wun jaxca tuꞌ? ¿Tzet watxꞌ chi kun ja wetoj, yet watxꞌ chi oc tucan sjowal jun kaꞌeꞌ tiꞌ yibꞌan jaꞌ Mar tiꞌ? ẍi ebꞌ tet naj.

12 Catuꞌ jix yalon naj Jonás jaxca tiꞌ:

—Kꞌoj jinwej eytoj yul jaꞌ mar tiꞌ, catuꞌ chi oc tucan sjowal jun kaꞌeꞌ yibꞌan jaꞌ mar tiꞌ. Yutol wotaj tol wu yuxan chi tit jun tiꞌ kibꞌan, ẍi naj.

13 Catuꞌ jix yakꞌon yip ebꞌ mulnawom tuꞌ yiꞌontoj teꞌ barco tuꞌ bꞌey sat txꞌotxꞌ yaloni; cꞌamxa chi skeꞌ yu ebꞌ, yutol caw chi jowbꞌi jun kaꞌeꞌ tuꞌ yibꞌan jaꞌ mar tuꞌ. 14 Catuꞌ jix txali ebꞌ tet Jehová. Jix yalon ebꞌ yin xa jaxca tiꞌ: Jaach cu Diosal tol cꞌam ojabꞌ chi cu cam yu spenail jun winaj tiꞌ, cꞌam kalon ket yu scamichal jun winaj tiꞌ jon, yutol man yu oj cu penail jon yuxan chi jul jun tiꞌ kibꞌan jon, yutol jaꞌ yin snaꞌbꞌal chi tita yuxan chi jul jun tiꞌ yibꞌan naj, ẍi ebꞌ.

15 Jaꞌ yet jix lawi xali ebꞌ tuꞌ, catuꞌ jix kꞌojle eytoj naj Jonás xol jaꞌ mar tuꞌ yu ebꞌ. Jaꞌ yet jun txolan tuꞌ jix oc tucan jun kaꞌeꞌ yibꞌan jaꞌ mar tuꞌ. 16 Jaxa yet jix yilon ebꞌ mulnawom yeoc yin teꞌ barco tuꞌ, jix yaoc scꞌul ebꞌ yin Dios, Naj tol caw ey yipal, jix yakꞌon jun xaambꞌal ebꞌ tet Dios, catuꞌ jix yakꞌon stiꞌ ebꞌ tol oj yakꞌ servil Dios ebꞌ yin junelne.

17 Jaꞌ Dios jix chejon jun noꞌ miman pescado, yet chi bꞌukꞌle eytoj naj Jonás yu noꞌ. Oxebꞌ cꞌual oxebꞌ akꞌbꞌal jix cancan naj Jonás yul scꞌul noꞌ miman pescado tuꞌ.