2 Jaꞌ tiꞌ je yet, tol che yintajne can el sjichanil, jaxa cꞌal spenail che camcꞌulne. Jaxca tol che tzilel stzꞌuumal ebꞌ ket conobꞌ, jaxa cꞌal sbꞌajil ebꞌ chi cancan melan je yu.

3 Jaxca tol yin yiquisal ebꞌ ket conobꞌ tiꞌ, catuꞌ che chiꞌon eytoj ebꞌ, che nicꞌon el stzꞌuumal ebꞌ, catuꞌ che makꞌon kꞌatoj sbꞌajil ebꞌ. Laan xacꞌal che yute ebꞌ jaxca noꞌ chiꞌbꞌe chi eytoj ta yul xi.

4 Yuxan ey wal jun cꞌual oj el je yaw yu je yawten Jehová; manxa oj takꞌwoj Naj ey jex. Jaꞌ yet jun cꞌual tuꞌ, oj yewbꞌa el sbꞌa Dios ey jex yu cꞌal je penail jix je yaocoj, jin chi tet ebꞌ yaaw tuꞌ.

5 Jix yalon Jehová ey jin jaxca tiꞌ: Jaꞌ ebꞌ jin conobꞌ tiꞌ, caw ey cꞌal oc ebꞌ yin bꞌeybꞌale man jichanoj, yu cꞌal ebꞌ lekꞌtiꞌ chejabꞌ, jaꞌton ebꞌ chi aloni tol ey cꞌal watxꞌcꞌulal snan xol ebꞌ, ta chi akꞌle low ebꞌ yin watxꞌ yu ebꞌ. Jal pax tet mactxequel cꞌam chi akꞌon no scꞌul ebꞌ xin, chi yakꞌon jowal ebꞌ yin ebꞌ. Yuxan chi wal yin wan chejabꞌ tuꞌ jaxca tiꞌ:

6 Jaxca tol eyman oj ey can cꞌu yibꞌan ebꞌ, jaxa scan ebꞌ xol kꞌejkꞌinal tuꞌ. Cꞌamxa tzetyetal oj txꞌoxle yil ebꞌ junelxa, cꞌamxa tzetyetal oj yalel ebꞌ yu tzet oj jul yet yatoj tuꞌ, jin chi, ẍi Jehová.

7 Jaꞌ wan chejabꞌ tuꞌ, cꞌal wan naꞌom el kꞌane tuꞌ, yaloni, tuxa cꞌal oj cancan ebꞌ yin cꞌam tzet yotaj, cꞌamxa cꞌal tzet oj yal ebꞌ, yutol cꞌam niꞌoj spajtzebꞌal ebꞌ oj ẍaꞌ tet Dios.

8 Jal jin pax jain tiꞌ, eyoc Yespíritu Jehová win, yuxan ey wipalil, catuꞌ chi naꞌcha el sjichanil wu, yuxan chin tecꞌbꞌa jin bꞌa walon oc jantaj spenail ebꞌ wet Israelal yin sat.

9 Abꞌwej wan kꞌane tinaniꞌ xin, jex syaawil conobꞌ Israel. Jaex tiꞌ che yintajne can el sjichanil. Jaxa spenail che yun sqꞌuexeloj sjichanil tuꞌ.

10 Che waꞌne a Jerusalén, jaꞌton conobꞌ yet wonan Sión, yu jantaj tzetyetal che yiꞌecꞌ tet ebꞌ ánima che makꞌ camoj, cꞌal yin jantaj tzet man jichanoj che yunne.

11 Jaꞌ ebꞌ juez yeoc yul conobꞌ, man watxꞌoj chi yute swaꞌne yeoc junoj jowal ey snan xol ebꞌ ánima, yutol chi ẍaꞌ tumin ebꞌ yin ewantajil. Jacꞌalaꞌ ebꞌ yakꞌomal xaambꞌal chi cuywa ebꞌ, asan yu ẍaꞌon tumin ebꞌ, cꞌal ebꞌ lekꞌtiꞌ ẍejabꞌ Dios, asan yu ẍaꞌon tumin yuxan chi yal ebꞌ tzet jix txꞌoxle yil ebꞌ, yaloni, catuꞌ chi yalon ebꞌ tol eyoc Dios yetoj ebꞌ, chi yalon ebꞌ jaxca tiꞌ: Jaꞌ Jehová eyoc ketoj, yuxan cꞌam tzetyetal oj jul kibꞌan, ẍi ebꞌ.

12 Yu jun tuꞌ xin, je yu jaex tiꞌ, yuxan jaꞌ Jerusalén, jaꞌton conobꞌ wonan Sión, jaxca xacꞌal tol tokꞌbꞌil oc yetoj chꞌen kꞌubꞌal txꞌotxꞌ oj yun cantoj, tuxa cꞌal oj a can bꞌulan spoꞌoilal, jaxa bꞌey wonan yet templo, eltzabꞌ xacꞌal oj yun cantoj.