Okꞌbꞌal Cꞌul Ebꞌ Etnem Mebꞌa
2
Okꞌbꞌal cꞌul oj yun ebꞌ tol scal sweyan chi snaꞌoꞌtane tzetyetal spenail oj yunne,jaxa yet chi kꞌinibꞌi a xin, catuꞌ chi yunen xacꞌal ebꞌ tzet chi snaꞌ tuꞌ, yutol eyoc yul skꞌabꞌ ebꞌ yuneni.
2 Ta chi yiloc scꞌul ebꞌ yin junoj txꞌotxꞌ, catuꞌ chi stokꞌon xacꞌal ecꞌoj, ta chi yiloc scꞌul yin junoj na, catuꞌ chi yelkꞌane ecꞌoj. Jaxca tuꞌ chi yun yetnele ebꞌ ánima yetoj yuninal yu ebꞌ.
3 Yuxan jix yalon Jehová jaxca tiꞌ: Jain tiꞌ, ey jun tzet chin naꞌ cꞌal pax je yin jaex tiꞌ. Tol oj watoj junoj miman syaꞌilal je xol, cꞌamxa tzet watxꞌ oj yun je colon je bꞌa. Manxa oj je meyne je bꞌa yet chex ecꞌabꞌi, yutol jix jul scꞌual jun miman syaꞌilal je yibꞌan.
4 Jaꞌ yet jun cꞌual tuꞌ oj tzꞌaj sbꞌitne ebꞌ je cajat wan bꞌit, yu jex sbꞌuchon ebꞌ. Oj yalon ebꞌ jaxca tiꞌ: Jaꞌ tinaniꞌ, tuxa wal jix cu lawi ey junelne, cꞌal cu conobꞌal tol yet Jehová yeocoj, tuxa jix qꞌuexcha yaaw. Cꞌamxa mactxequel jix skeꞌ stenchaneni. Jaꞌ ebꞌ jix cu akꞌon eyqꞌuey tuꞌ, tuxa jix spoꞌoecꞌ cu txꞌotxꞌ ebꞌ yin, ẍi jun sbꞌit ebꞌ tuꞌ, ẍi Dios.
5 Yu je penail tuꞌ, yuxan cꞌamxa mactxequel xol ebꞌ sconobꞌ Jehová oj skeꞌ yechen niꞌoj je majul txꞌotxꞌ.
Jaꞌ Wan Ẍejabꞌ Dios Man Watxꞌoj
6 Chi yalon ebꞌ ánima ey jin jaxca tiꞌ: ¡Cꞌam ojabꞌ cha wal yu wan syaꞌilal oj jul kibꞌan tuꞌ! ¿Tumi taꞌ oj cu michꞌcha yu wan syaꞌilal cha wal tuꞌ?
7 ¿Tumi intajnebꞌil el sconobꞌal Jacob? ¿tumi jix lawi smimancꞌulal Dios, yuxan queytuꞌ oj yunne? ẍi ebꞌ. Yuxan chi takꞌwi Jehová jaxca tiꞌ: ¿Tumi man watxꞌoj chi yun can jin kꞌane tet mactxequel tol jichan chi yute sbꞌa?
8 Jaex tiꞌ, chex jowi oc yin jin conobꞌ. Jaꞌ ebꞌ chi meltzotej yin jowal chi snaꞌ ebꞌ tol cꞌamxa tzet oj iꞌon ebꞌ; jal jex jaex tiꞌ, tol che yiꞌel spichil ebꞌ eyocoj.
9 Che yujte eltoj ebꞌ ix ix yul-laj sna tol eyoc yipoj scꞌul, catuꞌ che yiꞌon ecꞌ smajul ebꞌ unin tol jain jix wakꞌa.
10 Aanwej waanoj, asiꞌwej. Cꞌamxa chi skeꞌ chex eecꞌ titiꞌ, yutol miman spenail jix je yun sat txꞌotxꞌ txꞌotxꞌ tiꞌ, yuxan jix etex el txꞌotxꞌ yin junelne.
11 Jaex tiꞌ, caw chex tzalai ta ey junoj ẍejabꞌ Dios, yaloni, chi yakꞌon lekꞌtiꞌal, tol chi yal jaxca tiꞌ, watxꞌ ta miman je vino cꞌal teꞌ an oj je yuqꞌueꞌ, cꞌam cꞌal tzet oj jul je yibꞌan, ẍi ebꞌ, chi yalon ebꞌ.
Chi Yal Dios Tol Oj Scolel Sconobꞌ
12 Chi yalon cꞌal pax Dios jaxca tiꞌ: Jex yicꞌaal Jacob, oj jex jin yambꞌa oc je masanil. Jantaj jexto jaex Israel jex tiꞌ, jix jex cancanoj. Oj jex jin yambꞌa oc jaxca chi yun syambꞌale octoj noꞌ meꞌ yul scolal yu junoj ilom meꞌ. Jaxca cꞌal pax junoj acꞌal nonaj el yu meꞌ, queytuꞌ oj yun snoel sat je txꞌotxꞌ tuꞌ je yu jaex tiꞌ.
13 Bꞌabꞌel jin to yu jin jajon bꞌe je sattaj, catuꞌ tzajan jex oc wintaj. Jaxa je yeltoj bꞌey spuertail miman conobꞌ yin tzalacꞌulal. Jain caw Jehová jin, je Reyal jin, bꞌabꞌel jin too je sattaj, ẍi Dios.