2 Je masanil jex wet conobꞌ, abꞌwej wan kꞌane tiꞌ; je masanil jantaj jex caan jex bꞌey yul yibꞌankꞌinal tiꞌ, chi cam je yabꞌeni: Jaꞌ Jehová, Naj Yaaw, jaꞌ bꞌey yul stemplo oj al-le oc masanil je penail yin je sat yu Naj.

3 Oj eltej Jehová bꞌey scalubꞌal, catuꞌ oj tit yibꞌanlaj sjolomlaj wonan.

4 Oj ulojtoj txꞌotxꞌ wonanlaj yalan yajan, jaxca xacꞌal chi yun yulitoj noꞌ ixcabꞌ xol kꞌakꞌ. Masanil jobꞌelaj oj poꞌochatoj snan, jaxca chi yuntoj txꞌotxꞌ txꞌotxꞌ yu jaꞌ elom jaꞌ.

5 Queytuꞌ oj yun masanil ebꞌ yicꞌaal Jacob, yu cꞌal jantaj spenail ey yul yet Israel. ¿Bꞌeytuꞌ chi txeclo a spitalil ebꞌ yicꞌaal Jacob? Jaꞌton bꞌey conobꞌ Samaria. ¿Bꞌeytuꞌ chi txeclo a eyilal chi yun ebꞌ a Judá tet comon dios? Jaꞌton bꞌey Jerusalén.

6 Yuxan chi yal Jehová jaxca tiꞌ: Oj wakꞌ lawoj ey conobꞌ Samaria tiꞌ, tuxa cꞌal oj a can bꞌulan spoꞌoilal. Jajan xacꞌal oj yun can jaxca bꞌey chi skeꞌ yawle uva, jata cꞌal bꞌey yul-laj jobꞌe oj jin kꞌojcan eytoj ẍꞌenal jun conobꞌ tiꞌ, catuꞌ oj txeclo can a cimientoal yichlaj.

7 Kocꞌ xacꞌal oj yun cantoj wan echele. Oj wakꞌon lawoj ey wan comon dios. Masanil wan yelawil yul templo oj tzꞌaꞌcantoj. Yutol jaꞌ yetoj chꞌen tumin jix chaꞌle yin amulal jix waꞌnelei. Jacꞌalaꞌ wan tzetyetal cꞌam chi tzꞌaꞌi, yin amulal oj tojcan wan tumin tuꞌ junelxa, ẍi Jehová.

9 Yutol jaꞌ bꞌey jix yasitoj conobꞌ Samaria, manxa oj ancha oj. Tuxa jix tzꞌaꞌ cꞌal pax toj Judá yu syaꞌilal tuꞌ, masantaꞌcꞌal jix apni oc bꞌey stiꞌ conobꞌ Jerusalén, jaꞌton sconobꞌal ebꞌ wet conobꞌ.

10 Cꞌam ojabꞌ cha wal wan tiꞌ tet ebꞌ caan bꞌey conobꞌ Gat. Cꞌam ojabꞌ chex okꞌi. Eyanwej telan xol pojoj yu je cuscꞌulal tuꞌ bꞌey Bet-le-afra.

11 Jal jex caan jex bꞌey Safir, asiꞌwej can jaxca presowomal, tꞌiran jex eloj catuꞌ chex toocanoj. Yin xacꞌal qꞌuixwiltajil oj yun je yiꞌletoj. Cꞌamxa chi eltej niꞌoj ebꞌ caan bꞌey Zaanán. Ey okꞌil bꞌey Bet-esel, cꞌamxa mactxequel oj colwa je yetoj.

12 Jaꞌ ebꞌ caan bꞌey Marot, chi yechbꞌane ebꞌ tol chex colwa yin ebꞌ, yutol tuxa jix apni syaꞌilal bꞌey stiꞌ conobꞌ Jerusalén yu Jehová.

13 Jal jex caan jex bꞌey Laquis, caw pit jex jaxca ebꞌ Israel. Jaꞌ yu je pital tuꞌ, yuxan jix oc spenail ebꞌ a Sión. Awej oc noꞌ je che jelan sbꞌey yin carruaje yet jowal.

14 Junelne che yal xacꞌal can too je bꞌa bꞌey Moréset-gat. Jaꞌ conobꞌ Aczib, jaxca iꞌom eytej sate oj yute sbꞌa yin ebꞌ sreyal Israel.

15 Jix yalon Jehová je yin jaex caan jex bꞌey Maresá: Oj watoj jun mactxequel oj jex akꞌon eyqꞌueyoj, jaxa jun mac bꞌinabꞌil xol ebꞌ Israel, oj toj yewbꞌa el sbꞌa bꞌey yul-laj chꞌen nachꞌen bꞌey Adulam.

16 Jaex a Jerusalén jex tiꞌ, okꞌanwej, catuꞌ che tzujon el xil je jolom cꞌal xil je tiꞌ yu cuscꞌulal, caj tꞌirinaj xacꞌal chi yun can el je jolom jaxca sjolom noꞌ xulem. Yutol jaꞌ ebꞌ je yuninal oj iꞌletoj ebꞌ jaxca presowomal bꞌey jun conobꞌ caw naat, ẍi Jehová.