2 Jaꞌ Jehová chi alon jaxca tiꞌ: Jaꞌ conobꞌ Belén, jaꞌ chi yij pax Efrata, caxcꞌal yaliẍ conobꞌ chꞌan yeoc xol conobꞌlaj yul yet Judá, jaꞌ tituꞌ oj tit jun yaaw oj waoc yin yaawilal yibꞌan jin conobꞌ Israel. Oj tit yin jun icꞌaaleal tol ey cꞌaltaꞌ yet tax peyxa, ẍi Dios.

3 Jaꞌ tinaniꞌ xin, jaꞌ Jehová oj sbꞌejcan sconobꞌ, masantaꞌcꞌal yet oj aloj el jun yuneꞌ ix ix lalan yechbꞌanen yali tuꞌ. Catuꞌ oj meltzotej ebꞌ Israel tol iꞌbꞌilcantoj jaxca presowomal bꞌey txꞌoj conobꞌal, catuꞌ oj syambꞌan oc sbꞌa ebꞌ yetoj ebꞌ yet conobꞌ.

4 Jaꞌ naj Rey tuꞌ, oj a waan yetoj yipalil yetoj yopiso akꞌbꞌil yu Jehová cu Diosal, yu steynen sconobꞌ, yet chi caey ecꞌ ebꞌ conobꞌ yin tzalacꞌulal, yutol jaꞌ Naj Rey tuꞌ, miman oj yun yeloc apnoj xol conobꞌ, masantaꞌcꞌal bꞌey slawubꞌal yul yibꞌankꞌinal tiꞌ.

5 Jaꞌ jun Rey tuꞌ oj iꞌontej watxꞌcꞌulal. Jaꞌ yet oj jul ebꞌ Asirio yul cu nación tiꞌ, yet oj oc ebꞌ yul-laj cu cuartel, oj cu chejtoj jujwanoj ebꞌ yaaw, yetoj waxajwan tol miman yeloc apnoj, yu yakꞌon jowal yin ebꞌ.

6 Jaꞌ ebꞌ tuꞌ oj akꞌon eyqꞌuey ebꞌ Asiria yetoj espada, jaꞌton snación naj Nimrod. Oj cu col-le el yul skꞌabꞌ ebꞌ Asirio yu Naj, jaꞌton tet ebꞌ jix kꞌaxbꞌo ecꞌtej bꞌey cu moon yu yiꞌon ecꞌ cu txꞌotxꞌ ebꞌ yaloni.

7 Jaꞌ yet tuꞌ, jaꞌ ebꞌ yicꞌaal Jacob oj to cancanoj, oj yiꞌtej swatxꞌilal ebꞌ xol ecꞌaloj conobꞌ, jaxca chi yun yakꞌon syaaxilal yal akꞌbꞌal, cꞌal nabꞌ yibꞌan an cꞌultaj. Jaꞌ Jehová oj aontej jun swatxꞌilal tuꞌ, manaj ebꞌ ánima oj aontej.

8 Laan oj yun pax ebꞌ yicꞌaal Jacob tuꞌ snan xol ecꞌaloj nacionlaj jaxca junoj noꞌ bꞌalam ey xol noꞌ xol-laj teꞌal noꞌ, ma jaxca junoj noꞌ bꞌalam chi oc xol junoj bꞌulan noꞌ meꞌ. Jaꞌ yet chi oc noꞌ xol noꞌ meꞌ tuꞌ, catuꞌ chi smitxꞌon eyoj, chi skocꞌ tzilnentoj. Cꞌamxa junoj chi yakꞌ can yin yiquisal.

9 Jaxca tuꞌ oj yun je yakꞌon eyqꞌuey ebꞌ chi jowi oc je yin jaex yicꞌaal jex Jacob tiꞌ, cꞌal je yakꞌon lawoj el masanil ebꞌ.

10 Jaꞌcaw Jehová chi alon jaxca tiꞌ tet ebꞌ Israel: Jaꞌ yet jun cꞌual tuꞌ, oj jin makꞌ cam noꞌ je che, catuꞌ oj wakꞌon lawoj ey je carruaje yet jowal.

11 Oj wakꞌ lawoj ey je conobꞌ, cꞌal je cuartel yin junelne.

12 Oj wakꞌ lawoj el masanil ebꞌ atxum ey je xol. Cꞌamxa junoj ebꞌ naꞌom el kꞌane oj wakꞌcanoj.

13 Oj wakꞌ lawoj ey wan je comon dios, cꞌal chꞌen chꞌen yet je txabꞌal, yet watxꞌ manxa oj jex oc eyilal tet wan je diosal jix je waꞌne a tuꞌ.

14 Oj jin tokꞌatej masanil teꞌ teꞌ bꞌey chex oc eyilal, catuꞌ oj wakꞌon lawoj ey je conobꞌ yin junelne.

15 Yetoj sjowal jin cꞌul, catuꞌ oj jin pajtzen tet wan nacionlaj tol ma sjije niꞌoj tzet chi walaꞌ, ẍi Jehová.