Chi Yakꞌ Sowalil Dios Yu Tzet Pena Chi Yun Ebꞌ Israel
6
Jex wet Israelal, chi cam je yabꞌen tzet chi yal Jehová:Jex jin conobꞌ, titan alwej oc yin jin sat, ta man watxꞌoj tzet chi wun je xol, tol ojabꞌ chi yabꞌ txꞌotxꞌ tzalquiltaj yel yaw yul je nukꞌ.
2 Yabꞌ ojabꞌ txꞌotxꞌ wonanlaj, cꞌal cimientoal yich txꞌotxꞌ txꞌotxꞌ tiꞌ, toloj waloc je penail yin je sat, jaex Israel jex tiꞌ, catuꞌ oj wakꞌon jowal je yetoj.
3 Jex Israel, chi cam je yabꞌen tzet chi yal Jehová. Chi yal Naj jaxca tiꞌ: Jex jin conobꞌ, takꞌwanwej ey jin. ¿Tzet jix yun jex wetneni, ma tzet jix jex wute?
4 Ilaꞌ tol jain jix jex wiꞌeltej bꞌey txꞌotxꞌ Egipto, jix jex jin colon eltej bꞌey ey jex oc yin yakꞌomaloj servilal. Jain jix jin chejtoj naj Moisés, cꞌal Aarón yetoj ix María, jaꞌton ebꞌ jix jex ijbꞌani.
5 Jex jin conobꞌ, naꞌwejtej tzet spenail jix snaꞌ naj Balac sreyal Moab yin ebꞌ je mam icham. Naꞌwej pax tej tzet spajtzebꞌal jix yakꞌ naj Balaam, scꞌaal Beor. Naꞌwej cꞌal pax tej tzet jix ecꞌtoj je yibꞌan bꞌey snan xol Sitim yetoj Guilgal, catuꞌ che naꞌontej, tzet jix jex wute jin colon eloj, ẍi Jehová.
Jaꞌ Tzet Chi Yoche Jehová Tet Ebꞌ Ánima
6 Chi skꞌanle ebꞌ Israel jaxca tiꞌ: ¿Tzet oj kakꞌ tet Jehová yet oj cu oc yin eyilal tet, jaꞌton Dios, Naj Miman Yeloc Apnoj? ¿Oj mi cu oc sattaj Naj yetoj noꞌ meꞌ jun abꞌil skꞌinal, yet chi kakꞌon tzꞌaꞌ noꞌ yin xaambꞌalil?
7 ¿Oj mi tzalabꞌoj a scꞌul Jehová, ta chi kakꞌ junoj mil noꞌ icham meꞌ yin xaambꞌalil yetoj laonebꞌoj mil snukꞌ aceite tol chi bꞌey yel sne? ¿Ma xin, ta chi kakꞌ ebꞌ cu bꞌabꞌel unin yin xaambꞌalil yu cu penail? ẍi ebꞌ.
8 Jex wet conobꞌ, tuxa jix yal Jehová tzetyetal watxꞌ, cꞌal tzet chi yoche Naj ey jon, jaꞌton wan tiꞌ: Tol jichan chi kute cu bꞌeybꞌal, ey ojabꞌ cu camcꞌulal yin ebꞌ ket animail. Yin ojabꞌ yeynajilal chi kute cu bꞌa tet Naj cu Diosal.
9 Jaꞌ Jehová chi alon tet ebꞌ sconobꞌ jaxca tiꞌ: Jaꞌ mac yin yeynajilal chi yun yabꞌen tzet chi walaꞌ, jaꞌ jun tuꞌ, caw ey snaꞌbꞌal. Jul ojabꞌ je naꞌbꞌal yu syaꞌilal, ey ojabꞌ weloc apnoj yul je sat, jain ton chi waoc syaꞌilal je yibꞌan.
10 ¿Tumi oj toj qꞌueycꞌulal wu tol jaꞌ bꞌey sna ebꞌ penawom, manxa jantajoj bꞌeomal yaman ecꞌ yu ebꞌ, jaꞌton wan jix yiꞌ ebꞌ yin spenail, yetoj cꞌal pax yin wan echbꞌal man tzꞌajanoj, tol yaabꞌil el wu?
11 ¿Tzet oj yun wakꞌon mimancꞌulal yibꞌan wan ánima tiꞌ, tol jaꞌ echbꞌal man tzꞌajanoj chi skꞌan ebꞌ?
12 Jaꞌ wan bꞌeom xol conobꞌ tiꞌ, elkꞌom ebꞌ, etnem ánima ebꞌ. Jantaj jex caan jex bꞌey jun conobꞌ tiꞌ, lekꞌtiꞌ jex.
13 Yu jun tuꞌ, yuxan oj waoc je yaꞌilal. Oj jex wakꞌ lawoj ey yu je penail.
14 Oj jex lowoj, man oj no je cꞌul, jacꞌalaꞌ stit je wail. Oj je yambꞌa a je tzettaj yetal man oj colwa niꞌoj je yetoj. Ta cꞌuxan eyto tzet oj colcha el je yu xin, jaxa yin jowal oj wakꞌ lawoj eyoj.
15 Oj je yaw je yawo, cꞌam niꞌoj tzet oj je yambꞌa ocoj. Oj je tecꞌ el je yolivo, man oj je kꞌan niꞌoj yaceiteal. Oj je tecꞌ el je yuva, man oj je yucꞌ svinoal.
16 Yutol jaꞌ spena bꞌeybꞌal naj Omrí, jix je bꞌeybꞌalne. Jaꞌ spena bꞌeybꞌal naj Ahab jix je bꞌeybꞌalne. Yu jun tuꞌ, yuxan oj watoj syaꞌilal cꞌal bꞌuchwal kꞌane je yibꞌan. Queytuꞌ oj yun je yabꞌen syaꞌil qꞌuixwilal sattaj ebꞌ jin conobꞌ, ẍi Jehová.