Spenail Conobꞌ Israel
7
Yu jun tuꞌ xin, jix walon jaxca tiꞌ:¡Ay… okꞌbꞌal jin cꞌul! Laan jin xacꞌal jaxca ebꞌ chi ecꞌ seyo uva, ma higo yet chi sloꞌoni, yet tuxa chi lawi ecꞌ sat awo. Cꞌamxa junoj an sat jix cancanoj, tam wal an bꞌabꞌel sat tol caw ochebꞌil eyto ocoj.
2 Jaxca junoj teꞌ awbꞌeal teꞌ weocoj, yutol cꞌamxa chi ilcha junoj ánima watxꞌ sbꞌeybꞌal, ma junoj watxꞌ snaꞌbꞌal sattaj Dios. Jaꞌ ebꞌ conobꞌ tiꞌ, asanxane makꞌo cam ánima chi yoche ebꞌ chi yunne. Chi yaey yaal sattaj junojxa yet animail.
3 Caw cuywom ebꞌ yin yunen spenail. Jaꞌ ebꞌ ey yopiso, chi ẍaꞌ tumin ebꞌ yin ewantajil tet ebꞌ yet conobꞌ. Jaꞌ ebꞌ juez chi ẍaꞌ chꞌen montebꞌal tumin ebꞌ chi akꞌle tet. Jaꞌ ebꞌ tol miman yeloc apnoj, chi yun cꞌal tzetyetal chi yoche scꞌul. Junxane chi yute sbꞌa ebꞌ yin yetnen junoj yet animail.
4 Jaꞌ ebꞌ watxꞌ sbꞌeybꞌal xol ebꞌ tuꞌ, yaloni, laan ebꞌ jaxca teꞌ qꞌuix. Jaꞌ mac jichanto wal sbꞌeybꞌal, yaloni, laan ebꞌ jaxca teꞌ cajin qꞌuix. Yu jun tuꞌ xin, cawilxa chi jul scꞌual yet oj ale oc syaꞌilal yibꞌan ebꞌ yu Dios, jaxca jix yun yalon can el ebꞌ ẍejabꞌ Naj. Jaxa cꞌal somcꞌulal oj a can xol masanil ánima yet jun cꞌual tuꞌ.
5 Cꞌam ojabꞌ che yaoc yin je cꞌul tzet chi yal ebꞌ je yet animail ey je cawilal, tam wal che yaoc junoj je watxꞌil ánima yipoj je cꞌul. Chi cam cꞌal je naꞌon tzet che yal yetoj je yistil.
6 Yutol jaꞌ ebꞌ cꞌaale, oj bꞌuchwa ebꞌ yin smam, cꞌal ebꞌ ix uneꞌe oj spitne sbꞌa ebꞌ tet xutx, cꞌal ebꞌ ix alibꞌe oj oc ebꞌ scajatoj yalibꞌ. Jaꞌ ebꞌ junne eyecꞌ yul sna, oj scajatne a sbꞌa.
7 Jal jin pax jain tiꞌ xin, jaꞌ Jehová eyoc yipoj jin cꞌul. Asan Dios jin Colomal, caw yipcꞌule ye wu an, yutol oj yabꞌ Naj tzet oj walaꞌ.
Jaꞌ Jehová oj colwa yetoj ebꞌ Israel
8 Jex tol chex jowi oc kin, cꞌam ojabꞌ chex tzala yu tzet chi cu iꞌon jon. Caxcꞌal chi cu eyqꞌuey jon, oj cu a pax waan junelxa. Caxcꞌal chi oc xacꞌal joyan kꞌejkꞌinal kin, jaꞌ Jehová eyoc cu sajkꞌinaloj.
9 Jix oc cu penail tet Jehová, yu jun tuꞌ, yuxan oj kakꞌ techa sjowal scꞌul, masantaꞌcꞌal yet oj jul scꞌual yet oj naꞌle oc kin yu Naj, oj swaꞌne el cu kꞌane. Jaꞌ Jehová oj yakꞌ sajkꞌinal ey jon, oj kil tzet oj yun cu scolon eloj.
10 Jaꞌ ebꞌ cu cajat, oj txꞌoxle yil ebꞌ jun tiꞌ yu Dios, tuxa cꞌal oj qꞌuixwoj can a ebꞌ yiloni. Jaꞌton ebꞌ alnen ey jon jaxca tiꞌ: ¿Bꞌeytuꞌ eyoc Jehová je Diosal tuꞌ? ẍi ebꞌ. Jal tinaniꞌ, oj kilwej tzet oj yun yeyqꞌuey ebꞌ, catuꞌ oj tecꞌle ey ebꞌ, jaxca chi yun stecꞌle ey txꞌotxꞌ stzokꞌom bꞌey yul-laj scalleal conobꞌ.
11 Jex a Jerusalén, oj aapnoj scꞌual yet oj caꞌ waꞌnele a smuroal je conobꞌ, cꞌal ẍꞌibꞌtoj bꞌey oj ina oc je majul txꞌotxꞌ.
12 Tuxa chi jul scꞌual yet oj jul masanil ánima je cꞌatan, speto ebꞌ bꞌey masanil nacionlaj. Oj tit tacꞌal ebꞌ bꞌey Asiria cꞌal bꞌey Egipto, catuꞌ oj tit tacꞌal ebꞌ bꞌey jaꞌ Nilo cꞌal bꞌey jaꞌ Éufrates. Oj tit tacꞌal ebꞌ ey bꞌey stiꞌlaj junjun jaꞌ mar, cꞌal ebꞌ caan bꞌey txꞌotxꞌ sjolomlaj wonan.
13 Caw cusiltaj txꞌotxꞌ xacꞌal oj yun cantoj yul yibꞌankꞌinal tiꞌ, yu cꞌal spenail ebꞌ ánima.
14 Jaach jin Diosal, teyne ebꞌ ja conobꞌ tol ja wet yeocoj. Laan yeoc ebꞌ jaxca noꞌ meꞌ eycantoj xꞌojli bꞌey xol-laj teꞌ, jal pax bꞌey scawilal tuꞌ xin, ey an yaax cꞌultaj. Iꞌtoj ebꞌ ja conobꞌ tiꞌ jaxca cꞌaltaꞌ jix yun ja wiꞌon bꞌey ebꞌ yet peyxa, iꞌtoj ebꞌ jaxca bꞌey sakꞌal steynele low noꞌ meꞌ bꞌey yet Basán, cꞌal yul yet Galaad.
15 Txꞌox kil tzet qꞌueyubꞌtaj yili jaxca jix yun ja txꞌoxon ja wipalil tet ebꞌ cu mam bꞌey txꞌotxꞌ Egipto.
16 Yu jun tuꞌ, yuxan oj yil wan nacionlaj, catuꞌ oj qꞌuixwoj can a ebꞌ, caxcꞌal miman yeloc apnoj ebꞌ; cꞌamxa cꞌal tzet oj yal ebꞌ, jaxca xacꞌal tol cꞌam chi skeꞌ skꞌanabꞌ ebꞌ, jaxca xacꞌal chacan oj yun cantoj ebꞌ.
17 Yin xacꞌal xiwcꞌulal oj sjutxecꞌ sbꞌa ebꞌ xol pojoj jaxca noꞌ labꞌa. Oj eltej ebꞌ bꞌey yul-laj scuartel yu xiwcꞌulal. Yin xacꞌal yeynajil oj yun sjul ebꞌ ja cꞌatan jaach Jehová cu Diosal.
Chi Akꞌle Tan Spenail Conobꞌ Israel Yu Dios
18 Jaach jin Diosal, cꞌam junojxa Dios laan ja wetoj, yutol jaach tiꞌ, jaach cha wakꞌ lawoj jantaj spenail ebꞌ ja conobꞌ jix too cancanoj; chi too qꞌueycꞌulal spitalil ebꞌ ja wu. Man eyoj cꞌal ecꞌ sjowal ja cꞌul, yutol chi el yin ja cꞌul ja txꞌoxon ja camcꞌulal.
19 Okꞌ ojabꞌ ja cꞌul kin junelxa. Jaxca tol cha mujcan eytoj cu penail jon. Naat cha kꞌojcantoj cu penail tuꞌ bꞌey yich jaꞌ mar.
20 Ey ojabꞌ cꞌal ja watxꞌcꞌulal cꞌal ja camcꞌulal kin jon jaach jin Diosal, jaxca jix yun ja wakꞌon can ja tiꞌ tet ebꞌ kichmam yet peyxa jon, jaꞌton Abraham cꞌal Jacob.