2 Oj iꞌle cꞌal pax el masanil syaawil ebꞌ soldado, cꞌal ebꞌ soldado caw jelan yakꞌon jowal, cꞌal ebꞌ juez, ebꞌ naj ẍejabꞌ Dios, cꞌal ebꞌ chi naꞌon el kꞌane, cꞌal ebꞌ icham winaj yeoc yul conobꞌ.

3 Oj iꞌle el ebꞌ capitán yeoc xol junjun 50 ebꞌ soldado, ebꞌ miman yeloc apnoj, ebꞌ akꞌom naꞌbꞌale, ebꞌ jelan swaꞌnen junoj tzetyetal, cꞌal ebꞌ jelan snaꞌon el junoj kꞌane.

4 Jaꞌcaw Jehová oj aon oc ebꞌ naj achꞌe yin yaawil je xol, jaxa ebꞌ unin oj jex chejonoj, oj yakꞌ yaawil ebꞌ je yibꞌan.

5 Jaꞌ yet tuꞌ oj a uchna ebꞌ conobꞌ, oj yakꞌle jowal ebꞌ. Junjun mactxequel oj yakꞌ jowal yetoj ebꞌ caan scawilal. Jaꞌ ebꞌ naj achꞌe oj yakꞌ jowal yetoj ebꞌ icham winaj. Jaxa ebꞌ cꞌam yeloc apnoj oj yakꞌ jowal yetoj ebꞌ miman yeloc apnoj.

6 Jaꞌ yet jun cꞌual tuꞌ, oj oc mitxꞌan junoj naj yin skꞌabꞌ junoj yet conobꞌ eyto yu sbꞌa yetoj, catuꞌ oj yalon tet jaxca tiꞌ: Jaach tiꞌ, caw ey ja pichil, oj jaach oc can yaawil cu xol yet eyoc jun syaꞌtajilal tiꞌ kibꞌan, jaxca xacꞌal mi tuꞌ, oj yun yalon ebꞌ.

7 Jaꞌ yet jun cꞌual tuꞌ, oj yalon naj jaxca tiꞌ: Cꞌam chin oc yin jun opiso tuꞌ, yutol cꞌam jin loꞌbꞌe bꞌey jin na, tam wal ey jin pichil, cꞌam ojabꞌ chin je yaoc syaawiloj conobꞌ, ẍi naj.

8 Caw yel, manxa watxꞌoj yeoc Jerusalén, cꞌal Judá tuxa jix eyqꞌueyi, yutol jaꞌ tzet chi yal ebꞌ ánima, yetoj tzet chi el sbꞌeybꞌalnen ebꞌ, jaꞌ chi akꞌon etex el ebꞌ sattaj Jehová, yutol caw chi txꞌemletej sjowal scꞌul Naj yu ebꞌ.

9 Jaꞌ yili sat ebꞌ, jaꞌ chi akꞌon txeclo eloj, tol laan spenail ebꞌ jaxca ebꞌ a Sodoma. Okꞌbꞌalcꞌule oj yun ebꞌ, yutol jacꞌal oc ebꞌ jix iꞌontej syaꞌilal yibꞌan.

10 Alwej tet ebꞌ ánima watxꞌ snaꞌbꞌal, yutol asanne ebꞌ watxꞌ oj yun yelocoj, yutol oj tzala ebꞌ yet oj yilon oc spajtzebꞌal jantaj tzet watxꞌ jix el yunen ebꞌ.

11 Caw okꞌbꞌal cꞌul ebꞌ ánima pena snaꞌbꞌal. Caw cuscꞌulal oj eloc ebꞌ, yutol jatacꞌalaꞌ tzet jix el sbꞌeybꞌalnen ebꞌ, queytuꞌ oj yun ẍaꞌon spaj junjun ebꞌ.

12 Jaꞌ ebꞌ achꞌe chi etnen el jin conobꞌ tiꞌ, jaxa ebꞌ ix ix chi yakꞌ yaawil yibꞌan. Jex jin conobꞌ, jaꞌ ebꞌ chex ijbꞌani, jaꞌ ebꞌ chi iꞌon eytej je sat, catuꞌ chex yijbꞌan qꞌueytoj ebꞌ.

13 Jaꞌ Jehová eyecꞌ bꞌey sdespacho, tꞌanan oc yin ebꞌ conobꞌlaj yet chi ale oc syaꞌilal yibꞌan ebꞌ.

14 Catuꞌ oj yalon tet ebꞌ icham winaj yeoc yul conobꞌ, cꞌal tet ebꞌ eyoc yin yaawil xol ebꞌ: Jaex tiꞌ jix je yetnetoj jin awo, catuꞌ ey wal ecꞌ je yelkꞌan tuꞌ bꞌey je na, jaꞌton wan jix bꞌet je yelkꞌane ecꞌ tet ebꞌ mebꞌa tuꞌ.

15 ¿Tzet je yalon je yet je yetnen jin conobꞌ tiꞌ, yet che yetnen ebꞌ mebꞌa? ẍi Jehová Naj Chi Skeꞌ yu Masanil.

17 Yu jun tuꞌ xin, jain caw Jehová jin tiꞌ oj wakꞌ pujel xil sjolom ebꞌ ix yu yaꞌbꞌil, yet chi txeclo el sqꞌuixwilal ebꞌ ix, ẍi Dios.

18 Jaꞌ yet jun cꞌual tuꞌ, jaꞌ Jehová oj iꞌon el masanil jantaj tzetyetal eyoc yelawiloj smimanil ebꞌ ix a Jerusalén tiꞌ: Jaꞌton wan eyoc yin yajan ebꞌ ix, yin sjolom ebꞌ, cꞌal yin snukꞌ ebꞌ ix,

19 cꞌal wan chꞌen chꞌen eyoc yin snukꞌ skꞌabꞌ ebꞌ, cꞌal an smajil sat ebꞌ ix.

20 Oj iꞌle can el xotil sjolom ebꞌ, cꞌal scꞌalil snan ebꞌ, cꞌal sperfume ebꞌ, yetoj yom ebꞌ,

21 cꞌal scolkꞌabꞌ ebꞌ, cꞌal wan chꞌen chꞌen eyoc yin xaam ebꞌ ix,

22 cꞌal an spichil ebꞌ caw watxꞌ yili, cꞌal an scamiẍ ebꞌ, an xotil ebꞌ, cꞌal an txꞌuye,

23 chꞌen snen ebꞌ ix, an labꞌan scamiẍ ebꞌ, cꞌal an txeqꞌueqꞌui kꞌap, cꞌal smitxꞌbꞌanil xil sjolom ebꞌ ix.

24 Jaꞌ sqꞌuexel sperfume ebꞌ tol caw watxꞌ yoc sabꞌ, jaxa tzet pena yoc sabꞌ oj jul can sqꞌuexeloj. Jaxa lasu oj oc sqꞌuexeloj an kꞌalile, jaꞌ xil jolome watxꞌ yili yet yalantoj, tol oj pujeloj; jaxa an eel pichile oj oc sqꞌuexeloj an pichile watxꞌ yili, oj etextoj yili sate yu tzꞌaꞌil.

25 Jaꞌ yichamil ebꞌ ix ix a Jerusalén tiꞌ, oj eyqꞌuey ebꞌ yu espada. Jaꞌ ebꞌ akꞌom jowal oj cam can ebꞌ xol jowal tuꞌ.

26 Masanil ebꞌ conobꞌ oj okꞌ ebꞌ yu cuscꞌulal, tzꞌinini xacꞌal oj yun cantoj yul sconobꞌ ebꞌ.