4
Jaꞌ yet jun tiempoal tuꞌ, jaywanxane ebꞌ winaj oj cancanoj,yu jun tuꞌ, ey jujwanoj ebꞌ ix ix oj tewoc yin junoj winaj, oj yalon ebꞌ tet jun winaj tuꞌ jaxca tiꞌ: Tol oj wal chi ẍaꞌ ja cꞌul chin oc ja wistiloj, ẍi junjun ebꞌ ix, cu cuenta ojabꞌ cꞌal cu loꞌbꞌe cꞌal cu pichil jon, yet watxꞌ chi el jun qꞌuixwilal eyoc kin, yutol cꞌam kichamil jon, ẍi ebꞌ ix.
Oj Waꞌxoj A Conobꞌ Jerusalén
2 Jaꞌ yet jun tiempoal tuꞌ, oj yakꞌ txeclo a Jehová jun mactxequel xol ebꞌ yicꞌaal naj rey David, jaxca swol junoj teꞌ teꞌ. Tol caw watxꞌ yili, tol caw miman yeloc apnoj. Jaꞌ ebꞌ eyto can ecꞌ bꞌey Israel tuꞌ, caw oj tzala a scꞌul ebꞌ, yet oj yilon yelol sat yawoal xꞌotxꞌ ebꞌ tuꞌ, yutol caw watxꞌ yili ocoj.
3 Jaꞌ jaywanxa ebꞌ ey can bꞌey Jerusalén tuꞌ, jaꞌton Sión, jaꞌton ebꞌ iquisto cꞌal ecꞌ bꞌey Jerusalén, oj al-le yin ebꞌ tol sconobꞌ Jehová yeoc ebꞌ.
4 Jaꞌ yet jun tiempoal tuꞌ, jaꞌ Jehová oj naꞌon oc yin yetoj yipalil, catuꞌ oj yaon oc syaꞌilal, oj yiꞌcan el chicꞌ eyoc yin skꞌabꞌ ebꞌ a Jerusalén yutol jix smakꞌ cam yet animail ebꞌ, catuꞌ oj sajbꞌanele el ebꞌ a Sión yin spenail.
5 Jaꞌ yet cꞌualil oj yaoc Jehová jun asun yibꞌan masanil txꞌotxꞌ wonan Sión, cꞌal yibꞌan masanil ebꞌ chi syambꞌa sbꞌa tituꞌ; jaxa yet akꞌbꞌalil, ey mucꞌ cꞌal kꞌakꞌ oj yakꞌ sajilkꞌinal. Jaꞌ stzejejial Dios tuꞌ oj oc yeneloj masanil conobꞌ.
6 Jaꞌton jun tuꞌ, oj oc yeneloj ebꞌ yet ey sjowal yajan cꞌu yet cꞌualil, catuꞌ chi oc pax yeneloj ebꞌ yet ey nabꞌ cꞌal yet ey cajxuchum kaꞌeꞌ.