2 Jix sicꞌ can el ẍꞌenal sat txꞌotxꞌ, catuꞌ jix swaꞌnen oc scolalil, catuꞌ jix yawon ey jinat uva tol sicꞌbꞌil yu. Jix swaꞌne a jun ilbꞌal awo bꞌey snan xol yawo tuꞌ, jix swaꞌnen scaanteꞌal bꞌey chi tecꞌle el an. Caw watxꞌ sat uva oj yakꞌ yaloni, jaxa jix yunne, pa uva jix yakꞌa.

3 Yuxan jix yal naj ey yet jun mulnail tuꞌ jaxca tiꞌ: Ilaꞌ xin, jex a Jerusalén, cꞌal jex a Judá, alwej ey jin mac ey spenail, ¿tumi jain ma ja wawo tiꞌ?

4 ¿Tzet to wal watxꞌ chi wute wan wawo tiꞌ, yutol tzꞌajan jix yun wakꞌon servil? Jaꞌ waloni tol watxꞌ sat oj yakꞌa, jaxa jix yunne, pa uva jix yakꞌa.

5 Oj jin txꞌox ey jex an, tzet oj wute wan wawo tiꞌ: Oj wiꞌ can el scolalil eyocoj, yet watxꞌ chi lawi ey an. Oj jin jaj can eloj, yet chi tecꞌle cantoj teꞌ yu noꞌ noꞌ.

6 Oj jin bꞌejcan an jaxca tuꞌ, manxa oj wiꞌel stajinal yakꞌil an, catuꞌ man oj el yakꞌinal an. Oj chꞌibꞌa an cꞌultaj xol an, cꞌal teꞌ qꞌuix. Oj walon tet asun, tol cꞌam chi yakꞌ nabꞌ yibꞌan an, ẍi naj ey yet jun mulnail tuꞌ.

7 Queyton tuꞌ oj yun ebꞌ yicꞌaal Israel yetoj ebꞌ a Judá. Jaxca tol yawo Jehová yeoc ebꞌ, Naj Chi Skeꞌ yu Masanil. Jaꞌ Jehová chi yoche tol watxꞌ chi yute sbꞌa ebꞌ jaxca yalon ẍejbꞌanil, jaxa jix yunne, makꞌo cam ánima jix yun ebꞌ. Cꞌam niꞌoj swatxꞌilal jix yun ebꞌ, manxa jantajoj yel yaw ánima yetnen ebꞌ.

9 Tol jix wabꞌoc yu Jehová, Naj chi skeꞌ yu masanil, tol sowalil oj cancan tzꞌinan junjun na, cꞌamxa mactxequel oj caey ecꞌ bꞌey mimej na laj tuꞌ, caxcꞌal mi watxꞌ yili.

10 Jaꞌ yin junoj 90 txꞌanil uva awbꞌil asanxane joebꞌ galón yal uva oj yakꞌa. Jaxa yin wajebꞌ quintal ixim jinat, asanxane wajebꞌ almu oj yakꞌa.

11 Caw okꞌbꞌal cꞌul ebꞌ sebꞌ chi a waan yet skꞌinibꞌalil, catuꞌ chi cꞌoli yucꞌwi an ebꞌ; jacꞌalaꞌ yuqꞌuen an ebꞌ catuꞌ chi kꞌejbꞌi eyoj, masantaꞌcꞌal chi qꞌueyel scꞌul ebꞌ yu an tuꞌ.

12 Jaꞌ yet chi waꞌxi mimej loꞌbꞌe yu ebꞌ, chi ucꞌwi vino ebꞌ, catuꞌ chi yaon oc son ebꞌ, jaꞌton sonal arpa, sonal violín, sonal chꞌen pandereta, cꞌal sonal chꞌen flauta. Jal jantaj tzet chi yun Dios yu ebꞌ, cꞌam niꞌoj yeloc apnoj yul sat ebꞌ.

13 Yu cꞌal jun tuꞌ xin, yuxan oj iꞌletoj ebꞌ jin conobꞌ yin yakꞌomaloj servil, yutol man yotaj oj Dios ebꞌ. Masanil ebꞌ yaaw yeoc xol ebꞌ, cꞌal ebꞌ conobꞌ oj cam ebꞌ yu wail, cꞌal yu tajin tiꞌal.

14 Yu jun tuꞌ xin, jaxca wal tol oj sjaj stiꞌ syaawil camich yin ebꞌ, catuꞌ oj bꞌukꞌle eytoj jantaj ebꞌ ánima cꞌal ebꞌ yaaw yeoc bꞌey conobꞌ Jerusalén, cꞌal jantaj ebꞌ ánima comon cꞌal chi el yaw chi eqꞌui.

15 Jaꞌ ebꞌ ánima chi yiꞌa can sbꞌa, oj iꞌle ey ebꞌ, catuꞌ oj iꞌle el sqꞌuixwil ebꞌ, yutol yeynajil xacꞌal oj utele ebꞌ.

16 Jaꞌ Jehová Naj Yaaw yin Masanil, oj yakꞌ txeclo eloj tol miman yeloc apnoj, cꞌal jantaj tzet chi skeꞌ yu yetoj yipalil; cꞌal xꞌoxon eloj tol yel xacꞌal watxꞌ, cꞌal xꞌoxon eloj tol jichan ton snaꞌbꞌal.

17 Jantaj wan conobꞌ bꞌey waꞌnebꞌil a mimej na, oj akꞌle lawoj eyoj, jaxa noꞌ meꞌ cꞌal noꞌ chiw oj teynele low sat txꞌotxꞌ.

18 Okꞌbꞌal cꞌul jex jantaj jex che bꞌeybꞌalne spenail, cꞌal jantaj jex che yiꞌeytej sat je yet animail yin lekꞌtiꞌal, jaxca wal tol ijbꞌil oc spenail tuꞌ je yu, laan jaxca chi yun skꞌal-le oc junoj steꞌal carreta yibꞌan snukꞌ noꞌ wacax, catuꞌ chi sjutxon ecꞌoj, queytuꞌ je yeocoj.

19 Che yalon jaxca tiꞌ: Yun ojabꞌ jantaj tzet chi snaꞌ cu Diosal jaon Israel jon tiꞌ kibꞌan, catuꞌ oj kilon tzet chi cu elocoj. Yun ojabꞌ yin eymanil tzet chi snaꞌ, yet watxꞌ chi kotajne eloj, je chi, che yaloni.

20 Okꞌbꞌal jex cꞌul jantaj jex che yalaꞌ tol watxꞌ spenail, jaxa swatxꞌilal che yalaꞌ tol pena, jaxa sajkꞌinal, tol kꞌejkꞌinal je yaloni, jaꞌ kꞌejkꞌinal, tol sajkꞌinal je yaloni. Jaꞌ tzetyetal tol kꞌaꞌ, tol chiꞌ yuqꞌui je yaloni, jaxa tzet chiꞌ, kꞌaꞌ yuqꞌui je yaloni.

21 Caw okꞌbꞌalcꞌule jantaj ebꞌ chi yaloc sbꞌa jelanil, cꞌal ebꞌ caw ey snaꞌbꞌal chi yute sbꞌa yul yet.

22 Okꞌbꞌal cꞌul ebꞌ jelan yucꞌwi an, cꞌal ebꞌ jelan scalon teꞌ an tuꞌ.

23 Tol jaꞌ yu tumin chi yalon a ebꞌ, tol cꞌam spenail ebꞌ ey spenail; jaxa ebꞌ ánima watxꞌ sbꞌeybꞌal, chi ale can oc syaꞌtajilal yibꞌan ebꞌ.

24 Yu jun tuꞌ xin, yuxan jaxca wal chi yun stzꞌaꞌtoj an chꞌim yu kꞌakꞌ, catuꞌ chi lawi ey an yin eymanil, queywal tuꞌ oj yun slawi ey ebꞌ, jaxca wal yet chi kꞌaꞌtoj xeꞌ an cꞌultaj, cꞌal an xumac teꞌ tol pojoj xacꞌal chi yun cantoj. Yutol jix yintajne can el ẍejbꞌanil Jehová ebꞌ; Naj Yaaw yibꞌan Masanil.

25 Yu jun tuꞌ xin, yuxan jix tit sjowal scꞌul Jehová yin sconobꞌ, jix ton ale oc syaꞌilal yin ebꞌ sconobꞌ tuꞌ. Jix bꞌilwi a masanil txꞌotxꞌ mimej wonan, tuxa cꞌal teltombꞌa ey ebꞌ camom yul-laj scalleal conobꞌ. Ma cꞌal oc tucan sjowal scꞌul Jehová yin ebꞌ yu jun tzet jix yun tuꞌ, tol jacꞌalaꞌ yale oc syaꞌilal yibꞌan ebꞌ.

26 Jaꞌ Jehová oj yiꞌa sbandera, yet watxꞌ chi skeꞌ yilon wanxa conobꞌ naat ey, catuꞌ oj xubꞌlojtoj Naj tet ebꞌ ey bꞌey stiꞌlaj slawubꞌal txꞌotxꞌ txꞌotxꞌ tiꞌ, yin eymanil oj yun sjul ebꞌ scꞌatan Naj.

27 Cꞌam junoj ebꞌ soldado oj cꞌuumbꞌoj a xol ebꞌ, tam wal ey junoj mactxequel oj telcꞌo xol ebꞌ. Cꞌam junoj mactxequel chi wey sat eyoc xol ebꞌ. Cꞌam junoj mactxequel cꞌuun yeoc scꞌalil, tam wal ey junoj ebꞌ oj tujchatoj xꞌanil xanabꞌ.

28 Jaꞌ chꞌen sjulbꞌal ebꞌ soldado tuꞌ, caw nijbꞌil atej yee chꞌen; watxꞌ xacꞌal yeoc steꞌal sjulbꞌal ebꞌ tuꞌ. Jaꞌ xoyobꞌ yajan ẍe ebꞌ laan yili jaxca chꞌen chꞌen, cꞌal scarruaje yet jowal ebꞌ, caw jelan sbꞌey jaxca kajxuchum kaꞌeꞌ.

29 Jaꞌ yet chi el yaw ebꞌ, jaxca wal yel yaw noꞌ bꞌalam yet chi seyon ẍiꞌbꞌe noꞌ; catuꞌ chi yiꞌontoj noꞌ bꞌey snachꞌen, cꞌam mactxequel oj skeꞌ stokꞌon ecꞌ tet ebꞌ.

30 Jaꞌ yet jun cꞌual tuꞌ, oj el yaw jun nación tuꞌ yin cu conobꞌ, oj bꞌilwoj jaxca chi yun sbꞌilwi jaꞌ mar. Jaꞌ mactxequel oj toj tꞌanan yin jun conobꞌ tuꞌ, oj yil jun syaꞌilal ebꞌ tuꞌ, tol oj oc kꞌejkꞌinal cꞌal mimej syaꞌilal yibꞌan, jaꞌ satcan oj tancan el sajkꞌinalil yu asun.