Yet Jix Awtele Naj Isaías Yu Dios
6
Jaꞌ yet jun abꞌil yet jix cam naj rey Uzías, jix wil yin Dios, Naj Kaawil tol chotan ey bꞌey sdespacho tol yel xacꞌal naat eyaoj. Nonaj yul sTemplo yu sjojan pichil. 2 Jaꞌ yibꞌan Jehová tuꞌ eyoc wan ángel laan yili ebꞌ jaxca xaj kꞌakꞌ, wajebꞌ xicꞌ junjun ebꞌ. Caabꞌ xicꞌ ebꞌ chi majchen el sat, caabꞌ xicꞌ ebꞌ chi majchen el yajan, jaꞌ yetoj caabꞌxa xicꞌ ebꞌ chi skeꞌ stoo jenenoj ebꞌ. 3 Catuꞌ chi yalon ebꞌ tet junjun jaxca tiꞌ:Jaꞌ Jehová Asanxane Ocoj, Caw wal Watxꞌ Naj, jaꞌton Naj Yaaw yin Masanil. Chi txeclo el stzejejial Naj bꞌey masanil yul yibꞌankꞌinal tiꞌ, ẍi ebꞌ.
4 Jaꞌ yet jix oc jun aw tuꞌ, jix bꞌilwi a spuertail Templo tuꞌ, catuꞌ jix noel yul tuꞌ yu mucꞌ. 5 Jaꞌ yet tuꞌ jix walon yin jin naꞌbꞌal jaxca tiꞌ: Caw okꞌbꞌal jin cꞌul. Oj jin camoj, yutol jix wil yin Naj Rey, jaꞌton Jehová Naj Yaaw yibꞌan Masanil, jain tiꞌ alom jin pena kꞌane, catuꞌ caan jin pax ecꞌ snan xol jun conobꞌ pena skꞌanabꞌi, jin chi.
6 Jaꞌ yet jun txolan tuꞌ, ey jun ángel jix tit jenenoj jin cꞌatan jaxca xaj kꞌakꞌ, iꞌbꞌil a jun chꞌen lotꞌbꞌal a stzakꞌakꞌ yu jix bꞌet yiꞌa bꞌey jun yet xaambꞌal tuꞌ. 7 Jix snijon oc yin jin tiꞌ, jix yalon jaxca tiꞌ:
Jaꞌ jun stzakꞌakꞌ jix jin nijoc yin ja tiꞌ, tiꞌ, jaꞌ jix iꞌon can el ja penail cꞌal ja mul, ẍi jun ángel tuꞌ ey jin.
8 Jix lawi tuꞌ, jix yalon Jehová jaxca tiꞌ:
¿Mactxequel junoj chin chejtoj tinaniꞌ? ¿Mactxequel junoj chi oc jin chejabꞌoj? ẍi Dios.
Catuꞌ jix jin takꞌwi tet jaxca tiꞌ:
Ti ey jin, jaach jin Diosal, chin oc ja chejabꞌoj, jin chi tet.
9 Jix yalon Jehová ey jin jaxca tiꞌ:
Asiꞌ xin, catuꞌ cha walon tet jun conobꞌ tuꞌ: Caxcꞌal mi che yabꞌ yetoj je txiquin, cꞌam cꞌaltaꞌ chi naꞌcha el je yu. Caxcꞌal mi che yil yetoj je sat, cꞌam cꞌaltaꞌ chi naꞌcha el je yu tzet oj je yil tuꞌ, ja chi tet ebꞌ.
10 Etnetoj snaꞌbꞌal jun conobꞌ tiꞌ, majche el xiquin ebꞌ, cha majche el sat ebꞌ, yet watxꞌ cꞌam chi yabꞌ ebꞌ cꞌal yilon ebꞌ, tam wal chi naꞌcha el yu ebꞌ, yet watxꞌ cꞌam chi jul ebꞌ jin cꞌatan yu wanten ebꞌ, ẍi Dios.
11 Jix jin kꞌanle tet Naj jaxca tiꞌ:
Jaach jin Diosal ¿Jantaj wal tiempo catuꞌ oj ecꞌ el jun tuꞌ? jin chi tet.
Jix yalon ey jin jaxca tiꞌ:
Al cꞌal eloj, masantaꞌcꞌal chi uchle ey jun conobꞌ tiꞌ, yutol cꞌamxa mactxequel oj caey ecꞌ sat. Masantaꞌcꞌal yet cꞌamxa junoj ánima chi cancan yul-laj na tuꞌ, tol cusiltaj txꞌotxꞌ xacꞌal oj yun cantoj.
12 Masantaꞌcꞌal oj watoj wan ánima tiꞌ naat, catuꞌ oj cancan tzꞌinan yul-laj conobꞌ.
13 Ta tol eyto jaywanojxa ánima chito cancan yul conobꞌ tiꞌ, oj wuch cꞌal pax ey jun conobꞌ tiꞌ junelxa. Jaxca taꞌ chi yun teꞌ jii, cꞌal teꞌ maatxꞌ, jaꞌ yet chi kꞌajle ey teꞌ, chi tit swol skꞌoal teꞌ, queytuꞌ oj yun jaywanojxa ebꞌ sicꞌbꞌil el wu yet chi lawi ey jin conobꞌ tiꞌ, ẍi Dios.