Bꞌabꞌel Skꞌane Isaías Tet Naj Ahaz
7
Jaꞌ yet eyoc naj Ahaz yin reyal bꞌey Judá jaꞌton naj scꞌaal Jotam yitxiquin Uzías, jaꞌ naj Resín sreyal Siria, yetoj naj chi yij sbꞌi Pécah, scꞌaal Remalías, sreyal conobꞌ Israel, jix yoche ebꞌ chi yakꞌ jowal yetoj naj sreyal Judá, yet watxꞌ chi eyqꞌuey conobꞌ Jerusalén yu ebꞌ yaloni. Jaxa jix yunne ma skeꞌ yu ebꞌ naj. 2 Jaꞌton yet tuꞌ jix al-le yabꞌ naj rey Ahaz, cꞌal ebꞌ eyoc yin yopiso yetoj, tol jaꞌ ebꞌ a Siria ipan syambꞌan sbꞌa ebꞌ yetoj ebꞌ a Israel, yu yakꞌon jowal ebꞌ yetoj Judá. Jaxa ebꞌ conobꞌ yetoj naj rey jix cꞌoli sbꞌilwi a ebꞌ yu xiwcꞌulal, jaxca wal chi yun sbꞌilwi teꞌ teꞌ yu kaꞌeꞌ.3 Jix yalon Jehová tet Isaías jaxca tiꞌ: Asiꞌ, cha wiꞌontoj naj ja cꞌaal Sear-iasub,a ja wetoj. Jaꞌ tituꞌ oj ja chaꞌle ja bꞌa yetoj naj Ahaz bꞌey chi el sne jaꞌ jaꞌ bꞌey jaꞌ miman naabꞌ jaꞌ eyoc bꞌey yibꞌan bꞌe, bꞌey chi txꞌale an kꞌap. 4 Cha walon tet naj jaxca tiꞌ:
Cha wil cꞌal ja bꞌa, catuꞌ cꞌam chach xiwi, man ojabꞌ comonoj cha xibꞌte ja bꞌa tet naj Resín, yetoj ebꞌ Siria, yetoj cꞌal pax naj scꞌaal Remalías tuꞌ, cꞌam ojabꞌ chach xiwi. Laan ebꞌ jaxca caabꞌoj kꞌetxan cuux chi el smucꞌal.
5 Yel toni, jaꞌ ebꞌ a Siria, yetoj ebꞌ conobꞌ Efraín, cꞌal ebꞌ scꞌaal naj Remalías, caw pena tzet lalan snaꞌon ebꞌ ja win. Chi yalon ebꞌ jaxca tiꞌ:
6 Toonwej, kakꞌwej jowal yin conobꞌ Judá, toonwej cu xibꞌte ebꞌ. Kakꞌwej eyqꞌuey jun conobꞌ tuꞌ, jaxa naj scꞌaal Tabeel oj kaoc yin reyalil tituꞌ, ẍi ebꞌ.
7 Jain Jehová jin chi wal jaxca tiꞌ: Cꞌam bꞌakꞌin oj eloc jaxca tzet chi snaꞌ ebꞌ naj tuꞌ.
8 Yutol jaꞌ conobꞌ Damasco, jaꞌ miman conobꞌ yeoc yin conobꞌ Siria, jaꞌ naj Resín eyoc sreyaloj conobꞌ Damasco tuꞌ. Jaꞌ Samaria, jaꞌ miman conobꞌ yeoc yin Efraín, jaꞌ jun yuninal naj Remalías tuꞌ eyoc sreyaloj.
9 Jaꞌ yet 65 abꞌil tinaniꞌ, oj lawoj ey ebꞌ a Efraín tuꞌ, yuxan manxa nación oj yun canoj. Ta jaex tiꞌ, ta cꞌam chin je yaoc yin je cꞌul sicꞌlebꞌil, oj akꞌle eyqꞌuey je conobꞌ Jerusalén tiꞌ, ja chi tet ebꞌ, ẍi Dios.
Jaꞌ Skꞌaneal Jun Unin Chi Yij Emanuel
10 Jix yalon pax Jehová tet naj Ahaz jaxca tiꞌ: 11 Kꞌan tet Jehová ja Diosal junoj txꞌoxbꞌanile tol qꞌueyubꞌtaj yili, caxcꞌal mi jata cꞌal bꞌey snaatil yich txꞌotxꞌ txꞌotxꞌ ma bꞌey yibꞌan atoj satcan, ẍi Isaías tet naj.
12 Jix takꞌwi naj Ahaz jaxca tiꞌ: Cꞌamaj, ma skeꞌ wakꞌon porobꞌal Jehová yin jin kꞌanon wil junoj txꞌoxbꞌanile tet, ẍi naj Ahaz.
13 Jix yalon naj Isaías jaxca tiꞌ:
Jex yicꞌaal naj rey David, abꞌwej tzet oj walaꞌ: Jaꞌ mi je naꞌoni tol cꞌam yeloc apnoj wan ánima tiꞌ. ¿Tumi che yoche che yetne cu Diosal jaxca che yute ebꞌ tuꞌ?
14 Jaꞌcaw Jehová oj txꞌoxon junoj tzet caw qꞌueyubꞌtaj yili ey jex: Ey jun ix kꞌopo ix oj oc jun unin yin, oj aloj jun swinaj unin, Emanuelb oj yij sbꞌi yu ix.
15 Jaꞌ yet chi yotajne jun unin tuꞌ tzetyetal watxꞌ cꞌal tzetyetal pena, oj yintajne el spenail, jaꞌ yet tuꞌ oj sloꞌ lech panajxa yetoj yal awcabꞌ.
16 Jaꞌ yet cꞌamto chi tzꞌajna snaꞌbꞌal jun unin tuꞌ, jaꞌ caabꞌ conobꞌ yetoj cawan rey bꞌey chach xiw tiꞌ, oj can tzꞌinanoj.
17 Jaꞌ Jehová oj aontej jun syaꞌilal yibꞌan, cꞌal yibꞌan ja conobꞌ, cꞌal yibꞌan ebꞌ yicꞌaal naj rey David. Jaꞌ jun tuꞌ, cꞌamto juneloj chi yunne yet tax cꞌal jix yiꞌon el sbꞌa Efraín bꞌey Judá, ẍi Isaías. (Chi yal yeloc apnoj tol jaꞌton syaꞌtajilal oj yaoc naj sreyal Asiria.)
18 Jaꞌ yet jun cꞌual tuꞌ, jaꞌ Jehová oj awtentej ebꞌ soldado caan bꞌey stiꞌlaj jaꞌ miman jaꞌ bꞌey Egipto, catuꞌ oj tit somna ebꞌ jaxca noꞌ us, cꞌal ebꞌ Asiria oj jul somna ebꞌ jaxca snoꞌal awcabꞌ.
19 Catuꞌ oj caey ecꞌ masanil ebꞌ stiꞌlaj spananil jobꞌe, cꞌal yul-laj nachꞌen, cꞌal xol-laj eltzabꞌ, cꞌal yul-laj bꞌey chi yucꞌ jaꞌ noꞌ noꞌ.
20 Jaꞌ yet jun tiempoal tuꞌ, jaxca junoj josbꞌal xil jolome queytuꞌ oj utele naj sreyal Asiria yu Jehová bꞌey skꞌaxepal ecꞌtoj jaꞌ miman Éufrates, catuꞌ pilan oj iꞌletoj masanil je tzetyetal, jaxca chi yun yiꞌon el junoj tzujom xil jolome, cꞌal xil tiꞌe, yetoj xil mimanile. (Chi yal yeloc apnoj tol oj yiꞌecꞌ je txꞌotxꞌ, cꞌal je yawo je masanil jaex a Judá jex tiꞌ.)
21 Jaꞌ yet chi lawi jun jowal tuꞌ, caw watxꞌ yet ebꞌ tol ey junoj sjobꞌbꞌeal xutx swacax, ma cacꞌonoj smeꞌ ma chiw, 22 oj yakꞌ slech noꞌ, catuꞌ oj swaꞌnen lech panajxa, yutol oj yakꞌ lech noꞌ, yuxan jaꞌ ebꞌ oj colcha can xol jun jowal tuꞌ, asanxane lech panajxa oj sloꞌ ebꞌ, cꞌal yuqꞌuen yal awcabꞌ ebꞌ. Cꞌam junojxa tzetyetal watxꞌ sloꞌon ebꞌ. 23 Jaꞌ yet jun tiempoal tuꞌ, jaꞌ yet yalantoj bꞌey awbꞌiltaꞌle junoj 1,000 bꞌocꞌan an uva, catuꞌ 1,000 siclo chꞌen tumin plata stool chi yakꞌa, eltzabꞌ qꞌuix oj yun cantoj, catuꞌ oj chꞌibꞌa an cꞌultaj sat. 24 Asan ebꞌ ujtem noꞌ oj skeꞌ yecꞌ yetoj sjulbꞌal tituꞌ; yutol chꞌimlaj xacꞌal yili masanil, cꞌal eltzabꞌ qꞌuix xacꞌal oj yun cantoj. 25 Caw eltzabꞌ qꞌuix oj yun cantoj bꞌey txꞌotxꞌ tzalquiltaj, tol jaꞌ yet yalantoj chi ecꞌ chꞌen azarón sat txꞌotxꞌ yet chi awle ey awo. Cꞌam mactxequel oj mulna sat txꞌotxꞌ, asanne noꞌ wacax cꞌal noꞌ meꞌ oj ecꞌ low sat txꞌotxꞌ.