Jaꞌ Yuninal Naj Isaías
8
Jix yalon Jehová ey jin jaxca tiꞌ: Sey junoj miman chemteꞌ, catuꞌ chach tzꞌibꞌli oc yin. Yin mimej tzꞌibꞌ chi yun ja tzꞌibꞌen ey jun bꞌie tiꞌ jaxca tiꞌ: Maher-salal-hasbaz.a 2 Chi lawi tuꞌ, cha waon oc cawanoj ebꞌ yakꞌomal xaambꞌal yin testigoal, yutol yel chi yal ebꞌ, jaꞌton naj Urías, yetoj naj Zacarías, scꞌaal Jeberequías, ẍi Dios ey jin.3 Jix lawi tuꞌ, jix jin wey yetoj ix wistil tol ẍejabꞌ Dios yeocoj, catuꞌ jix oc unin yin ix. Jaꞌ yet jix ali jun winaj unin tuꞌ, jix yalon Jehová ey jin jaxca tiꞌ: Jaꞌ naj unin tiꞌ, Maher-salal-hasbaz, che yakꞌ yij sbꞌi naj. 4 Yutol jaꞌ yet cꞌamto chi skeꞌ yalon naj unin tiꞌ, chicay, mamin, jaꞌ yet tuꞌ oj jul iꞌletoj masanil sbꞌeomal ebꞌ a Damasco, cꞌal ebꞌ a Samaria yu naj sreyal Asiria, ẍi Dios. 5 Jix yalon Jehová yet scaelal ey jin jaxca tiꞌ:
6 Yutol chi tzala jun conobꞌ tiꞌ yu tzet oj wun yin naj Resín, yetoj cꞌal naj scꞌaal Remalías, jal ebꞌ a Judá cꞌam chi yoche ebꞌ, tol chin yintajne el ebꞌ jaxca jaꞌ Siloé tol cꞌuancꞌulal sbꞌeyi.
7-8 Yu jun tuꞌ xin, jain oj wiꞌtej jaꞌ miman Éufrates yibꞌan ebꞌ. Oj elcan jaꞌ yul sbꞌe, oj malel stiꞌlaj jaꞌ, oj apnoj tacꞌal jaꞌ bꞌey Judá, catuꞌ oj noel masanil sat txꞌotxꞌ yu jaꞌ. Oj aapnoj jaꞌ yin steel snukꞌ ebꞌ ánima. (Jaꞌ jun jaꞌ chi bꞌina tiꞌ, jaꞌ naj sreyal Asiria yetoj masanil ebꞌ soldado chi yalaꞌ.) Oj toj tacꞌal jaꞌ yibꞌan masanil xꞌotxꞌ yet Emanuel, ẍi Dios.
9 Jex conobꞌ, yambꞌawej je bꞌa catuꞌ chex tit yin jowal; asan xin, caw oj jex cam je masanil. Abꞌwej jun kꞌane tiꞌ, jantaj jex conobꞌlaj tol naat ey jex eloj. Naꞌbꞌa xacꞌal che yiꞌtej je mitxꞌkꞌabꞌ yet jowal tuꞌ, yutol oj jex camoj.
10 Oj ton je wa alne tzet oj je yute je bꞌa; man xacꞌaltaꞌ oj ẍaꞌle sbꞌa je kꞌane tuꞌ, caxcꞌal mi oj je yaoc yin xolilal tzet oj je yunne, manxa oj yun tzet che naꞌ tuꞌ, yutol eyecꞌ Dios ketoj jon.
Asanne Tet Dios Smoo Chi Cu Xiwi
11 Jaꞌ Jehová, caw ip jix yun yoc mitxꞌan win sicꞌlebꞌil, jix yalon ey jin jaxca tiꞌ: Cꞌam ojabꞌ cha bꞌeybꞌalne sbꞌeybꞌal wan ánima tiꞌ. 12 Cꞌam ojabꞌ cha wa alne yetoj ebꞌ ja wet conobꞌ tiꞌ yin je kꞌanon scolwal junojxa mactxequel. Cꞌam ojabꞌ cha xibꞌte ja bꞌa yu bꞌey chi xiw ebꞌ ánima tiꞌ. 13 Jain Jehová jin tiꞌ, yaaw jin yibꞌan Masanil, jaꞌ ojabꞌ ey jin smoo chach xiwi, miman ojabꞌ weloc apnoj yul ja sat. 14 Yet watxꞌ asanne ojabꞌ win chi skeꞌ ja colon ja bꞌa. Jal pax ebꞌ Israel, cꞌal ebꞌ a Judá, jaxca wal junoj chꞌen chꞌen bꞌey chi cu chakꞌoc kajan weoc tet ebꞌ. Yu jun tuꞌ, yuxan oj michꞌcha ey ebꞌ a Jerusalén tiꞌ. 15 Ecꞌal ebꞌ oj ẍakꞌoc yajan, oj eyqꞌuey ebꞌ, catuꞌ oj cam ebꞌ, ecꞌal ebꞌ oj can yul yaal, catuꞌ oj michꞌcha ey ebꞌ, ẍi Dios.
Jix Yakꞌ Cuyo Naj Isaías Tet Ebꞌ Scuywom
16 Jex jin cuywom, cꞌubꞌawej wan scuybꞌanil Dios tiꞌ yin je naꞌbꞌal, watxꞌ ojabꞌ chi yun scancan yin je naꞌbꞌal, yet watxꞌ cꞌam bꞌakꞌin chi too qꞌueycꞌulal je yu.
17 Caxcꞌal mi chi yewbꞌa el sbꞌa Jehová ey jon jaon yicꞌaal jon Jacob tiꞌ, jain tiꞌ chi waoc Dios yipoj jin cꞌul, tol asanne Naj chi colwa wetoj, cꞌal waon oc Naj yipoj jin cꞌul.
18 Jaꞌ jin bꞌi jain tiꞌ yetoj sbꞌi ebꞌ wuninal txꞌoxbꞌanile yeoc yu Jehová xol masanil ebꞌ wet Israelal, yutol queytuꞌ jix jin yute Jehová, Naj chi skeꞌ yu masanil, yutol caan ecꞌ Naj bꞌey wonan Sión, jix yakꞌ cuybꞌanile Naj ey jon yet chi cu oc txꞌoxbꞌanileal tet ebꞌ ket Israelal.
19 Caxcꞌal mi chi yal ebꞌ ánima ey jex jaxca tiꞌ: Kꞌanlewej je yabꞌ tet ebꞌ chi naꞌon el junoj kꞌane, cꞌal tet ebꞌ chi kꞌanabꞌ yetoj spixan camom, jaꞌton ebꞌ chi sasoni cꞌal ebꞌ chi numnoni, ẍi mi ebꞌ ey jex. ¿Tumi man oj skꞌanle snaꞌbꞌal junoj conobꞌ tet sDiosal. ¿Watxꞌ mi tol chi skꞌanle junoj naꞌbꞌale ebꞌ iquis tet ebꞌ camom yin tzet chi yun ebꞌ che naꞌ?
20 Chi cam je yiloni tzet ẍi ley, cꞌal ẍejbꞌanil Dios. Ta man laan oj chi yun yalon wan ánima tiꞌ, eyto cꞌal oc ebꞌ xol kꞌejkꞌinal chi yal tuꞌ, jaꞌ ebꞌ jaxca tuꞌ yaloni cꞌam snaꞌbꞌal ebꞌ.
21 Jaꞌ ebꞌ ánima tiꞌ, oj ecꞌ tzꞌeytzꞌon ebꞌ yu wail. Yu jun tuꞌ, oj tit sjowal ebꞌ, oj bꞌuchwa ebꞌ yin sreyal, cꞌal yin sDiosal. Catuꞌ oj a tꞌanan ebꞌ satcan,
22 cꞌal yey tꞌanan ebꞌ sat txꞌotxꞌ, asanne cꞌal cuscꞌulal, cꞌal kꞌejkꞌinal oj ilcha yu ebꞌ, jaxca tol oj majchele ey ebꞌ yu kꞌejkꞌinal yin junelne.