2 Jaꞌ ebꞌ ánima lalan sbꞌey snan xol kꞌejkꞌinal tuꞌ, oj yil sjul jun miman sajkꞌinal ebꞌ. Jaꞌ jun sajkꞌinal tuꞌ, oj oc kopna xol ebꞌ eyecꞌ xol kꞌejkꞌinal tuꞌ.

3 Jaach jin Diosal, jaach jix ja wakꞌ chꞌibꞌ cu bꞌisil jaon ja conobꞌ jon tiꞌ, jix ja wakꞌon pax cu tzalacꞌulal jon. Cu masanil jon caw chi cu tzala ja sattaj. Jaxca wal tzalacꞌulal yet chi yambꞌale a sat awo, ma jaxca chi yun stzala ebꞌ soldado yet chi spoꞌon can ecꞌ mimej bꞌeomal chi yiꞌ ebꞌ yin jowal.

4 Yutol jaach jix ja qꞌueycan el jun conobꞌ anen oc ebꞌ ja conobꞌ yin yakꞌomaloj servilal, cꞌal yin syaꞌtajilal. Jix ja qꞌueyon can el jun conobꞌ tuꞌ jaxca jix yun ja qꞌueyon el conobꞌ Madián yet yalantoj.

5 Jaꞌ masanil xanabꞌ ebꞌ soldado, cꞌal an pichile bꞌonbꞌil yu chicꞌ, oj nusle can tzꞌaꞌ an masanil.

6 Yutol jix ali jun winaj unin cu xol, yutol jaꞌ Dios jix aontej jun unin tiꞌ ey jon; jaꞌ jun unin tiꞌ, jix akꞌle yopiso yin yakꞌon yaawil. Caw miman yeloc apnoj sbꞌi yin syaawil tuꞌ, oj yij sbꞌi jaxca tiꞌ: Naj Qꞌueyubꞌtaj yili yin yakꞌon naꞌbꞌale, Naj Dios tol miman yipalil, Naj Mame cꞌam yichbꞌanil catuꞌ cꞌam slawubꞌal, Naj Yaaw yin yakꞌon watxꞌcꞌulal.

7 Oj yakꞌ Reyalil Naj sqꞌuexeloj naj rey David. Oj yakꞌ yaawil yibꞌan masanil ánima bꞌey junjun conobꞌ, cꞌam bꞌakꞌin oj lawoj swatxꞌcꞌulal tuꞌ. Oj yiꞌ yip yopiso tuꞌ sicꞌlebꞌil, oj snaꞌon oc yin watxꞌcꞌulal, cꞌal yin sjichanil. Jaꞌ jun tiꞌ oj yunne, yutol jaꞌ Jehová Naj Yaaw yibꞌan Masanil jix naꞌoni.

9 Jaꞌ masanil ebꞌ yicꞌaal Efraín caan bꞌey Samaria, oj naꞌcha el jun tiꞌ yu ebꞌ, tol snaꞌbꞌal Dios jun oj yun tuꞌ. Yu cꞌal smeynebꞌail ebꞌ, cꞌal yu spitalil ebꞌ, yuxan chi yal ebꞌ jaxca tiꞌ:

10 Tuxa jix ey bꞌulna xaanil na, jaon xa oj cu caꞌ waꞌne a yetoj chꞌen chꞌen tol josbꞌil. Ta jix tzokꞌletoj teꞌ sicómoro eyon yin patzabꞌil, jaxa teꞌ kꞌuteꞌ oj kaoc sqꞌuexeloj, ẍi ebꞌ.

11 Jaꞌ Jehová oj yiꞌtej wan scajat naj Resín yin ebꞌ Israel, jacꞌal oc Naj oj akꞌon yun ebꞌ yin yakꞌon jowal yin ebꞌ conobꞌ Israel.

12 Jaꞌ ebꞌ a Siria oj tit yetcꞌulal bꞌey chi aol cꞌu, jaxa ebꞌ Filisteo oj tit yetcꞌulal bꞌey chi too cꞌu. Junxane oj yun sqꞌueyle el Israel yu ebꞌ, jaxca tol oj bꞌukꞌle eytoj ebꞌ. Man tocꞌal pax oj oc tucan sjowal scꞌul Jehová, yutol lalantocꞌal yaon oc syaꞌilal yin ebꞌ sconobꞌ.

13 Jaꞌ ebꞌ conobꞌ tuꞌ, man oj snaꞌ sbꞌa scꞌul ebꞌ, ma yal sbꞌa ebꞌ tet Dios, caxcꞌal mi jix ale oc syaꞌilal ebꞌ yu Dios. Ma cꞌal yaoc sbꞌa ebꞌ yul skꞌabꞌ Jehová, Naj Yaaw yibꞌan Masanil.

14 Yu jun tuꞌ, yuxan naꞌbꞌilxa yu Jehová tzet oj yun yin conobꞌ Israel, jaxca wal chi yun junoj noꞌ noꞌ chi tzokꞌle el sne cꞌal sjolom yu junoj mactxequel, ma jaxca yet chi kꞌajle a teꞌ palma, cꞌal teꞌ aa yin junne cꞌual.

15 (Jaꞌ jun jolome tuꞌ, chi yal yeloc apnoj, jaꞌton ebꞌ icham winaj yeoc yul conobꞌ, cꞌal ebꞌ eyoc yin yaawilal yaloni; jaxa sne tuꞌ, jaꞌton ebꞌ chi yaloc sbꞌa ẍejabꞌoj Dios, ebꞌ chi cuywa yin lekꞌtiꞌal.)

16 Jaꞌ ebꞌ yaaw yeoc bꞌey jun conobꞌ tuꞌ, caw lekꞌtiꞌ ebꞌ, yutol caw chi ijbꞌale qꞌueytoj ebꞌ ánima yu ebꞌ.

17 Yu jun tuꞌ, yuxan manxa oj okꞌ scꞌul Jehová yin ebꞌ achꞌe, tam wal oj cus scꞌul yin ebꞌ unin camnajxa smam xutx, tam wal yin ebꞌ ix ix camnajxa yichamil. Yutol jaꞌ masanil ebꞌ ánima tuꞌ, junelne cꞌam yeloc apnoj Dios yul sat ebꞌ, caw penawom ebꞌ, pena kꞌane xacꞌal chi yal masanil ebꞌ. Yu cꞌal mi jaxca tuꞌ oj yun ebꞌ, man tocꞌal oj oc tucan sjowal scꞌul Jehová yin ebꞌ, yutol lalantocꞌal yaon oc syaꞌilal sconobꞌ tuꞌ.

18 Jaꞌ spenail chi yun ebꞌ conobꞌ tuꞌ, caw wal miman tzet chi yetnetoj, laan jaxca junoj bꞌolobꞌ pilan chi tzꞌaꞌtoj teꞌ qꞌuix yu bꞌey txꞌotxꞌ tzalquiltaj, cꞌal masanil txꞌotxꞌ eltzabꞌ, catuꞌ chi sjoyon sbꞌa cajxuchum xol mucꞌ, catuꞌ chi iꞌletoj yu.

19 Jaꞌ yu sjowal scꞌul Jehová, Naj Yaaw yibꞌan Masanil, yuxan lalan slawi ey jun conobꞌ tuꞌ, jaxca chi yun stzꞌaꞌtoj teꞌ teꞌ yu kꞌakꞌ, queytuꞌ oj yun stzꞌaꞌtoj ebꞌ ánima tuꞌ. Yutol masanil ebꞌ ánima tuꞌ cꞌam chi okꞌ scꞌul ebꞌ yin yet animail.

20 Yal xacꞌal tzetyetal niꞌoj oj chaꞌlo yu ebꞌ, oj sloꞌon eytoj ebꞌ. Caxcꞌal yu jaxca tuꞌ oj yun ebꞌ, manxa oj oc tucan swail ebꞌ. Tol tax oj ẍiꞌeytoj yuninal ebꞌ.

21 Jaꞌ ebꞌ yicꞌaal Manasés oj yakꞌle jowal ebꞌ yetoj ebꞌ yicꞌaal Efraín, catuꞌ oj spajtzen sbꞌa ebꞌ tet ebꞌ yet Manasés, jaxa oj yunne oj toj ebꞌ scaabꞌ tujanil yakꞌ jowal yin ebꞌ yet Judá. Caxcꞌal yu jaxca tuꞌ oj yun ebꞌ, man tocꞌal oj oc tucan sjowal scꞌul Jehová yin ebꞌ, yutol ipanto cꞌal yaon oc syaꞌilal yin sconobꞌ tuꞌ.