2 Cꞌam che waꞌne yeoc skꞌane ebꞌ yeynajil ánima, cꞌamxa niꞌoj yeloc apnoj ebꞌ mebꞌa ánima xol jin conobꞌ tiꞌ yul je sat. Che yetne ebꞌ ix ix camnajxa yichamil, catuꞌ che yelkꞌane ecꞌ stzetyetal ebꞌ unin camnajxa smam, cꞌal txutx.

3 ¿Tzet oj je yute je bꞌa jaex tiꞌ yet naat to wal oj jul syaꞌilal je yibꞌan? ¿Bꞌeytuꞌ oj je yaloc je bꞌa? ¿Bꞌeytuꞌ oj je yakꞌ can je bꞌeomal tuꞌ?

4 Ta tol man oj jex mitxꞌletoj yin presowomal, tol oj jex makꞌle camoj. Caxcꞌal mi oj yun jaxca tuꞌ, cꞌam tocꞌal chi oc tucan sjowal scꞌul Jehová je yibꞌan; eyto cꞌal syaꞌilal oj yaoc yibꞌan sconobꞌ tuꞌ.

6 Chin chejtoj yin jun conobꞌ tol cꞌam weloc apnoj yul sat, ebꞌ pena snaꞌbꞌal, jaꞌton jun nación tol chi xꞌemtej sjowal jin cꞌul. Chin chejtoj jun rey tuꞌ, yet watxꞌ chi yelkꞌanetej masanil sbꞌeomal jun nación tuꞌ, yu stecꞌle ey ebꞌ jaxca chi yun stecꞌle ey txꞌotxꞌ sokꞌom bꞌey yul-laj bꞌe.

7 Jaꞌ naj sreyal Asiria tuꞌ, cꞌam chi snaꞌ jaxca tuꞌ, man yu oj tuꞌ yuxan chi yakꞌ yip. Asan chi snaꞌ tol chi yakꞌ lawoj ecꞌaloj nación.

8 Chi yalon naj sreyal Asiria jaxca tiꞌ: Masanil ebꞌ syaawil xol ebꞌ jin soldado tiꞌ, jaxca rey yeoc ebꞌ, jain chi wakꞌ yaawil xol ebꞌ.

9 Laan cꞌal jix wute conobꞌ Calnó yetoj conobꞌ Carquemis. Jaxca jix wute Hamat, quey cꞌal pax tuꞌ jix wute conobꞌ Arpad, laan jix yun can Samaria jaxca jix yun yetoj Damasco.

10 Wet jix yun can oc wan nacionlaj tol ecꞌal sdiosal. Yel xacꞌal ey yipal sdiosal ebꞌ tuꞌ, yintaj sdiosal ebꞌ a Jerusalén cꞌal ebꞌ a Samaria.

11 Yu jun tuꞌ xin, jaxca tzet jix wun yin Samaria, cꞌal yin sdiosal, quey pax tuꞌ oj wute conobꞌ Jerusalén tuꞌ yetoj sdiosal? ẍi naj sreyal Asiria tuꞌ, ẍi Jehová.

12 Jaꞌ yet jix lawi yunen jaxca tzet naꞌbꞌil yu Dios yibꞌan wonan Sión, cꞌal yin Jerusalén, catuꞌ oj ale oc syaꞌilal yibꞌan naj sreyal Asiria tuꞌ yu Dios. Yutol jix yiꞌa can sbꞌa cꞌal smeynen sbꞌa yu tzet jix yunne.

13 Yutol jix yal naj sreyal Asiria jaxca tiꞌ: Jain tiꞌ jix wun wan tiꞌ yetoj wipalil. Caw jelan jin, watxꞌ jix wute jin naꞌbꞌalne eloj. Jix jin qꞌuextoj smoonal wan nacionlaj tiꞌ. Tuxa jix wiꞌ can oc sbꞌeomal ebꞌ, jix wakꞌon eyqꞌuey ebꞌ rey yetoj wipalil.

14 Jix waoc jin kꞌabꞌ yin sbꞌeomal wan conobꞌ tuꞌ, tuxa jix wiꞌ can oc masanil txꞌotxꞌ txꞌotxꞌ, jaxca xacꞌal kiꞌon atej sjos noꞌ tzꞌiquin bꞌejbꞌil can yul sweyubꞌ, cꞌamxa cꞌal junoj mactxequel jix bꞌilwi, cꞌamxa cꞌal tzet jix yal ebꞌ, tuxa cꞌal jix oc tꞌanan ebꞌ, ẍi naj rey tuꞌ.

15 Chi cu naꞌ yibꞌan tinaniꞌ ¿Tumi taꞌ miman yeloc apnoj chꞌen eche cꞌal chꞌen serrucho yintaj mac chi kꞌanon chꞌen? Jaꞌ junoj teꞌ kꞌojoch naꞌbꞌa teꞌ cꞌal eloj ¿Tumi jaꞌ teꞌ kꞌojoche tuꞌ chi akꞌon bꞌilwoj junoj ánima? Cꞌamaj, jaꞌ junoj ánima tuꞌ chi akꞌon bꞌilwoj teꞌ.

16 Yu jun tuꞌ, jaꞌ Jehová Naj Yaaw yibꞌan Masanil, jaꞌ oj iꞌon el yip wan soldado jelan yakꞌon jowal tuꞌ, oj lawoj ey smeynebꞌail naj sreyal Asiria jaxca chi yun stzꞌaꞌtoj junoj tzetyetal yu sjowal xaj kꞌakꞌ.

17 Jaꞌ Dios, Naj tol miman yeloc apnoj, sajkꞌinal yeoc yibꞌan conobꞌ Israel, yin junne cꞌual oj yun yakꞌon lawoj el ebꞌ Asiria jaxca chi yun stzꞌaꞌey teꞌ qꞌuix yu kꞌakꞌ.

18 Oj yakꞌ lawoj ey masanil ebꞌ mimej winaj, jaxca chi yun slawi ey swatxꞌil yili txꞌotxꞌ eltzabꞌ yu bꞌolobꞌ, cꞌal masanil jantaj teꞌ teꞌ. Jaxca xacꞌal junoj yaꞌey tol cꞌamxa yip, queytuꞌ oj yun cantoj conobꞌ Asiria.

19 Jaywanxane ebꞌ mimej yaaw oj cancanoj. Jaxca xacꞌal jayebꞌoj xa teꞌ teꞌ chi colcha can tet bꞌolobꞌ, tol chi skeꞌ sbꞌischa teꞌ yu junoj unin.

20 Jaꞌ yet jun tiempoal yet yatoj tuꞌ, jaꞌ jaywanojxa ebꞌ yicꞌaal Jacob oj cancan bꞌey Israel, oj colcha canoj. Manxa oj yaoc ebꞌ yipoj scꞌul jun nación ian jix akꞌon lawoj ey tuꞌ, yutol yin masanil scꞌul ebꞌ oj yaoc snaꞌbꞌal ebꞌ yin Jehová sDiosal ebꞌ, Naj tol miman yipal.

21 Jaꞌ jaywanojxa ebꞌ yicꞌaal Jacob oj meltzo tuꞌ, oj yaoc snaꞌbꞌal ebꞌ yin jun Dios tol miman yipal.

22 Caxcꞌal mi jaꞌ ebꞌ conobꞌ Israel, caw miman sbꞌisil ebꞌ jaxca yarenail stiꞌ jaꞌ mar, caw jaywanxane pax ebꞌ ánima tiꞌ oj meltzo bꞌey sconobꞌ. Naꞌbꞌilxa yu Jehová tol oj qꞌueyle el ebꞌ jaxca wal smooalil.

23 Yutol jaꞌ Jehová Naj ey yipalil, jaꞌ oj akꞌon lawoj el masanil yul-laj nación, jaxca jix yun yalon canoj.

24 Jaꞌ Jehová Naj Yaaw yin masanil chi yal jaxca tiꞌ: Jex jin conobꞌ caan bꞌey Sión, cꞌam ojabꞌ chex xiw tet ebꞌ Asiria, caxcꞌal mi oj smakꞌoc skꞌojoch ebꞌ je yin, jaxca jix je yun bꞌey Egipto, cꞌam ojabꞌ chex xiw tet ebꞌ.

25 Yutol yet xacꞌal jayebꞌ cꞌual tinaniꞌ oj tan el sjowal jin cꞌul je yin, catuꞌ oj waoc syaꞌilal yibꞌan ebꞌ Asiria, catuꞌ oj wakꞌon lawoj ey ebꞌ yetoj sjowal jin cꞌul, ẍi Dios.

26 Jaꞌ Jehová, Naj Yaaw yin masanil, jaꞌ oj aon oc syaꞌilal yibꞌan ebꞌ, jaxca wal jix yun yakꞌon lawoj ey conobꞌ Madián bꞌey chꞌen miman chꞌen yet Oreb. Queytuꞌ oj yun xꞌoxon yipalil yin Asiria tuꞌ, jaxca jix yun xꞌoxon yipal yin conobꞌ Egipto bꞌey jaꞌ Cajin Mar.

27 Jaꞌton wal yet jun cꞌual tuꞌ, oj iꞌle el ijatz eyoc je yibꞌan yu ebꞌ. Oj jex jajcha can el jaxca chi yun yel junoj noꞌ wacax yet chi kꞌatoj teꞌ yugo eyoc yin sjolom yet chi mulna noꞌ.

29 Jix kꞌaxbꞌo ecꞌtoj ebꞌ bꞌey jun cotzan, jix swaꞌne ey bꞌulan sbꞌa ebꞌ bꞌey Guebá. Jaꞌ ebꞌ a Ramá, caw jix xiwa ebꞌ. Jaꞌ ebꞌ a Guibeá bꞌey sconobꞌ naj Saúl, jix el ebꞌ yu xiwcꞌulal.

30 Jex a Galim, el ojabꞌ je yaw. Jex a Laisa, el ojabꞌ je yaw. Okꞌbꞌal jex cꞌul jex a Anatot.

31 Ebꞌ a Madmená, chi ela ebꞌ yu xiwcꞌulal, ebꞌ caan bꞌey Guebim chi too yewbꞌa el sbꞌa ebꞌ.

32 Jaꞌ tinaniꞌ, jix jul scꞌual syambꞌan oc sbꞌa ebꞌ soldado bꞌey Nob. Chi xꞌoxel sjowal scꞌul ebꞌ yin wonan Sión bꞌey conobꞌ Jerusalén.

33 Ilwej ton abꞌi, jaꞌ Jehová Naj Yaaw yin masanil, jaꞌ oj akꞌon lawoj ey masanil ebꞌ Asiria jaxca chi yun skꞌajle ey teꞌ mimej teꞌ bꞌey Líbano, eyxa smey sbꞌilwi yeyqꞌueyi. Chi tzokꞌle a teꞌ, cꞌal teꞌ yel xacꞌal watxꞌ yili, chi eyqꞌuey teꞌ bꞌey sat txꞌotxꞌ.

34 Jaꞌ Dios chi qꞌueyon can el ebꞌ chi jowi oc yin, jaxca chi yun skꞌajle ey teꞌ mimej teꞌ, jaxca chi yun skꞌajle ey teꞌ teꞌ txꞌojxa swatxꞌil yili bꞌey txꞌotxꞌ Líbano.