Jaꞌ Yopiso Naj Chi Yij Sbꞌi Mesías
11
Jaxca wal chi yun swoli junoj teꞌ skꞌoal teꞌ,queytuꞌ oj yun yali jun yicꞌaal naj David.
2 Oj oc cꞌal Yespíritu Jehová yetoj. Jaꞌ oj akꞌon sjelanil, yetoj watxꞌ naꞌbꞌale. Jaꞌ yu Yespíritu Dios tuꞌ, yuxan oj naꞌcha el yakꞌon naꞌbꞌale, ey pax yipal. Oj yotajne eloj tol miman yeloc apnoj Jehová, cꞌal yoc yin jijemal tet.
3 Yin tzalacꞌulal oj yun sjijen tzet oj yal Jehová. Yin cꞌal sjichanil oj yun swaꞌnen yeoc junoj skꞌane ebꞌ ánima, man yu oj tzet utbꞌil yili ebꞌ ánima, tam wal yu tzet chi el skꞌumal yin ebꞌ.
4 Yin cꞌal sjichanil oj yun swaꞌnen yeoc skꞌane ebꞌ mebꞌa, cꞌal tet ebꞌ ánima yeynajil chi yute sbꞌa. Jaꞌ yetoj skꞌane Naj oj yaoc syaꞌilal ebꞌ chi ecꞌ yibꞌan, catuꞌ oj akꞌle cam ebꞌ chi unen spenail.
5 Jaꞌ sjichanil cꞌal kꞌane eyoc yin xolilal, jaꞌ oj txeclo a yin jaxca tol spichil yeocoj.
6 Jaꞌ yet jun tiempoal tuꞌ, jaꞌ noꞌ ooj cꞌal noꞌ meꞌ, cꞌam jowal xol noꞌ. Junne oj yun xew noꞌ bꞌalam, cꞌal noꞌ yuneꞌ chiw. Jaꞌ noꞌ achꞌe wacax, cꞌal noꞌ bꞌalam, oj ey cupan noꞌ bꞌey scꞌatan junjun. Jaꞌ junoj unin oj teynen low noꞌ.
7 Oj yamigone sbꞌa noꞌ xutx wacax yetoj noꞌ xutx oso, jaxa yuneꞌ noꞌ, junne oj ey cupan noꞌ xewoj. Jaꞌ an cꞌultaj oj sloꞌ noꞌ bꞌalam, jaxca chi yun slow noꞌ wacax.
8 Jaꞌ ebꞌ yaliẍ unin oj skeꞌ sajchi ebꞌ yetoj noꞌ labꞌa bꞌey ey sjolanil noꞌ, oj yatoj skꞌabꞌ ebꞌ bꞌey sweyubꞌ noꞌ; cꞌam cꞌal tzet oj utele ebꞌ yu noꞌ.
9 Jix yalon Jehová jaxca tiꞌ: Cꞌamxa syaꞌilal oj jul bꞌey wonan Sión, jun wonan tol sicꞌbꞌil el wu, ẍi Dios. Jaxca wal chi yun yapni jaꞌ jaꞌ xol jaꞌ mar, queytuꞌ oj yun snoel bꞌey yul yibꞌankꞌinal tiꞌ yu ebꞌ ánima chi otajne el Jehová.
10 Jaꞌ yet jun tiempoal tuꞌ, ey jun rey oj xꞌoxa sbꞌa xol yicꞌaal naj David, jaxca chi yun yaol junoj swol teꞌ teꞌ. Oj a jun tuꞌ jaxca wal junoj bandera bꞌey xol conobꞌ. Masanil conobꞌlaj oj syambꞌa oc sbꞌa bꞌey eyecꞌ Naj. Jaꞌ bꞌey oj eecꞌ tuꞌ, yel xacꞌal bꞌinabꞌil oj yunne.
Chi Meltzo Ebꞌ Iꞌbꞌiltoj Yin Yakꞌomaloj Servilal
11 Jaꞌ yet jun tiempoal tuꞌ, oj xꞌox Jehová yipalil junelxa, catuꞌ oj syambꞌantej masanil ebꞌ sconobꞌ sajleminaj ye cantoj. Oj tit ebꞌ ey bꞌey Asiria, ebꞌ ey bꞌey Egipto, bꞌey Patros, bꞌey Etiopía, bꞌey Elam, bꞌey Sinar, bꞌey Hamat cꞌal bꞌey wanxa conobꞌlaj ey stiꞌlaj jaꞌ mar.
12 Jaꞌ Dios oj yaa junoj bandera xol wan nación tuꞌ, yet oj yambꞌaletej ebꞌ Israel sajleminaj ye cantoj bꞌey wan nacionlaj tuꞌ. Jacꞌalaꞌ pax ebꞌ a Judá tol sajleminaj ye cantoj bꞌey masanil yul yibꞌankꞌinal tiꞌ.
13 Yutol jaꞌ ebꞌ yet Efraín oj lawoj ecꞌ ẍichoncꞌulal ebꞌ yin ebꞌ yet Judá; yuxan cꞌamxa cꞌal jowal xol ebꞌ.
14 Junxane oj yute ey sbꞌa ebꞌ scaabꞌ tujanil, catuꞌ oj yakꞌon jowal ebꞌ yin ebꞌ Filisteo yetcꞌulal bꞌey chi too cꞌu. Oj eyqꞌuey ebꞌ tuꞌ yu ebꞌ, catuꞌ oj swa inen oc masanil bꞌeomal oj yiꞌ ebꞌ tet ebꞌ caan yetcꞌulal bꞌey chi aol cꞌu. Oj apnoj tacꞌal oc yopiso ebꞌ bꞌey Edom, cꞌal bꞌey Moab, catuꞌ oj yakꞌon yaawil ebꞌ yibꞌan ebꞌ Amonita.
15 Jaꞌ Jehová oj akꞌon jun tajin bꞌe yul jaꞌ Cajin Mar. Oj yaontoj skꞌabꞌ yibꞌan jaꞌ Éufrates, oj tit jun jow kaꞌeꞌ yibꞌan jaꞌ, yuxan oj tantoj jaꞌ. Jujebꞌ tujan oj yun cantoj jaꞌ, man oj yiꞌeltej xanabꞌ ebꞌ yet oj ecꞌtoj ebꞌ yul jaꞌ.
16 Jaꞌ yet oj meltzotej ebꞌ sconobꞌ Jehová bꞌey Asiria, oj bꞌey ebꞌ yul miman bꞌe, jaxca wal jix yun stit ebꞌ conobꞌ Israel bꞌey Egipto.