2 ꞌTúúcā duūchi nduꞌu ndiichúúví apóstoles; Simón chi nguuvi Pedro ndúúcū Andrés ꞌdíinu sa, Jacobo ndúúcū Juan ꞌdiinū sa chi daiya Zebedeo; 3 ndúúcū Felipe, ndúúcū Bartolomé, ndúúcū Tomás, ndúúcū Mateo chi sáⁿꞌa publicano chi cobrador; ndúúcū Jacobo saⁿꞌā daiya Alfeo; ndúúcū Lebeo chi nguuvi Tadeo; 4 ndúúcū Simón yeⁿꞌe yáⁿꞌāa Caná; ndúúcū Judas Iscariote saⁿꞌa miiⁿ chi cuayiivi chꞌiⁿꞌi sá duꞌu chí Jesús miiⁿ chi cuuvi ꞌcaaⁿꞌnúⁿ ya ꞌyā.

5 Jesús dichoꞌó yā nduꞌū ndiichúúví apóstoles ní caⁿꞌa yā chii yā ꞌiiⁿꞌyāⁿ taacā chi canee chi diíⁿ yā. Ní Jesús caⁿꞌa yā: Nguɛɛ caⁿꞌá nī cuaaⁿ yúúní yeⁿꞌé ꞌiiⁿꞌyāⁿ chi nguɛ́ɛ́ ndaata yeⁿꞌē Israel chi judíos. Nguɛ́ɛ́ cundaa nī yáāⁿ vaacú ꞌiiⁿꞌyāⁿ Samaritanos. 6 Naati ndísꞌtiī ní caⁿꞌa nī nanááⁿ ꞌiiⁿꞌyāⁿ Israel sꞌeeⁿ tí ꞌiiⁿꞌyāⁿ sꞌeeⁿ tanꞌdúúcā ꞌíítí cuuchi chi níndái tī na icyáⁿꞌā, ꞌtííca yā. 7 Ní taachi caⁿꞌá nī ꞌtúúcā caaⁿꞌmaⁿ nī nduudu cuaacu ní caaⁿꞌmaⁿ nī yeⁿꞌē naachí Dendyuūs ngaⁿꞌa ntiiⁿnyúⁿ yā na vaꞌai chɛɛti nguuvi chí ꞌāā ndaa niiⁿnuúⁿ. 8 Diíⁿ nī chi nduūvā yeⁿꞌé ꞌiiⁿꞌyāⁿ chi ngíita. Diíⁿ nī chí nduuchi ꞌiiⁿꞌyāⁿ chi nꞌdíí chi tináⁿꞌā. Diíⁿ nī chi nduūvā ní nduuví dɛɛvɛ cuerpo yeⁿꞌe ꞌiiⁿꞌyāⁿ chi vɛ́ɛ́ vaadī yaꞌai chi nguuvi lepra chi inꞌduuti yuūtɛ̄ yeⁿꞌe yā. Ní diíⁿ nī chí divíi nī espíritus yeⁿꞌē yááⁿnꞌguiinūuⁿ chi snéé ndúúcū ꞌiiⁿꞌyāⁿ. Ndísꞌtiī ndaacá nī poder ꞌcūū yeⁿꞌé Dendyuūs, ní nguɛ́ɛ́ cutaꞌa nī tuumī cáávā chuū. Chuū chi diíⁿ nī ndúúcū ꞌiiⁿꞌyāⁿ nguɛ́ɛ́ cuuvi cúnꞌdiꞌi yeⁿꞌé yā.

9 Nguɛ́ɛ́ candɛ́ɛ nī ꞌdííⁿnguaaⁿ, ndíí nguɛ́ɛ́ ndúú ꞌdííⁿnguɛɛ, ndíí nguɛ́ɛ́ ndúú tuūmī cheēyé ra. 10 Nguɛ́ɛ́ candɛ́ɛ nī morral yeⁿꞌe nī cuaaⁿ cyúúní chi cáⁿꞌa nī. Ndíí nguɛ́ɛ́ ndúú ꞌuūvī ra catecai nī candɛ́ɛ nī. Ndíí nguɛ́ɛ́ ndúú canduu ndaācuú yeⁿꞌé nī, ndíí nguɛ́ɛ́ ndúú inꞌdaacuú rá yeⁿꞌe nī, ti ꞌiiⁿꞌyāⁿ chi diíⁿ ntiiⁿnyuⁿ, na ntiiⁿnyúⁿ chi diíⁿ yā ní ndaācā chi chéꞌe yā ndúúcū necesidades chí neⁿꞌe yā.

11 ꞌĀā tií nūuⁿ yáāⁿ nꞌgɛɛtɛ ndúúcu yáāⁿ nꞌgaiyaá naachí cundáa nī tíínguuneeⁿ nī duꞌú ꞌiiⁿꞌyāⁿ yeⁿꞌē yáāⁿ miiⁿ chí nꞌdai yā ní cunée nī na vaacú yā ndii nꞌdáá cá nī. 12 Taachí ndaá nī na vaacu ꞌiiⁿꞌyāⁿ: Ndaí ndísꞌtiī, caaⁿꞌmáⁿ nī, tanꞌdúúcā costumbre yeⁿꞌe nī. 13 Ndúúti chi ꞌiiⁿꞌyāⁿ yeⁿꞌé vaꞌāī miiⁿ nꞌdai yā tuuꞌmi ní vaadī ꞌdiiíⁿ yeⁿꞌe nī cunéé ndúúcu yā. Nduuti chi nguɛ́ɛ́ nꞌdai yā o nguɛ́ɛ́ vaadī ꞌdiiíⁿ ndúúcu yā, nacanꞌdáa nī vaꞌāī miiⁿ ndúúcū ꞌáámá nduudu nꞌdai. 14 Nduuti chi ꞌiiⁿꞌyāⁿ sꞌeeⁿ nguɛ́ɛ́ ꞌcuaaⁿ yā ndísꞌtiī ndíí nguɛ́ɛ́ ndúú ꞌcaandiveeⁿ ra yā nduudu yeⁿꞌe nī nanꞌdáa nī vaꞌai miiⁿ o yeⁿꞌe yáāⁿ miiⁿ ní nꞌdáádi nī iyaācáa yeⁿꞌe caꞌá nī ti nguɛ́ɛ́ nꞌgiindiveéⁿ yā yeⁿꞌé nī. 15 Cuaacu nííⁿnyúⁿ cuaacu nííⁿnyúⁿ ngaⁿꞌá ngīi ndísꞌtiī chi taachi ndaá nguuvi chi Ndyuūs nꞌdiichí yā nuuⁿndi yeⁿꞌe yáāⁿ, castigo yeⁿꞌe ꞌiiⁿꞌyāⁿ yeⁿꞌe yáaⁿ ꞌcūū cunncáā ca chí cuuví castigo yeⁿꞌe ꞌiiⁿꞌyāⁿ yeⁿꞌe yáāⁿ Sodoma ndúúcū yáāⁿ Gomorra chi yáāⁿ sꞌeeⁿ yeⁿꞌé ꞌiiⁿꞌyāⁿ chi nguɛ́ɛ́ diíⁿ yā chi nꞌdai ndíí nguɛ́ɛ́ ꞌiiⁿꞌyāⁿ yeⁿꞌe ndaata Israel yā.

16 Cunꞌdiichí nī. ꞌÚú ní dichoꞌó ndísꞌtiī tanꞌdúúcā chi ndísꞌtiī ní ꞌiiti cuūchī náávtaⁿꞌā yeⁿꞌē ꞌyáaⁿyāaⁿ nꞌgaātáā, ꞌtiicá nī. Canéé chí diíⁿ nī chi listo nī tanꞌdúúcā ꞌaama cúú. Ní canéé chí dinꞌdaacá nī ní canéé manso nī tanꞌdúúcā ꞌáámá paloma. ꞌTíícā diíⁿ nī. 17 Candɛ́ɛ nī cuidado caati ꞌiiⁿꞌyāⁿ sꞌeeⁿ ní ncaꞌá yā ndísꞌtiī nanááⁿ ꞌiiⁿntyeⁿꞌē yeⁿꞌe yaacū sinagoga. Ní cúúví ꞌcueⁿꞌé yā ndísꞌtiī na yaacū sinagoga miiⁿ. 18 Ní ꞌiiⁿꞌyāⁿ sꞌeeⁿ candɛ́ɛ yā ndísꞌtiī nanááⁿ gobernadores ndúúcū nanááⁿ reyes cucáávā ꞌúú. Ní ꞌíícú ndísꞌtiī cuuví caaⁿꞌmáⁿ nī nduudu cuaacu yeⁿꞌē ꞌúú nanááⁿ ꞌiiⁿꞌyāⁿ sꞌeeⁿ ndúúcū ꞌiiⁿꞌyāⁿ chi nguɛ́ɛ́ yeⁿꞌe ndaata Israel. 19 Ní taachi ꞌiiⁿꞌyāⁿ ncaꞌa yā ndísꞌtiī nanááⁿ ꞌiiⁿꞌyāⁿ sꞌeeⁿ, nguɛ́ɛ́ nadicádíínuuⁿ nī yeⁿꞌe chi caaⁿꞌmáⁿ nī ti hora mííⁿ nūuⁿ ní Ndyuūs tée yā nduudu chí caaⁿꞌmáⁿ nī. 20 Ti nguɛ́ɛ́ ndísꞌtiī chí caaⁿꞌmáⁿ nī naati Espíritu Nꞌdai yeⁿꞌé Ndyuūs Chiida yú. Espíritu miiⁿ caaⁿꞌmáⁿ yā cáávā ndísꞌtiī ti canée yā nduucú nī.

21 Nguaaⁿ ꞌdíínū sa caⁿꞌa sa caaⁿꞌmaⁿ sa contra yeⁿꞌē víꞌī chi canéé chí ꞌcuūvī sa. ꞌTiicá ntúūⁿ chiidá yā caⁿꞌa yā caaⁿꞌmaⁿ yā contra yeⁿꞌē daiya yā chi canéé chí ꞌcuūvi yā. ꞌTiicá ntúūⁿ daiyá yā ní caⁿꞌá yā diiⁿ yā ndúúcū chiidá yā ti ndísꞌtiī candɛ́ɛ nī nduudu yeⁿꞌé. 22 Ní nducyáácá ꞌiiⁿꞌyāⁿ nguɛ́ɛ́ cuuvi nꞌdiichí yā ndísꞌtiī cucáávā ꞌúú ti cueⁿꞌé nī nduucú. ꞌIiⁿꞌyāⁿ chi cuchɛ́ɛ yā tanducuéⁿꞌē chuū nducuéⁿꞌē nguuvi yeⁿꞌé yā ꞌiiⁿꞌyāⁿ miiⁿ chí nanguaⁿꞌai yā. 23 Taachí ꞌiiⁿꞌyāⁿ canꞌdaá yā ndísꞌtiī chí neⁿꞌe yā chi ndísꞌtiī ꞌcueenú nī cuuvi, na ꞌáámá yáāⁿ, tuuꞌmi ní caⁿꞌā nī cáánu nī ná taama yáāⁿ ti cuaacu nííⁿnyúⁿ ngaⁿꞌá ngií ndísꞌtiī chi Saⁿꞌā chí Daiya Ndyuūs miiⁿ nndaa sá taama vmnéⁿꞌēe vmnaaⁿ chí ndísꞌtiī cuuvi caaⁿꞌmaⁿ nī nduudu cuaacu yeⁿꞌé nuuⁿmaⁿ na yáⁿꞌāa Israel.

24 Mar ꞌáámá discípulo ní nguɛ́ɛ́ nꞌgɛɛtɛ ca ntiiⁿnyuⁿ sá chi cuuvi maestro yeⁿꞌē sa, ndíí nguɛ́ɛ́ ndúú mar ꞌáámá mozo ní ngꞌɛɛtɛ ca sa chí cuuvi ꞌiivi sa. 25 Nꞌdáacā chí discípulo miiⁿ diiⁿ sa tanꞌdúúcā chi īdiiⁿ maestro yeⁿꞌe sa ní mozo miiⁿ diiⁿ sa tanꞌdúúcā chi diiⁿ ꞌiivi sa. Ndúúti chi ꞌiiⁿꞌyāⁿ chi ngaⁿꞌa ntiiⁿnyuⁿ yeⁿꞌe vaꞌai chi nguuví Beelzebú chi yááⁿnꞌguiinūuⁿ, tuuꞌmi ní tanáⁿꞌā ꞌiiⁿꞌyāⁿ chi nguɛ́ɛ́ yeⁿꞌe familia yeⁿꞌe Beelzebú miiⁿ cunncáā caⁿꞌa yā caaⁿꞌmáⁿ yā yeⁿꞌe ꞌiiⁿꞌyāⁿ yeⁿꞌe Beelzebú.

26 Tuuꞌmi ní ndísꞌtiī nguɛ́ɛ́ ꞌvaꞌá nī ꞌiiⁿꞌyāⁿ ti nguɛ́ɛ́ ꞌáámá chí canúúⁿ nꞌdeꞌei chi nguɛ́ɛ́ cuuví snaaⁿ yú, ndíí nguɛ́ɛ́ ndúú canee ꞌáámá secreto chi ꞌiiⁿꞌyāⁿ nguɛ́ɛ́ cuuvi cadíínuuⁿ yā. 27 ꞌIicu chiiⁿ chi ꞌúú ngaⁿꞌá ngií ndísꞌtiī yeⁿꞌe nduūdū nꞌdeꞌei chi nguɛ́ɛ́ ituumicádíínuuⁿ ꞌiiⁿꞌyāⁿ, ndísꞌtiī caaⁿꞌmaⁿ nī nduudu chi túúmícádiinuuⁿ ꞌiiⁿꞌyāⁿ. Níícú dɛꞌɛ chí ngaⁿꞌá ngií ndísꞌtiī ní ꞌcuai nī ndii na yaacū yeⁿꞌē tiiⁿ vaꞌāī ní túúmícádiinuuⁿ ꞌiiⁿꞌyāⁿ nduudú ꞌcūū. 28 Nguɛ́ɛ́ ꞌvaꞌá ni ꞌiiⁿꞌyāⁿ chí ꞌcaāⁿꞌnūⁿ cuerpo yeⁿꞌe nī ní nguɛ́ɛ́ cuuvi ꞌcaaⁿꞌnúⁿ yā alma yeⁿꞌe nī. Diꞌvaꞌá ca nī Dendyuūs chí cuuvi ꞌcaaⁿꞌnúⁿ yā alma yeⁿꞌe nī ndúúcū cuerpo yeⁿꞌe nī chí caⁿꞌá nī na infierno.

29 ¿ꞌÁá nguɛ́ɛ́ inꞌdíícui yā na ꞌuūvī ꞌyaada cáávā ꞌaama tuūmī? Mar ꞌáámá ꞌyáádá sꞌééⁿ nguɛ́ɛ́ ꞌcuuvá tī na yáⁿꞌāa ꞌcūū núúⁿmáⁿ neⁿꞌe chi nguɛ́ɛ́ déenu Ndyuūs Chiida yú. 30 Níícú nducyaaca yuudu tiíⁿ nī ní ndii dúúchɛ́ ndúúcū Ndyuūs. 31 Nguɛ́ɛ́ diꞌváꞌa ndísꞌtiī caati chꞌɛɛtɛ cá nī chi cuuvi ꞌyaaⁿ nꞌdáí ꞌyaada.

32 ꞌĀā duꞌú nūuⁿ chí ngaⁿꞌa chi iintiiⁿnaaⁿ ꞌúú nanááⁿ ꞌiiⁿꞌyāⁿ, ꞌúú ntúūⁿ ní caāⁿꞌmáⁿ chi iintiiⁿnaáⁿ ꞌiiⁿꞌyāⁿ sꞌeeⁿ nanááⁿ Chiidá chi canée yā na vaꞌai chɛɛti nguuvi. 33 ꞌĀā duꞌú nūuⁿ chí caāⁿꞌmáⁿ chi nguɛ́ɛ́ inꞌdiichi ꞌúú nanááⁿ ꞌiiⁿꞌyāⁿ, ꞌúú ntúūⁿ ní caāⁿꞌmáⁿ chi nguɛ́ɛ́ inꞌdiichí ꞌiiⁿꞌyāⁿ sꞌeeⁿ nanááⁿ chiidá chi canée yā na vaꞌāī chɛɛti nguuví.

34 Nguɛ́ɛ́ nadicádíínuuⁿ nī chi ꞌúú, Jesús, ndaá chi ndɛɛ́ vaadī ꞌdiīiⁿ ꞌiiⁿꞌyāⁿ na iⁿꞌyeeⁿdí ꞌcūū. Nguɛ́ɛ́ ndaá chi ndɛɛ́ vaadī ꞌdiīíⁿ caati ndɛɛ́ vaadī ꞌcaaꞌva ní tanꞌdúúcā chi candɛɛ́ ꞌáámá machete chi ꞌcaāiⁿ nduu ꞌuuvī lados. 35 Tí ndaá chí ꞌiiⁿꞌyāⁿ ní nguɛ́ɛ́ cuuvi nꞌdiichí yā chiidá yā, ní nꞌdaataá nguɛ́ɛ́ cuuvi nꞌdiichi tá chɛɛcu tá, nꞌdaataá nguɛ́ɛ́ cuuvi nꞌdiichi ntúūⁿ tá indáⁿꞌa tá. 36 Caati ꞌáámá ꞌáámá yā ní enemigos yā yeⁿꞌe yā víꞌi na vaacu yā.

37 ꞌIiⁿꞌyāⁿ chí neⁿꞌe cá yā chiidá yā o chɛɛcu yā nguɛ́ɛ́ ti ꞌúú, nguɛ́ɛ́ neene nꞌdai yā chi cuuvi yeⁿꞌé ꞌiiⁿꞌyāⁿ. ꞌIiⁿꞌyāⁿ chí neⁿꞌe cá yā daiyá yā saⁿꞌā o daiyá yā nꞌdaataá nguɛ́ɛ́ ti ꞌúú, nguɛ́ɛ́ neene nꞌdai yā chi cuuvi yeⁿꞌé ꞌiiⁿꞌyāⁿ. 38 Ní ꞌiiⁿꞌyāⁿ chí nguɛ́ɛ́ neⁿꞌe yā ꞌcueenú yā cuuvi cucáávā ꞌúú chi tanꞌdúúcā chi cutaꞌá yā cruz yeⁿꞌe yā ní caⁿꞌa yā nduucú, nguɛ́ɛ́ neené nꞌdai yā chi cuuvi yeⁿꞌé ꞌiiⁿꞌyāⁿ. 39 ꞌIiⁿꞌyāⁿ chi neⁿꞌe cá yā vida yeⁿꞌe yā cáávā cosas chi vɛ́ɛ́ ná iⁿꞌyeeⁿdí ꞌcūū nguɛ́ɛ́ ti ꞌúú, tuuꞌmi ní táámá vida ní dindaí yā. ꞌIicú ꞌiiⁿꞌyāⁿ chí dindaí yā vida yeⁿꞌe yā na iⁿꞌyeeⁿdí ꞌcūū cucáávā ꞌúú, ti diíⁿ yā chi ꞌúú neⁿꞌé ní ndaacá yā táámá vida yeⁿꞌé yā.

40 ꞌIiⁿꞌyāⁿ chi ꞌcuaaⁿ yā ndísꞌtiī, ꞌcuaaⁿ yā ꞌúú. ꞌIiⁿꞌyāⁿ chi nꞌgúuⁿ yā ꞌúú, nꞌgúuⁿ yā ꞌiiⁿꞌyāⁿ chi dichóꞌo yā ꞌúú. 41 ꞌIiⁿꞌyāⁿ chi nꞌgúuⁿ yā ꞌáámá saⁿꞌa profeta caati profeta miiⁿ chií yā lado yeⁿꞌe Ndyuūs ꞌiiⁿꞌyāⁿ ní cutaꞌá yā premio chí ndaacā yeⁿꞌē chi tunééⁿ ꞌiiⁿꞌyāⁿ chi profeta. ꞌIiⁿꞌyāⁿ chí nꞌgúuⁿ yā ꞌáámá ꞌiiⁿꞌyāⁿ chí nꞌdai caati ꞌiiⁿꞌyāⁿ miiⁿ ni nꞌdai yā, ꞌiiⁿꞌyāⁿ ní cutaꞌá yā premio chí tunééⁿ ꞌiiⁿꞌyāⁿ chi nꞌdai. 42 ꞌĀā duꞌú nūuⁿ ꞌiiⁿꞌyāⁿ chi caꞌa ꞌáámá vaso nuūⁿnīⁿ ꞌiichɛ ꞌáámá ꞌiiⁿꞌyāⁿ caati iꞌtéénu yā ꞌúú, cuaacu nííⁿnyúⁿ ngaⁿꞌá ngií ndísꞌtiī chi vɛ́ɛ́ premio yeⁿꞌe ꞌiiⁿꞌyāⁿ miiⁿ chi cuuvi ndaāca yā yeⁿꞌe yā.