Jesús diíⁿ yā chi nduūvā yeⁿꞌe ꞌáámá saⁿꞌā
14
ꞌÁámá sábado, nguuvi chi ntaaviꞌtúúnuuⁿ ꞌiiⁿꞌyāⁿ, Jesús sndaa yā ní cheⁿꞌe yā ꞌáámá vaꞌai yeⁿꞌe ꞌáámá saⁿꞌā fariseo chi ngaⁿꞌa ntiiⁿnyuⁿ sa. Ní tanáⁿꞌā saⁿꞌā fariseos canee ngiinu sa Jesús dɛꞌɛ̄ chi caⁿꞌá yā chi diiⁿ yā. 2 Tuuꞌmi ní ndaā nanááⁿ Jesús ꞌáámá saⁿꞌā chí ngiītā ní ndiituú núúⁿmáⁿ chꞌɛɛtɛ sa. 3 Jesús caⁿꞌa yā chii yā maestros yeⁿꞌe ley ndúúcū saⁿꞌā fariseos: ¿ꞌÁá ꞌcuaaⁿ ley miiⁿ chí cuuví diíⁿ chi nduūvā yeⁿꞌe ꞌiiⁿꞌyāⁿ nguuvi chí ntaaviꞌtuunúúⁿ yā?4 Saⁿꞌā sꞌeeⁿ ní ꞌdiiiⁿ ꞌdiiíⁿ chꞌɛɛtinee sa ní nguɛ́ɛ́ nanꞌguɛɛcutaⁿꞌa sa. Tuuꞌmi ní Jesús staꞌá yā taꞌa saⁿꞌā chi ndiituú ní diíⁿ yā chi nduūvā yeⁿꞌe saⁿꞌā miiⁿ. Ni yaaꞌvi yā saⁿꞌā chi cunaⁿꞌa sa. 5 Cuayiivi ní Jesús yaaꞌvi yā saⁿꞌā sꞌeeⁿ ní caⁿꞌa yā: ¿Chɛɛ̄ ndísꞌtiī ndúúti chi ꞌáámá burro o ꞌáámá itiindu yeⁿꞌe nī cunꞌdáá nuúⁿ tī na ꞌáámá viini ní nguɛ́ɛ́ tuuꞌmí nūuⁿ ntunꞌdáa nī ꞌiiti ꞌáárá chí nguuvi chi ntaaviꞌtuunuúⁿ ꞌiiⁿꞌyāⁿ?
6 Saⁿꞌā sꞌeeⁿ nguɛ́ɛ́ chiī nanꞌguɛɛcútaⁿꞌa sa cucáávā nduudu chi ngaⁿꞌa yā.
ꞌIiⁿꞌyāⁿ chi invitado yā naachi nꞌgiindivaacu ꞌiiⁿꞌyāⁿ
7 Taachí Jesús nꞌdiichí yā táácā diiⁿ ꞌiiⁿꞌyāⁿ chi invitados chi ndɛɛvɛ yā silla yeⁿꞌe mesa chi lugar chí nꞌdaacā ca, tuuꞌmi ní caⁿꞌa yā ꞌáámá ejemplo chi ꞌtɛɛ nguɛɛ dááma ndúúcū ꞌiiⁿꞌyāⁿ chi diiⁿ yā invitados. 8 Ngaⁿꞌa yā ꞌtíícā. Taachi ꞌáámá ꞌiiⁿꞌyāⁿ diíⁿ yā invitar dii naachí nꞌgiindivaacu ꞌiiⁿꞌyāⁿ nguɛ́ɛ́ ꞌcuūndī di na silla vmnááⁿ vmnaaⁿ caati cuuvi ndaa táámá ꞌiiⁿꞌyāⁿ invitado chi chꞌɛɛtɛ́ yā nguɛ́ɛ́ ti dii. Ní silla miiⁿ ní caava ꞌiiⁿꞌyāⁿ miiⁿ. 9 Ní taachí ndaa ꞌiiⁿꞌyāⁿ chi chꞌɛɛtɛ ca yā, tuuꞌmi ní ꞌiiⁿꞌyāⁿ chi diíⁿ yā invitar di ndaa yā nanáaⁿ di ní caaⁿꞌmáⁿ yā cuuvi yā dii: Cuꞌneeⁿ di lugar ꞌcūū yeⁿꞌe ꞌiiⁿꞌyáⁿ ꞌcūū. Tuuꞌmi ní cuuví ꞌcuináaⁿ di ní ꞌcuūndī di na silla nꞌdíí naaⁿ nꞌgiinu. 10 Taachí ꞌiiⁿꞌyāⁿ diíⁿ yā invitar dii caⁿꞌa di ꞌcuūndī di na silla ndíí naaⁿ nꞌgiinu. Ní taachi ndaá nanááⁿ dii ꞌiiⁿꞌyāⁿ chi diíⁿ yā invitar dii, tuuꞌmi ní caaⁿꞌmáⁿ yā cuuvi yā dii: Díí sáⁿꞌā chi nꞌdai nduucú, caaca dí cuaaⁿ ꞌniiⁿnuⁿ. Ní ꞌāā nꞌdaacā cuuvi yeⁿꞌē di nanááⁿ ꞌiiⁿꞌyāⁿ chi vɛɛtɛ́ yā na mesa. 11 ꞌIiⁿꞌyāⁿ chi dichꞌɛɛtɛ́ maáⁿ yā táámá ꞌiiⁿꞌyāⁿ ní diíⁿ yā chi ndiicuuⁿ yā. Ní ꞌiiⁿꞌyāⁿ chi maaⁿ yā diiⁿ chi ndiicuuⁿ yā tááma ꞌiiⁿꞌyāⁿ ní diíⁿ yā chi chꞌɛɛtɛ́ yā.
12 Tuuꞌmi ní Jesús ngaⁿꞌá yā ngii yā saⁿꞌā chi diīⁿ invitar ꞌiiⁿꞌyāⁿ sꞌeeⁿ: Dii taachí inꞌnuuⁿ di chí cheꞌe nguaiⁿ di o chi cheꞌe nguíinū di, nguɛ́ɛ́ ꞌcuai di ꞌiiⁿꞌyāⁿ chi nꞌdai ndúúcu di, ndíí nguɛ́ɛ́ ndúú víꞌi rā di, ndíí nguɛ́ɛ́ ndúú ꞌiiⁿꞌyāⁿ yeⁿꞌē di, ndíí nguɛ́ɛ́ ndúú ꞌiiⁿꞌyāⁿ na niiⁿnuúⁿ vaꞌāī yeⁿꞌē di chi ꞌcuííca yā caati ꞌiiⁿꞌyāⁿ sꞌuuⁿ ní diíⁿ ntúuⁿ yā invitar dii chi cheꞌe di nduucú yā. ꞌTíícā ní nadííꞌvɛ yā diiⁿ cáávā chi caꞌa di chi cheꞌe yā. 13 Naatí taachi idinꞌdái di ꞌaama comida nꞌdai, ꞌcuai dí ꞌiiⁿꞌyāⁿ chi ndaachí snee yā, ndúúcū ꞌiiⁿꞌyāⁿ chi nguɛ́ɛ́ ngii ngiicá yā, ndúúcū chi ngaī yóꞌo, ndúúcū ꞌiiⁿꞌyāⁿ chi ngueenáaⁿ. 14 Ní caaⁿꞌmaⁿ ꞌiiⁿꞌyāⁿ sꞌeeⁿ yeⁿꞌē di: Dɛꞌɛ chúúcā nꞌdai di. Ti ꞌiiⁿꞌyāⁿ sꞌeeⁿ nguɛ́ɛ́ nteé yā dii. Naati Ndyuūs nadííꞌvɛ yā dii taachí ndaa nguuvi chi ꞌiiⁿꞌyāⁿ chi nꞌdai nduuchí yā yeⁿꞌē nguaaⁿ tináⁿꞌā.
Ejemplo yeⁿꞌe ꞌiiⁿꞌyāⁿ chi cheꞌe yā cena chi chꞌɛɛtɛ
15 Taachi ꞌáámá ꞌiiⁿꞌyāⁿ chi vɛ́ɛ yā na mesa miiⁿ chꞌiindiveéⁿ yā chuū, caⁿꞌa yā chii yā Jesús: Dɛꞌɛ chúúcā nꞌdai chi caⁿꞌá yā cheꞌe yā pan naachí Ndyuūs ngaⁿꞌa ntiiⁿnyúⁿ yā.
16 Tuuꞌmi ní Jesús caⁿꞌa yā ejemplo ꞌcūū: ꞌÁámá saⁿꞌā caꞌā sa chi dinꞌdái yā ꞌáámá chi cheꞌe nguíinū ꞌyaaⁿ ꞌiiⁿꞌyāⁿ, ní idiiⁿ sa invitar nꞌdeee nꞌdáí ꞌiiⁿꞌyāⁿ. 17 Ní taachi ꞌāā chaa cheꞌe nguiinú yā dichoꞌo yā ꞌáámá mozo chi caⁿꞌa sa cuuvi sa ꞌiiⁿꞌyāⁿ chi ndii yā invitado: Cuchíi nī. ꞌĀā vɛ́ɛ́ tanducuéⁿꞌē chí cheꞌe nguiinu yú. 18 Nducyaaca yā ní tucáꞌa yā caⁿꞌa yā ꞌtíícā: Chꞌɛɛtinúuⁿ nī yeⁿꞌé. Ní ꞌáámá saⁿꞌā ní caⁿꞌā sa: Cáámá chꞌiīnū ꞌcaí ꞌáámá finca ní cánéé chí caⁿꞌá nꞌdiīchí finca, chiiⁿ chi chꞌɛɛtinúuⁿ nī yeⁿꞌé. 19 Táámá yā ní caⁿꞌa yā: ꞌCaí nyuⁿꞌu yáandā itiindu ní neⁿꞌé diíⁿ ntiiⁿnyuⁿ ndúúcu tī. Ngiicá favor. Chꞌɛɛtinúuⁿ nī yeⁿꞌé. 20 Táámá yā ní caⁿꞌa yā: Cáámá chꞌiinu chꞌiindivaacú chi chiiⁿ nguɛ́ɛ́ cuuvi caⁿꞌá. 21 Taachí nguɛɛcunéé mozo, caⁿꞌa sa chuū chii sa ꞌiivi sa. Tuuꞌmi ní ꞌiivi miiⁿ nduuvi taáⁿ yā ní caⁿꞌa yā chii yā mozo miiⁿ: Cueⁿꞌe di cuaaⁿ nííꞌvɛ̄ɛ̄ ndúúcū cuaaⁿ cyúúní yeⁿꞌe yáāⁿ ní candɛ́ɛ di ꞌiiⁿꞌyāⁿ ndaachíī, ndúúcū ꞌiiⁿꞌyāⁿ chi nguɛ́ɛ́ ngii ngiicá yā, ndúúcū ꞌiiⁿꞌyāⁿ chi ngaī yóꞌo, ndúúcū ꞌiiⁿꞌyāⁿ chi ngueenáāaⁿ. 22 Sáⁿꞌā mozo ní cueⁿꞌē sa. Cuayiivi ní ndaā sa ní caⁿꞌā sa chiī sa ꞌiivi sa: Nꞌdií, señor, ꞌāā diíⁿ tanꞌdúúcā chí ngaⁿꞌa nī ní vɛ́ɛ́ cá lugar chi ꞌcuɛɛ̄tɛɛ́ ꞌiiⁿꞌyāⁿ na mesa. 23 Caⁿꞌa señor miiⁿ chiī yā saⁿꞌā mozo miiⁿ: Cueⁿꞌe di cuaaⁿ cyúúní nꞌgɛɛtɛ ndúúcū yúúní chi vɛ́ɛ́ chi neēeⁿ cuááⁿ ꞌdiītū ní diꞌcuíítu di ꞌiiⁿꞌyāⁿ chí chii yā na vaacú ní ꞌíícú cuuvi diituú na vaacú. 24 Ti ꞌúú ní ngaⁿꞌá ngīi ndísꞌtiī chi mar ꞌáámá saⁿꞌā chí diíⁿ invitar saⁿꞌā vmnaaⁿ nguɛ́ɛ́ ꞌcuúⁿ ndáa sa cheꞌē nguiinú sa nduucú na mesa yeⁿꞌé.
ꞌIiⁿꞌyāⁿ chi caⁿꞌa yā ndúúcū Jesús canee chi ꞌcuéénu yā cuuvi
25 Cuayiivi mííⁿ nééné nꞌdeee ꞌiiⁿꞌyāⁿ cueⁿꞌe yā ndúúcū Jesús. Ní Jesús miiⁿ ní caⁿꞌa yā chiī yā ꞌiiⁿꞌyāⁿ sꞌeeⁿ ꞌáámá ejemplo: 26 Ndúúti chi ꞌáámá ꞌiiⁿꞌyāⁿ neⁿꞌe ca yā chiidá yā o chɛɛcú yā o nꞌdaataá yeⁿꞌe yā o daiya yā o ꞌdíínu yā o viꞌi yā o vida yeⁿꞌē maáⁿ yā nguɛ́ɛ́ ti ꞌúú chi Jesús, nguɛ́ɛ́ cuuvi discípulo yeⁿꞌé. 27 ꞌĀā duꞌú nūuⁿ chi caⁿꞌa yā nduucú ní nguɛ́ɛ́ ndɛ́ɛ yā cruz yeⁿꞌe yā chi tanꞌdúúcā nducuéⁿꞌē chi ꞌcueenu taavi yā cuuvi cucáávā ꞌúú nguɛ́ɛ́ cuuvi discípulo yeⁿꞌé. 28 ¿ꞌÁá chɛɛ́ nūuⁿ ꞌáámá ndísꞌtiī taachí neⁿꞌe nī dinꞌdái nī ꞌáámá torre, ¿ꞌáá nguɛ́ɛ́ nꞌgɛɛtɛ́ nī ní ididuuchɛ́ nī? ¿ꞌÁá nꞌdeēe diíⁿ nī gasto ndúúti chi tuꞌnéé chíꞌvɛɛ yeⁿꞌe nī chí ꞌcuiinu dinꞌdái nī torre yeⁿꞌe nī? 29 Ní nduuti chi cuꞌnuúⁿ nī cimientos yeⁿꞌē torre ní cuayiivi nguɛ́ɛ́ cuuvi dinꞌdaí nī torre yeⁿꞌe nī, tuuꞌmi ní nducyaaca yā chi snaaⁿ yā ꞌcáíⁿnyūⁿneeⁿ yā ndísꞌtiī. 30 ꞌIiⁿꞌyāⁿ sꞌeeⁿ ní caaⁿꞌmaⁿ yā: Sáⁿꞌa ꞌcūū tucáꞌa sa dinꞌdái sa ní nguɛ́ɛ́ chꞌiinu diꞌcuiīnú sa. 31 Ní Jesús ngaⁿꞌa yā ꞌtíícā: ¿Duꞌú rey ndúúti chi canee chi diíⁿ yā caandaá ndúúcū táámá rey, ꞌáá nguɛ́ɛ́ nꞌgiindi yā ndúúcū táámá saⁿꞌā ní ididuuchɛ́ yā? Nduuti chi tunééⁿ ndiicu mil soldados ní ꞌiicu ndúúcū chuú nūuⁿ cuuvi ꞌcuuⁿꞌmaⁿ yā ndúúcū soldados chi ndiichi mil yeⁿꞌē táámá rey. 32 Ní nduuti chi nguɛ́ɛ́ cuchɛɛ yā, taachi cuchií yā táámá rey ndúúcū soldados yeⁿꞌe yā chi diíⁿ yā caandaá ní canéé yaⁿꞌai ca yā miiⁿ tuuꞌmi ní rey miiⁿ dichoꞌó yā ꞌiiⁿꞌyāⁿ chi candɛ́ɛ̄ nduudu miiⁿ. Ní ꞌiicu caaca yā taama rey chi ꞌcuɛɛtinéé ꞌdiiíⁿ yā. Ní nguɛ́ɛ́ diíⁿ yā caandaá ndúúcū rey yeⁿꞌe yā. 33 ꞌTiicá ntúūⁿ. ꞌĀā chɛɛ́ nūuⁿ ndísꞌtiī nduuti chi nguɛ́ɛ́ cuꞌnee nī tanducuéⁿꞌē chi vɛ́ɛ́ yeⁿꞌe nī, nguɛ́ɛ́ cuuví cuuvi ndísꞌtiī discípulos yeⁿꞌé.
Jesús ngaⁿꞌa yā yeⁿꞌé yiima chi nguɛ́ɛ́ nꞌdaācā sabor yeⁿꞌē