3 Tuuꞌmi ní Jesús miiⁿ ní caⁿꞌa yā ꞌaama chi ꞌtɛ́ɛ́ nguɛɛ daama ndúúcū ꞌiiⁿꞌyāⁿ miiⁿ. 4 Chɛɛ́ ndísꞌtiī ndúúti chi vɛ́ɛ́ ꞌáámá ciento ꞌiiti cuūchī yeⁿꞌe nī ní nduuti chí ꞌáámá chɛɛ ꞌiiti sꞌuuⁿ cuuví ndái tī, ¿ꞌáá nguɛ́ɛ́ cuꞌnee nī nduꞌu chí cuūⁿ ngɛɛcú nditiiⁿꞌyú cuuúⁿ tī na ꞌcuɛ́ɛ́tí? Ní caⁿꞌá nī inꞌnuúⁿ nī ꞌiiti chi nindáí mííⁿ ndíí taachí nndaacá nī ꞌiiti miiⁿ. 5 Ní taachí ndaacá nī ꞌiiti miiⁿ cunꞌduú nī ꞌiiti ná ꞌdiimi nī ní candɛ́ɛ nī ꞌiiti cuūchī miiⁿ naachi canéé tanáⁿꞌā ꞌiiti cuūchī. Ní yeenú nꞌdai nī. 6 Ní taachi nndaa nī na vaacu nī, tuuꞌmi ní nadidaama nī ꞌiiⁿꞌyāⁿ chi nꞌdai ndúúcu nī ndúúcū ꞌiiⁿꞌyāⁿ na niiⁿnuúⁿ na vaꞌai yeⁿꞌe nī. Ní caaⁿꞌmaⁿ nī cuuvi nī, ꞌiiⁿꞌyāⁿ sꞌeeⁿ: Ndísꞌtiī cuuvi yeenú nꞌdai nī nduucú ní diꞌviicu yú ti ꞌāā nꞌdaacá ꞌiiti cuūchī yeⁿꞌé chi nīndaí. 7 Tuuꞌmi ní Jesús ngaⁿꞌá ntúuⁿ yā, ꞌúú ngaⁿꞌá ngīi ndísꞌtiī: ꞌTíícā vɛ́ɛ́ vaādī yeenú taavi na vaꞌai chɛɛti nguuvi yeⁿꞌē ꞌáámá ꞌiiⁿꞌyāⁿ chi vɛ́ɛ́ nuuⁿndi yeⁿꞌe yā ní ndaacadaami yā yeⁿꞌē nuuⁿndi yeⁿꞌe yā nguɛ́ɛ́ ti yeⁿꞌē cuūⁿ ngɛɛcú nditiiⁿꞌyu cuūuⁿ ꞌiiⁿꞌyāⁿ chi nꞌdai chi nguɛ́ɛ́ canee cuumi chi ndaacadaami yā yeⁿꞌē nuuⁿndi yeⁿꞌe yā.

8 Ní caⁿꞌa Jesús: Duꞌu ꞌáámá nꞌdaataá chi vɛ́ɛ́ ndiichi cáádí yeⁿꞌē ta nduuti chi dindai tá ꞌáámá ¿ꞌáá ꞌcuuⁿꞌmiⁿ tá lámpara ní nꞌdaaca tá vaꞌāī, ní inꞌnuuⁿ tá ndúúcū cuidado taanduvɛ́ɛ́ ndíí ndaācā ta tuūmī miiⁿ? 9 Taachí ndaācā tá nadaama tá ꞌiiⁿꞌyāⁿ chi nꞌdai ndúúcu ta ndúúcū ꞌiiⁿꞌyāⁿ na niiⁿnuúⁿ vaꞌai yeⁿꞌe ta ní caⁿꞌa tá: Cuuvi yeenú nī nduucú ní diꞌviicu yú ti ꞌāā ndaācá ꞌáámá cáádí yeⁿꞌé chí chindāi miiⁿ. 10 ꞌÚú ngaⁿꞌá ngií ndísꞌtiī caati ꞌtiicá ntúūⁿ vɛ́ɛ́ vaadī yeenú nguaaⁿ ángeles yeⁿꞌé Ndyuūs cucáávā ꞌáámá ꞌiiⁿꞌyāⁿ nuuⁿndi chí nandaacadaamí yā yeⁿꞌē nuuⁿndi yeⁿꞌe yā.

11 Jesús ngaⁿꞌa ntúuⁿ yā ejemplo ꞌcūū: ꞌÁámá saⁿꞌā vɛ́ɛ́ ꞌuūvī daiya sa. 12 Saⁿꞌā nꞌgaiyáā daiya sa chi ꞌlííⁿ ca miiⁿ caⁿꞌa sá chii sá chiida sa: Nꞌdiī, chiidá, tée nī parte chi ituneeⁿ ꞌúú yeⁿꞌe vaādi nguaꞌaá yeⁿꞌe nī. Chiida sa ní nacaⁿꞌá yā ní ncaꞌa yā saⁿꞌā chi parte yeⁿꞌe sa. 13 Nguɛ́ɛ́ chi ꞌnaaⁿ, saⁿꞌā ꞌlííⁿ ca miiⁿ ní nadīdaamá sá tanducuéⁿꞌē dénduꞌū yeⁿꞌē sa. Ní cueⁿꞌe yaⁿꞌai sa táámá país. Mííⁿ chꞌiinu diiⁿ sa gastar tanducuéⁿꞌē ti diiⁿ sa nducuéⁿꞌē chi nguɛɛ nꞌdaacā. 14 Ní taachi chꞌiinu tuūmī yeⁿꞌē sa tanducuéⁿꞌē chi caꞌa chiida sa, ndaā ꞌáámá cuiicu chꞌɛɛtɛ na país miiⁿ. Sáⁿꞌā miiⁿ ní chꞌeenū nꞌdai sa chiī caati nguɛ́ɛ́ chí cheꞌe sa. 15 Saⁿꞌā miiⁿ ní ndaā sa nanááⁿ ꞌáámá ꞌiiⁿꞌyāⁿ yeⁿꞌe país miiⁿ. Ní caⁿꞌa sa chi neⁿꞌe sa diiⁿ sa ntiiⁿnyuⁿ. ꞌIiⁿꞌyāⁿ miiⁿ ní caⁿꞌa yā chii yā saⁿꞌa miiⁿ chi cueⁿꞌe sa tanꞌdúúcā mozo yeⁿꞌé yā ní diiⁿ sa cuidado cuūchí sꞌeeⁿ yeⁿꞌé yā. 16 Saⁿꞌā miiⁿ ní nacádiinuuⁿ sa chí neⁿꞌē sa cheꞌe sa chi yeⁿꞌē cuuchí sꞌeeⁿ caati mar ꞌáámá ꞌiiⁿꞌyāⁿ nguɛ́ɛ́ caꞌa yā dɛꞌɛ̄ vɛɛ saⁿꞌā. 17 Tuuꞌmi ní nꞌgaācu sa ní caⁿꞌā sa nguaaⁿ maaⁿ sa: Nꞌdeee nꞌdáí mozos yeⁿꞌe chiidá chí ngeꞌe yā pan ní neené nꞌdeee chí ngeꞌe yā vɛɛ, ꞌiicu ꞌmuuⁿ ꞌúú ní idiíⁿ ntiiⁿnyuⁿ ní neⁿꞌē ꞌcuūvi chi cuiicú. 18 Nꞌdaa cá ꞌmuuⁿ. Naⁿꞌá nꞌdiichí chiidá ní caaⁿꞌmáⁿ cuuví ꞌiiⁿꞌyāⁿ: Nꞌdiī chiidá vɛ́ɛ́ nuūⁿndī yeⁿꞌé nanááⁿ Ndyuūs chi canéé na vaꞌai chɛɛti nguuvi ní nanááⁿ nꞌdiī. 19 ꞌĀā ntɛ́ɛ́ nꞌdai ca ꞌúú chi tuneeⁿ ꞌúú chi caaⁿꞌmaⁿ nī chi daiya nī ꞌúú. Cuꞌneéⁿ nī ꞌúú tanꞌdúúcā ꞌaama mozo yeⁿꞌe nī. 20 Tuuꞌmi ní cunaⁿꞌā sa ndaā sa nanááⁿ chiīdā sa. Taachi indái ca nndaa sa, tuuꞌmi ní chiida sa ní nꞌdiichí yā saⁿꞌā ní nnee yaꞌāī ꞌiinú yā saⁿꞌā. Chiida sa ní cueⁿꞌe yā ngeenu yā naachi canéé sá ní tumaⁿꞌá yā daiyá yā ní tuuꞌvi yā cheendi sa. 21 Daiya yā miiⁿ ní caⁿꞌa sa chii sa chiida sa: Nꞌdiī, chiidá, vɛ́ɛ́ nuuⁿndi yeⁿꞌé nanááⁿ Ndyuūs chi canee na vaꞌai chɛɛti nguuvi ndúúcū nanááⁿ nꞌdiī. ꞌĀā nꞌtɛ́ɛ́ nꞌdai ca ꞌúú chí ituneeⁿ ꞌúú chi caaⁿꞌmáⁿ nī chi daiya nī ꞌúú. 22 Naati chiida sa mííⁿ ní caⁿꞌa yā chii yā mozos yeⁿꞌe yā: Dii mozos, maaⁿ nchꞌɛɛtɛ́ nūu tunꞌdáa di tíinūuⁿ chí nꞌdai ca ní cuꞌnuúⁿ di saⁿꞌā daiyá. Ní caꞌa di chiīnūtaꞌāa cunuuⁿ taꞌā sa ndúúcū ndaacuú chi cunuuⁿ caꞌā sa. 23 Cuéⁿꞌe di canguaiⁿ di itiindu ꞌlííⁿ chi ꞌviichɛɛ́. Ní ꞌcaaⁿꞌnuⁿ di ꞌiiti chi cheꞌé ꞌnū. Ní diíⁿ ꞌnū ꞌviicu. 24 Ti sáⁿꞌa ꞌcūū daiyá cueⁿꞌe sa yaⁿꞌai ní ꞌāā tanꞌdúúcā chi nꞌdií sá. Maaⁿ ní navaacunée sa ní nduuchi sa. Ní tanꞌdúúcā chí nīndáí sá ní ndaācā sa. Ní ꞌiiⁿꞌyāⁿ sꞌeeⁿ ní yeenú taavi yā ní diíⁿ yā ꞌáámá ꞌviicu.

25 Ní saⁿꞌā daiyá yā chí vmnaaⁿ canee sa cuɛɛti. Ní taachí ndaā nííⁿnūuⁿ sa ná vaꞌai, chꞌiindiveeⁿ sa chí itiivi saⁿꞌā flauta ní ꞌiiⁿꞌyāⁿ ndeꞌei yā. 26 Tuuꞌmi ní saⁿꞌā miiⁿ ní ꞌcaī sa ꞌaama mozo ní itiinguuneeⁿ sa mozo miiⁿ dɛꞌɛ̄ chi vɛ́ɛ́. 27 Mozo miiⁿ ní caⁿꞌā sa chii sa ꞌiiⁿꞌyāⁿ: ꞌĀā ndáā ꞌdíinu nī. Ní nguɛ́ɛ́ dɛꞌɛ̄ vɛɛ yeⁿꞌē sa. Ní chiidá nī ní caⁿꞌa ntiiⁿnyuⁿ yā chí chꞌiī itiindu ꞌlííⁿ chi ꞌviichɛ. 28 Saⁿꞌā miiⁿ ní nduuvi taaⁿ sa. Nguɛ́ɛ́ ꞌcuuⁿ sa nndaā sa vaꞌāī. Tuuꞌmi ní chiida sa miiⁿ ní cunꞌdáa yā vaꞌāī ní diꞌcuíítu yā daiya yā chí nuūⁿ ndaā sa vaꞌāī. 29 Naati saⁿꞌā miiⁿ ní nánꞌguɛɛcútaⁿꞌā sa yeⁿꞌe chiida sa: ꞌĀā ꞌnaaⁿ nꞌdáí idichííꞌvɛ̄ ꞌúú nꞌdiī, ní diíⁿ tanducuéⁿꞌē chi ngaⁿꞌa nī ní mar ꞌáámá vmnéⁿꞌēe nguɛ́ɛ́ tee nī mar ꞌáámá ꞌiiti cuūchī ꞌlííⁿ chi ꞌcaaⁿꞌnúⁿ ní diíⁿ ꞌviicu. Ní ꞌúú cuuvi yeenú ndúúcū amigos yeⁿꞌé. 30 Naatí taachi ndaā daiya nī sáⁿꞌa ꞌcūū, ꞌnííⁿnuúⁿ ꞌtuūꞌvī sa tanducuéⁿꞌē chí vaadī nꞌguáꞌāa yeⁿꞌē sa ndúúcū nꞌdaataa sꞌeeⁿ chi vɛ́ɛ́ saⁿꞌā sꞌeeⁿ yeⁿꞌe. Ní ngaⁿꞌa ntiiⁿnyúⁿ nī chi mozos chꞌiiⁿꞌnúⁿ yā itiindu ꞌlííⁿ chi ꞌviichɛɛ́ chi cheꞌe sa. 31 Tuuꞌmi ní chiida sa miiⁿ caⁿꞌa yā chii yā saⁿꞌā: Díí, daiyá, ꞌáámá canee di nduucú ní tanducuéⁿꞌē denduꞌū chiī yeⁿꞌé ní yeⁿꞌē di. 32 Canéé chí diiⁿ yú ꞌviicu ti saⁿꞌā ꞌdiinu di chi ꞌúú nacadiinú chi tanꞌduucā chi ꞌāā nꞌdií sá ní nduuchí sa. ꞌĀā nindáa sa na vaacu yú ní maaⁿ ní ndaācā yú saⁿꞌā.