Baal Baalqa cananeo runakuna adorayanqan diosmi karqan. Juk dios kanqanta yarpäyaptinpis manami rasunpaypatsu dios karqan. Cananeo runakuna yarpäyarqan tsay diosta adorayaptin uywankuna mirayanqanta y chakrankunacho imapis wayunqantami. Tsaynöpis yarpäyarqan mangädata y alli tamyatapis kachamunqantami.

babulpa tsapanan Babulpa tsapananpa jutinmi hebreucho karqan kapporet. Kapporet ninanqa tsapanan ninanmi y jutsata perdonanqan ninanmi. Wakin castellänu traduccionkunaqa propiciatoriu nirmi tsay palabrata traducin. Babulpa tsapanan jananpitami Moisésta Tayta Dios parlaparqan (Éxo. 25.22). Tsaynöpis babulpa tsapanan jananman pukutaycho Tayta Dios yurimurqan (Lev. 16.2). Israel runakuna purificashqa kayänanpä kaq junaqchömi mandaq sacerdöti babul kanqanman yaykur torïtupa yawarninman dëdunta jatiykur babulpa tsapananta tsaqtsuparqan (Lev. 16.14).

bautizay Jesucristuta chaskikuqkuna bautizakurqa runakunata musyatsiyan jutsankunata kachariyanqanta, Jesucristuman yärakuyanqanta y Jesucristuta cäsukuyänanpä kanqantami. Discïpulunkunatami Jesucristo nirqan payta chaskikuqkunata bautizayänanpä (Mat. 28.19; Mar. 16.16).

büqui Büquiqa yaku jananpa puriyänanpä tablapita rurashqa jatunkaray artësanömi kaykan. Büquikunawanmi runakuna puriyan lamarpa y jatun qochakunapapis. Tsaynö puriyan pescädukunata tsariyänanpä y juklä markakunaman aywayänanpämi. Bibliata qellqayanqan witsanqa qeruta cruztanö ruraykurmi büquicho ichitsiyarqan. Tsay cruzmanmi rakta tëlata ishkan esquïnankunaman watayaq. Ura kaq esquïnantanami büquiman watayaq wayraptin tsayllawanna aywananpä (Luc. 8.22-25; Hech. 27.17).