Pabluta Romaman prësu apatsinqan
27
Italiamana apatsiyänanpä autoridäkuna willanakuskirmi wakin prësukunatawan capitán Juliuman Pabluta entregayarqan. Juliuqa Augusto niyanqan tröpapa capitanninmi karqan. 2 Tsaymi Adramitiupita shamuq büquiman witsäyarqä.b Tsay büquiqa Asia provinciacho kaq puertukunaman aywananpänami kaykarqan. Pabluta wallkiyänäpämi Aristarcuwan aywayarqä. Aristarcuqa Macedonia provinciacho Tesalónica markapitami karqan. 3 Waraynin junaq Sidónman charmi capitán Juliuqa Pabluta kuyapar nirqan: “Imallawanpis yanapayäshunaykipä reqinakunqaykiman ayway”.4 Sidónpita yarquyaptï pasaypa wayramuptinmi Chipre isla kuchullanpa aywayarqä. 5 Nirkurmi Cilicia y Panfilia tsimpanpa päsar Liciacho kaq Mira markaman chäyarqä.
6 Tsaychömi capitán Julio tarirqan Alejandríapita Italiaman aywaykaq büquita. Tsaymi tsay büquimanna yarkuyänäpä niyämarqan. 7 Tsaypita yarqur atska junaqtarämi ñakar Gnido markapa frentinpa päsayarqä. Tsaypita aywaykäyanqä kaqpa pasaypa wayramuptinmi Creta islapa tumar Salmón niyanqan ñöpanpa päsayarqä. 8 Creta isla kuchunpa aywayta ñakarmi Buenos Puertos markaman ajatarä chäyarqä. Tsay markaqa Lasea markapita cercallanchömi kaykan. 9 Atska junaqna päsashqa kaptinmi tamya witsan qallaykunanpäna karqan. Tsaymi päsayänäpä mana alli kaptin büquicho aruq runakunata Pablo nirqan: 10 “Taytakuna, amana aywashunnatsu. Kaynöcho aywashqaqa büquipis cargapis ushakanqami. Noqantsikpis ushakäshunmi”.
11 Pablo tsaynö niptinpis capitanqa manami cäsurqantsu, sinöqa büquiyuqta y büqui manijaqtami cäsurqan. 12 Tamya witsan Buenos Puertuscho quëdayänäpä mana alli kaptinmi llapäkunapis yarpäyarqä Cretacho Fenice markaman aywayta. Fenicichömi itsanqa tamya witsanpis büqui ichïnanpä alli karqan.
Wayrantin tamya pasaypa kanqan
13 Aywayänäpä wayra alli kaptinnami büquicho aruqkuna yarpäyarqan Feniciman chäyänäpäna kanqanta. Tsaymi büquipa anclankunatac qoriskir Creta isla kuchullanpa aywayarqä. 14 Yarquyanqäpita tsayllatanami Euroclidón niyanqan shukukuy wayra Cretapita pasaypa wayramurqan. 15 Tsaymi wayra shamunqanpa aywayta mana kamäpakur büqui manijaqkuna kachaykuyarqan wayra apanqallanpana büqui aywakunanpä. 16 Tsaypita Clauda niyanqan taksha islapa aywarmi qarachaypa apanqan taksha büquita pasaypa ñakarrä büqui jananman joqarkatsir watayarqä.
17 Tsaypitanami aywaykäyanqä jatun büqui mana llaktikänanpä waskakunawan watayarqan. Nirkurmi lamar rurincho Sirte niyanqan aqushaman chänanta mantsar despaciu aywayänäpä büquipa juk anclanta jitarpuyarqan. Nirkurmi wayra apanqallanpa aywakuyarqä. 18 Tsaypita waraynin junaqpis tsaynölla wayramuptinmi büquipita cargankunata lamarman jitariyarqan. 19 Büquipa anclanta jitarpuyanqanpita kimsa junaqtanami büquicho alläpa mana ministiyanqan kaqkunatapis jitariyarqan. 20 Pukutay tsaparaptinmi rupaypis ni qoyllurpis atska junaq rikakarqantsu. Pasaypa wayramuptinmi ushakäyänäpä kanqanta yarpäyarqä.
21 Atska junaq mallaqlla kayaptïmi chawpïkunaman ichiykur Pablo niyämarqan: “Taytakuna, Creta islapita mana yarqamunantsikpä ninqäta cäsukayämaptikiqa manami kayjinanpa ñakashwantsu karqan ni imakunatapis lamarman jitashwantsu karqan. 22 Tsaynö kaptinpis ama llakikuyaytsu. Manami mayqantsikpis wanushuntsu. Büquimi itsanqa ushakanqa. 23 Qäyan paqasmi sirvinqä Tayta Dios kachamunqan ángel yuripaykamar 24 nimashqa: ‘Pablo, ama mantsariytsu. Romacho mandaq César juzgashunaykipä chankirämi. Büquicho kaykaq runakunatapis qam raykuqmi Tayta Dios salvanqa’. 25 Taytakuna, ángel tsaynö nikämaptinqa ama mantsarishuntsu. Tayta Diosmanmi yärakü. Ángel nimanqannöllami kanqa. 26 Büqui ushakaptinpis isla kuchunmanmi lamar jitarimäshun”.
27 Adriático ninqan lamarcho ishkay semänana wayra puriykätsiyämaptinmi büqui manijaqkuna pullan paqasnö tantiyayarqan tsaki patsaman chaykäyanqäta. 28 Yakupa jondunta tupuyaptinmi kimsa chunka soqta (36) metru karqan. Yapay tupuyaptinmi ishkay chunka qanchis (27) metrullana karqan. 29 Tsaymi rumikunacho büqui takakänanta mantsarir büqui ichïnanpä chusku anclankunata watarkur büqui qepanpa jitarpuyarqan. Nirkurmi patsa waranqanyaq tsaycho shuyaräyarqä. 30 Büqui manijaqkuna qeshpiyta munarmi büqui puntanpapis anclata urätsiq tumpalla taksha büquita urätsiyarqan. 31 Qeshpiyta munayanqanta tantiyaskirmi capitanta y soldädukunata Pablo willar nirqan: “Büqui manijaqkuna aywakuyaptinqa manami salvakuyankitsu”.
32 Tsaynö niptinmi taksha büqui wataraq waskakunata soldädukuna rutuyaptin lamarman ishkirqan.
33 Patsa waraskiptinnami runakunata Pablo nirqan: “Taytakuna, mikushunrä. ‘Imarä päsamäshun’ nir yarpachakurmi ishkay semänana mikushqantsiktsu. 34 Kananqa kallpantsik yurinanpä mikuskishunrä. Manami mayqantsikpis wanushuntsu”.
35 Niskirmi tantata aptarkur llapanpa ñöpancho Tayta Diosta agradëcikurqan. Nirkurmi tantata pakiskir mikuyta qallaykurqan. 36 Pablo mikuykaqta rikaykurmi llapanpis mikuyarqan. 37 Büquicho aywaqkuna kayarqä ishkay pachak qanchis chunka soqta (276) runakunami. 38 Pacha junta mikuskirnami büqui ankashyänanpä apayanqan trïguta lamarman jitayarqan.
Büqui takakar ushakanqan
39 Patsa waraskiptinnami chaykäyanqä tsaki patsata rikarpis büqui manijaqkuna reqiyarqantsu maycho kaykäyanqantapis. Pläyata rikaykurnami büquita tsayman chätsiyta munayarqan. 40 Tsaymi wataraq waskakunata rutuskiyaptin anclakuna lamarcho quëdayarqan. Nirkurmi timunnin wataraqta paskaskir büquita wayra apananpä kaq jatun rakta tëlata witsätsiyarqan. Tsaymi lamar kuchunman büqui aywar qallaykurqan. 41 Aywaykanqanchömi büquipa puntan aqushaman jatikaskirqan. Tsaymi yaku jaytaptin büquipa qepan pakiskirqan.
42 Tsaymi prësukuna mana qeshpiyänanpä soldädukuna wanutsiyta munayarqan. 43 Tsaynö yarpäyaptinpis Pabluta salvayta munarmi capitán nirqan: “Ama pitapis wanutsiyaytsu. Nädayta yachaqkunaqa yaku kuchunman yarquyätsun. 44 Wakinkunana tablakunata o büquipa pakipinkunata tsarikurkur yaku kuchunman imanöpapis yarquyätsun”.
Tsaynöpami llapäkuna yakupita yarquyarqä.