Malta islacho Pablo kanqan
28
Lamarpita llapäkuna yarquskirmi musyayarqä Malta islacho kaykäyanqäta. 2 Tsaycho taq runakuna allimi chaskiyämarqan. Tsaymi tamyar alaptin ninata tsariskatsir mashakuyänäpä qayayämarqan. 3 Pablupis tsaki raprakunata qoriskir ninaman jitapuykaptinmi ninapita culebra qeshpir makinta amukurkurqan. 4 Pablupa makincho warkuraykaqta rikaykurmi tsaycho taq runakuna niyarqan: “¡Kay runaqa wanutsikuqmi kashqa kanqa! Tsaymi lamarpita kawaykar yarqamuptinpis adoranqantsik diösaa kawananta munantsu”.5 Makinpita ninaman culebrata Pablo tapsiskiptin kaninqan manami imanarqanpistsu. 6 Culebra kaninqan jakananpä kanqanta o Pablo wanunanpä kanqantami runakuna yarpäyarqan. May höra imapis mana päsaptinmi niyarqan: “¡Kay runaqa juk diospis kakunchi!”
7 Tsay mashakuykäyanqä ñöpanchömi Publio jutiyuq runapa chakrankuna karqan. Publiuqa tsay islacho mas mandaq autoridämi karqan. Noqakunata kimsa junaq patsatsiyämar allimi rikayämarqan. 8 Tsaychömi Publiupa taytan disenteriawanb y fiebriwan cämacho antsa ujuraykarqan. Tsayman Pablo yaykuskir Tayta Diosta mañakur yataykuptinmi alliyaskirqan. 9 Tsay runa alliyanqanta musyaykurmi wakin qeshyaykaqkunapis Pabluman shayämuptin llapanta alliyätsirqan. 10 Tsaynö alliyätsinqanpita agradëcikurmi alli rikayämarqan. Aywakuyaptïnami llapan ministiyanqäkunatapis kamaripäyämarqan.
Romaman Pablo chanqan
11 Tamya killakuna päsanqanyaqmi Alejandríapita shamuq büqui tsay islacho jamararqan. Tsaymi kimsa killa tsay islacho kakur aywakuyänäpä tsay büquiman yarkuyarqä. Tsay büquipa frentinchömi Cástor y Pólux niyanqan diosninkuna llaqllaypa dibujashqa karqan. 12 Tsaypita Siracusa markaman chaykurmi kimsa junaq tsaycho qoyäyarqä. 13 Siracusapitanami lamar kuchullanpa Regio markayaq aywayarqä. Sur kaqläpita wayramuptinmi Regiupita ishkay junaqllatana Puteoli markaman chäyarqä. 14 Tsaychönami büquipita yarpuskir wawqikunawan tinkuyarqä. Paykuna rugakayämaptinmi juk semäna paykunawan quëdayarqä. Tsaypitanami chakillapana Romaman aywayarqä. 15 Aywaykäyanqäta musyarmi Romacho kaq wakin wawqikuna Foro de Apio markaman taripäyämarqan. Wakinnami Tres Tabernas markacho shuyaräyämarqan.c Paykunata rikaykurmi Tayta Diosta Pablo kushishqa agradëcikurqan. 16 Romaman chaykuyaptïnami [capitanqa prësukunata comandantiman entregarqan]. Pablutami itsanqa juk wayicho wichqaränanpä aparqan. Tsaychömi juk soldädu cuidarqan.
Israel runakunata Romacho Pablo willanqan
17 Chäyanqäpita kimsa junaqtanami Israel mayor runakunata Pablo qayatsirqan. Qorikaskiyaptinmi nirqan: “Taytakuna, manami Israel mayintsikkunatapis ni costumbrintsikkunatapis manakaqman churashqätsu. Llutanta imatapis mana ruraykaptïmi Jerusaléncho prësu tsariskamar Roma autoridäkunaman apayämashqa. 18 Tsay autoridäkuna juzgamar wanunäpä jutsä mana kaptinmi kachäyämayta munayarqan. 19 Israel autoridäkunami itsanqa wanutsimayta munayarqan. Tsaymi mandaq César arreglamänanpä mañakurqä.† Imanö kaptinpis Israel mayintsikkunata manami demandätsu. 20 Llapan Israel runakunanöllami noqapis criyï Tayta Dios awnimanqantsikkunata cumplinanpä kanqanta. Tsaynö criyinqäpitami cadënawan wataraykä. Tsayta musyatsinäpämi qamkunata qayatsimushqä”.
21 Tsaynö niptinmi Israel mayor runakuna niyarqan: “Imanö kanqaykitapis musyayänäpä Judea provinciapita manami ima cartatapis chaskiyashqätsu. Israel mayintsikkunapis kayman chämur qampä manami imatapis parlakuyashqatsu. 22 Itsanqa maytsaychömi yachatsinqaykikuna llutan kanqanta runakuna parlaykäyan. Tsaymi imata yachatsinqaykitapis kikïkuna wiyayta munayä”.
23 Tsaynö niyaptinmi juk junaq yapay qorikäyänanpä willanakuyarqan. Willanakuyanqan junaq chämuptinnami Pablo patsaranqan wayiman atskaq qorikäyarqan. Tsaymi tutapita tardiyaq Tayta Diospa mandakuyninpita Pablo yachatsirqan. Tsaynöpis Moisés qellqanqan leykunata y profëtakuna qellqayanqankunata tantiyatsirmi Jesucristo salvamaqnintsik kanqanta yachatsirqan. 24 Tsaynö yachatsiptinmi wakin runakuna criyiyarqan y wakinna criyiyarqantsu. 25 Mana tantiyanakur aywakuyänanpäna kaykaptinmi Pablo nirqan: “Rasun kaqtami unay castantsikkunata willananpä Espíritu Santu profëta Isaíasta tantiyatsir nirqan:
26 “ ‘Aywar tsay runakunata niy:
“Mayjina wiyarpis manami tantiyayankitsu.
Mayjina rikarpis manami cuentata qokuyankitsu”.
27 Tsay runakunapa shonqunkunami chukruyashqa.
Rinrinkunapis upayashqami.
Ñawinkunapis qaprayashqami.
Tsaynö karmi rikayantsu, wiyayantsu, tantiyayantsu ni jutsankunata kachariyantsu.
Tsaynö kayaptinmi noqapis alliyätsishätsud’ ”.†
28 “Isaías ninqannölla qamkunapis kayaptikimi mana Israel runakunatana salvakuyänanpä willashä. Paykunami itsanqa tantiyakuyanqa”.
29 [Pablo tsaynö niptinmi Israel runakuna kikinpura rimanakur aywakuyarqan.]