Mi riri e mana yokleye ommo nengkre
(Matyu 13.2-23; Mak 4.1-20)
8
Ingke ommo namo pekimo,
Jisas waraiye poipai taun ka mokoi yoprole miuporo kingdom e God yakle nu 12pla uma.
2 Ka pinmana mingklari nupene wu.
Nu pinmana namo,
isi Jisas yuꞌpoleye opola ka yemplekuru nale e nenrinine.
Wongke e nu pinmana namo sa Maria,
nu fa nouwne Makdala pin.
Wu pin,
e isi Jisas yuꞌpoleye 7pla opola nenene wu.
3 Ka Joana yane Susana ka pinmana mingklari plai plau,
nupene Jisas.
Joana sa Kusa puri,
Kusa sa iramana fa yuruye mow e Herot.
Nu pinmana namo nali romaula ka ommo plai e none,
fa e mewmew Jisas yakle disaipol e wone.
Jisas yopro mi riri e mana wongke yokle wit nalale nengkrele
(Matyu 3.13-17; Mak 1.9-11)
4 Ka pinuma mingklari wamo nolonine Jisas e taun wokwokera.
Nu ni nifrilpanro naine ka wu yirengkle nu mi riri nanrona,
5 “Mana wongke e pai yokle ommo nengkrele woneni ka yufla ommo nalale.
Wu yufla ommo nalale namo,
ka plai firipanro rokoi ka uma rew numaro ka rora no.
6 Ka nalale plai e firipanro pike e roma plau,
nemei ka rowlini,
pike namo fei rekle.
7 Ka nalale plai e firipanro iplele e kapa rin plau,
nemei ka kapa rin nuforo ka rowlini.
8 Ka nalale plai e firipanro pike uporo,
nemei uporo wamo ka nalelwa nale mingklari wamo resukru 100pla.”
Jisas na yopro ompla namo,
ka youw nanrona,
“Mana e ripi plau,
sa yupu mi mee.”
9 Nu disaipol woneni narine wu nomu e mi riri e wone yirengkleye nu namo.
10 Ka wu yirengkle nu nanrona,
“God e yukule pone pu,
fa e namale ommo upupu e pekinenene kingdom e God.
Ka ki kireli nu plai mi riri,a
e fika,
‘Nu nurune,
ka nu ese fei nane ompla wongke.
Nu nupune mi,
ka nu ese fei namale mi nomu.’ b
Nomu e mi riri e mana yuflaneye wit nalale
(Matyu 13.18-23; Mak 4.13-20)
11 “Mi riri e ki kirepi pone namo,
sa rona:
Ompla nalale namo,
sa mi e God.
12 Ommo nalale e firipanro rokoi namo sa yukaine uma e nupu mi e God,
ka Opola wi yuꞌpole mi e God e nene wolpuna e nu,
se nu e fei bilipim God ka God ese yuꞌpu kore nu.
13 Ka nalale plai e firipanro pike e roma plau,
sa nu uma e nupune mi e God ka nemne mi namo ka woluporone,
kinrela e nu sa onne,
bilip e nu yeye pai la taim ommo wongkwongkeni yemplekare nu,
nu e nupone bilip e none.
14 Ka nalale plai e firipanro pike e kapa rin plau sa yukaine nu uma e nupu mi e God,
ka wolnaurene ommo e pike,
yukaine romaula ka ommo plai e none wolane fa ese saimoyale none ka yangke none e naine uporo,
ommo namo yangke bilip e nu fafaile.
Nanrona fane nu e fei nalelwa ka puno.
15 Ka,
nalale e firipanro pike uporo sa yukaine pinuma e naine wolwokera uporo,
ka nupu mi e God ka nuna kero mi namo.
E ommo wongkwongkeni yemplekare nu,
nu fa neri kero bilip ka nalelwa.
Lam fa neine yeriye tebol riri
16 “Uma fi fa nesana lam ka nufonralo pike mangkam,
ka nu fi fa nesana neine yeri angkromole e koii funrola.
Sa onne!
Nu fa neine yeriye koii alele se nu pinuma fopi e neri monre ese nuru.
17 Ommo e pone fei namale ingke se pone e namale,
ka ommo e pekinaine o nuforo naine namo ingke e nemei alele.
18 Nanrona fane e pone pupu mi,
pone poo e fika mana e namale mi plai pu,
mana namo God ese yaꞌne wu plai kore.
Le mana ikakro onnele,
mana namo God ese yuꞌpole ikakro uporo e wu,
yukaine wone yire wone yuna pu.”
Jisas moka yakle Jisas inompi ka ranimpi
(Matyu 12.46-50; Mak 3.31-35)
19 Jisas moka yakle Jisas inompi e noloni nuru Jisas.
Nu ni,
ka nu fei painri ekrene Jisas,
e fika,
uma mingklari wamo neinangkru wu pu.
20 Ka nu uma plai nireni Jisas nanrona,
“Yene moka yakle yene inompi nanerine moile nire nuru yene.”
21 Ka Jisas yirengkle nu nanrona,
“Ki ama,
ki inompi ka ranimpi,
sa nu uma e fa nupune mi e God ka nupenene.”
Jisas yire, ka rapu e yemei wamo nupi namo, pekimo kei
(Matyu 8.23-27; Mak 4.36-41)
22 Kaire wongke Jisas yirengkle nu disaipol e wone nanrona,
“Mone maure fun mamampri repo.”
Nanrona fane nu nulpanri bot wongke ka painri.
23 E nu painrine,
Jisas wile nama.
E wu wileye nama,
rapu priri wamo ka fun yemei wamo flilene panri panro yimerwa bot ka bot yire eniralo.
24 Nu disaipol norone Jisas ka nireni wu nanrona,
“Manwamo,
Manwamo,
mone ese rili!”
Rongka wu yemei ka yenre rapu yane nupi e nopune namo.
Ka nupi yane rapu yiwri ka nupi fa wile uporo kore.
25 Ka wu yarile nu nanrona,
“Bilip e pone waiye pei?”
Nu disaipol nemnum ka nemfirineri ka nemnarile none kore e ompla namo,
“Mana namo sa fina,
wu yire mi kero ka rapu yane nupi ke nupu mi e wu.”
Jisas yuꞌpole opola fafaile e napalene mana wongke
26 Nu painri repo e fun wamo Galili,
painri plele pike plola e nu Gerasa.
Pike plola namo sa yeye repo e fun Galili.
27 Jisas yupone bot ka pai pari pike,
ka mana wongke e taun namo,
opola fa nisinorine wu.
E isi wi plele mee mana namo fi fa yiperiye amprapi reinangkruye wone,
ka wiye waiye mow wongke onnele.
Wu fa wiye waiye roma pulale,
koii e fa niꞌrine pinuma e rili.
28 Mana namo yuru Jisas,
ka yangke mi ka firalo ekrene Jisas.
Ka yangkrom mi kero wamo yireni Jisas nanrona,
“E fikami ka yene wi plele ki,
Jisas,
yene Auna e God Riri!
Ki kiri wola ke yene fa yane eni ki ka yangke ki nalpapri rerene.”
29 Wu yangkromo nanrona,
e fika,
Jisas yire mi kero pu fa opola fafaile e yupone mana namo.
Ningki ka kaire wokwokera opola fafaile fa yisiyori wu fafaile wamo,
ka uma fa nuka wu sen rew ka mew ka samo naine nopanene wu.
Ka wu yekriyampreye sen namo ka opola fa yumaneye wu pai mokoi e uma fi fa nainene.
30 Ka Jisas yarine wu nanrona,
“Yene noula fina?”
Ka wu yireni Jisas nanrona,
“Noula kinini Ami.”
E fika nu opola fafaile mingklari isi napane wu.
31 Nu opola fafaile namo nemniri wola naurene fa Jisas e fei yawale nu painri panro pulale renro.
32 Mokoi namo,
pori mewlen mingklari nonene ommo ka nerine arwola.
Nanrona fane nu opola fafaile namo nemniri wolanaurene Jisas e yireli nu painri ninarpoinre pori,
ka wu yireli nu painri.
33 Ka nu opola fafaile namo nupone mana namo,
ka painri ninarpoinre pori namo ka pori nempriri painri panro arwola repo ka panro fun wamo,
ka naikolno mii ka rili kei.
34 Nu uma e fa nopaline pori mewlen namo nuru ompla namo nemei,
ka nu kenkenra painri ka mi nufu ommo namo poipai mokoi e naine mamanene taun.
35 Ka pinuma mingklari painri e nuru ompla namo.
Nu ni Jisas,
ka nuru mana e opola nuponene namo ke yiperi amprapi ka yem ira uporo ka waiye ekrene rew e Jisas.
Nu pinuma nuru ommo namo ka nemnum wamo.
36 Nu pinuma e isi nuru ommo namo noprongkle nu uma plai,
e rongkele Jisas yemyangkrupu opola ka mana namo yemei uporo kore.
37 Ingke se nu pinuma e Gerasa namo narine Jisas,
e as yupole nu ka pai,
e fika nu nemnum wamo.
Nanrona fane Jisas pai pari bot ka pai kore.
38 Mana e opola fafaile nupone namo wiri wolyaureye Jisas fa e yane painri,
ka Jisas yawane wu pai.
Ka wu yireni wu nanrona,
39 “Yene pai kore mokoi yeneni ka yoprongkle nu ommo wamo e God yangke yene.”
Nanrona fane mana namo pai ka yoprongkle nu pinuma mingklari e taun ommo fika e Jisas yangkeye wone.
Mela pin e ri ka pin wongke e yenriye
(Matyu 9.18-26; Mak 5.21-43)
40 Jisas pai kore fun repo ka pinuma mingklari woluporo wu,
e fika nu nai norine wu.
41 Ka mana wongke e wi,
noula Jairus,
firpalo rew e Jisas ka wiri wolyaureye Jisas fa e yane painri mow e wu.
Jairus wu sa mana wongke e nu uma fa nurune mow kori e nu Juda mokoi namo.
42 Wu pai Jisas e fika mel pin wokera nro woneni yire yangke e ri,
kikla wunini sa 12-pla.
Jisas pai mow e Jairus,
ka pinuma mingklari wamo nupene wu nangke le naukiri wu ungkla wiꞌn.
43 Pin wongke e yakle nu painri namo.
Wu fa yupraiye ori ningki kaire,
yeye nanrona pai resukru 12-pla kikla,
ka mana wongke fei yangke ompla namo yupone wu.c
44 Pin namo wi kumale e Jisas ka mew yoku amprapi piyewa e wu ka wampane nro ori e wu namo pekimo kei.
45 Ka Jisas yarile nu nanrona,
“Fina ke mew yokuye ki?”
Ka nu awail nire,
“Ki onne.
Ki onne.”
Ka Pita ke yireni wu nanrona,
“Manwamo,
pinuma mingklari nemnangkaro ka naraine mamanene yene ro paryane yene.”
46 Ka Jisas ke yirengkle nu nanrona,
“Mana wongke e mew yoku ki,
ki namale nanrona kero plai e ki nupone ki.”
47 Ka pin namo namale nanrona wu e fi peki pai,
nanrona fane nale e wu forwo ka wu wi firalo rew e Jisas.
Pin namo mi yufu pinuma mingklari e fika wu e mew yoku Jisas ka wampane nro wu uporo kore.
48 Ka Jisas ke yireni wu nanrona,
“Nona,
bilip yeneni namo yangke yene yemei uporo.
Yene pai woluporo.”
49 Jisas nawaiye yoproye nu ka mana wongke e yolowi mow e Jairus iramana e mow kori,
ka yireni wu nanrona,
“Yene nona ri pu,
ka yene fa yangke tikse namo nalrangkuwa.”
50 Ka Jisas yupu mi namo ka wu yireni Jairus nanrona,
“Yene fa yumye,
bilip nro,
sa yene nona e yemei uporo kore.”
51 E Jisas wi plele mow e Jairus,
wu mi yaure nu pinuma e fi nane wu panri monre.
Wu ko yireni Pita,
Jon,
Jems,
ka mokanangka e mela nro nane wu panri monre.
52 Ka pinuma mingklari nemnirine ka mew naririne none wolpoku,
e fika nu wolnaure wamo pin aula e ri namo.
Ka Jisas yirengkle nu nanrona,
“Pone fa pempiripe,
wu seke ri,
wu an nawileye nro.”
53 Nu sam nupol ri Jisas e fika nu namale nanrona wu ri pu.
54 Ka Jisas yuna mew e mel pin ka yireni wu nanrona,
“Eiki mela,
yene yemei!”
55 Ka malma e wu wi kore ka wu wampane yemei waiye.
Ka Jisas yirengkle nu nane ompla plai wu wo.
56 Ka mokanangka e mela wolnipanri,
ka wu yali mi kero wuyane,
e fi noprongkle nu uma e ompla namo.