Mi riri e mana yoku ompla aure nengkre
(Matyu 13.1-9; Luk 8.4-8)
4
Jisas yangke ommo woneni kore e yukuleye nu pinuma piyewa e fun wamo Galili.
Ka pinuma mingklari wamo noloni nemnoku mamane wu.
Nanrona fane wu yulpari waiye bota wongke yapa ekrene fun maipon ka nu pinuma sa naine maipon.
2 Ka e Jisas yukuleye nu,
wu yopro mi riri mingklari e mi woneni.
Ka wu yirengkle nu nanrona,
3 “Pone pupu!
Mana wongke pai yuflane wit nalale nengkrele woneni.
4 E wu yuflane wit nalale nengkrele woneni,
ka wit nalale plai sa firipanro naine rokoi ka rora noloni ka no pekimo kei.
5 Ka wit nalale namo plai sa firipanro koii roma mingklari wamo ka pike sa pitirinro.
Nanrona fane wit nalale namo wampane nemei.
6 Ka wit wela namo,
kinrela nunini fi samo panro pike ruwe.
Nanrona fane e kaire yeri riri ka yekri wit namo ka wit namo rowlini.
7 Ka wit nalale namo plai sa firipanro nainene koii e kapa rin mingklari.
Ka kapa rin namo nemei wamole ka nuforo wit namo fane wit fei nemei uporo ka fi nalelwa nale.
8 Ka wit nalale namo plai sa firipanro pike uporo fane samo nemei wamfafai ka nalelwa nalale mingklari.
Plai nalelwa nale 30pla ka plai nalelwa nale 60pla ka plai sa nalelwa nale 100pla.”
9 Ka Jisas yopro nu kore nanrona,
“Mana e ripi plau sa ese yupu mi mee,
ka ese namale nomu e mi riri namo.”
Nale e Jisas fa yoproye mi riri
10 E nu pinuma mingklari namo nupone koii namo ka painri pekimo se,
nu 12pla disaipol e Jisas nakle nu uma plai sa nane Jisas naine plau,
nu narine wu ese yirengkle nomu e mi riri mingklari namo.
11 Ka Jisas yire kore nu nanrona,
“God yangke mi e pekiyeye e kingdom woneni namo yemei alele pone pu.
Ka nu uma fopi plai e naine moile e kingdom e God,
nu ese nupu mi namo yukaine mi riri nro.
12 Nanrona fane
‘nu ese nuru ommo mingklari ki kangkeke,
ka nu sa ese fi samo namale ompla wongke.
Ka nu ese nupu mi mingklari kinini,
ka nu ese fi samo namale mi nomu.
Nanrona fane ki fa koproke mi riri nro ese nu e fi nupole nale fafaire noneni namo
ka God ese fi yuꞌpole nale fafaile nunini.’ ”
Nomu e mi riri e mana yuflane wit nalale nengkre
(Matyu 13.18-23; Luk 8.11-15)
13 Ka Jisas yarile nu nanrona,
“Anro pone fi namale nomu e mi riri namo wee?
Nanrona fane ese pone namale nomu e mi riri mingklari rongkele?
14 Mana namo isi yuflane wit nalale namo,
sa yukaine e wu yoku mi e God.
15 Wit nalale e firipanro rokoi namo,
sa yukaine nu uma fopi fa nem mi namo,
ka wampanenro Satan fa yolowi ka yisiyori mi isi God yoku waiye wolpuna e nu.
16 Ka nu pinuma plai namo sa yukaine wit nalale e firipanro naine pike e roma mingklari.
Nu fa nupu mi e God ka wampane nem ka samo ainemne.
17 Ka nu sa kinrela onnele.
Nu fa asa neri pai ka rowlini.
E uma nire numaro mi e God nu nane eni nu pinuma namo ka nangke fafaile nu,
fane bilip nunini fa wampane firalo.”
18 “Ka pinuma plai sa yukaine wit nalale e firipanro iplele koii e kapa rin.
Nu uma namo fa nupu mi e God,
19 ka nu fa wolrufune ommo mingklari e pike namo ka nu fa karnire none kore e nu nire nuꞌpu romaula mingklari ka naine wamo ka re nu fa nampalone ommo pitpitiri wongkwongkeni.
Ommo namo fa yuforo mi e God ka fi nalelwa nale.
20 Nu pinuma plai sa yukaine wit nalale e firipanro pike uporo.
Nu nupu mi e God,
ka nem ka nuna ka nalelwa nale.
Plai sa nalelwa nale 30pla,
plai sa nalelwa nale 60pla ka plai sa nalelwa nale 100pla.”
Nu uma fi fa nem lam ka nufonane baket
21 Ka Jisas yirengkle nu nanrona,
“Anro nu uma fa nem lam nuna nolonine namo nu fa ninapouwe yeri pike mangkam wee tebol angkromoile?
Onnele.
Nu fa neine yeri tebol riri.
22 Ompla fika e peki yeye namo,
ese yeye alele.
Ompla fika e samo peki yeye namo ese ingke samo yemei alele.
23 Pone e ripi uporo,
samo pupu mi mee ka namale nomu e mi riri mee.”
24 Ka wu yirengkle nu kore nanrona,
“Pone samo ripi parana mi kinini.
E pone pupu mi mee,
pone sam pina waiye kero wolpuna poneni.
Kero rongkele e pone puna fa namale mi kinini namo,
wamo wee pitiri,
God ese yape kore pone ka ese yaunpalo plai kore.
25 E fika,
le mana wongke yuna ira uporo plai pu,
sa God ese yane wu ira uporo plai kore.
Le e mana fi yuna ira uporo,
sa God ese yupole ira uporo pitiri e yeye wu namo.”
Mi riri e ommo wela neri
26 Jisas yopro kore nanrona,
“Kingdom e God sa yukaine mana wongke e yuflane ommo nalale pike.
27 Ka ningki mana namo fa wiye nama,
ka kaire wu fa pai yangke ommo woneni.
Ka ommo nalale namo neri ka wamo rongkele,
sa mana namo fi namale.
28 Pike wone fa yangke ommo nalale namo neri.
Emen sa,
wela fa neri,
se nenru para,
ka runola riri sa nale napalene.
29 Ka e wit nale rokerile se,
mana namo ese yem aimon woneni pai ka yaurere wit.
E fika,
kaire e ommo e nengkrele resukru pu fa mana ese yuꞌpu ka wo.”
Mi riri e ilo mastet nalale
(Matyu 13.31-32; Luk 13.18-19)
30 Ka Jisas yopro kore nanrona,
“Mone mire nanrona kingdom e God sa yukaine ompla fika?
Mone ese mire mi riri wunini rongkele?
31 Kingdom e God namo sa yukaine nalale wongke nu nouw ‘mastet’.
Wu sa ompla pitiri.
Nu fa noku wu palo pike,
32 ka wu yemei pari wamo ka rikepone ommo plai neri nengkre.
Wu sa iri wamo ka ese resukru fa rora ese noloni ka naine ka nere mow noneni iri e yeye yawom.”
Jisas yopro mi riri
(Matyu 13.34-35)
33 E Jisas yoprongkle nu pinuma namo,
wu yali nu mi riri mingklari pai resukru wolpuna e none ilwi ese nupu.
34 Ningki kaire wu fa yaliye nu mi,
wu fa yopro mi riri nro.
Ka e nu disaipol woneni nane wu naine plau,
sa wu fa yopro nu nomu e mi riri mingklari.
Jisas yire ka rapu yiwri
(Matyu 8.23-27; Luk 8.22-25)
35 Ningkipopri namkureli e kaire namo,
Jisas yirengkle nu disaipol woneni nanrona,
“Mone ese mamampri fun repo.”
Jesus Calms the Storm (Mak 4:35-41)
36 Jisas sa nawaiyeye bot ka nu nupole nu pinuma e nemnoku naine namo ka nu painri nulipanri bot ka nu nem wu nane painri.
Ka nu bot plai re nakle painri plau.
37 Ka rapu kero wamo yemei ka yereryane furu ka furu okol poinpanro bot namo ka bot eniraloye.
38 Ka Jisas sa wiye riri pilo wongke kuma e bot namo.
Ka nu disaipol woneni nouw wu yemei ka nu nireni wu nanrona,
“Tikse,
yene fi wolyaure mu wee?
Ekreneye le bot e mone ese eniralo ka mone ese maikomo mii ka ri.”
39 Ka Jisas yemei ka yenre rapu ka yireni furu wamo namo nanrona,
“Resukru ka wiyeye nro!”
Ka rapu yiwri ka furu pekimo kei.
40 Ka wu yarile nu disaipol nanrona,
“E fikami ka pone ke pumpe?
Pone fa pakeki maime plau ka pone fi wampane bilip wee?”
41 Nu samo num wamo ka nopro none kore nanrona,
“Mana namo sa fina,
ka rapu yane nupi nupu mi wunini?”