Miuporo e Luk yeꞌre namo ese yuku mone e samo muru rona Jisas wone mana fa yuꞌpu kore nu Israel ka mone uma plai plau. E taim Jisas yangke ompla woneni, wu miyufu nu pinuma rona, Holi Spirit e yereryane wu ese yopro mi uporo e God pai nu pinuma e fafaile ka pinuma e ommo onnele (Puru 4.18). Mi alwone e buk mee sa nanrona, Luk yopro mi mingklari e Jisas wolpalo nu pinuma e nuꞌpu eni wongwongkeni ka wu mewmew nu.

Ommo e Jisas yangkeye namo ke yangke nu uma e wone ke woluporo wamo wu. E Maria yem wu, nu pinuma woluporo wamo (Puru 1.42-48 ka 2.10), ka pekini e buk mee ka e Jisas pari heven namo re nu woluporo wamo (Puru 24.52).

Mi plai nile buk mee, Luk wonkere nro yopro mi e ommo mingklari e laip e Jisas ka mi mee fei nile buk plai. Luk wonkere nro yopro mi e ommo mingklari e Jisas yemei pike mee. Luk wonkere nro yopro mi riri e Jisas yoproye mana wongke e Samaria yemplekuru mana e nu uma fafaile samo nufu waiye rokoi. Ka mi riri wongke yopro mi e auna yuponeye nangka ka pai mokoi amone ka mi e romaula wunini samo pekimo ka mi riri plai kore e Jisas. Luk wonkere nro yopro mi e mana yuꞌpu romaula noula wunini Sakias.

Ommo plai Luk yopro mi mingklariye nu namo, sa nale fa kero nesapune ka ommo e Holi Spirit ka nale e God fa yangkeye fa yuꞌpoleye ommo fafaile e nu uma fa nangkene. Luk yuna mi mingklari e ommo e nu pinmana nangkene.

Mi e Luk fei pekimo buk mee, onnele. E fika wu wone isi yeꞌre mi nile buk mu fa mouw Aposel. Buk mee yopro mi e ommo mingklari e nu Aposel nangkene e taim Jisas pariye heven.