Miuporo
Luk
Yeꞌre
Luk reꞌre mi pai Tiofilus
1
Manwamo Tiofilus,
isi uma mingklari neingkari nire fa neꞌre mi e ommo mingklari God yangke nemei mu.
2 Nu neꞌre mi e nu uma e isi naraine plau Jisas ka nuru ommo nama noneni,
ka naimele nu fa naine yukaine nu uma fa nem mi e Manawamo ka niremi mu.
3 Ki isi sam karile ke mi nomu e ommo namo.
Nanrona fane ese uporo e ki keꞌre mi namo pai yene,
manwamo Tiofilus.a
4 Yene yuru ka yene ese samo namale nanrona,
mi isi nu nukune yene namo,
sa won alwone.
Ensel yireni Sekaraia nanrona Elisabet ese yem mela manro, noula wunini Jon
5 Isi Herot waiye king e distrik Judia,
pris wongke,
noula wunini Sekaraia re waiye.
Wu sa pris e waiye grup wongke fa nouwne Abiya.
Noula e purini sa Elisabetb,
wu sa uma oikenra e Aron.
6 Wuyane naine uporo nama e God,
ka fa samo nupene lo ka nale uporo e Manawamo yireye,
ka fi fa nangke ommo fafaire nama e wu.
7 Wuyane kongkom onnele,
e fika Elisabet e karyeri nalenro.
Wuyane an almari pu.
8 E kaire wongke Sekaraia yakle nu pris painri nangke ompla e nu pris fa nangkene,
ka Sekaraia re yangke ompla namo nama e God.c
9 Rongka nu naraku satu e napu pris fina ese pari tempol e Manawamo,
e yangke ompla ruru worum uporo.
Nu nangke nanrona wola nouw Sekaraia pari tempol e Manawamo ka yesane holi sanda.
10 E Sekaraia yangke ommo fa ese yesane holi sanda,
nu pinuma mingklari sa paril naine monre e tempol moilelepo ka nesapune.
11 Rongka ensel wongke e Manawamo yemei Sekaraia ka yeri rere menrulpo e alta,
koii e fa nesanane holi sanda.
12 Sekaraia yuru ensel ka wu wol malmaran ka yum.
13 Ka ensel yireni Sekaraia nanrona,
“Sekaraia,
yene fa yumye.
God yupu mi yeneni pu.
Yene puri Elisabet ese yem melmanro.
Ka yene ese youw noula wunini Jon.
14 Yene ese samo woluporo.
Ka pinuma mingklari ese nuru mela namo ka nu ese wolpuna uporo e moka yemye wu,
15 e fika wu ese yem noula wamo nama e Manawamo.
Wu ese fei yaikowo wain,
ka mii kero plai.
E wu waiye moka puna,
Holi Spirit ese konralo wu.
16 Wu ese yangke pinuma mingklari e Israel ese nensoro ka painri kore Manawamo,
God noneni.
17 Wu ese yem kero e Manawamo God yukaine Elaija ka wu ese pai risi Manawamo.
Wu ese yangke nu nangkapi nemplesoro wolpuna ka ese wola naꞌle kongkom noneni.
Ka wu ese yemplesoro wolpuna e nu uma fa nangkrumo mi,
ka nu ese nuꞌpu ikakro uporo yukaine uma fa naine uporo nama e God.
Wu ese kampruno nu pinuma ka nu e nai nori Manawamo God ese wi.”
18 Ka Sekaraia yireni ensel nanrona,
“Ki ese namale mi yeneni rongkele,
e alwone wee?
Kikane an almari pu.”
19 Ensel yire nanrona,
“Ki Gabriel,
ki fa keri ekrene God,
wu wone yawane ki kuna mi uporo yeneni,
koloki kirewi yene.
20 Nammee yene yupu.
Yene fi bilipim mi e ki,
nanrona fane mee yene ese mireꞌfa kungku ka yene e fei yoprole mi,
pai la ommo namo nemei pekimo se.
Mi kinini namo ese alwone pai la God wone yire.”
21 Nu pinuma naine norine Sekaraia,
ka wolpun mingklari ompla fika wongke ro yemei wu tempol monre fane wu ro ripkikriye mee.
22 E wu yolo moile wu fei yopro mi plai nu.
Nanrona fane nu namale,
wu ro yuru ompla wongkeni nama woneni tempol e God.
Wu mireꞌfa kungku fane wu yopro yukuleye mew nro.
23 Wola Sekaraia yangke ompla e nu pris fa nangkene pekimo se,
ka wu pai kore mow woneni.
24 Ingke se,
Sekaraia puri Elisabet mela plau.
Ka wu waiye monre nro 5pla kari.
Elisabet yire nanrona,
25 “Manawamo God wola palo ki,
isi ki fei kem mela.
Namele wu yangke ompla namo yemei ki e yuꞌpole nale sem e kone nama e nu pinuma.”
Ensel yireni Maria wu ese reingki mela Jisas
26 Namba 6 kari e Elisabet reingki mela,
God yawane ensel Gabriel pai taun wongke e distrik Galili,
noula Nasaret.
The Birth of Jesus Foretold (Luk 1:26-38)
27 Wu pai pinmangkrama wongke e fei yane mana nile,
noula Maria e nu nire e yem mana wongke oikenra e King Devit,
noula e mana namo sa Josep.
28 Wola ensel Gabriel pai wu ka yire nanrona,
“Kaire uporo yene fina e yem ompla uporo e Manawamo.
Manawamo waiye yene,
ka yangke uporo yene.”
29 Maria yupu mi namo,
ka wu wolnipanri ka wol rufuye nro,
“Mi mee sa rongkele?”
30 Ensel yireni Maria nanrona,
“Maria yene fa yumye.
God wolyapaye yene.
31 Yupu.
Yene ese reingki mela ka yem mela manro.
Ka yene ese youw noula wunini Jisas.
32 Wu ese yem noula wamo.
Ka nu pinuma ese nouw wu Auna e God Waiye Riri.
Ka God ese yina wu waiye king yukaine maumfle e wone Devit.
33 Wu ese waiye king e nu oikenra e Jekop nanrona nanrona.
Ka kingdom e wu ese fei pekimo.”
34 Ka Maria yarine ensel nanrona,
“Ompla namo e yene yireye ese yemei rongkele?
Ki an fei kem mana wongke.”
35 Ensel yireni wu kore nanrona,
“Holi Spirit ese yolo yene,
ka kero e God Riri ese yufona yene.
Nanrona fane mela namo lese yene yem,
sa ese holi.
Ka nu uma ese nouw wu Auna e God.
36 Yupu.
Yene araufle Elisabet an almari pu,
mee wu re mela plau.
Isi nu fa nire wu ese fei yem mela.
Nammee wu reingki mela manro,
ka 6pla kari wunini pai pu.
37 Ompla fika e God yire yangke ese fi raraine,
wu ese yangke.”
38 Ka Maria yire nanrona,
“Yupu!
Ki an pin siwole fa kangke ompla e Manawamo.
Ompla namo yemei ki yukaine mi isi yene yireye,
sa ki mi onne.”
Wola ensel yupone Maria ka pai kei.
Maria pai yuru Elisabet
39 E kaire plai pai se,
Maria yemei wampane pai koii arwola e taun wongke yeye distrik Judia.
40 Wu pai plele mow e Sekaraia,
pari monre ka yire,
kaire uporo Elisabet.
41 Elisabet yupu mi e Maria yireye,
ka mela e yapaye puna e wu ke firyeri ka raram.
Ka Holi Spirit yolo konrare Elisabet,
42 Ka wu yangke mi wamo ka yire,
“God blesim yene,
fei yukaine wu blesim nu pinmana plai.
Ka mela e yapaye puna yeneni namo,
re God blesim.
43 Ki sa fina la Manawamo kinini moka ke yolowi wane ki?
44 E ki kupu mi e yene yireye,
mela e yapaye puna kinini woluporo.
45 God blesim yene,
yene isi bilipim Manawamo nanrona mi e isi wu yirewi yene ese alwone.”
Rai e Maria
46 Ka Maria yire nanrona:
“Wolpuna e ki samo yereri noula e Manawamo.
47 Ka ruwila malma kinini woluporoye God,
wu Mana e Yem Ki Kore.
48 E fika wu yuru ki pin siwole nro fa kangke ompla wunini,
wu yuru ki ka wolapalo ki.
Naminre ka pai pinuma mingklari ese nire God isi blesim ki,
49 E fika God wu Kero Wamo yangke ompla wamo ki,
ka noula wunini ese waiye holi.
50 God fa wolpalo nu pinuma e numne wone.
Wu ese yangke nanrona e nu pinuma e naminre ka pinuma ese nemei.
51 Wu yangke ommo wamwamo,
kero woneni.
Wu yemyangkrupu uma e fa nire none nro sa rikepone uma plai.
52 Wu yangke nu king ka nu uma e fa painri ririne nu uma,
e nupole sia king e none
ka e yereri yali nu uma e siwole panri risi.
53 Wu yali ommo mingklari nu uma e fa ponriline,
ka nu samo reingki.
Ka nu uma e ommo mingklari,
wu yawale karpainri.
54-55 Ka wu saimoro nu uma fa nangke ommo e wone,
sa nu Israel.
Ka wu na wola rufuye mi isi wone yukayali mampi e mone,
ka e Abraham yakle kongkom e wone,
fane wu ese wolpalo nu ka kongkom anfife e none ese nemei nanrona nanrona.”d
56 Maria yane Elisabet naine kari plainrikera,
wola wu pai kore mow woneni.
Elisabet yem mela Jon
57 Kari e Elisabet e yem mela,
wola wu yem mela manro.
58 Uma e mokoi woneni ka uma oikenra woneni nupu mi isi Manawamo wolpalo wu wamo,
ka nu nane wu woluporo.
59 Rongka nu naine 8pla kaire se,
nu noloni nangke kola e noneni fa naurene papri e kongkom manro.
Nu nire nina mela noula yukaine noula e nangka Sekaraia.
60 Ka mela moka yire,
“Onnele.
Mone ese mouw noula wunini Jon.”
61 Ka nu nireni wu,
“Mana wongke e pone oikenra fei yem noula nanrona”. e
62 Nu nopro nukune mew nro ka narine mela nangka,
wu yire yina mela noula fina.
63 Wu mew yukule nu nem ompla fa neꞌrene ni nane wu,
ka wu reꞌre nanrona,
“Noula e wu Jon.”
Ka nu wolnipanri.
64 Wampane nro Sekaraia fa yopro mi kore,
ka yereri noula e God.
65 Ka uma mingklari e mokoi noneni nemnum.
Mi e ompla namo poupai plele mokoi arwola e nenene distrik Judia.
66 Uma mingklari nupu mi namo,
ka nu wolpuna mingklari ka nemnari none nanrona,
“E mela namo yemei ese yemei yukaine mana fina?”
E fika,
nu e namale kero e Manawamo waiye wu.
Sekaraia yopro mi Profet
67 Wola Holi Spirit konrare Sekaraia,
Jon nangka ka wu yopro mi profet nanrona:
68 “Mone mereri noula e Manawamo God e Israel.
E fika wu isi yolo nu pinuma e wone fa saimoro nu ka yuꞌpu kore nu.
69 Manawamo yame mone mana kero wongke nu oikenra e king Devit,
mana fa yangke ompla e God wone.
Mana namo ese yuꞌpu mone kore e nale fafaire e mone mangkeme,
70 yukaine mi isi wu yirengkle
mireꞌfa e nu profet woneni.
71 Wu yuka mi yire wu e yem mone kore mew e nu iim uma
ka mew e uma e fa wolpuna fafaire mone.
72 Wu wolpalo mone fa yuku nu flili e mone
ka wu na wolrufuye holi kontrak isi wone yireye.
73 God isi yuka mi maumfle e mone Abraham.
Naminre wu yangke yukaine mi isi wone yireye.
74 Wu yire wu ese yem mone kore mew e iim uma e mone,
sa mone ese mangke ommo wunini ka mone e fei mum.
75 Nanrona fane e mone maime laip,
ningki kaire mone ese maraime nale uporo ka maime holi nama e God.
76 Ka yene melaula kinini,
ese uma nouw yene profet e God Waiye Riri,
e fika yene ese pai risi Manawamo ka yemplekuru rokoi wunini.
77-78 Yene ese yukule nu pinuma woneni ka nu ese namale
wu wolpalo nu wamo,
yire yuꞌpole nale fafaire e nu fa nangkene ka ese yuꞌpu kore nu.
Wu ese yawane ali e heven yolo mone,
79 e yali nu pinuma e naine mokoi ningki ka samo numne rili.
Wu ese samo yukule mone rokoi e wolraulo.”
80 Ingke mela namo e yemei wamo,
ka Holi Spirit konrare wu ka yane wu kero.
Wola wu pai waiye koii maipon nro e uma fei nainene,
pai la wu yolowi alele namapren e nu Israel.