Maria yem Jisas
(Matyu 1.18-25)
2
E taim namo,
Sisar Ogastus yina lo wongke fa nu ese nuꞌpu noula e nu pinuma e pike.
2 E isi gapman fei nuꞌpu noula e nu pinuma,
nammee Kwirinius waiye gavana e provins Siria,a
nu nuꞌpu noula e nu pinuma.
3 Nanrona fane pinuma e pike awail painri kore mokoi ripile e none,
le gapman e yuꞌpu noula e none.
4 Josep sa ori oikenra e King Devit.
Nanrona fane wu yupone taun Nasaret e distrik Galili,
ka pai taun e Devit Betlehem,
waiye distrik Judia.
5 Josep yumane puri Maria e nu naureni wone,
painri le gapman e yuꞌpu noula e wonyane.
E taim namo Maria sa mela plau.
6 E wuyane naine Betlehem ka Maria yeingkari e yem mela.
7 Ka wu yem melmanro,
ira mana woneni.
Ka wu yufona mela amprapi plola,
ka yina wiye bokis e bulmakau fa nonene,
e fika mow pasindia sa yimerwa pinuma pu.
Nu ensel nirengkle nu uma e fa nopaline sipsip
8 E koii namo,
uma plai e fa nopaline sipsipb fa panro naine piyewa e taun,
nu fa nopaline sipsip e none ningki.
9 Ka ensel e Manawamo karyemei nu,
ka Manawamo yangke ali wamo yemei mamane nu,
nu sam nemnum wamo.
10 Ensel yirengkle nu nanrona,
“Pone fa pumpe.
Pupu.
Ki kape pone mi uporo,
mi mee e yangke nu pinuma e pike e woluporo wamo.
11 Naminre ningki taun e Devit,
pin wongke e yem mela.
Mela namo ese yuꞌpu pone kore.
Wu sa Manawamo,
ka wu sa Krais.c
12 Ka pone ese puru ka namale wu nanrona.
Mela wongke nu nukaro amprapi,
nina wiye bokis e bulmakau fa none.”
13 Ensel ko yire pekimo,
wampane nro ensel e ami e heven mingklari wamo nolo neri plau ensel namo.
Ka nu nereri noula e God ka nire rona:
14 “Mereri noula e God Waiye Riri.
E pike,
nu pinuma e God fa wola yaliye,
nu e naine wolraulo.”
Nu uma e fa nopaline sipsip painri nuru Jisas
15 Nu ensel nupone nu ka panri kore heven.
Rongka nu uma e fa nopaline sipsip nemnire none kore nanrona,
“Souw mone maimpi Betlehem ka mone muru ompla e yemeiye namo,
e Manawamo yiremi mone.”
16 Wola nu wampane painri nuru ka Maria yane Josep nanaine,
ka melaula sa nina wiye bokis e bulmakau fa none.
17 Nu nuru ompla namo pekimo,
nu mi nufu ompla namo e ensel nirengkle nu e melaula namo.
18 Pinuma mingklari nupu mi e nu uma fa nopaline sipsip noprone,
nu wolnipanri.
19 Maria fei wolyumaro,
wu yina mi namo yeye wolpuna e wone ka waiye wolaye.
20 Ka nu uma e nopaline sipsip painri kore koii e none fa nopaline sipsip ka nosinane God ka nereri noula e wu,
e ommo mingklari e none nupu ka nuru.
Ompla namo yemei yukaine mi e ensel yirengkleye.
Moka nangka nina mela noula Jisas
21 Maria yem mela,
7pla kaire pai se,
nu naure papri e wu ka nouw noula Jisas.
Noula namo e isi Maria fei mela plau,
ensel yireni.
Simion ka Ana nuru Jisas mow tempol e Manwamo
22 Kaire e Josep yane Maria naine namkire nama e God,d
yukaine lo e Moses yireye,
wola wuyane neima mela nane painri panri Jerusalem e nane mela pai Manawamo.
23 Wuyane nire nupene mi wiye lo e Manawamo rona,
“Kongkom manro ira mana e mokapi nuꞌpune,
kongkom namo ese pone pane Manawamo.”
24 Wuyane nuna rora plainren painri nangke ofa,
yukaine lo isi Manawamo yireye,
“Rora ufu plainren o,
rora miloko aula plainren.”e
25 E taim namo mana wongke e waiye Jerusalem,
noula wunini Simion.
Wu fa samo yangke nale uporo nama e God ka yosiye God.
Wu yori ompla namo isi God yireye wu e saimoro wolpuna e nu uma Israel.
Ka Holi Spirit konrare wu.
26 Holi Spirit isi yireni wu rona,
wu ese fei ri.
Onnele.
Wu ese waiye ka yuru Krais,
Manawamo e isi yukami ese yane nu Israel.
27 Rongka Holi Spirit yereryane wu ka wu pai pari tempol e God.
Josep yane Maria neima mela Jisas painri fa nangke kola e none Israel fa nangkene yukaine isi lo e Manawamo yireye.
28 Wola Simion yeima mela ka yarana wiye mew woneni.
Ka yereri noula e Manawamo rona:
29 “Manawamo mi isi yene yireye ki,
nammee yene mew yimai ki mana fa kangke ommo yeneni se ki e kaiki woluporo.
30 E fika ki kone nama kuru ompla namo pu,
e yene yireye ese yuꞌpu mu kore.
31 Yene isi saimoro ompla namo namapren e nu pinuma.
32 Wu ese yukune ali woneni pai nu pinuma e fi Juda,
sa nu ese namale God.
Ka wu e yangke pinuma e yene Israel ese nem noula wamo.”
33 Moka nangka e Jisas nupu mi e Simion yireye Jisas,
ka wuyane wolnipanri.
34 Simion yane blesing nu,
ka yireni mela moka rona,
“Yupu.
God e yaure mela namo,
e yangke pinuma mingklari e Israel e firipanro,
ka yangke mingklari e nemei kore.
Wu ese waiye yukaine mak,
ka pinuma mingklari ese nire mi fafaile wu.
35 Nanrona fane wolpuna runu e pinuma mingklari e pekinene ese nemei alele.
Maria yene re,
eni e ompla namo ese yemei yene yukaine bainat ese yoku wolpuna e yene.”
36 Profet wongke pin,
noula nouw Ana.
Wu sa Fanuel nona oikenra e Aser.
Wu an almari pu.
Isi wu yem mana wongke yane naine 7pla kikla.
37 Rongka ini ri,
ka wu karwaiye.
Naminre wu sa 84 kikla.
Ana fa pariyoloye tempol.
Wu fa karwaiye punale,
yesapuye ka yangke ompla e God ningki kaire.
38 E taim Simion yoproye mi,
Ana re yolowi ekrene mela ka yereri noula e God.
Ka yoprole mi e mela namo pai nu pinuma e naine norine God ese yuꞌpu nu pinuma e Jerusalem.
Josep yane Maria panro painri kore Nasaret
39 Wuyane nangke ompla pekimo yukaine lo e Manawamo yireye,
wola wuyane panro painri kore Nasaret,f
taun noneni waiye distrik Galili.
40 Mela yemei wamo ka kero.
Ikakro e wu samo namale ommo mingklari.
Ka woluporo e Manawamo waiye wu.
Mela efapu Jisas pari tempol.
41 E kikla fa nine,
mokanangka e Jisas fa painri panri Jerusalem nuru Kola Wamo e Fa Wola Rufune God e Yangke Nu Israel Naine Uporo,
nouw Pasowa.g
42 Jisas sa 12pla kikla pu,
nu painri nupene nale e kola wamo Pasowa,
wola nu painri panri Jerusalem.
43 Kaire e kola wamo namo pekimo,
rongka nu painri kore mokoi e none.
Ka mela Jisas sa yeye Jerusalem.
Moka nangka e wone fei namale rona wu ro yeye.
44 Wuyane ke nire wu ro yakle nu pinuma plai painri pu.
Nanrona fane wuyane naraine resukru kaire wokera.
Se wuyane fa napu wu kore iplele e nu oikenra e none ka nu foruma.
45 Wuyane napu,
napu ka fei nane Jisas.
Nanrona fane wuyane painri panri kore Jerusalem ka napu wu.
46 Kaire plainrikera pai se,
wuyane nuru wu waiye tempol e God.
Wu waiye iplele e nu uma fa namale lo.
Wu waiye ripi yaranaye mi e nu ka yarile nu mi plai.
47 Nu uma nupu mi e wu,
nu wola nipanri ira uporo e wu ka mi e wu yire kore nu.
48 Josep yane Maria nuru wu,
wuyane wol mingklari,
ka moka yireni wu nanrona,
“Auna,
yene fa yangke nale nanrona ki kane yene nangka.
Wolpuna e ki kane yene nangka samo eni ka maraime mapu yene.”
49 Ka wu yireni wuyane kore nanrona,
“E fikami ka yenyane ke paraipe papupe ki?
Yenyane fei namale rona,
ki es kaike mow e Aina koneni.”
50 Wuyane ke fei namale mi nomu e wu yireniye wuyane.