Jon e Baptais yirengkle mi e God
(Matyu 3.1-12; Mak 1.2-8; Jon 1.19-28)
3
E taim namo,
sa namba 15 kikla e Sisar Taiberius waiye king e kantri Rom ka mokoi mingklari e kantri Rom fa yuruye.
Ka nu uma namo,
re naine mew e Sisar Taiberius ka nurune mokoi namo:
Pontius Pailat yuruye distrik Judia ka Herot sa fa yuruye distrik Galili.
Herot rani noula Pilip wu sa fa yuruye Ituria ka Trakonitis.
Laisenias wu sa fa yuruye Abilene.
2 E taim namo Anas yane Kaiafas naine hetprisa e tempol.
Mela manro e Sekaraia noula Jon pai waiye koii maipon nro e uma fei nainene ka God yane mi wu.
3 Wu pai mokoi mingklari naine ekrene nupi Jodan ka yopro mi yukule nu pinuma ese as nensoro wolpuna e none ka nem baptais,
ka God ese yuꞌpole nale fafaile e none.
4 Ompla namo yemei yukaine mi wiye buk e profet Aisaia:
“Mi mongkoma e mana wongke wiyeye koii e uma fei naine,
youw ka yire nanrona,
‘Pone pemplekuru rokoi e Manawamo
yeye uporo nro.
5 Pimerwa koii ruwe mingklari
ka pekrire moule arwola pitpitiri ka wamfafai panro.
Rokoi e kulale pangke pai uporo,
ka rokoi e roma panripanro namo pone ese samo paku ka samo pangke pai uporo ka nangkra aula.
6 Nanrona fane uma e pike ese nuru ompla e God yangke
ese yuꞌpu mone kore.’ ” b
7 Jon yirengkle pinuma mingklari e nolonine fa wu e baptaisim nu nanrona,
“Pone kongkom e umele fafaile,
fina yire pone pulpaplo ompla fafaile God ese yangke yemei mee?
8 Pone pangke ompla ese yuku pone samo pensoro wolpuna poneni.
Ka pone e fi wola nanrona,
‘Abraham wu sa alma flili e mone.’
Ki kirepi pone nanrona God ese yangke roma naime nemei yukaine kongkom e Abraham.
Nale poneni nemei yukaine ilo e nalelwa nale uporo.
9 Weki yeri ilo nomu pu la ilo e fi nalelwa nale uporo,
ilo namo nu ese noko pikari ka ningkapalo niꞌpi yuꞌpo.”
10 Nu pinuma mingklari narine Jon nanrona,
“Le mu ese mangke fika?”
11 Ka Jon yirengkle nu nanrona,
“Mana e yuna amprapi plainre,
wongke yane mana wongke e amprapi onne.
Ka mana yuna ompla fa none wu re ese yangke nanrona.”
12 Nu uma fa nuꞌpu romaula e gapman re noloni ese wu e baptaisim nu.
Ka nu narine wu nanrona,
“Tikse,
le mu ese mangke ompla fik?”
13 Ka wu yirengkle nu nanrona,
“Pone ese puꞌpu romaula e nu uma resukru mak e gapman yireye pone.”
14 Ka nu iim uma plai narine wu nanrona,
“Le mu ese mangke ommo fika?”
Ka wu yirengkle nu nanrona,
“Pone ese fei karpirepe nu uma ka peki puꞌpupe romaula e nu.
Pone e woluporope nro romaula namo e gapman yape pone.”
15 Nu uma mingklari namo naine nori nire nuru Krais.
Nanrona fane nu nuru ompla namo,
ka wolanro nanrona,
“Jon anro,
Krais wee?”c
16 Jon yirengkle nu pinuma mingklari kore nanrona,
“Ki baptaisim pone mii siwolenro,
mana wongke ese yolowi wairu ki kero wunini sa yumaro kero kinini.
Ki seke mana uporo ese kangke ompla wunini yukaine nu uma nalenro fa nangkene,
ki ese fi fingki kalo ka kingklame sandel wunini.
Wu ese baptaisim pone Holi Spirit ka niꞌpi.
17 Wu yuna sawol waiye mew woneni ese yensyensoro wit ka yem nale yenru naine mow monre woneni.
Ka uruawa e wit wu ese yenru niꞌpi fa waiye nanrona ka ese fei roko.”
18 Jon yirengkle nu mi mingklari plai kore,
e yereryali wolpuna nunini.
Wu yangke nanrona ka wu yirengkle miuporo e God pai nu pinuma.
Herot yina Jon pari waiye kalabus
19 Ka taim namo,
Jon yenre Herot,
mana e fa pai risiye gapman e none,
e ompla fafaile isi wu yangkeye.
Wu yem Herodias,
wone rani puri,
ka yangke ommo wongkwongkeni samo fafaile.
20 Herot yangke ompla wongke fafaile kore,
wu yina Jon pari waiye kalabus.
Jon baptaisim Jisas
(Matyu 3.13-17; Mak 1.9-11)
21 E pinuma mingklari baptaisne,
Jisas re baptais.
E wu yesapu,
nemi freingkyane.
22 Ka Holi Spirit yolo wu yukaine rora ufu.
E taim namo mi mongkoma wongke yolo nemi nanrona,
“Yene Auna kinini,
ki samo wola yapa yene ka woluporo yene wamo.”
Nu ori oikenra e Jisas
23 Jisas,
kikla e wu sa yukaine 30pla kikla,
ka wu yangke ompla woneni.
Nu pinuma wolanro Jisas sanro Josep auna.
Ka Josep nangka Heli.
24 Ka Heli nangka Matat,
ka Matat nangka Livai,
ka Livai nangka Melki,
ka Melki nangka Janai.
Janai nangka Josep.
25 Josep nangka Matatias,
ka Matatias nangka Amos,
ka Amos nangka Nahum,
ka Nahum nangka Esli,
ka Esli nangka Nagai.
26 Ka Nagai nangka Mat,
ka Mat nangka Matatias,
ka Matatias nangka Semen,
ka Semen nangka Josek,
ka Josek nangka Joda.
27 Ka Joda nangka Joanan,
ka Joanan nangka Resa,
ka Resa nangka Serubabel,
ka Serubabel nangka Sealtiel,
ka Sealtiel nangka Neri.
28 Ka Neri nangka Melki,
ka Melki nangka Adi,
ka Adi nangka Kosam,
ka Kosam nangka Elmadam,
ka Elmadam nangka Er.
29 Ka Er nangka Josua,
ka Josua nangka Elieser,
ka Elieser nangka Jorim,
ka Jorim nangka Matat,
Matat nangka Livai.
30 Ka Livai nangka Simion,
ka Simion nangka Juda,
ka Juda nangka Josep,
ka Josep nangka Jonam,
ka Jonam nangka Eliakim.
31 Ka Eliakim nangka Melea,
ka Melea nangka Mena,
ka Mena nangka Matata,
ka Matata nangka Natan,
ka Natan nangka Devit.
32 Ka Devit nangka Jesi,
ka Jesi nangka Obet,
ka Obet nangka Boas,
ka Boas nangka Salmon,
ka Salmon nangka Nason.
33 Ka Nason nangka Aminadap,
ka Aminadap nangka Atmin,
ka Atmin nangka Arni,
ka Arni nangka Hesron,
ka Hesron nangka Peres,
ka Peres nangka Juda.
34 Ka Juda nangka Jekop,
ka Jekop nangka Aisak,
ka Aisak nangka Abraham,
ka Abraham nangka Tera,
ka Tera nangka Nahor.
35 Ka Nahor nangka Seruk,
ka Seruk nangka Reu,
ka Reu nangka Pelek,
ka Pelek nangka Eber,
ka Eber nangka Sela.
36 Ka Sela nangka Kainan,
ka Kainan nangka Arpaksat,
ka Arpaksat nangka Siem,
ka Siem nangka Noa,
ka Noa nangka Lamek.