Opola yeingkari Jisas
(Matyu 4.1-11; Mak 1.12-13)
4
Holi Spirit konrare Jisas,
wu yupone nupi Jodan,
ka Holi Spirit yumane wu pai koii maipon yaupe nro e uma fei nainene.
2 Wu waiye mokoi namo 40pla ningki ka 40pla kaire,
ka Opola yeingkari wu.
Taim namo,
wu fei wo ompla wongke,
ka wu sam ponrini wamo.
3 Se,
Opola yireni wu rona,
“Le yene God Auna,
sa yene yireni roma namo yensona yukaine bret sa yene wo.”
4 Ka Jisas fa yireni wu kore nanrona,
“Mi e wiye buk e God yire nanrona,
‘Ompla e fa none namo e fi yaꞌne laip mana.
Onnele.’ ” a
5 Ka Opola yumane wu pari riri ka faflai yukune kingdom mingklari e pike.
6 Ka wu yireni Jisas nanrona,
“Ki ese kawe yene kero fa yuruye kingdom mingklari namo,
ka yene ese yem noula wamo.
God yake ki kingdom mingklari namo pu,
nanrona fane ki ese kane fina e ki kire kane,
kane.
7 Ommo mingklari namo ese yene yuꞌpu,
e yene fufula pikari ki ka yosiyane ki.”
8 Ka Jisas yireni wu kore nanrona,
“Mi wiye buk e God yire nanrona,
‘Yene yosiyane Manawamo,
God yeneni,
ka yangke ommo wunini nro.’ ”b
9 Opola yumane Jisas pai taun wamo Jerusalem ka yirane wu yeri tempol riplala,
ka yireni wu nanrona,
“E yene God Auna,
sa yene yulpalo ruwe.
10 Yukaine mi wiye buk e God nanrona,
‘God ese yirengkle nu ensel woneni
nopane ka nurune yene.
11 Nu ese neima yene riryen painri,
ka roma wongke ese fei yoku rew yeneni.’ ”c
12 Ka Jisas yireni wu nanrona,
“Mi wiye buk e God yire rona:
‘Yene e fi yeingkariye Manawamo,
God yeneni.’ ”d
13 Opola yeingkari Jisas ompla mingklari pekimo,
ka wu yupone Jisas ka pai waiye yori ingke se.
Nu uma e taun Nasaret numplewa Jisas
(Matyu 4.12-17; Mak 1.14-15)
14 Holi Spirit keryane Jisas,
ka wu pai kore distrik woneni Galili.
Mi e wu yopri pouwpai mokoi e naine ekrene Galili.
15 Wu fa yali mi nu pinuma e naine mow kori e Juda,
ka pinuma mingklari nereri noula wunini wamo.
16 Jisas pai kore taun Nasaret,
mokoi e wone yemei wamoye.
Ka kaire e Sabate yolowi ka wu pai mow kori e nu Juda yukaine nale e wone fa yangkeye.
Ka wu yemei yeri e yoprole mi wiye buk e God.f
17 Nu nane wu buk e profet Aisaia.
Wu yonrome pai ka wu yapu mi plola nanrona:
18 “Spirit e Manawamo waiye ki,
e fika,
wu yaure ki pu,
e kuna miuporo e God kaiki kali nu pinuma e ommo onne.
Wu yawane ki,
e koprongkle nu uma e naine kalabus e nolo moile,
ka nu uma e nama wowole e nuru kore.
Wu yawane ki ese kemplekuru nu uma e nungkam eni wamo e nu uma plai,
e painri nal engkem.
19 Ka wu yawane ki e kirengkle nu uma miuporo nanrona moul uporo wi pu ka Manawamo ese saimoyale nu uma woneni.”g
20 Jisas yuru mi wiye buk pekimo,
ka yufona ka yaꞌne mana e fa yunaye,
ka wu pai waiye.h
Nu uma e naine mow kori e nu Juda,
nama e nu sa kirnurune wu nro.
21 Ka wu yirengkle nu nanrona,
“Kowerme,
mi e ki koproke wileye buk e God,
pone pupu namo sa yemei alwone.”
22 Nu uma mingklari nereri noula wunini ka wola nipanri miuporo e wu yirengkle nu.
Ka nu narine nanrona,
“Mana namo,
wu sa Josep auna.
E fika ka wu ke yopro mi nanrona?”
23 Ka Jisas yirengkle nu rona,
“Ki namale pu,
pone ese pire ki mi namo:
‘Dokta,
yangke nalpapri yeneni uporo.
Nammee yene e yangke ompla moile yeneni yukaine mu mupu e yene isi yangkeye taun Kaperneam.’ ”
24 Ka wu yire nanrona,
“Ki kire mi alwone pone,
nu uma fi fa nupu mi e profet wongke e wu waraiye yoproye mokoi woneni.
25 Ki kire mi alwone pone nanrona,
taim e profet Elaija,
pinmana ploli mingklari isi naine Israel,
impi rili pu.
E taim namo,
riple fei yilo pai resukru 3pla kikla ka 6pla kari.
E taim namo ompla e fa nonene re sam onne ka uma e mokoi mingklari namo nemponrili wamo.
26 God fei yawane profet Elaija pai nu pinmana mingklari namo e isi impi rili nupole.
Wu yawane profet Elaija pai pin wokera nro e fi Juda,
isi ini ri yupone waiye mokoi Sarefat ekrene taun Saidon.
27 Ka taim e profet Elisa,
uma e leproi mingklari naine Israel,
ka wu fei saimoyale nu ka yangke nu nemei uporo.
Wu yemplekuru mana wokera nro e kantri Siria noula wunini Naman fa yangke nalpapri wunini namkire kore.”
28 E nu uma mingklari naine mow kori namo nupu mi ka nu wolpuna neni wamo.
29 Nu nemei ka nuna neingke Jisas yolo moile e taun.
Taun e nu sa waiye arwola riri,
nu neingke wu pai piyewa e koii arwola nire ningkapalo wu palo koiiale.
30 Ka wu yauri pai iplele e nu uma mingklari ka pai kei.
Jisas yuꞌpole opola fafaile
31 Ingke se wu pai palo taun Kaperneam e distrik Galili,
ka e kaire Sabat wu yali mi nu pinuma.
32 Ka nu wolnipanri,
e fika,
mi e wu yirengkle nu namo sa kero.
33 Mana wongke e yakle nu naine mow kori,
opola konralo wu.
Wu yangkrom mi kero wamo,
ka yire nanrona,
34 “Ai!
Jisas e taun Nasaret,
yene yire yangke ommo fika mu?
Yene yolowi yire yangke mu e fafaile,
wee?
Ki namale yene,
yene sa Holi Mana e God.”
35 Jisas yenre opola namo ka yireni wu nanrona,
“Miruru!
Ka yupone wu!”
Ka opola yurome mana namo firalo iplele e nu uma ka yupone wu ka nalpapri wunini fei fafaile.
36 Uma mingklari namo wolnipanri ka nopro none kore nanrona,
“Mi mee sa rongkele?
Wu sanro yuna noula wamo ka kero,
nanrona fane wu fa yirengkle nu opola fafaile ka nu fa nupu mi e wu ka nupone mana.”
37 Ka mi e ompla wu yangkeye namo yopri poupai mokoi e naine ekrene taun namo.
Jisas yangke pinuma mingklari nemei uporo
(Matyu 8.14-15; Mak 1.29-31)
38 Jisas yemei yupone mow kori,
rongka wu pai mow e Saimon.
Saimon puri moka yenri ka nalewori wamo.
Nanrona fane nu painri narine Jisas e yemplekuru wu.
39 Wu yeri ekrene ka yire mi kero nalewori e pin namo,
ka nalewori yupone wu.
Ka pin e yenriye namo faflai uporo ka yemei ka pai yampole ommo ka yali nu no.
40 E kaire paloye,
pinuma mingklari nakle none uma plai e nenrini wongkwongkeni,
numale nakle noloni Jisas.
Wu mew yaune nu wokerwokera ka yangke nu uporo.
41 Ka opola nupole nu uma mingklari,
nangke mi ka nire nanrona,
“Yene God Auna.”
Ka wu yenrele nu ka mi yaure nu e fei nire mi plai kore.
E fika nu opola namo namale rona wu Krais.
42 Ningkinama nole Jisas pai koii wongke e uma fei nainene.
Uma mingklari painri napu wu ka e nu nane wu,
nu nire mi naure wu e fei pai ka yupole nu.
43 Ka wu yirengkle nu nanrona,
“Nomu e God yawane ki koloki mee,
sa nanrona ki e kopro miuporo e kingdom e God pai taun plai plau.”
44 Ka wu pai waraiye yoprole mi mow kori e nene mokoi mingklari e nu Juda.